HighLight News

       ရှမ်းပြည်နယ်(မြောက်ပိုင်း)၊ ကျောက်မဲခရိုင်၊ သီပေါမြို့နယ်တွင် (၉-၄-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် ပန်းတိမ်မြောက်ရပ်ကွက်ရှိ “ရွှေဘရားသား” စိုက်ပျိုးရေးသုံးပစ္စည်းမျိုးစုံအရောင်းဆိုင်သို့သွားရောက်၍ မြန်မာစာကုန်ညွှန်းအမှတ်အသားပြည့်စုံမှန်ကန်စွာပါဝင်သော ကုန်ပစ္စည်းများရောင်းချမှုရှိစေရေးအတွက် အသိပညာပေးဆွေးနွေးခဲ့ကြောင်းသိရသည်။

        ဟောပြောဆွေးနွေးပွဲတွင် သီပေါမြို့နယ်တာဝန်ခံ ဒေါ်လင်းလင်းထွန်းက စီးပွားရေးလုပ်ငန်းရှင်အား စားသုံးသူကာကွယ်ရေးဥပဒေ (၂၀၁၉)၊ အခန်း(၁၈) ပါ ကုန်ညွှန်းအမှတ်အသားပြည့်စုံစွာဖော်ပြခြင်းနှင့်ပတ်သက်၍ စားသုံးသူများအတွက် ဘေးအန္တရာယ်ကင်းရှင်းပြီး သတင်းအချက်အလက်များပြည့်စုံစွာထည့်သွင်း ဖော်ပြမှသာလျှင် စားသုံးသူများစိတ်ချစွာအသုံးပြုလာနိုင်မည်ဖြစ်ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉) တွင် မြန်မာဘာသာဖြင့်မဖြစ်မနေ ကုန်ညွှန်းအမှတ်အသားများကိုထည့်သွင်းဖော်ပြရမည်ဖြစ်၍ စီးပွားရေးလုပ်ငန်းရှင်များလိုက်နာရမည့်တာဝန်ဖြစ်ကြောင်းနှင့် ဥပဒေတွင်ပြဋ္ဌာန်းထားသည့် တားမြစ်ချက်များ၊ စီမံခန့်ခွဲရေး အရေးယူခြင်းများကို အသိပညာပေးဆောင်ရွက်ခဲ့ပြီး ဧပြီလ ဒုတိယပတ်တွင်ဖြစ်ပေါ်နေသော ဓာတ်မြေဩဇာဈေးနှုန်းများမှာ (၅၀) ကီလိုဂရမ်တစ်အိတ်လျှင် ရွှေတောင်ပုလဲ (၄၆.၀%) မှာ (၈၅,၀၀၀)ကျပ်၊ မြှားကမ္ဘာ(၁၅:၉:၈) မှာ  (၉၁,၀၀၀) ကျပ်၊ စီပီဆင်ဖြူတော်တစ်အိတ်လျှင် (၉၅,၀၀၀) ကျပ်၊ စိုးမိုးမိုင်မူလလက်ဟောင်းတစ်အိတ်လျှင် (၈၁,၀၀၀) ကျပ်နှင့် ဒို့တောင်သူ ယူရီးယားတစ်အိတ်လျှင် (၈၉,၅၀၀) ကျပ်ရှိကြောင်းသိရှိရပါသည်။ ဓာတ်မြေဩဇာဈေးနှုန်းများမှာ ယခင်အပတ်ဈေးနှုန်းများအတိုင်း တည်ငြိမ်လျက်ရှိပြီး စိုက်ပျိုးရာသီဖြစ်သော်လည်း တောင်သူများ၏ ဓာတ်မြေဩဇာဝယ်ယူမှုနည်းပါးသောကြောင့်  အရောင်းအေးလျက်ရှိကြောင်းသိရှိရပါသည်။

DOCA(ရှမ်း)

     စားသုံးသူရေးရာဦးစီးဌာန၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံနှင့် ဝန်ထမ်းများသည် ၂၀၂၄ခုနှစ်၊ ဧပြီလ(၈)ရက်နေ့၊ နံနက်(၀၉:၃၀)နာရီအချိန်တွင် ချောင်းဆုံမြို့နယ်၊ ကုလားဘီကျေးရွာရှိ သဘာဝမြေဩဇာထုတ်လုပ်သော လုပ်ငန်းရှင်နှင့်သွားရောက်တွေ့ဆုံခဲ့သည်။

