ကျိုက်မရောမြို့နယ်၊ ကလိုင်းကနိုင်ကျေးရွာရှိ ယိုးဒယားကိုင်းဆက် ကြက်မောက်သီး များ ယခုနှစ်တွင် ရာသီဥတု အပူရှိန်ကြောင်း ယခင်နှစ်ကထက် အထွက်နှုန်းလျော့နည်း နေသော်လည်း စျေးကွက်အတွင်း၌ စျေးကောင်းရရှိလျက်ရှိကြောင်း ကြက်မောက်သီး စီးပွားဖြစ် စိုက်ပျိုးသူတောင်သူထံမှ သိရသည်။
ယခင်နှစ်က ဒီအချိန်ဆို ဒေသထွက်ကြက်မောက်နှင့် ယိုးဒယားကြက်မောက်သီးပါ လှိုင်လှိုင်ထွက်ရှိနေပြီး စျေးကွက်အတွင်း စျေးကောင်းရရှိကာ အနယ်နယ်အရပ်ရပ်သို့ပင် ကားစီးလုံး သယ်ယူပို့ဆောင်နိုင်ခဲ့ကြောင်း ယခုနှစ်ကတော့ ရာသီဥတု အပြောင်းအလဲမှာ အပူချိန်ကလဲများလွန်း၍ ရေမရရှိသဖြင့် အသီးများကြွေကျကုန်ကြောင်း၊ ကြက်မောက်ပင်က ရေအလွန်ကြိုက်သော အပင်မျိုးဖြစ်၍ ရေများများပေးနိုင်မှသာ အထွက်နှုန်းလည်းကောင်း၊ အသီးလည်းကောင်းမွန်ကြောင်း ရေမရတာနှင့် အသီးတွေ ခြောက်ကုန်ကြောင်း ခြံရှင် ဦးဝင်းနိုင်၏ ပြောပြချက်အရ သိရသည်။
ကျိုက်မရောမြိုနယ်တွင် ယခုနှစ် မိုးရာသီတွင် ကြက်မောက်သီးအထွက်နှုန်း ကျဆင်း၍ မြို့အဝင်၌ ကြက်မောက်သီးဆိုင်များပင် နည်းပါးခဲ့ပြီး စျေးနှုန်းမှာလည်း အလုံး၅၀ ပါ အတွဲတစ်ခုလျှင် (၇၅၀၀) ကျပ်အထိ စျေးရပြီး အလုံး(၁၀၀) တွဲထားသည့် တစ်တွဲကို ငွေကျပ် (၁၅၀၀၀) အထိ ဖောက်သည်ပေးရပြီး ရန်ကုန်မြို့သို့ တင်ပို့သည့် ကုန်သည်များက ပို့ဆောင်ရောင်းချလျက်ရှိနေကြောင်း ကြက်မောက်သီးကုန်သည် ဦးစိုးမြင့်ထံမှ သိရသည်။
DOCA (မွန်)