HighLight News

    မွန်ပြည်နယ်၊ သထုံခရိုင်၊ စားသုံးသူရေးရာဦးစီးဌာန၊ ပေါင်မြို့နယ်၊ မြို့နယ်တာဝန်ခံရုံးမှ ဝန်ထမ်းများသည် (၂၁-၁၁-၂၀၂၃) ရက်နေ့တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့်ပူးပေါင်း၍ ပေါင်မြို့နယ်အတွင်းရှိ သောက်ရေသန့်စက်ရုံများအား ဈေးကွက်စောင့်ကြည့်စစ်ဆေးခဲ့ကြပါသည်။

  ထိုသို့ ကွင်းဆင်းစစ်ဆေးရာတွင် ဦးစားပေးကုန်စည်များအနက် (၁) မျိုးဖြစ်သည့် သောက်ရေသန့်များအား ဈေးကွက်အတွင်း စားသုံးသူပြည်သူများဘေးအန္တရာယ်ကင်းရှင်းစွာဝယ်ယူသုံးစွဲနိုင်စေရေးအတွက် သောက်ရေသန့်ဘူးများတွင် စားသုံးသူကာကွယ်ရေးဥပဒေပါအတိုင်း မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခုခုနှင့်တွဲလျက်ဖြစ်စေ ကုန်အညွှန်းအမှတ်အသားဖော်ပြထားခြင်းရှိ/မရှိ၊ သက်ဆိုင်ရာဌာနများ၏ ထောက်ခံချက်များ ဖော်ပြထားခြင်းရှိ/မရှိ စောင့်ကြည့်စစ်ဆေးခဲ့ရာ ကုန်အညွှန်းအမှတ်အသားများပြည့်စုံစွာဖော်ပြပါရှိသည်ကိုတွေ့ရှိရပြီး ရေသန့်လုပ်ငန်းရှင်များအား ကုန်အညွှန်းအမှတ်အသားများပြည့်စုံမှန်ကန်စွာပါရှိသည့် သောက်ရေသန့်ဘူးများကိုသာ ဈေးကွက်အတွင်းသို့ ထုတ်လုပ်ဖြန့်ဖြူးရောင်းချရန်ဆွေးနွေးခဲ့ပြီး မြန်မာနိုင်ငံစာသုံးသူကာကွယ်ရေးကော်မရှင်၏ (၂/၂၀၁၉) ညွှန်ကြားချက်အရ ကုန်စည်အုပ်စုအလိုက်  မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ်အချက်ပါရှိသော လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(မွန်)

    စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် (၂၂-၁၁-၂၀၂၃)  ရက်နေ့တွင်   ပြည်နယ်ဦးစီးမှူးရုံးခန်း၌ သထုံမြို့နယ်မှ ဆီလုပ်ငန်းရှင်နှင့်တွေ့ဆုံဆွေးနွေးခဲ့သည်။

   ထိုသို့တွေ့ဆုံဆွေးနွေးရာတွင် ပြည်နယ်ဦးစီးမှူးက မွန်ပြည်နယ်အနေဖြင့် စားဆီဖူလုံမှု (၁၄) ရာခိုင်နှုန်းသာရှိသဖြင့် မွန်ပြည်နယ်အတွက် စားသုံးဆီလိုအပ်ချက်များကို ပြည်နယ်အစိုးရအဖွဲ့၏ လမ်းညွှန်ကြီးကြပ်မှုဖြင့် စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီသို့ တင်ပြဆောင်ရွက်လျက်ရှိကြောင်း၊ မွန်ပြည်နယ်အတွက် ခွဲဝေရရှိသောစားအုန်းဆီများကို ပြည်နယ်အစိုးရအဖွဲ့၏လမ်းညွှန်မှုဖြင့် ပြည်နယ်အတွင်းရှိ မြို့နယ် (၁၀) မြို့နယ်သို့ လူဦးရေပေါ်မူတည်၍ အချိုးကျခွဲဝေရောင်းချပေးလျက်ရှိကြောင်း၊ ပြည်သူများလက်ဝယ် တိုက်ရိုက်ရောင်းချပေးမှုများတွင်လည်း သတ်မှတ်ဈေးနှုန်း၊ သတ်မှတ်တန်ချိန်အတိုင်း သတ်မှတ်နေရာများတွင် ရောင်းချပေးခြင်းရှိ/မရှိကိုလည်း မြို့နယ်အဆင့်ကြီးကြပ်ရေးကော်မတီများမှတစ်ဆင့် ကြီးကြပ်ဆောင်ရွက်ပေးလျက်ရှိပြီး ရောင်းချပေးခဲ့မှုမှတ်တမ်းများကို ပြန်လည်တင်ပြစေလျက်ရှိကြောင်း၊ မွန်ပြည်နယ်အတွင်းရှိ မြို့နယ်များ၏ရောင်းချမှုမှတ်တမ်းများကို စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှတစ်ဆင့် သက်ဆိုင်ရာဌာနများ၊ ပြည်နယ်အစိုးရအဖွဲ့သို့ အစီရင်ခံတင်ပြလျက်ရှိကြောင်း ဆွေးနွေးခဲ့ကြောင်းသိရှိရပါသည်။

