HighLight News

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်တာဝန်ခံ ဦးမြင့်ကြည်(ရုံးအုပ်)နှင့် ဝန်ထမ်းများသည် အစားအသောက်နှင့်ဆေးဝါးကွပ်ကဲရေးဦးစီးဌာန၊  အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ (၂-၄-၂၀၂၄)ရက်နေ့၊ နံနက်(၀၉:၀၀)နာရီအချိန်တွင် မင်းဘူးမြို့မ‌ဈေးအတွင်းရောင်းချနေသော စားသောက်ကုန်များမှာ စားသုံးရန်သင့်/မသင့် ရှောင်တခင်ဝင်ရောက်စစ်ဆေးခဲ့ပါသည်။

      ထိုသို့စစ်ဆေးရာတွင် ဈေးအတွင်းရှိ စားသောက်ကုန်များဖြစ်သည့် မုန့်ဖတ်၊ နနွင်းမှုန့်၊ အရောင်တင်၊ အမဲသွေး၊ ဆိတ်သွေး၊ ပုစွန်ခြောက်၊ ပဲပြား၊ ပိတ်ဆွယ်၊ ခံတက်ချဉ်၊ လက်ဖက်၊ ငရုတ်သီးမှုန့်၊ ကြက်အူချောင်း၊ ဝက်အူချောင်း၊ ငါးပိထောင်း၊ အသားတု၊ ခေါက်ဆွဲခြောက်၊ ဘူးချဉ်၊ ပိန္နဲသီး၊ ချင်းပေါက်တို့ကို နမူနာဝယ်၍စစ်ဆေးခြင်း၊ မုန့်ဖတ် (၄)ဆိုင်၊ အရောင်တင် (၂)ဆိုင်၊ ကြက်အူချောင်း(၂)ဆိုင်နှင့် ဝတ်အူချောင်း(၂)ဆိုင်တို့မှ အမျိုးအမည်ပေါင်း (၂၆)မျိုးအား ဓာတ်ခွဲစမ်းသပ်စစ်ဆေးခဲ့ရာ ချင်းပေါက်တစ်မျိုးကိုသာ ချွတ်ဆေးနှင့် တာရှည်ခံဆေးများသုံးစွဲထားသဖြင့် စားသုံးရန်မသင့်ကြောင်းသိရှိရပါသည်။ ထို့နောက် မူရင်းထုတ်လုပ်ဖြန့်ဖြူးရောင်းချသော ဦးစိုး၊ စက်ဝိုင်းရပ်၊ အမှတ်(၃)ရပ်ကွက်နေအိမ်သို့ ပေါက်ပြီးသောချင်း၊ ပထမရေစိမ်သောချင်း၊ ဒုတိယရေစိမ်သောချင်းနှင့် ဈေးကွက်အတွင်းသို့ တင်ပို့ရန်ချင်းတို့အား နမူနာကောက်ယူ၍စစ်ဆေးခဲ့ရာ ဈေးကွက်အတွင်းသို့ ပို့မည့်နမူနာတွင် ချွတ်ဆေးနှင့်တာရှည်ခံဆေးများ သုံးစွဲထားသည်ကိုတွေ့ရှိရသဖြင့် သိမ်းဆည်းခဲ့ပြီး နောက်နောင် ဤကဲ့သို့ မသုံးစွဲပါဟု ခံဝန်ကတိရေးထိုးစေခြင်းနှင့် ဈေးကွက်အတွင်း ထပ်မံတွေ့ရှိပါက စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း ရှင်းလင်းပြောကြားခဲ့ကြောင်းသိရှိရပါသည်။

DOCA(မကွေး)

      စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်မှ မော်လမြိုင်မြို့နယ်တာဝန်ခံ ဦးအောင်ကိုကိုသည် ၂၀၂၄ခုနှစ်၊ ဧပြီလ (၂) ရက်နေ့၊ နံနက်(၁၀း၀၀)နာရီအချိန်တွင် ရွှေမြိုင်သီရိ စက်ကွင်းရပ်ကွက်ရှိ “ မြ” တံဆိပ် အိုင်အိုဒင်းဆားစက်လုပ်ငန်းရှင်နှင့်တွေ့ဆုံ၍ ဆွေးနွေးခဲ့သည်။

    ထိုသို့တွေ့ဆုံဆွေးနွေးရာတွင် ဆားကုန်ကြမ်းပြတ်လပ်မှုရှိ/မရှိ၊ ကုန်ကြမ်းဝယ်ယူသည့်နေရာ၊ အလုပ်သမားအရေအတွက်နှင့် အလုပ်သမားခက်ခဲမှုရှိ/မရှိ၊ ဆားလုပ်ငန်း၏ တစ်ရက် ထုတ်လုပ်မှုပမာဏ၊ အော်ဒါရရှိမှုအခြေအနေများအား မေးမြန်းဆွေးနွေးခဲ့ပါသည်။ ဆက်လက်၍ လုပ်ငန်းရှင်များအနေဖြင့် စျေးကွက်အတွင်း ဖြန့်ဖြူးရောင်းချလျက်ရှိသော ကုန်စည်များနှင့် ပတ်သက်၍ စားသုံးသူကာကွယ်ရေးဥပ‌ဒေ ၂၀၁၉၊  အခန်း(၁၈) တွင်ပြဋ္ဌာန်းထားသော ကုန်အညွှန်းအမှတ်အသားဆိုင်ရာအချက်များကို ပြည့်စုံမှန်ကန်စွာဖော်ပြရမည်ဖြစ်ကြောင်း၊ ကုန်အညွှန်းအမှတ်အသားမပြည့်စုံသောကုန်စည်များအား ရောင်းချခွင့်မရှိကြောင်းနှင့် ရောင်းချပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ဆွေးနွေးခဲ့ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် ၂၀၂၄ခုနှစ်၊ ဧပြီလ (၂) ရက်နေ့၊ နံနက်(၁၀း၀၀)နာရီအချိန်တွင် မော်လမြိုင်မြို့၊ စက်မှုဇုန်ရှိ ကောင်းထက်အိုင်အိုဒင်းဆားလုပ်ငန်းစက်ရုံလုပ်ငန်းများအား ကွင်းဆင်းလေ့လာသည့် သူနာပြုသင်တန်းကျောင်းမှ သင်တန်းသူ/သင်တန်းသား(၆၀)ဦးအား စားသုံးသူ ကာကွယ်ရေးအသိပညာပေးဟောပြောခဲ့ပါသည်။

       အဆိုပါဟောပြောပွဲတွင် စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူကာကွယ်ရေးဥပ‌‌‌‌ဒေပါ စားသုံးသူများ၏အခွင့်အရေးများ၊ ကုန်စည်များဝယ်ယူအသုံးပြုသည့်အခါ စားသုံးသူကာကွယ်ရေးဥပဒေတွင်ပြဋ္ဌာန်းထားသည့် ကုန်အညွှန်းအမှတ်အသားပြည့်စုံစွာဖော်ပြပါရှိသော အစားအသောက်များကိုသာဝယ်ယူစားသုံးသင့်ကြောင်း၊ ဘေးအန္တရာယ်ကင်းရှင်းသော ကုန်စည်များကိုရွေးချယ်ဝယ်ယူသင့်ကြောင်း၊ ကုန်စည် (သို့မဟုတ်) ဝန်ဆောင်မှုများအပေါ် စားသုံးသူများနစ်နာဆုံးရှုံးမှုဖြစ်ပေါ်လျှင် စားသုံးသူရေးရာဦးစီးဌာနသို့ လူကိုယ်တိုင်လာရောက်၍သော်လည်းကောင်း၊ ဖုန်းဖြင့်သော်လည်းကောင်း၊ consumer call center (1535) သို့လည်းကောင်း တိုင်ကြားနိုင်ကြောင်းနှင့် တိုင်ကြားမှုအပေါ် ဆက်သွယ်ဖြေရှင်းဆောင်ရွက်ခဲ့သည်များအား ရှင်းလင်းဆွေး‌နွေးခဲ့ပါသည်။

