ဗီယက်နမ်နိုင်ငံဆိုင်ရာလာအိုသံရုံးနှင့် Viet-Lao AZ JSC တို့သည် အပြန်အလှန်ကုန်သွယ် ရေးနှင့် ရင်းနှီးမြှုပ်နှံမှုတိုးချဲ့ရန်အတွက် ခိုင်မာသောပူးပေါင်းဆောင်ရွက်မှုအခွင့်အလမ်းများကို ရှာဖွေရန်ရည်ရွယ်၍ ၂၀၂၅ ခုနှစ် လာအို-ဗီယက်နမ် ကုန်သွယ်ရေးနှင့် ရင်းနှီးမြှုပ်နှံမှုမြှင့်တင်ရေး ကွန်းဖရန့်ကို နိုဝင်ဘာလ ၁၄ ရက်နေ့က ပူးတွဲကြီးမှူးကျင်းပခဲ့ကြောင်း သိရပါသည်။ ဗီယက်နမ် နိုင်ငံဆိုင်ရာ လာအိုသံအမတ် Khamphao Ernthavanh က ဗီယက်နမ်-လာအိုကုန်သွယ်ရေး ဆက်ဆံမှုသည် ဆယ်စုနှစ်ခြောက်ခုကျော်ခဲ့ပြီဖြစ်ကြောင်း ပြောကြားခဲ့ပါသည်။ နှစ်နိုင်ငံသည် လာအိုပြည်နယ် ၁၀ ခုနှင့် ဗီယက်နမ်ဒေသ ၉ ခုတစ်လျောက်တွင် ၂၃၃၇ ကီလိုမီတာရှည်လျား သော နယ်စပ်ဆက်စပ်မှုရှိပြီး အရှေ့-အနောက်စီးပွားရေးစင်္ကြန်နှင့်အတူ ဗျူဟာမြောက်တန်ဖိုးနှင့် သိသာထင်ရှားသောဖွံ့ဖြိုးတိုးတက်မှုအလားအလာကို ပိုင်ဆိုင်ထားကြောင်း သိရပါသည်။ အပြန် အလှန်ကုန်သွယ်ရေး အထူးသဖြင့်နယ်စပ်ကုန်သွယ်ရေးမှာ အပေါင်းလက္ခဏာဆောင်သည့်ရလဒ် ရှိနေသော်လည်း သံအမတ်က တည်ငြိမ်ပြီး စဉ်ဆက်မပြတ်နယ်စပ် ကုန်သွယ်ရေးဖွံ့ဖြိုးတိုးတက် ရေးနှင့် တစ်ဖက်၏အားသာချက်ကို တစ်ဖက်ကရယူခြင်းတို့တွင် စိန်ခေါ်မှုများ ဆက်လက်တည်ရှိ နေကြောင်း မှတ်ချက်ပြုခဲ့ပါသည်။ သံအမတ်က ပူးပေါင်းဆောင်ရွက်မှုမြှင့်တင်ခြင်းသည် ဆင်းရဲ နွမ်းပါးမှုလျှော့ချခြင်း၊ ကျေးလက်ဒေသဖွံ့ဖြိုးတိုးတက်မှုအရှိန်မြှင့်တင်ခြင်းနှင့် နယ်စပ်ဒေသခံများ ၏ လူမှုဘဝတိုးတက်စေရေးတို့တွင် တိုက်ရိုက်ကူညီပေးနိုင်ကြောင်း ပြောကြားခဲ့ပါသည်။ ကွန်းဖရန့်တွင် ရင်းနှီးမြှုပ်နှံမှုနှင့် ကုန်သွယ်မှုမြှင့်တင်ရေးအပေါ်ဆွေးနွေးမှုများ ပြုလုပ်ခဲ့ကြောင်း သိရပါသည်။ ကျွမ်းကျင်သူများက လာအိုအား ကုန်းတွင်းပိတ်နိုင်ငံအဖြစ်မှ ဒေသဆိုင်ရာကုန်တွင်း ချိတ်ဆက်ရာအချက်အခြာအဖြစ်အသွင်ကူးပြောင်းရည်ရွယ်၍ မူဝါဒအသစ်များနှင့် မက်လုံးများကို အသားပေးပြောကြားခဲ့ကြောင်း သိရပါသည်။ ၂၀၂၅ ခုနှစ်၏ ပထမ ၉ လတွင် အပြန်အလှန် ကုန်သွယ်ရေးမှာ အမေရိကန်ဒေါ်လာ ၂.၃၆ ဘီလီယံရောက်ရှိခဲ့ပြီး ၂၀၂၄ ခုနှစ် တူညီသည့်ကာလ နှင့်နှိုင်းယှဉ်ပါက ၅၇ ရာခိုင်နှုန်းမြင့်တက်ခဲ့ကာ ဆယ်စုနှစ်အတွင်း အမြင့်ဆုံး အဆင့်ဖြစ်ခဲ့ကြောင်း သိရပါသည်။ ဗီယက်နမ်နိုင်ငံ စက်မှုနှင့် ကုန်သွယ်ရေးဝန်ကြီးဌာန၏ နိုင်ငံခြားကုန်သွယ်ရေး အေဂျင်စီ ညွှန်ကြားရေးမှူး Nguyen Anh Son က နှစ်ဖက်အစိုးရသည် ၂၀၂၄ ခုနှစ် ဗီယက်နမ်-လာအိုကုန်သွယ်ရေးသဘောတူညီချက်နှင့် ဗီယက်နမ်-လာအိုနယ်စပ် ကုန်သွယ်ရေးသဘောတူညီချက်တို့ပါဝင်သည့် အရေးပါသောပူးပေါင်းဆောင်ရွက်မှုစီမံချက်များ ကို အကောင်အထည်ဖော်ခဲ့ပြီး ဖြစ်ကြောင်း ပြောကြားခဲ့ပါသည်။ ထိုကွန်းဖရန့်တွင် Viet-Lao AZ JSC (ဗီယက်နမ်) နှင့် Hung-Aloun Logistic (လာအို) တို့သည် ထောက်ပံ့ပို့ဆောင်ရေးနှင့် ဖြန့်ဖြူးရေးတို့တွင် ဗျူဟာမြောက် ပူးပေါင်းဆောင်ရွက်ရန်အတွက် MoU ရေးထိုးခဲ့ကြောင်း သိရပါသည်။ ထိုသဘောတူညီချက်သည် နယ်စပ်ဖြတ်ကျော်ထောက်ပံ့မှုကွင်းဆက် ပူးပေါင်း ဆောင်ရွက်ရေးနှင့် နှစ်နိုင်ငံအကြားဘက်ပေါင်း စုံပူးပေါင်းဆောင်ရွက်ရေးတို့တွင် စာမျက်နှာသစ် တစ်ခုဖြစ်ခဲ့ကြောင်း သိရပါသည်။
DOCA(ရန်ကုန်)