စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ရွှေဘိုခရိုင်မှ ရွှေဘိုမြို့နယ်တာဝန်ခံသည် ရွှေဘိုမြို့၊ အမှတ်(၈)ရပ်ကွက်ရှိ ထင်းအစားထိုး မီးသွေးလောင်စာတောင့် လုပ်ငန်းလုပ်ကိုင်လျက်ရှိသည့် စီးပွားရေးလုပ်ငန်းရှင်နှင့် စက်တင်ဘာလ (၁၉)ရက်နေ့ (၁၀:၃၀)နာရီအချိန်တွင် တွေ့ဆုံဆွေးနွေးခဲ့ပါသည်။
ထိုသို့တွေ့ဆုံရာတွင် မီးသွေးလောင်စာတောင့်ပြုလုပ်ရာတွင် လိုအပ်သော ကုန်ကြမ်းပစ္စည်းများ၊ ပြုလုပ်ပုံအဆင့်ဆင့်၊ ဈေးနှုန်း၊ ဈေးကွက်နှင့် အကျိုးအမြတ်အခြေအနေများကို မေးမြန်းဆွေးနွေးရာ လောင်စာတောင့်ပြုလုပ်ရန်အတွက် လိုအပ်သောကုန်ကြမ်းပစ္စည်းများမှာ မီးသွေးမှုန့်နှင့် ရွှံ့မြေ/နှုန်းမြေတို့ ဖြစ်ပြီး မီးသွေးမှုန့်များကို ရွှေဘိုခရိုင်အတွင်းရှိ ခင်ဦးမြို့နယ်၊ ရေဦးမြို့နယ်နှင့် ကန့်ဘလူခရိုင်အတွင်းရှိ ကန့်ဘလူမြို့နယ်တို့မှ ကားဖြင့်အိမ်အရောက်လာရောက်ပို့ပေးကြောင်း၊ ရွှံ့မြေ/နှုန်းမြေကို တောင်သူများ လယ်ရိတ်သိမ်းပြီးချိန်တွင် ဝယ်ယူပြီးအိမ်သို့ကားဖြင့် သယ်ဆောင်ထားရကြောင်း သိရှိရပါသည်။
ကုန်ကြမ်းဖြစ်သည့် မီးသွေးမှုန့်များကို စက်ဖြင့်အမှုန့်ကြိတ်ခြင်း၊ ရွှံ့မြေ/နှုန်းမြေများကိုလည်း ရေဖြင့်တစ်ညစိမ်ထားပြီး တုတ်ဖြင့်မွှေကာ ပျစ်နေသော ရွှံ့မြေ/နှုန်းမြေရေများနှင့် မီးသွေးမှုန့်များကို အချိုးကျရောစပ်၍ အုတ်ကန်တစ်ခုထဲသို့ထည့်ပြီးမွှေခြင်း၊ ခြေထောက်ဖြင့်နင်းခြင်းများ ဆောင်ရွက် ရကြောင်း၊ ထိုသို့ဆောင်ရွက်ပြီး စေးသွားပါက လောင်စာတောင့်ပြုလုပ်မည့် ပုံစံခွက်ထဲသို့ ရိုက်ထည့် ရကြောင်း၊ ပုံစံခွက်ထဲမှ ထွက်လာသောလောင်စာတောင့် အစိုများကို နေ(၅)ရက်လှန်းရကြောင်း၊ ရွှံ့မြေ/နှုန်းမြေကို ရေစိမ်သည့်အခါ ရေတွင်ပျော်ဝင်မှုမရှိသည့် အခဲများပါဝင်ပါက လောင်စာတောင့် ကွဲသဖြင့် ၎င်းအခဲများကို စွန့်ပစ်ရကြောင်း သိရှိရပါသည်။
လောင်စာတောင့်ကို နေ့စဉ်ထုတ်လုပ်လျှက်ရှိပြီး တစ်ရက်လျှင် လောင်စာတောင့်(၈၀၀)မှ (၉၀၀)ကြားထုတ်လုပ်နိုင်ကြောင်း၊ ရောင်းဈေးအနေဖြင့် လောင်စာတောင့်(၁)တောင့်လျှင် (၁၀ဝိ/-)ဖြင့် လည်းကောင်း၊ (၅၀)ပါတစ်အိတ်လျှင် ပုံမှန်ယူနေသောဖောက်သည်များကို (၄၀၀ဝိ/-)ဖြင့်လည်းကောင်း၊ တစ်ခါတစ်ရံဝယ်ယူသောသူများကို (၄၅၀ဝိ/-)ဖြင့်လည်းကောင်းရောင်းချပြီး ဈေးကွက်အနေဖြင့် ရွှေဘိုမြို့ နယ်၏ အနောက်ဘက်၊ တောင်ဘက်၊ မြောက်ဘက်စသည်ဖြင့် ရွှေဘိုမြို့နယ် တစ်နယ်လုံးနီးပါးနှင့် ကန့်ဘလူခရိုင်၊ ဇီးကုန်းမြို့နှင့် ရွှေတောများမှာယူကြကြောင်း၊ တစ်ရက်လျှင် နေ့စားလုပ်သား(၂)ဦး ဌားရမ်းရပြီး လုပ်သားခအနေဖြင့် မီးသွေးလောင်စာတောင့်တစ်ခုလျှင် အပြီးအစီး(၁၅)ကျပ်နှုန်း ပေးရကြောင်းသိရှိရပါသည်။ ယခင်က တစ်ရက်ထုတ်လုပ်မှု ကုန်ချောပစ္စည်းရောင်းချရငွေ၏ ထက်ဝက်ခန့် အကျိုးအမြတ်ရှိခဲ့သော်လည်း ယခုအချိန်တွင် ကုန်ကြမ်းပစ္စည်းများဖြစ်သည့် ရွှံ့မြေ/နှုန်းမြေများ လိုသလောက်ရနိုင်သော်လည်း မီးသွေးမှုန့်ပြုလုပ်သူများ နည်းပါးသွားသည့်အတွက် ကုန်ကြမ်းခက်ခဲခြင်း ယခင်က ကားအစီးလိုက်ဝယ်ယူ၍ရသော်လည်း ယခုအခါဝယ်ယူ၍မရရှိခြင်း၊ ဈေးနှုန်းတက်ခြင်း၊ လုပ်သားရှားပါးခြင်းများကြုံတွေ့နေရသော်လည်း လောင်စာတောင့်ရောင်းဈေးမှာ အနည်းငယ်သာ ဈေးတင်ရောင်းရသောကြောင့် အကျိုးအမြတ်နည်းပါးသဖြင့် ပုံမှန်ဝယ်ယူနေသည့် ဖောက်သည်များအတွက်သာ နေ့စဉ်ထုတ်လုပ်လျှက်ရှိကြောင်း သတင်းရရှိပါသည်။
DOCA(စစ်ကိုင်း)