မိဿလင်ပင်သည် မြန်မာနိုင်ငံတွင် သဘာဝအလျောက်ပေါက်ရောက်သည့် ဆေးဖက်ဝင် အပင် တစ်မျိုးဖြစ်၍ ၎င်းကို "ချင်းပင်" ဟုလည်း ခေါ်ဆိုကြကြောင်း၊ ရိုးရာဆေးပညာ၊ အိမ်သုံးဆေး နှင့်ဟင်းလျာချက်ပြုတ်ရာတွင် အစဉ်အဆက်အသုံးပြုလာခဲ့ကြကြောင်းသိရှိရသည်။ မိဿလင်ပင် သည်အမြင့် ၄–၆ ပေထိရှိပြီး အမြဲစိမ်းနှစ်ကြာခံပင်ငယ်မျိုး ဖြစ်ကြောင်း၊ အရွက်များသည် ချင်းရွက်နှင့်ဆင်တူကာ လှံစွပ်ပုံရှိ၍ ရွက်နားညီပြီး ချောမွေ့၍ အပွင့်များမှာ ညိုဝါရောင်ရှိကာ ပင်ခြေရင်းမှပွင့်ပြီး ချင်းပွင့်နှင့်တူကြောင်း၊ အမြစ်ဥမှာ ညိုဝါရောင်၊ အသားထူ၍မြစ်မြွှာ များဖြာ ထွက်၍ ပေါက်ရောက်ရာဒေသများအနေဖြင့် မြန်မာနိုင်ငံအနှံ့ (အထူးသဖြင့်မြောက်ပိုင်း ဒေသများ) တွင် သဘာဝအလျောက် ပေါက်ရောက်သည်။
မြန်မာဆေးကျမ်းများအလိုအရ မိဿလင်သည် စပ်သောအရသာရှိ၍ အာနိသင်များအနေဖြင့် သွေးကိုကြေစေခြင်း၊ ဝမ်းမီးတောက်စေခြင်း၊ ဆီးများ စေပြီး လေကိုသက်စေခြင်း၊ ပူသောဂုဏ်သတ္တိရှိ၍ အအေးဒဏ်၊ လေနာများကို ကာကွယ်ပေး ခြင်းအာနိသင်များကို ပိုင်ဆိုင်သည်။ မိဿလင်ပင်၏ ပဉ္စငါးပါး(ဥ၊ ပွေ့ပိုင်၊ အရွက်၊ အပွင့်၊ အမြစ်)ကို ရောဂါအမျိုးမျိုးအတွက် အသုံးပြု နိုင်ပါသည်။ ခန္ဓာကိုယ် အတွင်းရောဂါများနှင့်ပတ်သက်၍ ချောင်းဆိုး၊ ပန်းနာ၊ သန်ချခြင်း များအတွက် ပဉ္စငါးပါးကို ဆေးဖော်စပ်အသုံးပြုနိုင်သည်။ ဝမ်းလျှောပါက မိဿလင်ဥကို နံနံစေ့နှင့် ရောကျိုပြီး သောက်သုံးနိုင်သည်။ ဝမ်းဗိုက်ထိုးအောင့်ခြင်းအတွက် မိဿလင်ဥ (၈)ပဲသားကို ရေနှင့်ကျိုတိုက်နိုင်သည်။ မီးယပ်ချုပ်ခြင်းများအတွက် အရည်ညှစ်၍ ဆားအနည်း ငယ်ထည့် သောက်ပါက သက်သာစေနိုင်သည်။ အတွင်းလိပ်ခေါင်းရောဂါအတွက် အစိုဥကိုထုခြေ၍ ပေါင်းရည် ယူကာ နံနက်စာ/ညစာစားပြီး သောက်သုံးနိုင်သည်။ခန္ဓာကိုယ်အပြင်ရောဂါများနှင့်ပတ်သက်၍ အဆစ်ရောင်၊ ဒူးရောင်၊ ခြေမျက်စိရောင် အမြစ် ဥကို ထုထောင်း၍ ကြပ်စည်းပေးနိုင်သည်။ ထိခိုက်ဒဏ်ရာ၊ အကြောထုံးနာများအတွက် ဥကိုကြိတ်၍ အုံပေးခြင်းဖြင့် နာကျင်မှုသက်သာစေသည်။ အအေးပတ်ခြင်း၊ လေဖြန်းခြင်း များအတွက် အရည်ညှစ်ပြီး ငရုတ်ကောင်းမှုန့်ထည့်ကာ လိမ်းပေးနိုင်သည်။ အရေပြားနှင့် နာတာရှည်ရောဂါများ နူနာ၊ ယားနာ၊ အနာကြီးရောဂါများအတွက် ပဉ္စငါးပါးကို ကုလားကင်ပွန်းသီး၊ နွားကျင်ငယ်ရည် တို့နှင့် ရောပြုတ်၍ လိမ်းနိုင်သည်။စားစရာအဖြစ် စားသုံးရာတွင် အပွင့်ကို ပြုတ်၍တို့စရာအဖြစ် စားသုံးနိုင်သည်။ ဟင်းချို ဟင်းခါး ချက်သောက်နိုင်ပြီး သုတ်၍လည်း စားကြသည်။ ဥနှင့်အရွက်ကို ဟင်းခတ်အမွှေး အကြိုင်အဖြစ် အသုံးပြုနိုင်သည်။ မိဿလင်ပင်သည် ရိုးရာဆေးဝါးအပြင် ခေတ်ပေါ်ကျန်းမာ ရေးထုတ်ကုန်များတွင်ပါ အရေးပါသော ကုန်ကြမ်းတစ်ခုဖြစ်သည်။ ၎င်း၏ ဘက်စုံသုံးဆေးဖက် ဝင်ပုံ၊ လွယ်ကူစွာရှာဖွေရရှိနိုင်မှုတို့ကြောင့် မြန်မာ့ဆေးဝါးရင်းမြစ်များတွင် အဖိုးတန်အပင် တစ်မျိုး အဖြစ် တွင်တွင်ကျယ်ကျယ်အသုံးဝင်လျက်ရှိကြောင်း လေ့လာသိရှိရသည်။
DOCA(မန္တလေး)