     ထိုသို့သွားရောက်တွေ့ဆုံရာတွင် ချောင်းဆုံမြို့နယ်တာဝန်ခံက လုပ်ငန်းရှင်အား သဘာဝမြေဩဇာလုပ်ငန်းစတင်တည်ထောင်သောခုနှစ်၊ ကုန်ကြမ်းရရှိမှုအခြေအနေ၊ တစ်အိတ်ထုတ်လုပ်မှုကုန်ကျစရိတ်၊  တစ်နေ့တာထုတ်လုပ်မှု၊ ဖြန့်ဖြူးသောဈေးကွက်၊ တစ်အိတ်ဈေးနှုန်း၊ အလုပ်အကိုင်အခွင့်အလမ်းဖန်တီးပေးနိုင်မှုအခြေအနေတို့ကို ဆွေးနွေးမေးမြန်းခဲ့ရာ လုပ်ငန်းရှင်က သဘာဝမြေဩဇာလုပ်ငန်းကို ၂၀၂၂ခုနှစ်တွင် စတင်တည်ထောင်ခဲ့ပြီး၊ တစ်နေ့ကို အိတ်၅၀ခန့် ထုတ်လုပ်ကြောင်း၊ တစ်အိတ်လျှင် ဈေးနှုန်း ၁၈၀၀၀ကျပ်ဖြင့် ချောင်းဆုံမြို့နယ်၊ မော်လမြိုင်မြို့နယ်၊ ကတိုးကျေးရွာ၊ ကော့နှပ်ကျေးရွာ၊ တနင်္သာရီတိုင်း၊ထားဝယ်မြို့နယ်အထိ ဖြန့်ဖြူးကြောင်းသိရှိရသည်။ ကုန်ကြမ်းကို ချောင်းဆုံမြို့နယ်အတွင်းသာဝယ်ယူရရှိပြီး တစ်အိတ်ထုတ်လုပ်မှုကုန်ကျစရိတ်မှာ ၁၄၀၀၀ကျပ်ခန့်ရှိပြီး၊ တစ်အိတ်လျှင် အမြတ် ၄၀၀၀ကျပ်ခန့်ကျန်ရှိသဖြင့် တွက်ချေကိုက်မှုရှိကြောင်း၊ အလုပ်အကိုင်အခွင့်အလမ်းဖန်တီးပေးနိုင်မှုအနေဖြင့် အလုပ်သမားဦးရေ ၇ဦးကို အလုပ်အကိုင်ဖန်တီးပေးနိုင်ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုနှင့် ပခုက္ကူခရိုင်ဦးစီးမှူးရုံး၏ အနီးကပ်ကြီးကြပ်မှုတို့ဖြင့် ဒုတိယခရိုင်ဦးစီးမှူး ဦးဇော်ထွန်းဦးနှင့် ဝန်ထမ်းများသည် (၄-၄-၂၀၂၄)ရက်နေ့၊ နံနက်(၀၉:၃၀)နာရီအချိန်တွင် အသေးစားစက်မှုလက်မှုဦးစီးဌာန၊ ရက်ကန်းနှင့် အသက်မွေးပညာသင်တန်းကျောင်းသို့သွားရောက်၍ ဆရာ၊ ဆရာမ(၁၀)ဦး၊ သင်တန်းသူ/ သင်တန်းသား (၂၂)ဦး၊ စုစုပေါင်း (၃၂)ဦးတို့အား စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ပေးခဲ့ပါသည်။

       ထိုသို့ဟောပြောဆွေးနွေးရာတွင် ဒုတိယခရိုင်ဦးစီးမှူးက ဌာန၏သမိုင်းကြောင်းနှင့်  လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ စားသုံးသူကာကွယ်ရေးဥပဒေပါ အကြောင်းအရာများ၊ စားသုံးသူပြည်သူများအတွက် ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချမှုရှိစေရေးတို့ကို ဆောင်ရွက်နေရုံသာမက စားသုံးသူနစ်နာဆုံးရှုံးမှုများအတွက် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ဖွင့်လှစ်ထားရှိမှုကို Power Point ဖြင့် အသေးစိတ်ရှင်းလင်းဆွေးနွေးခဲ့ပြီး စားသုံးသူထိခိုက်နစ်နာမှုနှင့် စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စရပ်များကို စုံစမ်းမေးမြန်းရန်အတွက် Consumer Call Center (၁၅၃၅) ကိုဖွင့်လှစ်ထားကြောင်းနှင့် ၎င်းနောက် တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်းကိုလည်း အကျယ်တဝင့်ရှင်းလင်းဆွေးနွေးခဲ့ပါသည်။