       ဆက်လက်၍ စီးပွား‌ရေးလုပ်ငန်းရှင်များအနေဖြင့် အွန်လိုင်းမှ ရောင်းချလိုလျှင် ရောင်းချမှုအတွက် မှတ်ပုံတင်ရမည်ဖြစ်ကြောင်း၊ စားသုံးသူများအနေဖြင့်လည်း လိမ်လည်လှည့်ဖျားခြင်းမခံရစေရန် အွန်လိုင်းမှစျေးဝယ်လျှင် မှတ်ပုံတင်ထားသော လုပ်ငန်းများမှသာ ဝယ်ယူအသုံးပြုကြရန်ဆွေးနွေးခဲ့သည်။ ထို့နောက် သင်တန်းသား/သင်တန်းသူများ၏ စားသုံးသူကာကွယ်ပေးရေးအကြောင်းအရာများနှင့်ပတ်သက်၍ သိရှိလိုသည်များမေးခြင်းအပေါ်  ခရိုင်ဦးစီးမှူး ဒေါ်ဝါဝါမြိုင်က ရှင်းလင်းဆွေးနွေးခဲ့ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် (၂-၄-၂၀၂၄) ရက်နေ့တွင် မုဒုံမြို့၊ မြို့မ (၄) ရပ်ကွက်ရှိ “ဟင်္သာမင်းအမှတ်တံဆိပ် ကြက်ဥခေါက်ဆွဲ၊ ဂျုံခေါက်ဆွဲထုတ်လုပ်သည့် လုပ်ငန်းရှင်နှင့်တွေ့ဆုံခဲ့သည်။

      ထိုသို့တွေ့ဆုံရာတွင် မုဒုံမြို့နယ်တာဝန်ခံက လုပ်ငန်းရှင်အား ကုန်ထုတ်လုပ်မှုအခြေအနေများ၊ ဈေးနှုန်း၊ ဈေးကွက်အခြေအနေများကိုဆွေးနွေးမေးမြန်းခဲ့ရာ လုပ်ငန်းရှင်က ၎င်းတို့အနေဖြင့် ကြက်ဥခေါက်ဆွဲ (၁၅) ကျပ်သားအထုပ်များ၊ ဂျုံခေါက်ဆွဲ (၁၀) ကျပ်သားအထုပ်များကို ထုတ်လုပ်လျက်ရှိကြောင်း၊ တစ်နေ့လျှင် အထုပ်ရေ (၂၀၀) ခန့်ထုတ်လုပ်ကြောင်း၊ ကြက်ဥခေါက်ဆွဲ (၁၅) ကျပ်သားတစ်ထုပ်လျှင် (၁၅၀၀) ကျပ်၊ ဂျုံခေါက်ဆွဲ (၁၀) ကျပ်သားတစ်ထုပ်လျှင် (၁၀၀၀) ကျပ်ဖြင့်ရောင်းချကြောင်း၊ ဈေးကွက်အနေဖြင့် မုဒုံ၊ မော်လမြိုင်၊ သထုံမြို့များသို့ တင်ပို့ရောင်းချကြောင်း၊ အလုပ်အကိုင်အခွင့်အလမ်းအနေဖြင့် လုပ်သား (၅) ဦးကို အလုပ်အကိုင်ဖန်တီးပေးနိုင်ကြောင်းဆွေးနွေးခဲ့သည်။

