စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ရာသီပေါ်သီးနှံများဖြစ်သော ခဝဲသီး၊ ရွှေဖရုံသီး၊ ကန့်လန့်ဖူး၊ မုံညှင်းရွက်၊ ခရမ်းကဆော့သီး၊ ကြက်ဟင်းခါးသီး၊ ခရမ်းသီး၊ ပြောင်းဖူး၊ ဘူးသီး၊ ကင်းပုံသီး၊ ပဲတောင့်ရှည်သီး၊ ခရမ်းကြွပ်သီးများ ရောင်းချလျက်ရှိရာ ယခုအခါ ပြောင်းဖူးပင်၊ ကင်းပုံသီးပင်၊ ပဲတောင့်ရှည်သီးပင်နှင့် ခရမ်းကြွပ်သီးပင်များကို နေအိမ်ခြံဝင်းများတွင်လည်းကောင်း၊ ယာကွက်ခြံစည်းရိုးများတွင်လည်းကောင်း စိုက်ပျိုး၍ ရောင်းချလျက်ရှိကြောင်းသိရ သည်။ ပြောင်းဖူး၊ ကင်းပုံသီး၊ ပဲတောင့်ရှည်သီးများကို ကြော်စား၊ သုပ်စား၊ ချက်စားပြီး ခရမ်းကြွပ်သီးများကို ငပိရည်နှင့်တွဲဖက်၍လည်း အမျိုးမျိုးပြုလုပ်၍ စားသုံးကြကြောင်း သိရသည်။
၂၀၂၅ ခုနှစ်၊ နိုဝင်ဘာလ စတုတ္ထပတ်အတွင်း ကန့်ဘလူမြို့မဈေးတွင် ပြောင်းဖူး၊ ကင်းပုံသီး၊ ပဲတောင့်ရှည်သီးနှင့် ခရမ်းကြွပ်သီးများကို ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများမှဝယ်ယူ၍ ရောင်းချလျက်ရှိကြောင်း၊ ပြောင်းဖူးအကြီး(၁)ဖူးလျှင် (၇၀၀)ကျပ်၊ (၃)ဖူးလျှင် (၂၀၀၀)ကျပ်၊ အသေး(၁)ဖူးလျှင် (၅၀၀)ကျပ်၊ ကင်းပုံသီး(၁)ဘူးလျှင် (၆၀၀)ကျပ်၊ (၁)ပြည်လျှင် (၄၇၀၀)ကျပ်၊ ပဲတောင့်ရှည်သီး(၁)စည်းလျှင် (၅၀၀)ကျပ်၊ ခရမ်းကြွပ်သီး(၁)ပိဿာလျှင် (၃၈၀၀) ကျပ်၊ (၅၀)ကျပ်သားလျှင် (၂၀၀၀)ကျပ်၊ (၂၅)ကျပ်သားလျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူထံမှ သတင်းရရှိပါသည်။
DOCA(စစ်ကိုင်း)