ကမ္ဘောဒီးယားနိုင်ငံ၏ဒေသခံကုမ္ပဏီတစ်ခုဖြစ်သော SSR Co.,Ltd သည် Prey Veng ပြည်နယ်တွင် အမေရိကန်ဒေါ်လာ ၂၀ သန်းကျော်တန်ဖိုးရှိသော ကုန်းတွင်းဆိပ်ကမ်း ဖွံ့ဖြိုးတိုးတက်ရေးကို အဆိုပြုထားပြီး ယင်းသည် ဒေသတွင်း ပထမဆုံးစီမံကိန်းဖြစ်ကြောင်း ကမ္ဘောဒီးယားနိုင်ငံ၊ ဖွံ့ဖြိုတိုးတက်ရေးကောင်စီ (CDC) မှ မကြာသေးမီက ထုတ်ပြန်ခဲ့သော ကြေညာချက်တွင် ဖော်ပြထားသည်။ Kamchay Mear ခရိုင်၊ Krabo မြို့နယ်ရှိ ၁၀ ဟက်တာကျယ်ဝန်းသောနေရာတွင် တည်ဆောက်ရန် အဆိုပြုထားသော အဆိုပါ ကုန်းတွင်းဆိပ်ကမ်းသည် ကမ္ဘောဒီးယားနှင့် ဗီယက်နမ်နိုင်ငံတို့အကြား အထူးသဖြင့် Meun Chey အပြည်ပြည်ဆိုင်ရာ နယ်စပ်ဂိတ်မှတစ်ဆင့် နယ်စပ်ဖြတ်ကျော်ကုန်စည်သယ်ယူပို့ဆောင်ရေး လုပ်ငန်းများကို မြှင့်တင်ပေးလိမ့်မည်ဟု မျှော်မှန်းထားသည်။ အဆိုပါ ကုန်းတွင်းဆိပ်ကမ်းသည် ကုန်းတွင်းထောက်ပံ့ပို့ဆောင်ရေးဗဟိုချက်အဖြစ် ကုန်စည်ပို့ဆောင်ရေး၊ ကွန်တိန်နာ ထိန်းသိမ်းသိုလှောင်ခြင်းနှင့် အကောက်ခွန်ရှင်းလင်းခြင်းတို့အတွက် ဗဟိုချက်အဖြစ် ဆောင်ရွက်ပေးမည်ဖြစ်သည်။ အဆိုပြုထားသောနေရာကို စစ်ဆေးရေးခရီးစဉ်အတွင်း CDC လက်အောက်ရှိ ကမ္ဘောဒီးယားရင်းနှီးမြှုပ်နှံမှုဘုတ်အဖွဲ့ (CIB) ၏ အထွေထွေအတွင်းရေးမှူး Chea Vuthy က စီမံကိန်းသည် Meun Chey အပြည်ပြည်ဆိုင်ရာ နယ်စပ်ဂိတ်မှတစ်ဆင့် အနာဂတ်နယ်စပ်ဖြတ်ကျော်ကုန်စည်စီးဆင်းမှုကို ပံ့ပိုးရာတွင် အရေးပါသောအခန်းကဏ္ဍမှ ပါဝင်မည်ဖြစ်ပြီး ဒေသခံလူမှုအသိုင်းအဝိုင်းများအတွက် သိသာထင်ရှားသော အလုပ်အကိုင် အခွင့်အလမ်းများ ဖန်တီးပေးလိမ့်မည်ဟု မျှော်လင့်ရကြောင်း အလေးပေးပြောကြားခဲ့သည်။ CDC မှ ထုတ်ပြန်သော စီမံကိန်းအသေးစိတ်အချက်အလက်များအရ ဖွံ့ဖြိုးတိုးတက်ရေးတွင် ရုံးခန်းနှင့် စီးပွားရေးအဆောက်အအုံများ၊ ကုန်သွယ်ရေးအဆောက်အအုံများ၊ ကွန်တိန်နာ သိုလှောင်ရာနေရာများနှင့် ဂိုဒေါင်များကဲ့သို့သော မရှိမဖြစ်လိုအပ်သော အခြေခံ အဆောက်အအုံများ ပါဝင်မည်ဖြစ်သည်။ ဤအစီအစဉ်သည် ထောက်ပံ့ပို့ဆောင်ရေးစွမ်းရည်ကို မြှင့်တင်ရန်နှင့် ဗီယက်နမ်နှင့် ကမ္ဘောဒီးယား၏ ကုန်သွယ်ရေးချိတ်ဆက်မှုကို အားကောင်းစေရန် ရည်ရွယ်ထားသည်။ ကမ္ဘောဒီးယား-ဗီယက်နမ် ကုန်သွယ်မှုသည် ၂၀၂၄ ခုနှစ်တွင် အမေရိကန် ဒေါ်လာ ၁၀.၁ ဘီလီယံခန့် ရောက်ရှိခဲ့ပြီး ၂၀၂၃ ခုနှစ်ထက် ၁၇.၅ ရာခိုင်နှုန်း တိုးလာခဲ့သည်။ ၂၀၂၅ ခုနှစ်၏ ပထမ ၁၀ လအတွင်း ကုန်သွယ်မှုသည် အမေရိကန်ဒေါ်လာ ၆.၅ ဘီလီယံအထိ ရောက်ရှိခဲ့ပြီး ကမ္ဘောဒီးယား၏ ဗီယက်နမ်သို့ ပို့ကုန်မှာ အမေရိကန်ဒေါ်လာ ၃.၁ ဘီလီယံနှင့် သွင်းကုန်မှာ အမေရိကန်ဒေါ်လာ ၃.၄ ဘီလီယံရှိကြောင်း သိရှိရပါသည်။
Source: Khmer Times
DOCA(ရန်ကုန်)