    ဆက်လက်၍ စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးက လူတော်များဖြစ်ရန်အတွက် အတတ်ပညာများလိုအပ်ပြီး လူကောင်းများဖြစ်ရန်အတွက်မှု အသိပညာများစွာသိရှိရမည်ဖြစ်ကြောင်း၊ လူတော်လူကောင်းဖြစ်ရန်အတွက် အတတ်ပညာရောအသိပညာပါ နှစ်မျိုးလုံးသိရှိရန်လိုအပ်ကြောင်း၊ စားသုံးသူများတွင် စားသုံးသူအခွင့်အရေးများရှိ၍ ၎င်းအခွင့်အရေးများကိုသိရှိရန်လိုအပ်ကြောင်း၊ အခွင့်အရေးကိုရယူနိုင်မှသာလျှင် နစ်နာဆုံးရှုံးမှုများမရှိဘဲ နောင်အနာဂတ်၌ ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ ကုန်စည်များကိုဝယ်ယူသုံးစွဲရာတွင် သတင်းအချက်အလက်များပြည့်စုံစွာရယူနိုင်မှ သာလျှင် ဘေးအန္တရာယ်ကင်းရှင်းစွာအသုံးပြုနိုင်၍ စိတ်ကျေနပ်မှုများရရှိမည်ဖြစ်ကြောင်း၊ အမှန်တကယ်နစ်နာဆုံးရှုံးမှုများဖြစ်ပေါ်ပါက မှန်ကန်ပြည့်စုံသော အထောက်အထားများနှင့်အတူ မိမိတို့ဌာနသို့ တိုင်ကြားစေခြင်းဖြင့် ကုစားခွင့်များရရှိမည်ဖြစ်ကြောင်း၊ တာဝန်များကိုလည်း လိုက်နာရန်လိုအပ်ကြောင်း၊ စားသုံးသူများအား ကုန်စည်များဝယ်ယူသုံးစွဲခြင်းနှင့်စပ်လျဉ်း၍ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြချက်များအကြောင်းကို အသေးစိတ်ရှင်းလင်းဆွေးနွေးခြင်း၊ စားသုံးသူများအနေဖြင့် ကုန်စည်နှင့်ဝန်ဆောင်မှုများကို ဝယ်ယူသုံးစွဲရာတွင် မှန်ကန်စွာရွေးချယ်တတ်ခြင်းဖြင့် လုံခြုံစိတ်ချရမှုရှိပြီး ဘေးအန္တရာယ်ကင်းရှင်းမည်ဖြစ်ကြောင်း၊ ထုတ်ကုန်လုံခြုံစိတ်ချရမှုရှိသော ကုန်စည်များအား အသိတရား၊ သတိထား၍ ဝယ်ယူသုံးစွဲစေလိုကြောင်း၊ တချို့ကုန်စည်များတွင် ထုပ်ပိုးမှုသာလှပပြီး စားသုံးရန်မသင့်သည့်အစားအစာများကို သတိလက်လွတ်ဝယ်ယူသုံးစွဲမှုမပြုစေရန်နှင့် သေချာစွာစိစစ်ရွေးချယ်ပြီးမှသာ သုံးစွဲစေလိုကြောင်း အသေးစိတ်ရှင်းလင်းဆွေးနွေးခဲ့ပြီး အမှတ်တရလက်ဆောင်ပေးအပ်ခြင်း၊ စားသုံးသူကာကွယ်ရေးဥပဒေစာအုပ်နှင့် စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုနှင့် ပခုက္ကူခရိုင်ဦးစီးမှူး၏ ကြီးကြပ်မှုတို့ဖြင့် ဆိပ်ဖြူမြို့နယ်တာဝန်ခံ ဦးဇော်နေလင်းနှင့်ဝန်ထမ်းသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၃-၄-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် စားသုံးသူများဘေးကင်းလုံခြုံမှုရှိစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် ဆိပ်ဖြူမြို့၊ ပတ္တမြားဈေးအတွင်းရှိ စားသုံးဆီရောင်းဝယ်ရေးဆိုင်များသို့ရောက်ရှိပြီး စားသုံးဆီများကြိတ်ခွဲထုတ်လုပ်ရောင်းချဖြန့်ဖြူးလျက်ရှိသော ဆီစက်လုပ်ငန်းရှင်များနှင့်တွေ့ဆုံ၍ အသိပညာပေးဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင် ဆိပ်ဖြူမြို့နယ်တာဝန်ခံက စားသုံးဆီများကြိတ်ခွဲထုတ်လုပ်ရောင်းချခြင်းနှင့်ပတ်သက်၍ စားသုံးသူကာကွယ်ရေး(၂၀၁၉)ပါ စီးပွားရေးလုပ်ငန်းရှင်များ၏တာဝန်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ စားသုံးသူများဘေးကင်းလုံခြုံစိတ်ချရမှုရှိစေရေးအတွက် စားသုံးဆီထုတ်လုပ်ရောင်းဝယ်ရေးလုပ်ငန်းရှင်များအနေဖြင့် ဆီဆိုင်များ၌ ကြိတ်ခွဲထုတ်လုပ်ရာတွင် သန့်ရှင်းသပ်ရပ်စွာကြိတ်ခွဲထုတ်လုပ်ဆောင်ရွက်ရေး အသိပညာပေးပြောကြားခဲ့ပြီး ပဲဆီ၊ နှမ်းဆီများကို ရောစပ်မှုဆီအမျိုးအစားအလိုက် စားသုံးသူများမြင်သာအောင် ကုန်အညွှန်းအမှတ်အသားပြည့်စုံစွာရေးသားဖော်ပြပြီးရောင်းချသွားရန်နှင့် အချင်အတွယ်မှန်ကန်စေရေးနှင့် စားသုံးသူများ ဝယ်ယူသုံးစွဲရာတွင် နစ်နာမှုမရှိစေရေး အသိပညာပေးဆွေးနွေးဆောင်ရွက်ခဲ့ပြီး စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် (၂/၂၀၁၉)နှင့်အညီ ပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို ထည့်သွင်းဖော်ပြရမည်ဖြစ်ပြီး ကုန်အညွှန်းအမှတ်အသားပြည့်စုံခြင်းမရှိသော စားသုံးဆီများ ဈေးကွက်အတွင်းရောင်းချသည်ကို စစ်ဆေးတွေ့ရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်း အသိပညာပေးဆွေးနွေးပြီးနောက် စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်၊ တိုင်းဒေသကြီးဦးစီးမှူးလမ်းညွှန်မှုဖြင့် ခရိုင်ဦးစီးမှူး ဦးဝေဠုအောင်နှင့် ဝန်ထမ်းများသည် (၃-၄-၂၀၂၄)ရက်နေ့၊ နံနက်(၁၀:၃၀)နာရီအချိန်တွင် ပခုက္ကူမြို့ပေါ်ရှိ ဓူဝံပဲကြော်လုပ်ငန်း၊ အောင်မြင့်ထွန်းပဲကြော်လုပ်ငန်း၊ ကျော်မြင့်ထွန်းပဲကြော်လုပ်ငန်းများသို့သွားရောက်၍ လုပ်ငန်းလည်ပတ်မှုနှင့် စက်မှုကုန်ကြမ်းဆီသုံးစွဲမှုအခြေအနေများကို ကွင်းဆင်းစစ်ဆေးခဲ့ပါသည်။