DOCA(မွန်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ပခုက္ကူခရိုင်ဦးစီးမှူး၏ကြီးကြပ်မှုဖြင့် (၁၆-၁၁-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ပခုက္ကူခရိုင်ဦးစီးမှူးရုံး (CICC) ခန်းမ၌ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြုစေရန် Thursday Talk အသိပညာပေးဟောပြောဆွေးနွေးပွဲကျင်းပပြုလုပ်ခဲ့ရာ ဝန်ထမ်း(၁၇)ဦးတက်ရောက်ခဲ့ပါသည်။

    အဆိုပါ Thursday Talk အသိပညာပေးဆွေးနွေးပွဲတွင် စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူး ဦးဝေဠုအောင်က အဖွင့်အမှာစကားပြောကြားခဲ့ပြီး ဒုတိယဦးစီးမှူး ဒေါ်ခင်သူဇာက  ဈေးကွက်စောင့်ကြည့်စစ်ဆေးခြင်းလုပ်ငန်းစဉ်ဆိုင်ရာ ညွှန်ကြားချက်(၁/၂၀၂၂)ပါ အပိုဒ်(၁)မှ(၃၉)ထိ အသေးစိတ်ရှင်းလင်းဆွေးနွေးခြင်း၊ ဒုတိယဦးစီးမှူး ဒေါ်နွယ်နွယ်အေးက  စားသုံးသူကာကွယ်ရေးဥပဒေ(၂၀၁၉) ပြဋ္ဌာန်းချက်ပါ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးခြင်း၊ အခန်း(၁၂)ပါ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူတောင်းဆိုနိုင်သည့်အခွင့်အရေး၊ အခန်း(၁၃)ပါ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းနှင့် အခန်း(၁၄)ပါ ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍ စားသုံးသူက‌တောင်းဆိုနိုင်သည့် အခွင့်အရေးများအား မိမိ၏ကိုယ်တွေ့အကြောင်းအရာများနှင့်ဆက်စပ်ပြီး ဌာနတွင်လုပ်ကိုင်ဆောင်ရွက်နေရသော လုပ်ငန်းအတွေ့အကြုံများနှင့်ပေါင်းစပ်၍ အကျယ်တဝင့်ဆွေးနွေးခြင်းနှင့် အငယ်တန်းစာရေး ဒေါ်သီတာနွယ်က စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်း အမှတ်အသားဖော်ပြခြင်းနှင့် အခန်း(၁၉)တိုင်ကြားခြင်းနှင့် စိစစ်ညှိနှိုင်းဖြေရှင်းဆောင်ရွက်ခြင်းဥပဒေ ပုဒ်မ ၄၁မှ ဥပဒေပုဒ်မ ၅၁ထိ ရှင်းလင်းဆွေးနွေးခဲ့ပါသည်။

