HighLight News

        စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ၁၃.၈.၂၀၂၄ ရက်နေ့တွင် ပြည်နယ်ဦးစီးမှူးရုံးခန်း၌ မွန်ပြည်နယ်အတွက် တာဝန်ယူရောင်းချမည့် ကုမ္ပဏီ(၄)ခုမှ စားအုန်းဆီလက်လီ/ လက်ကားဖြန့်ဖြူးရောင်းချသည့် လုပ်ငန်းရှင်များနှင့်တွေ့ဆုံဆွေးနွေးခဲ့ ပါသည်။

        ထိုသို့တွေ့ဆုံဆွေးနွေးရာတွင် စားအုန်းဆီဖြန့်ဖြူးရောင်းချသည့် လုပ်ငန်းရှင်များအနေဖြင့် စားအုန်းဆီများကို ဖြန့်ဖြူးရောင်းချရာတွင် မွန်ပြည်နယ်အတွက် ယခင်တစ်လတန် (၂၀၀) ရရှိခဲ့ရာမှ ယခုဩဂုတ်လ(၁၂) ရက်နေ့မှစ၍ တန်(၄၀၀) ရရှိရာ ကုမ္ပဏီအလိုက်၊ မြို့နယ်များ၏ လူဦးရေအမျိုးအစားအလိုက် အချိုးကျခွဲဝေခြင်း၊ ဈေးနှုန်းမြှင့်တင်ရောင်းချခြင်းမပြုကြရန်၊ သင့်တင့်မျှတသည့်ဈေးနှုန်းဖြင့်သာရောင်းချကြရန်၊ နေရာအနှံ့ရောက်ရှိအောင် ဖြန့်ဖြူးပေးရန်၊ ဈေးနှုန်းမြှင့်တင်ရန်ရည်ရွယ်၍ သိုလှောင်ခြင်းမပြုလုပ်ရန်ဆွေးနွေးခဲ့ပြီး စားအုန်းဆီဈေးနှုန်းများကို အဆမတန်ဈေးနှုန်းမြှင့်တင်ရောင်းချခြင်းများပြုလုပ်ပါက တည်ဆဲဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်းဆွေးနွေးခဲ့သည်။

       စားသုံးသူရေးရာဦးစီးဌာနအနေဖြင့် သက်ဆိုင်ရာဌာနများပါဝင်သော မြေပြင်ကွင်းဆင်းစစ်ဆေးရေးအဖွဲ့နှင့်ပူးပေါင်း၍ စားအုန်းဆီ လက်လီ/လက်ကားအရောင်းဆိုင်များ၌ စားအုန်းဆီ များအား ဈေးနှုန်းအဆမတန်မြှင့်တင်ရောင်းချခြင်းရှိ/မရှိ စစ်ဆေးဆောင်ရွက်လျက်ရှိကြောင်းသိရှိရပါသည်။

DOCA(မွန်)

       မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ (၁၂-၈-၂၀၂၄)ရက်နေ့၊ နံနက်(၀၉:၃၀)နာရီအချိန်တွင် ပခုက္ကူမြို့ပေါ်ရှိ အလှကုန်ဆိုင်(၄)ဆိုင်အား  FDA ၏ တားမြစ်ဓာတုပစ္စည်းများပါဝင်မှုမရှိသော်လည်း မှတ်တမ်းတင်ထားခြင်းမရှိသော အလှကုန်ပစ္စည်း KERATIN (Hair Treatment)၊  ချင်းဆံပင်ပေါင်းဆေး၊  Pony Beauty (Toner)၊  MINGYA၊ BIOAOUA (Lotion) များရောင်းချခြင်းရှိ/ မရှိ ဈေးကွက်စောင့်ကြည့်စစ်ဆေးခဲ့ကြောင်းသိရသည်။