     ထိုသို့စစ်ဆေးရာတွင် ဓူဝံပဲကြော်လုပ်ငန်း၊ အောင်မြင့်ထွန်းပဲကြော်လုပ်ငန်း၊ ကျော်မြင့်ထွန်းပဲကြော်လုပ်ငန်းများ၌ အသုံးပြုသောပဲအမျိုးအစားများမှာ ပဲကြီး၊ ပဲဇီးကွက်၊ တရုတ်ပဲ၊ စားတော်ပဲ၊ မြေပဲဆံတို့ကိုအသုံးပြုပြီး၊ ဆီသုံးစွဲမှုအနေဖြင့် လုပ်ငန်းအမျိုးအစားပေါ်မူတည်၍ (၁)ရက်လျှင် ဆီပေပါ(၄)လုံးမှ (၆)လုံးအထိသုံးစွဲရကြောင်းနှင့် လုပ်သားအခြေအနေများမှာ ပဲကြော်လုပ်သား (၆)ဦးမှ (၁၂)ဦး၊ ပဲချွတ်လုပ်သားဦးရေမှာ (၅၀မှ ၃၀၀)အထိရှိကြောင်း လုပ်ငန်းရှင်များထံမှသိရှိရပါသည်။ လုပ်သားခများမှာ အမျိုးသားလုပ်သားခ (၁)ဦးလျှင် ကျပ်(၁၀၀၀၀မှ ၁၃၀၀၀)၊ အမျိုးသမီးပဲချွတ်ခမှာ (၁) ပိဿာလျှင် ကျပ်(၂၀၀မှ ၂၅၀) ရရှိကြောင်း၊ (၁)ရက်လျှင် ပဲကြော် (၃၀)ပိဿာပါအိတ်ရေ (၅၀မှ ၆၀)အထိကြော်ရပြီး၊ ကုန်ချောထွက်ရှိမှုမှာ ပိဿာ(၁၅၀၀မှ ၁၈၀၀)ထွက်ရှိပြီး၊ ပဲကြော် တစ်ပိဿာလျှင်  ပဲကြော်အမျိုးအစားကိုလိုက်၍  နှစ်ပြန်ကြော်တစ်ပိဿာလျှင် ကျပ်(၁၀၀၀၀)၊ ရိုးရိုးပဲကြော်တစ်ပိဿာလျှင် ကျပ်(၈၅၀၀)ဖြင့်ရောင်းချနေကြောင်း၊ တင်ပို့မှုအနေဖြင့် ရန်ကုန်၊ မန္တလေး၊ နေပြည်တော်၊ မုံရွာ၊ တောင်ကြီး၊ ကလေးဝမြို့များသို့တင်ပို့နေရကြောင်း လုပ်ငန်းရှင်များထံမှသိရှိရပါသည်။

DOCA(မကွေး)