ဆန်ကုန်သွယ်မှုသဘောတူညီချက် လက်မှတ်ရေးထိုးရန် ထိုင်းနှင့်တရုတ် နှစ်နိုင်ငံဝန်ကြီးချုပ်များ တွေ့ဆုံမည်

      ထိုင်းဝန်ကြီးချုပ်နှင့် ပြည်ထဲရေးဝန်ကြီးဖြစ်သူ Anutin Charnvirakul  သည် ၂၀၂၅ ခုနှစ် ဒီဇင်ဘာလ ၁၄ ရက်နေ့တွင်ကျင်းပမည့် မဲခေါင်-လန်ချန်းဖိုရမ်တွင် ဆန်တန်ချိန် ၅ သိန်းရောင်းချမည့် ဆန်ကုန်သွယ်မှု သဘောတူညီချက် (MOU) ကို လက်မှတ်ရေးထိုးရန် တရုတ်နိုင်ငံဝန်ကြီးချုပ် Li Qiang နှင့် တွေ့ဆုံလိမ့်မည်ဟု ထိုင်းနိုင်ငံခြားရေးဝန်ကြီး Sihasak Phuangketkeow က နိုဝင်ဘာလ ၂၅ ရက်နေ့တွင် ထုတ်ဖော် ပြောကြားခဲ့ပါသည်။

       မဲခေါင်-လန်ချန်း ပူးပေါင်းဆောင်ရွက်မှုဖိုရမ် ကျင်းပနေစဉ်အတွင်း အဆိုပါ ဆန်ကုန်သွယ်မှု သဘောတူညီချက် (MOU) ကို တရားဝင် လက်မှတ်ရေးထိုးနိုင်ရေး ဆောင်ရွက်မည်ဖြစ်ကြောင်း၊ ၎င်းသဘောတူညီချက်၏ အသေးစိတ်အချက်အလက်များကို  ဆက်လက်ညှိနှိုင်းဆောင်ရွက်လျက် ရှိပြီး MOU ကို အစီအစဉ်အတိုင်း လက်မှတ်ရေးထိုးနိုင်ရန် မျှော်မှန်းထားကြောင်း Mr. Sihasak က ရှင်းလင်းပြောကြားခဲ့သည်။

      ဆန်ကုန်သွယ်မှုသည် ဆွေးနွေးပွဲများ၏ ဗဟိုအချက်အဖြစ် ပါဝင်သော်လည်း နှစ်နိုင်ငံကြား ပူးပေါင်းဆောင်ရွက်မှုဆိုင်ရာ အခြားခေါင်းစဉ်များကိုလည်း တင်ပြဆွေးနွေးနိုင်သည်ဟု ၎င်းက ဆို သည်။ ဆွေးနွေးရန် ဖြစ်နိုင်ခြေရှိသည့် အခြားနယ်ပယ်များနှင့် ပတ်သက်၍ လက်ရှိညှိနှိုင်းဆဲ ဖြစ် ကြောင်း Mr. Sihasak က ထပ်မံပြောကြားခဲ့သည်။

      ထိုင်းနိုင်ငံဆိုင်ရာ တရုတ်သံအမတ်ကြီး Zhang Jianwei က ဆန်ကုန်သွယ်မှုနှင့်စပ်လျဉ်း၍ လက်ရှိကာလ၌ ထိုင်းနှင့်တရုတ်နိုင်ငံတို့မှ သက်ဆိုင်ရာအဖွဲ့အစည်းများက ညှိနှိုင်းဆွေးနွေးလျက်ရှိ သည်ဟု နိုဝင်ဘာလ ၂၄ ရက်နေ့ အစောပိုင်းတွင် မီဒီယာများအား ပြောကြားခဲ့ကြောင်း သိရှိရသည်။

Source: The Nation Thailand, November 25, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)