မြင်းခြံမြို့နယ် ကျေးရွာအချို့သည် စိုက်ပျိုးရေးလုပ်ငန်းကို လုပ်ကိုင်စားသောက်ကြရာ စပါးခင်း၏ ကန်သင်ရိုးတွင် စားဖိုဆောင်သီးနှံဖြစ်သော ပဲသီးတောင့်ရှည်ကိုလည်း တိုင်ထောင်၍ အပိုဝင်ငွေရရှိရန် တိုင်ထောင်၍ စိုက်ပျိုးကြကြောင်း သိရသည်။ ဆောင်းရာသီဖြစ်သော ဇန္နဝါရီလ တွင် စတင်ခူးဆွတ်ရောင်းချရကြောင်း ၊ မြင်းခြံမြို့ပေါ်ရှိ မြို့မစည်ပင်သာယာဈေး၊ အေးမြသီတာ ဈေးနှင့် စံပြဈေးတို့တွင် အချို့က ဖောက်သည်ပေးပြီး အချို့က ကိုယ်တိုင်ရောင်းချကြောင်း ဒေသခံတောင်သူတစ်ဦး၏ ပြောကြားချက်အရ သိရပါသည်။ ပဲသီးကို ကြက်ဥနှင့်ကြော်စား၍ လည်းကောင်း၊ ငါးဖယ်ခြစ်နှင့်ချက်စား၍လည်းကောင်း၊ ပဲသီးအစပ်ချက်ချက်စား၍လည်းကောင်း၊ ပဲသီးပြုတ်၍ မြေပဲဆံထောင်း၊ ပဲကျက်မှုန်နှင့် ကြက်သွန်ဖြူဆီချက်ဖြင့်သုပ်၍လည်းကောင်း စားသုံး ခြင်းကြောင့် လူကြိုက်များပြီး အရောင်းအဝယ်သွက်သော သီးနှံတစ်မျိုးဖြစ်ပါသည်။ ယခု ဇွန်လ ပထမပတ်တွင် ဒေသထွက် ပဲသီးတောင့်ရှည်များ ခူးဆွတ်ရာသီကုန်သွားပါသဖြင့် မိတ္ထီလာမှ ဝယ်ယူ ရောင်းချကြောင်း၊ မိတ္ထီလာမြို့မှ ပဲသီးသည် အတောင့်ချောပြီး ဒေသထွက်ပဲသီးထက် ပို၍ရှည် ကြောင်း သိရသည်။ဇွန်လ ဒုတိယပတ်တွင် ပဲသီးတောင့်ရှည်ဈေးနှုန်းမှာ (၂၅)ကျပ်သား လျှင် (၁၅၀၀)ကျပ်နှင့် တစ်ပိဿာလျှင် ( ၅၅၀၀) ကျပ်ဈေး ရောင်းချကြောင်း သိရှိရပါသည်။
DOCA(မန္တလေး)