ဆိပ်ဖြူမြို့ ကြက်သွန်နီ အရောင်းအဝယ်ဖြစ်လျက်ရှိသောကုန်စည်ဒိုင်သို့ ဇူလိုင်လ(စတုတ္ထ)ပတ်အတွင်း ကြက်သွန်နီပင်စိုက်အသစ်များ ဆိပ်ဖြူမြို့နယ်ဒေသတွင်း နေရာအနှံ့အပြားမှ နေ့စဉ်ဝင်ရောက်ပြီး တစ်ရက်လျှင် ပျမ်းမျှကြက်သွန်နီကုန်ချိန်ပိဿာ (၂)သောင်းခန့် (၁)ပတ်အတွင်း စုစုပေါင်းပိဿာ (၂)သိန်းခန့် ကုန်စည်ဒိုင်သို့ ဝင်ရောက်လျက်ရှိပြီး မြို့ပေါ်ရှိ ကြက်သွန်ကုန်သည် သိုလှောင်ရုံများတွင် ကြက်သွန်နီပိဿာပျမ်းမျှ (၁)ပတ်အတွင်း ကုန်ချိန် (၄)သိန်းခန့် ဝင်ရောက်အရောင်းအဝယ်ဖြစ်ကြောင်း၊ ဇူလိုင်လ(၂၁)ရက်မှ (၃၁)ရက်ထိ ကုန်စည်ဒိုင်နှင့် သိုလှောင်ရုံများ အရောင်းအဝယ်ဖြစ်မှုစုစုပေါင်းမှာ ကြက်သွန်နီပိဿာ (၆)သိန်းခန့်ရှိကြောင်း မြို့ပေါ်ရှိ ကုန်စည်ဒိုင်အသင်းဝင် ကုန်သည်ပွဲစား (၁)ဦးထံမှ သိရှိရသည်။
ဈေးနှုန်းဈေးကွက်အနေဖြင့် ဇူလိုင်(စတုတ္ထ)ပတ်အတွင်း ကြက်သွန်နီ (၁)ပိဿာ ထိပ်စအမြင့်ဆုံးဈေးနှုန်းမှာ (၁၆၅၀)ကျပ်မှ (၁၅၀၀)ကျပ်ထိ ဈေးနှုန်းဖြစ်ခဲ့ပြီး အနိမ့်စအမြင့်ဆုံးဈေးနှုန်းမှာ (၁၃၅၀)ကျပ်မှ (၁၁၀၀)ကျပ်ထိဈေးနှုန်းများဖြင့် အရောင်းအဝယ်ဖြစ်ခဲ့ကြောင်း၊ သီးနှံအရည်အသွေးများမတူညီခြင်းကြောင့် ဈေးနှုန်းများကွာခြားကြောင်း၊ ယခင် (၁)ပတ် ကြက်သွန်နီအမြင့်ဆုံးဈေးနှုန်းမှာ (၁၅၀၀)ကျပ်ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခု (၁)ပတ် အမြင့်ဆုံးဈေးမှာ (၁၆၅၀)ကျပ် ဈေးနှုန်းဖြင့် အရောင်းအဝယ်ဖြစ်၍ ယခင် (၁)ပတ်ထက် (၁၅၀)ကျပ်ခန့် ဈေးနှုန်းမြင့်သွားကြောင်း၊ အနိမ့်စအမြင့်ဆုံးဈေးနှုန်းမှာ ယခင် (၁)ပတ်က (၁၁၅၀)ကျပ်၊ ယခု (၁)ပတ် (၁၃၅၀)ကျပ်ဈေးနှုန်းဖြစ်၍ (၂၀၀)ကျပ်ခန့် မြင့်တက်ခဲ့ကြောင်း၊ ပြည်တွင်းသုံးစွဲမှုသာမက ပြည်ပပို့ကုန်အဖြစ် မြဝတီဝယ်လက်မှတစ်ဆင့် ထိုင်း၊ ဗီယက်နမ်၊ လာအိုနိုင်ငံများသို့ တင်ပို့မှုများကြောင်း၊ ယခင် (၁)ပတ်ထက် ယခု (၁)ပတ်တွင် ကြက်သွန်နီ(၁)ပိဿာလျှင် ထိပ်စအမြင့်ဆုံး း(၁၅၀)ကျပ်နှင့် အနိမ့်စအမြင့်ဈေး း(၂၀၀)ကျပ်ခန့် မြင့်တက်သွားကြောင်း၊ ရန်ကုန်ဘုရင့်နောင်ပွဲရုံနှင့် မြဝတီမြို့သို့ အများဆုံးတင်ပို့လျက်ရှိကြောင်း သိရှိရသည်။
ဆိပ်ဖြူမြို့တွင် ကြက်သွန်နီအသစ် (၁)ပိဿာလျှင် လက်လီဈေးနှုန်းအနေဖြင့် ထိပ်စ(ရှယ်) ကျပ်(၁၉၀၀/၁၈၀၀)၊ လတ်(ကြီး) ကျပ်(၁၇၀၀/၁၆၀၀)၊ လတ်(သေး) ကျပ်(၁၄၀၀/၁၃၀၀)၊ အသေးစ (၁၁၀၀)ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ ကုန်စည်စီးဆင်းမှုအနေဖြင့် ဇူလိုင်လ(စတုတ္တ)ပတ်အတွင်း ဆိပ်ဖြူမြို့မှ ရန်ကုန်ဘုရင့်နောင်ပွဲရုံသို့ (၂၀)စီး၊ ပြည်မြို့ (၁၀)စီး၊ ဧရာဝတီတိုင်းဒေသကြီး၊ ပုသိမ်မြို့ (၇)စီး၊ မော်လမြိုင်မြို့ (၆)စီး၊ မြဝတီမြို့ (၁၉)စီး(တွဲကား) စုစုပေါင်း (၆၂)စီးခန့် (၆/၁၂/၂၄)ဘီး မော်တော်ယာဉ်များဖြင့် ကြက်သွန်နီပျမ်းမျှပိဿာ (၆)သိန်း၊ တန်ချိန်(၃)သောင်းခွဲခန့် ကုန်စည်စီးဆင်းခဲ့ကြောင်း သိရှိရပါသည်။
DOCA(မကွေး)