မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မစည်ပင်သာယာဈေးနှင့် အမှတ်(၂)ဈေးတို့တွင် အာလူးသီးအသစ်များ အများအပြားဝင်ရောက် အရောင်းအဝယ်ဖြစ်လျက်ရှိပါသည်။ မြို့မ စည်ပင်ဈေးတွင် ကမ္မ၊ မြစ်ခြေ၊ ပေါက်မြို့နယ်ထွက် အာလူးသီးများသာမက ရှမ်းပြည်နယ်ထွက် အာလူးသီးများလည်း ဝင်ရောက်အရောင်းအဝယ်ဖြစ်လျက်ရှိပါသည်။ ၂၀၂၅ခုနှစ်၊ မတ်လ (ပထမပတ်)မှစ၍ ရှမ်းပြည်နယ်မှထွက်ရှိသော အာလူးသီး(အသစ်)များ လှိုင်လှိုင် ဝင်ရောက်လျက် ရှိကြောင်း သိရှိရသည်။
မတ်လတွင် အာလူးတစ်ပိဿာလျှင် အရည်အသွေးနှင့် အရွယ်အစားလိုက် ၍ ကျပ်(၄၅၀၀-၃၅၀၀)ဈေးအသီးသီးဖြင့် အရောင်းအဝယ်ဖြစ်လျက်ရှိပြီး ယခုဧပြီလ(စတုတ္ထပတ်)တွင် အာလူး (အလုံးကြီး) လက်ကားတစ်ပိဿာလျှင် ကျပ်(၅၅၀၀)၊ အလုံးလတ် တစ်ပိဿာလျှင် ကျပ် (၄၅၀၀)၊ အလုံးသေး တစ်ပိဿာလျှင် ကျပ်(၄၀၀၀)ခန့်ဖြစ်ပြီး ယခင်တစ်ပတ်နှင့် နှိုင်းယှဉ်ပါက တစ်ပိဿာ လျှင် ကျပ်(၁၀၀၀)ခန့်ဈေးတက်နေကြောင်း မြို့မဈေးသည်များထံမှသိရပြီး နေ့စဉ်ကုန်ချိန် ဝင်ရောက်မှုအနေဖြင့် တစ်နေ့လျှင် ကုန်ချိန်(၅၀၀၀ မှ ၆၀၀၀)ခန့် ဝင်ရောက်လျက်ရှိကြောင်း သိရှိရပါသည်။
DOCA(မကွေး)