 ဆက်လက်၍ ဦးဝေဠုအောင်က ယခုကဲ့သို့ရှင်းလင်းဆွေးနွေးခဲ့သူများကိုလည်း ကျေးဇူးတင်ပါကြောင်း၊ တက်ရောက်လာသည့်ဝန်ထမ်းများလည်း စားသုံးသူကာကွယ်ရေးဥပဒေနှင့် ဌာနခွဲများမှ လုပ်ငန်းများကိုလည်းနားလည်စေရန်အတွက် Thursday Talk ကို လစဉ်ပြုလုပ်ရခြင်းဖြစ်ကြောင်းနှင့် နောင်လာမည့် Thursday Talk  များတွင် စားသုံးသူကာကွယ်ရေးဥပဒေ၊ နည်းဥပဒေများသာမက ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် အထောက်အကူပြုမည့်ဒေသထွက်ကုန်များ၊ စိုက်ပျိုးသီးနှံများအကြောင်းကိုလည်း ထည့်သွင်းဆွေးနွေးသွားရန်လိုအပ်ကြောင်းပြောကြားခဲ့ပါသည်။

DOCA(မကွေး)

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်၊ သရက်မြို့နယ်တာဝန်ခံ ဦးအုန်းမြင့် (ဦးစီးမှူး)သည် တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုတို့ဖြင့် လစဉ် အသိပညာပေးခြင်းလုပ်ငန်းများပြုလုပ်ဆောင်ရွက်လျက်ရှိရာ (၁၇-၁၁-၂၀၂၃)ရက်နေ့၊ နံနက်(၁၀း၀၀)နာရီအချိန်တွင် သရက်မြို့၌ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ စားသုံးသူပြည်သူများ Online ပေါ်တွင်ရောင်းချနေသော ကုန်စည်များဝယ်ယူသုံးစွဲရာတွင် လုံခြုံစိတ်ချရမှုရရှိစေရေးအတွက် ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးခန်းမ၌ Online Sale ‌ပြုလုပ်ရာတွင် သိရှိလိုက်နာဆောင်ရွက်ရမည့်အချက်များကို စီးပွားရေးလုပ်ငန်းရှင်များသိရှိစေရန် အသိပညာပေးဟောပြောပွဲ (Talk Show) ကျင်းပခဲ့ပါသည်။

    အဆိုပါဟောပြောပွဲ၌ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးမှူးက ယနေ့ လူအများသုံးစွဲနေသည့် Facebook စာမျက်နှာများပေါ်တွင် Online Sale များနှင့်ပတ်သက်၍ စားသုံးသူရေးရာဦးစီးဌာနအနေဖြင့် စီစဉ်ဆောင်လျက်ရှိသော လုပ်ငန်းလုပ်ဆောင်ချက်များအကြောင်း ရှင်းလင်းပြောကြားပေးပါရန် မေးမြန်းခဲ့ရာ စားသုံးသူရေးရာဦးစီးဌာနဦးစီးမှူး ဦးအုန်းမြင့်က  Online စနစ်ဖြင့်ရောင်းချနေမှုအား အရေးကြီးဝန်ဆောင်မှုလုပ်ငန်းအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ (၂၁-၇-၂၀၂၃)ရက်နေ့တွင် သတ်မှတ်ကြော်ငြာခဲ့ပြီး Online စနစ်ဖြင့်ရောင်းချပါက မှတ်ပုံ တင်ခြင်းပြုလုပ်ရမည်ဖြစ်ပါကြောင်း၊ Online စနစ်ဖြင့် ရောင်းချခြင်းလုပ်ငန်းများကို မှတ်ပုံတင်သည့်အခါတွင် လုပ်ငန်းလိပ်စာမှန်ကန်ကြောင်းအတွက် ရပ်ကွက်ထောက်ခံစာနှင့် ရဲစခန်းထောက်ခံစာ၊ လုပ်ငန်းရှင်၏ရပ်ကွက်ကျေးရွာတွင် အမှန်တကယ်နေထိုင်ကြောင်းထောက်ခံစာ စသည့် လုပ်ငန်းမှတ်ပုံတင်ရမည်အချက်(၈)ချက်တို့ကို အသေးစိတ်ရှင်းလင်းပြောကြားခဲ့ကာ Online စနစ်ဖြင့်ရောင်းချခြင်းပြုလုပ်ပါက လုပ်ငန်းမှတ်ပုံတင်ခြင်းကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၏ eComReg System (https://www.ecomreg.gov.mm) Website တွင် မှတ်ပုံတင်နိုင်ကြောင်း စားသုံးသူပြည်သူများအားသိရှိစေရန် အသိပညာပေးဟောပြောခဲ့ကြောင်းသိရှိရပါသည်။

