မြန်မာလူမျိုးများအတွက် ကြောင်လျှာသီးဟင်းလျာသည် စားချင်စဖွယ်ရာသီစာအဖြစ် နှစ်သက်စွာ ချက်ပြုတ်စားသောက်ကြပါသည်။ ကြောင်လျှာသီးသည် မိုးရာသီတွင် ပေါ်ရောက်လေ့ရှိသော်လည်း ပုသိမ်မြို့နယ်အပါအဝင် ဧရာဝတီတိုင်းဒေသကြီးတွင် ယခုလို စက်တင်ဘာလ၌လည်း ဈေးကွက်အတွင်း တွေ့ရှိရဆဲဖြစ်ပါသည်။
ပုသိမ်မြို့နယ်အတွင်းရှိ ဈေးများ၌ ရောင်းချနေသော ကြောင်လျှာသီးအများစုမှာ ဒေသတွင်းမှ စိုက်ပျိုးထုတ်လုပ်သည့် ကြောင်လျှာသီးများနှင့် ဟင်္သာတမြို့နယ်၊ မြောင်းမြမြို့နယ်၊ ကျောင်းကုန်းမြို့နယ်များမှ သယ်ယူရောင်းချသော ကြောင်လျှာသီးများဖြစ်ကြောင်း သိရပါသည်။
၂၀၂၅ ခုနှစ်၊ စက်တင်ဘာလ (တတိယပတ်) ဈေးနှုန်းများအရ ကြောင်လျှာသီး အတောင့်သေး တစ်တောင့်လျှင် ကျပ် (၁,၀၀၀) မှ (၁,၂၀၀) အထိ၊ အတောင့်ကြီး တစ်တောင့်လျှင် ကျပ် (၁,၅၀၀) မှ (၂,၀၀၀) အထိ ဈေးနှုန်းဖြင့် အရည်အသွေး၊ အရွယ်အစားနှင့် လတ်ဆတ်မှုပေါ် မူတည်၍ ရောင်းချလျက်ရှိကြောင်း ဈေးသည်များထံမှ သိရှိရပါသည်။
DOCA (ဧရာဝတီ)