ရှမ်းပြည်နယ်(တောင်ပိုင်း)နမ့်စန်ခရိုင်၊ နမ့်စန်မြို့နယ်အတွင်းရှိ မက်မွန်းမွန်းရွာ၊ တွံ့တီးရွာ၊ လွယ်ဆိုင်ရွာတို့တွင် နာနတ်သီးကိုစီးပွားဖြစ်စိုက်ပျိုးကြပါသည်။ ကျန်သောရွာများတွင်လည်း အနည်းငယ်စိုက်ပျိုးကြသည်။ နာနတ်သီးအားအပင်အသစ်စိုက်ပျိုးပါက(၃)နှစ်မှစတင်အသီးသီးပြီး (၃)နှစ်အသီးထွက်ရှိပါသည်။ အသီးအထွက်(၃)နှစ်ပြည့်အခင်းမှအပင်များတူးထုတ်ပြီး အခင်း အသစ်ပြန်လည်စိုက်ပျိုးပါသည်။ တောင်သူများအနေဖြင့်နာနတ်စိုက်ခင်းအား မိမိစိုက်မြေပေါ်ကို မူတည် (၂)ခင်း (၃)ခင်းအားစိုက်ချိန်ခွာ၍ စိုက်ပျိုးကြသည့်အတွက်ကြောင့် နှစ်စဉ်ဝင်ငွေရရှိကြပါ သည်။ နာနတ်သီးကိုဇူလှိုင်လတွင် စတင်ထွက်ရှိ၍ စက်တင်ဘာလအထိထွက်ရှိပါသည်။ နာနတ်သီးထွက်ချိန်တွင် တောင်သူများသည် နမ့်စန်၊လွိုင်လင်၊ပင်လုံ၊မိုးနဲမြို့များသို့ တောင်သူများ ကိုယ်တိုင်လာရောက်ရောင်းချလျက်ရှိပြီး တောင်သူများထံမှတဆင့်ဝယ်ယူပြီး အခြားမြို့ကြီးများသို့ တင်ပို့ရောင်းချကြောင်းလည်းသိရှိရပါသည်။လွိုင်လင်မြို့နာရီစင်အနီးတဝိုက်နှင့် ဈေးအနောက် လမ်းဘေးတစ်ဝိုက်တွင် ထောလာဂျီ၊ ကားများဖြင့်လည်းကောင်း လာရောက်ရောင်းချလျက်ရှိပြီး၊ ပင်လုံမြို့ရှိရွှေတိဂုံဘုရားရှေ့လမ်းမဘေးတွင်လည်း လာရောက်ရောင်းချလျက်ရှိပါသည်။ နာနတ်သီး အားအသေး၊ အလတ်၊ အကြီး ဟူ၍(၃)မျိုးခွဲ၍ရောင်းချပါသည်။အသေးတစ်လုံး၏ ယခုပေါက်ဈေး သည်(၁၀၀/-)ကျပ်ဖြစ်ပြီး၊ အလတ်တစ်လုံးပေါက်ဈေးသည်တစ်လုံး(၂၅၀/-)ကျပ်နှင့် အလုံးကြီး တစ်လုံး၏ပေါက်ဈေးသည် တစ်လုံး(၈၀၀/-)ကျပ် (၂)လုံး(၁၅၀၀/-)ကျပ်ဈေးရှိပါသည်။ မက်မွန်းမွန်းရွာ ၊ တွံ့တီးရွာတို့မှ ထွက်ရှိသောနာနတ်သီးများကို ပွဲစားများမှခြံအထိလာရောက် ဝယ်ယူကြပြီးတွဲကားများဖြင့် ရန်ကုန်၊ မန်းလေး၊ နေပြည်တော်များသို့တင်ပို့ရောင်းချကြသည်ဟု သတင်းရရှိပါသည်။
DOCA(ရှမ်း)