မြင်းခြံမြို့နယ်ရှိ ကျေးရွာအများစုသည် လယ်ယာစိုက်ပျိုးရေးလုပ်ငန်းများကို အဓိကလုပ်ကိုင်ကြသကဲ့သို့ အိမ်တိုင်းနီးပါးတွင် တောကြက်များကို တစ်နိုင်တပိုင်မွေးမြူလေ့ရှိကြကြောင်း သိရှိရသည်။ အိမ်မွေးတောကြက်ဖနှင့် ကြက်မ ပေါင်းစပ်ခြင်းဖြင့် ရရှိသောကြက်ဥများကို ဒေသအခေါ် လိုက်ကြက်ဥ(သို့) တောကြက်ဥဟု ခေါ်ဆိုလေ့ရှိကြောင်း၊ တောကြက်ဥတွင် ပရိုတင်းဓာတ်မြင့်မားစွာ ပါဝင်သောကြောင့် ကိုယ်ခန္ဓာကြီးထွားကြံ့ခိုင်ရန်နှင့် ကျန်းမာသန်စွမ်းရန်အတွက် ကြွက်သား တည်ဆောက်မှုကို များစွာအထောက်အကူပြုကြောင်း၊ အားကစားသမားများ၊ သက်ကြီးရွယ်အိုနှင့် ကလေးသူငယ်များစားသုံးရန် အထူးသင့်လျော်ကြောင်း၊ ဦးနှောက်နှင့် မှတ်ဉာဏ်ကို အထူးကောင်း မွန်စေကြောင်း၊ ဗမာလိုက်ကြက်ဥတွင် ဗီတာမင်ဒီနှင့် ဖော့စရပ်ပါဝင်သောကြောင့် အရိုးပွရောဂါကို ကာကွယ်ပေးနိုင်ကြောင်း သိရှိရသည်။
သဘာဝအစားအစာများကိုစားသုံးထားသော တောကြက်မများမှ ဥထားသော တောကြက်ဥများကို စားသုံးခြင်းသည် မွေးမြူရေးကြက်ဥများထက် ခန္ဓာကိုယ်အတွက် ပိုမိုဆေးဖက်ဝင်ပြီး ခွန်အားပိုမိုပြည့်ဝကာ ကျန်းမာရေးကို များစွာအထောက်အကူပြုပါကြောင်း၊ လူကြိုက်များသော်လည်း မွေးမြူရေးကြက်ခြံများမှ မွေးမြူရေးကြက်ဥများကဲ့သို့ အမြောက်အများ ထုတ်လုပ်မှုမရှိသဖြင့် ဈေးကွက်တွင် ပေါပေါများများ တွင်တွင်ကျယ်ကျယ် ရောင်းဝယ်ဖောက်ကားလေ့မရှိကြောင်း၊ ရှားပါသောကြက်ဥဖြစ်သောကြောင့် ဗမာလိုက်ကြက်ဥတစ်လုံးလျှင် ဈေးနှုန်း (၁၂၀၀) ကျပ်မှ (၁၅၀၀)ကျပ်အထိ ရောင်းဝယ်လျက်ရှိကြောင်း သိရှိရပါသည်။
DOCA(မန္တလေး)