       ဆက်လက်၍ မုဒုံမြို့နယ်တာဝန်ခံက စီးပွားရေးလုပ်ငန်းရှင်အား စားသုံးသူကာကွယ်ရေးဥပဒေတွင်ပြဋ္ဌာန်းထားသည့် စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြချက်ဆိုင်ရာ အကြောင်းအရာများကိုဆွေးနွေးခဲ့ကြောင်းသိရှိရပါသည်။

DOCA(မွန်)

     ၂၀၂၄ခုနှစ်၊ ဧပြီလ ၃ရက်နေ့၊ နံနက်(၁၀:၀၀) နာရီအချိန်တွင် စီးပွားရေးနှင့်ကူးသန်းရောင်း ဝယ်ရးဝန်ကြီးဌာန၊ စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူးရုံးမှ မော်လမြိုင်မြို့နယ်တာဝန်ခံနှင့် ဝန်ထမ်းများအဖွဲ့သည် မော်လမြိုင်မြို့၊ ပတ္တမြားဘုရားလမ်း၊ သွေးသောက်ကျေးရွာရှိ ပြည်မြန်မာမုန့်တိုက်မှ မုန့်လုပ်ငန်းရှင်နှင့် ဝန်ထမ်း (၁၀) ဦးအား စားသုံးသူကာကွယ်ရေးအသိပညာပေးဟောပြောဆွေးနွေးခဲ့ပါသည်။

     အဆိုပါဟောပြောဆွေးနွေးပွဲတွင် မြို့နယ်တာဝန်ခံ ဦးအောင်ကိုကိုက စားသုံးသူကာကွယ်ရေးဥပဒေ၏ ရည်ရွယ်ချက်များ၊ စားသုံးသူနှင့် စီးပွားရေးလုပ်ငန်းရှင်၏ အဓိပ္ပါယ်ဖော်ပြချက်များ၊ စားသုံးသူ၏အခွင့်အရေးများ၊ စီးပွားရေးလုပ်ငန်းရှင်များ၏တာဝန်များ၊ စီးပွားရေးလုပ်ငန်းရှင်များအနေဖြင့် မိမိတို့ထုတ်လုပ်ရောင်းချသည့် ကုန်စည်များအား ဈေးကွက်အတွင်း ဖြန့်ဖြူးရောင်းချမည်ဆိုပါက စားသုံးသူကာကွယ်ရေးဥပဒေ အခန်း (၁၈) တွင် ပြဋ္ဌာန်းထားသည့် ကုန်အညွှန်းအမှတ်အသားများကို မဖြစ်မနေဖော်ပြရမည်ဖြစ်ကြောင်း၊ ကုန်အညွှန်းအမှတ်အသားပြည့်စုံမှုမရှိသည့် ကုန်စည်များအား ဈေးကွက်အတွင်းဖြန့်ဖြူးရောင်းချခွင့်မရှိကြောင်းနှင့် ရောင်းချပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်သဖြင့် ကုန်အညွှန်းအမှတ်အသားမပြုလုပ်ရသေးပါက လာရောက်ပြုလုပ်ကြရန် တိုက်တွန်းရှင်းလင်းဆွေးနွေးခဲ့ပါသည်။

    ဆက်လက်၍ လုပ်ငန်းရှင်များအနေဖြင့် မိမိလုပ်ငန်းများရှိကုန်ပစ္စည်းများကို အွန်လိုင်းဖြင့်ရောင်းချမည်ဆိုပါက အွန်လိုင်းမှတ်ပုံတင်ခြင်းလုပ်ဆောင်ပြီးမှသာ ရောင်းချခွင့်ရှိမည်ဖြစ်ကြောင်းနှင့် အွန်လိုင်းမှတ်ပုံတင်ခြင်းနှင့်ပတ်သက်၍ သိလိုသည်များရှိပါက စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးသို့ လာရောက်လေ့လာစုံစမ်းနိုင်ကြောင်းသိရှိရပါသည်။

DOCA(မွန်)