ကျောက်ဆည်ခရိုင်အတွင်းရှိ အေးမြကြည်လင်ဈေးနှင့် မြို့မဈေးများသို့ ရာသီစာဖြစ်သော ပိန်းဥများ ဈေးကွက်သို့ စတင်ဝင်ရောက်လာပြီး ဒေသခံစားသုံးသူများ၏ ဝယ်ယူမှုဖြင့် အရောင်းအဝယ် သွက်လက်လျက်ရှိကြောင်း၊ ပိန်းဥများကို စားသုံးသူများက ပြုတ်၍ဖြစ်စေ၊ ပိန်းဥရွက်နှင့် ရောချက် ပြုတ်၍ဖြစ်စေ နှစ်သက်စွာ စားသုံးလျက်ရှိကြောင်း၊ ပိန်းဥသည် သွေးလည်ပတ်မှုကောင်းစေခြင်း၊ ကိုယ်ခံအားစနစ်မြှင့်တင်ပေးခြင်း၊ မျက်စိကျန်းမာရေးကောင်းစေခြင်း စသည့်ကျန်းမာရေးကောင်း ကျိုးများစွာပါဝင်သည့် ရာသီစာဟင်းသီးဟင်းရွက်တစ်မျိုးလည်း ဖြစ်ကြောင်း၊ ဈေးနှုန်းအနေဖြင့် လက်ကားဈေး တစ်ပိဿာလျှင် (၁၈၀၀/-)ကျပ်၊ လက်လီဈေး တစ်ပိဿာလျှင် (၂၅၀၀/-) ကျပ်ဖြင့် ရောင်းဝယ်လျက်ရှိကြောင်း၊ ပိန်းဥကို သက်သတ်လွတ်ဟင်းလျာအဖြစ် အာဟာရပြည့်ဝစွာ သုံးဆောင်နိုင်သလို မိမိနှစ်သက်ရာ အသားတစ်မျိုးမျိုး (သို့မဟုတ်) ငါး (သို့မဟုတ်) ပုစွန်ဖြင့်ရော ချက်၍လည်းကောင်း၊ စွပ်ပြုတ်အဖြစ်လည်းကောင်း စားသုံးနိုင်ကြောင်း၊ ပိန်းဥကိုပြုတ်၍ ဆီ၊ ဆားဖြင့်စားခြင်းသည် အလွယ်ကူဆုံးသော စားသုံးနည်းဖြစ်ပြီး ကလေး၊ လူကြီးအားလုံး ကြိုက်သော သရေစာတစ်မျိုးလည်းဖြစ်ကြောင်း၊ တိုးတက်ခေတ်မီသောနိုင်ငံများတွင် ပိန်းဥကို အမှုန့်ပြုလုပ်၍ ဟင်းခတ်စားဖွယ်အဖြစ်လည်းကောင်း၊ ရေခဲမုန့် သို့မဟုတ် မုန့်ချိုပြုလုပ်၍ လည်းကောင်း၊ နို့မှုန့်အစားထိုး ပိန်းဥဖျော်ရည်အဖြစ်လည်းကောင်း အရသာရှိရှိ စားသုံးကြကြောင်း၊ ပိန်းဥများ ဈေးကွက်ဝင်ရောက်လာခြင်းနှင့်အတူ ဒေသခံစားသုံးသူများအနေဖြင့် ဈေးနှုန်းသင့်တင့်စွာ ဖြင့် ဝယ်ယူစားသုံးနိုင်ခြင်းကြောင့် ရောင်းအားကောင်းလျက်ရှိကြောင်း သတင်းရရှိပါသည်။
DOCA(မန္တလေး)