          တားမြစ်ဓာတုပစ္စည်းများပါဝင်မှုမရှိသော်လည်း မှတ်တမ်းတင်ထားခြင်းမရှိသော အလှကုန်ပစ္စည်း KERATIN (Hair Treatment)၊  ချင်းဆံပင်ပေါင်းဆေး၊  Pony Beauty (Toner)၊  MINGYA၊ BIOAOUA (Lotion) များရောင်းချခြင်းမရှိကြောင်းစစ်ဆေးတွေ့ရှိရပြီး ဈေးဆိုင်ပိုင်ရှင်များအား မှတ်တမ်းတင်ထားခြင်းမရှိသော အလှကုန်ပစ္စည်းကိုရောင်းချခြင်းမပြုကြရန်နှင့် ကုန်အညွှန်းအမှတ်အသားများပြည့်စုံစွာပါရှိသည့် ကုန်စည်များကိုသာရောင်းချကြရန်၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉)နှင့်အညီ ပြည့်စုံစွာဖော်ထားရှိသော ကုန်စည်များကိုသာရောင်းချကြရန်၊ သက်တမ်းလွန်ပစ္စည်းများကိုရောင်းချခြင်းမပြုရန် အသိပညာပေးဆွေးနွေးခဲ့ကြောင်းသိရှိရပါသည်။

DOCA(မကွေး)

       မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှဝန်ထမ်းများသည် (၉-၈-၂၀၂၄)ရက်နေ့၊ နံနက် (၀၉:၀၀)နာရီအချိန်တွင် မကွေးမြို့၊ ရန်ပယ်စျေးအတွင်းရှိ ကုန်စုံဆိုင်များ၌ အစားအသောက်နှင့်ဆေးဝါးကွပ်ကဲရေးဦးစီးဌာန၊ စျေးတာဝန်ခံ(စည်ပင်သာယာရေးအဖွဲ့)တို့နှင့်ပူးပေါင်းပြီး စျေးကွက်အတွင်းရှိ ကုန်စည်များအား နမူနာဝယ်ယူ၍ Mobile Lab Van  ဖြင့်စစ်ဆေးခဲ့ကြောင်းသိရသည်။

        ပဲပြား၊ ပိတ်ဆွယ်၊ ကြက်အူချောင်း၊ ပုစွန်ဆားနယ်၊ မုန့်ဟင်းခါးဖတ်၊ ခေါက်ဆွဲဖတ်၊ အသားတု၊ အရောင်တင်မှုန့်၊ ငရုတ်သီးမှုန့်၊ နနွင်းမှုန့်၊ ငါးအုံးအရိုး၊ ငါးပိ၊ လက်ဖက်၊ မျှစ်(အဖြူ) စသည့် ကုန်စည်နမူနာ(၁၄)မျိုးအားဝယ်ယူခဲ့ပြီး ပဲပြား၊ ပိတ်ဆွယ်၊ မုန့်ဟင်းခါးဖတ်၊ ခေါက်ဆွဲဖတ်၊ အသားတု၊ လက်ဖက်၊ မျှစ်(အဖြူ)တို့အား ရန်ပယ်စျေး၌ပင် အစားအသောက်နှင့်ဆေးဝါးကွပ်ကဲရေးဦးစီးဌာနမှ Mobile Lab Van  ဖြင့် ချက်ချင်းစစ်ဆေးခဲ့ရာ အစားအ‌သောက်များတွင် သုံးစွဲခွင့်မပြုသော Sulfiting Agent (ချွတ်ဆေး)များသုံးစွဲထားခြင်းမရှိကြောင်းနှင့် ကျန်ပစ္စည်း(၇)မျိုးမှာ ခွင့်မပြုဆိုးဆေးပါဝင်မှုရှိ/မရှိသိရှိနိုင်ရန်အတွက် အစားအသောက်နှင့်ဆေးဝါးကွပ်ကဲ‌ရေးဦးစီးဌာနဓာတ်ခွဲခန်းသို့ ပေးပို့စစ်ဆေးသွားမည်ဖြစ်ပြီး ဓာတ်ခွဲစမ်းသပ်ချက်အဖြေရရှိပါက သက်ဆိုင်ရာစျေးများနှင့် မိတ်ဖက်ဌာနတို့အား အသိပေးအကြောင်းကြားဆောင်ရွက်သွားမည်ဖြစ်ကြောင်းသိရှိရပါသည်။

DOCA(မကွေး)

      စားသုံးသူရေးရာဦးစီးဌာန၊ မွန်ပြည်နယ် မော်လမြိုင်ခရိုင်၊ မုဒုံမြိုနယ်တာဝန်ခံသည် (၉-၈-၂၀၂၄)ရက်နေ့တွင် မုဒုံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ မုဒုံမြို့နယ်၊ ဝက်တဲကျေးရွာ အခြေခံပညာမူလတန်းကျောင်း၌ စားသုံးသူကာကွယ်ရေးဆိုင်ရာ အသိပညာပေးဟောပြောဆွေးနွေးပွဲကျင်းပခဲ့ပါသည်။

