၂၉.၉.၂၀၂၅ ရက်နေ့တွင် မွန်ပြည်နယ်၊ ဘီးလင်းမြို့နယ်အတွင်းရှိ နှင်းပုလဲကျေးရွာ၊ ဇုတ်သုတ်ကျေးရွာ၊ မုသင်ကျေးရွာနှင့် ရွှေလှေကျေးရွာများ၌ ကွမ်းရွက်အား တစ်နိုင်တစ်ပိုင် စိုက်ပျိုးကြရာမှ စီးပွားဖြစ်စိုက်ပျိုးလာကြပြီး ယခုနှစ်တွင် စျေးကောင်းရ၍ ကွမ်းရွက်စိုက်ပျိုးသူများ အဆင်ပြေနေကြောင်း သိရသည်။
အဆိုပါ ကွမ်းရွက်ပင်များစိုက်ပျိုးရာ၌ ဝါဆိုလတွင်စိုက်ပျိုးကြပြီး ဝါးတစ်တိုင်လျှင် ကွမ်းအညွှန့်နှစ်ညွှန့်စိုက်ပျိုးရပြီး တော်သလင်းလတွင် သွင်းအားစုများအဖြစ် နွားချေး၊ မြေဆွေး၊ ဓါတ်မြေသြဇာများ ကျွေးရပါသည်။ သီတင်းကျွတ်လဆန်းတွင် ကွမ်းရွက်များစတင်ခူးဆွတ်ရရှိ ပြီး ကွမ်းတိုင် (၁၀၀၀) တိုင် စိုက်ပျိုးလျှင် (၂၀) ရက်လျှင် (၁) ကြိမ် ခူးရာ (၃၅) ပိဿာခန့် ခူးဆွတ်ရရှိ၍ ထိုကွမ်းရွက်များအား မြို့နယ်အတွင်းဖြန့်ဖြူးရောင်းချရာတွင် ကွမ်း (၅၀) ကျပ်သား တစ်လိပ်လျှင် (၃၅၀၀) ကျပ် ဝန်းကျင်ရရှိကြောင်း၊ ကွမ်းတိုင်တစ်ထောင်စိုက်ပျိုးရန် အထွေထွေကုန်ကျစရိတ် (၂၅) သိန်းခန့် ကုန်ကျပြီး ကွမ်းပင်၏သက်တမ်းမှာ (၄)နှစ်ခန့် ရှိကြောင်း၊ အထွေထွေကုန်ကျစရိတ်များသော်လည်း ကွမ်းရွက်စျေးကောင်းရ၍ အထွက်နှုန်း ကောင်းလျှင် အကျိုးအမြတ်ကောင်းစွာရရှိနိုင်ကြောင်း ကွမ်းရွက်စိုက်ပျိုးသူများထံမှ သိရှိရပါသည်။
DOCA (မွန်)