DOCA(မကွေး)

  မကွေးတိုင်းဒေသကြီး၊ ချောက်ခရိုင်၊ ချောက်မြို့၊ အမှတ်(၅) အခြေခံပညာမူလတန်းလွန်ကျောင်း (ပျဉ်းမကျောင်း)၌ ဌာနဆိုင်ရာများစုပေါင်း၍ ကျောင်းသား/ ကျောင်းသူများအား ဗလငါးတန်ဖွံ့ဖြိုးရေး လူငယ်ရေးရာအသိပညာပေးဟောပြောပွဲကို (၁၄-၁၁-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ကျင်းပခဲ့သည်။

   ရှေးဦးစွာ ပြန်ကြားရေးနှင့် ပည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်သိမ့်ဝါက “စာရိတ္တမဏ္ဍိုင်ကြံ့ခိုင်ပါစေ” ခေါင်းစဉ်ဖြင့်လည်းကောင်း၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးက “သုံးစွဲရန်မသင့်သောဆေးဝါးများနှင့် ကုန်အညွှန်းအမှတ်အသားပြည့်စုံစွာ ပါဝင်သည့်ပစ္စည်းများကို ဝယ်ယူသုံးစွဲတတ်စေရေး” ခေါင်းစဉ်ဖြင့်လည်းကောင်း၊ မြို့နယ်ပတ်ဝန်းကျင်ထိန်းသိမ်းရေးဦးစီးဌာန၊ ဒုတိယလက်ထောက်ဦးစီးမှူး ဒေါ်ညိမ်းညိမ်းအေးက “ရေချိုသယံ ဇာတအကြောင်း သိကောင်းစရာ” ခေါင်းစဉ်ဖြင့်လည်းကောင်း အသီးသီးပြောကြားခဲ့ကြသည်။

    ထို့နောက် လူငယ်ရေးရာအသိပညာပေးဟောပြောပွဲသို့ တက်‌ရောက်‌ဟောပြောခဲ့သည့် ဌာနဆိုင်ရာတာဝန်ရှိသူများအား ကျောင်းအုပ်ဆရာမကြီး ဒေါ်ခင်စန်းဝေက ကျေးဇူးတင်စကားပြောကြားခဲ့သည်။ ၎င်းနောက် ဟောပြောပွဲတက်ရောက်လာသည့် ကျောင်းသား/ ကျောင်းသူများအား သက်ဆိုင်ရာဌာနအလိုက် အသိပညာပေးလက်ကမ်းစာစောင်များဖြန့်ဝေပေးခဲ့ပြီး အဆိုပါ လူငယ်ရေးရာအသိပညာ ဩပေးဟောပြောပွဲတွင် ကျောင်းအုပ်ဆရာမကြီးနှင့် ဆရာ/ ဆရာမ၊ ကျောင်းသား/ ကျောင်းသူစုစုပေါင်း (၁၂၀)ဦးတက်ရောက်ခဲ့ကြောင်းသိရသည်။

    ဆက်လက်၍ မူလတန်းအဆင့် ‌ကျောင်းသား/ ကျောင်းသူများအား မြို့နယ်စားသုံးသူရေးရာဦးစီးဌာနမှ အစားအသောက်ဆိုးဆေးအကြောင်းအရာများကိုလည်းကောင်း၊ မြို့နယ်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှ ငလျင်ဘေးအန္တရာယ်အကြောင်းကိုလည်းကောင်း၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မိတ္တဗလနှင့် မိတ်ဆွေကျင့်ဝတ်အကြောင်းသိကောင်းစရာများကိုလည်းကောင်း အသီးသီးပြောကြားခဲ့ကြပြီး ကလေးများအား ပုံပြင်ပြောပြခြင်းအစီအစဉ်များလည်း ဆောင်ရွက်ခဲ့ကြောင်းသိရှိရပါသည်။

DOCA(မကွေး)