        အဆိုပါဟောပြောဆွေးနွးပွဲတွင် မုဒုံမြို့နယ်၊ ဝက်တဲကျေးရွာ အခြေခံပညာမူလတန်းကျောင်း၊ ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီး မုဒုံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးအရာရှိက စာဖတ်ခြင်း၏အကျိုးကျေးဇူးများ၊ လူကုန်ကူးမှုအန္တရာယ်တားဆီးကာကွယ်ရေးဆိုင်ရာအကြောင်းအရာများ၊ မူးယစ်ဆေးဝါးအန္တရာယ်တားဆီးကာကွယ်ရေးအကြောင်းအရာများကို ဟောပြောဆွေးနွေးခဲ့ပြီး စားသုံးသူရေးရာဦးစီးဌာန၊ မုဒုံမြို့နယ်တာဝန်ခံကလည်း ဦးစီးဌာန၏ ရည်မှန်းချက်၊ မျှော်မှန်းချက်များ၊ စားသုံးသူအကာအကွယ်ပေးရေးဥပဒေပါ ပြဋ္ဌာန်းချက်များဖြစ်သည့် စားသုံးသူအခွင့်အရေးနှင့်တာဝန်များ၊ ကုန်ညွှန်းအမှတ်အသားနှင့်ပတ်သက်သည့် ဥပဒေပါ ပြဋ္ဌာန်းချက်များ၊ ကုန်စည်နှင့်ဝန်ဆောင်မှုများအား ရွေးချယ်ဝယ်ယူသုံးစွဲရာတွင် သတိပြုရမည့်အချက်များ၊ စားသုံးသူနစ်နာဆုံးရှုံးမှုများဖြစ်ပေါ်ပါက တိုင်ကြားနိုင်သည့်နည်းလမ်းများအား ဟောပြောဆွေးနွေးခဲ့ပြီး၊ ကျောင်းအုပ်ဆရာမကြီးအား စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များပေးအပ်ခဲ့ခြင်း၊ နံရံကပ်စာစောင်များပြသခြင်း စသည်ဖြင့် အသိပညာများဟောပြောဆွေးနွေးခဲ့ပြီးး ဟောပြောပွဲသို့ ဆရာ/ဆရာမ (၈)ဦးနှင့် ကျောင်းသား/ကျောင်းသူ (၅၃)ဦ တက်ရောက်ခဲ့ကြောင်းသိရှိရပါသည်။

DOCA(မွန်)

      အထက်ဌာနချပြသတင်းအရ ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံကွပ်ကဲမှုဖြင့် သင်္ဃန်ကျွန်းခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့၊ အရှေ့ပိုင်းခရိုင်စားသုံးသူရေးရာဦးစီးဌာန၊ ခရိုင်ရဲတပ်ဖွဲ့မှူးဦးဆောင်၍ အကောက်ခွန်ဦးစီးဌာန၊ အထွေထွေအုပ်ချုပ်‌‌ရေးဦးစီးဌာန၊ ရပ်ကွပ်အုပ်ချုပ်ရေးမှူးပါဝင်သော ပူပေါင်းအဖွဲ့သည် ၁၀-၈-၂၀၂၄ ရက်နေ့၊ နေ့လယ် (၁၄:၀၀) နာရီအချိန်တွင် သင်္ဃန်းကျွန်မြို့နယ်၊ လေးထောင့်ကန်ရပ်ကွက်၊ ဦးဘဟန်လမ်း၊ ရထားသံလမ်းအနီးရှိ အမှတ်(၈၀)၊ မြေညီထပ်အား ရှောင်တခင်ဝင်ရောက်စစ်ဆေးခဲ့ကြောင်းသိရှိရပါသည်။

        ထိုသို့စစ်ဆေးရာတွင် ပိုင်ရှင်ဖြစ်သူမှာ PKZ အမည်ဖြင့် ပြည်တွင်းထုတ် အရက်၊ ဘီယာ၊ အချိုရည်အမျိုးမျိုးတို့ကို ‌ သက်ဆိုင်ရာဌာနများ၏ ထောက်ခံချက်၊ လိုင်စင်ဖြင့် ရောင်းချလျက်ရှိနေကြောင်း စိစစ်တွေ့ရှိရကြောင်းသိရှိရပါသည်။

DOCA(ရန်ကုန်)