မြိတ်ခရိုင်အတွင်း သီးနှံမျိုးစုံစိုက်ပျိုးလျက်ရှိရာ စားဖိုဆောင်သီးနှံဖြစ်သော ငရုတ်၊ ကန်စွန်း၊ ခရမ်း၊ ပဲသီး တို့အပြင် ဘူးသီး သီးနှံကိုလည်း စီးပွားဖြစ် စိုက်ပျိုးလာကြပါသည်။ ဘူးသီးစိုက်ပျိုးရာတွင် မြေဆွေး၊ မြေဩဇာများအား သမအောင်ရောမွှေပြီး ဘောင်ပြုလုပ်၍စိုက်ပျိုးရကြောင်း၊ တစ်ပိုင်တစ်နိုင်အနေဖြင့်လည်း မိမိတို့လယ်ယာများနှင့် နေအိမ်များတွင်လည်းစိုက်ပျိုးကြကြောင်း သိရှိရပါသည်။ ဘူးသီးသည် မြန်မာနိုင်ငံတွင် လူအများစားသုံးကြသော ဟင်းသီးဟင်းရွက်တစ်မျိုးဖြစ်သည်။ ဘူးသီးပင်သည် နွယ်ပင်အမျိုးအစားဖြစ်ပြီး အိမ်ခြံဝင်းများ၊ ဥယျာဥ်များနှင့် လယ်ယာမြေများတွင် စိုက်ပျိုးလေ့ရှိကြပါသည်။ ဘူးသီးသည် အာဟာရဓာတ်များစွာပါဝင်ပြီး ရေဓာတ်ပါဝင်မှုမြင့်မားသဖြင့် ပူအိုက်သောရာသီတွင် စားသုံးရန်သင့်တော်သည်။ ဘူးသီးကို ဟင်းချက်စားခြင်း၊ ပြုတ်စားခြင်း၊ အကြော်ကြော်စားခြင်းတို့ ပြုလုပ်၍စားသုံးနိုင်သည်။ ဘူးသီးတွင် ဗီတာမင်ဓာတ်များပါဝင်ပြီး အမျှင်ဓာတ်လည်း ကြွယ်ဝသောကြောင့် စားသုံးသင့်သည်။ ဘူးသီးပင်မှ အသီးတင်မက ရွက်နု၊ အညွန့်များကိုလည်း အသုတ်၊ ဟင်းများတွင် ထည့်သွင်းချက်ပြုတ် စားသုံးကြပြီး စားသောက်ဖွယ်ရာတစ်ခု အဖြစ်သာမက အိမ်ထောင်စုဝင်ငွေရရန်အလို့ငှာစိုက်ပျိုးနိုင်သော သီးနှံတစ်မျိုးလည်းဖြစ်သည်။ ရာသီဥတုဒဏ်ခံနိုင်မှုနှင့် ဈေးကွက်ဝယ်လိုအားကောင်းမွန်သည့်အတွက် လွယ်ကူစွာစိုက်ပျိုးနိုင်သည်။ မြိတ် မြို့ပေါ်တွင် ဘူးသီးဈေးနှုန်းမှာ အရွယ်အစားပေါ်မှု၍ တစ်လုံးလျှင်(၃၅၀၀)ကျပ်နှင့် (၄၀၀၀)ကျပ် ရှိကြောင်း သိရှိရပါသည်။ ထို့ကြောင့် ဘူးသီးသည် စိုက်ပျိုးရလွယ်ကူပြီး ဈေးကွက်အတွင်း ရောင်းဝယ်မှုကောင်းမွန်သောကြောင့် တောင်သူများအတွက် အသုံးဝင်သော အသီးတစ်မျိုး ဖြစ်သကဲ့သို့ စိုက်ပျိုးသူများ ယခင်ကထက် ပိုမို များပြားလာသည်ဟုလည်း သိရှိရပါသည်။
DOCA(တနင်္သာရီ)