HighLight News

  ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်၊ စားသုံးသူရေးရာဦးစီးဌာန၊ စည်ပင်သာယာရေးအဖွဲ့တို့ပူးပေါင်းသော တာဝန်ရှိသူများသည် (၂၂-၁၁-၂၀၂၃) ရက်နေ့၊ နံနက် (၀၉း၄၀) နာရီအချိန်တွင် ဓနုဖြူမြို့၊ မြို့မဈေး၊ ဇကာကြီးဈေးရှိ စားသုံးဆီရောင်းချနေသော စားသောက်ကုန်စုံဆိုင်(၄)သို့သွားရောက်၍ ရောင်းချနေသောစားသုံးဆီအမျိုးမျိုးတွင် ဘေးအန္တရာယ်ရှိ/မရှိ၊ ကုန်အညွှန်းအမှတ်အသားဖော်ပြချက်များပါဝင်မှုရှိ/ မရှိကွင်းဆင်းစစ်ဆေးခဲ့ကြပါသည်။

    အဆိုပါစစ်ဆေးဆောင်ရွက်မှုတွင် စားသုံးသူရေးရာဦးစီးဌာန၊ ဦးခိုင်လွမ်းမိုးက စားသုံးသူများဘေးအန္တရာယ်ကင်းရှင်းရေးအတွက် ဒေသတွင်းအသုံးပြုလျက်ရှိသည့် ကုန်စည်များနှင့်စပ်လျဉ်း၍ စားသုံးသူကာကွယ်ရေးဥပဒေပါအချက်များကို ကျယ်ကျယ်ပြန့်ပြန့်သိရှိစေရေးအတွက် အသိပညာပေးခြင်း၊ ဟောပြောခြင်း၊ အပတ်စဉ် ဈေးကွက်စောင့်ကြည့်စစ်ဆေးခြင်းလုပ်ငန်းများကို လုပ်ဆောင်လျက်ရှိကြောင်း၊ လုပ်ငန်းရှင်များအား မိမိတို့ရောင်းချနေသောကုန်စည်များတွင် ကုန်အညွှန်းအမှတ်အသားဖော်ပြရာ၌ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြပါဝင်သော ကုန်စည်များကိုသာရောင်းချရန်ကြရန် ကုန်စုံဆိုင်လုပ်ငန်းရှင်များကို အသိပညာပေးပြောကြားခဲ့ကြောင်းသိရှိရပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်ရှိ ဇီးဖြူကျွန်းရှိ ဦးလှဖုန်း၏ ကွမ်းသီးခြောက်လုပ်ငန်းသို့သွားရောက်၍ ကွမ်းသီးခြောက်လုပ်ငန်းအတွက် ထုတ်ကုန်လုံခြုံစိတ်ချမှုရှိစေရေးအသိပညာပေးဆွေးနွေးခြင်းကို (၂၂-၁၁-၂၀၂၃)ရက်နေ့၊ နေ့လယ် (၁း၀၀)နာရီအချိန်တွင် ကွင်းဆင်းဆောင်ရွက်ခဲ့ကြောင်းသိရသည်။

  အဆိုပါကွင်းဆင်းဆောင်ရွက်ခြင်းကို မြို့နယ်စာသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်က ကွမ်းသီးခြောက်လုပ်ငန်းလုပ်ကိုင်ဆောင်ရွက်မှုကိုလေ့လာပြီး ကွမ်းသီးများကို အမြို့မြို့အနယ်နယ်မှဝယ်ယူပြီး ကွမ်းသီးစိမ်းကိုသန့်စင်၍ ရေဖြင့်ပြုတ်ကာ နောက်တဆင့်ပေါင်းခံ၍ အခြောက်ခံပြီးမှသာ အခွံချွတ်ရကြောင်း၊ ပြီးလျှင် ဈေးကွက်တင်၍ မြို့နယ်များသို့ဖြန့်ချိကြောင်းကို လုပ်ငန်းရှင်က ရှင်းလင်းပြောကြားခဲ့ပြီး ဆက်လက်၍ ညောင်တုန်းမြို့နယ်ဦးစီးမှူးက ကွမ်းသီးများသည် မှိုတက်လွယ်သောကုန်စည်ဖြစ်သောကြောင့် စနစ်တကျပြုလုပ်ပြီး ထုတ်ကုန်လုံခြုံစိတ်ချစေရေး အလေးပေးဆွေးနွေးအသိပညာပေးခဲ့ကြောင်းသိရှိရပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် “ပြည်တွင်းကုန်သွယ်မှုဖွံ့ဖြိုးတိုးတက်စေရန်” ဆိုသည့် မျှော်မှန်းချက်နဲ့အညီ အကောင်အထည်ဖော်ဆောင်ရွက်လျက်ရှိရာ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်ဝေဝေအောင်သည် ၂၀၂၃ခုနှစ်၊ နိုဝင်ဘာလ(၂၃)ရက်နေ့၊ နံနက်(၁၀:၀၀) နာရီအချိန်တွင် စစ်ကိုင်းတိုင်းဒေသကြီး၊  ကန့်ဘလူခရိုင်၊ ကျွန်းလှမြို့၊ သစ်ရာမြိုင်ရပ်ကွက်ရှိ” ကုဋေစိုး “ဆီစက်လုပ်ငန်းရှင်နှင့်သွားရောက်တွေ့ဆုံဆွေးနွေး၍ အသိပညာပေးခဲ့ပါသည်။

     ထိုသို့တွေ့ဆုံဆွေးနွေးရာတွင် စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံ ဒေါ်ဝေဝေအောင်က ဆီဆိုသည်မှာ လူတို့စားသုံးရသော စားသုံးဆီဖြစ်သည့်အတွက် ဆီများထုတ်လုပ်ရောင်းချခြင်းနှင့်ပတ်သက်၍ စားသုံးသူအကာအကွယ်ပေးရေးဥပဒေ(၂၀၁၉)၊ အခန်း(၁၅)၊ ပုဒ်မ(၂၈)အရ ကုန်စည် (သို့မဟုတ်) ဝန်ဆောင်မှုများလုံခြုံစိတ်ချရမှုရှိစေရေးနှင့် စားသုံးသူပြည်သူများဘေးအန္တရာယ်ကင်းရှင်းစေရေးတို့အတွက် "ကုဋေစိုး" ဆီစက်လုပ်ငန်းအနေဖြင့် ဆီများကြိတ်ခွဲထုတ်လုပ်ရာတွင် သန့်ရှင်းသပ်ရပ်မှုရှိ/ မရှိ၊ အချင်အတွယ်မှန်ကန်မှုရှိ/ မရှိ၊ ဆီများထုတ်လုပ်မှုအဆင့်ဆင့်တွင်လည်း သန့်ရှင်းသပ်ရပ်စွာထုတ်လုပ်စေရေးနှင့် ဆီများထုတ်လုပ်ရာတွင် ကုန်အညွှန်းအမှတ်အသားများပြည့်စုံမှန်ကန်စွာထည့်သွင်းဖော်ပြရန်တို့အတွက် ဌာနမှဆောင်ရွက်ပေးလျက်ရှိကြောင်းနှင့် မိမိတို့မြို့နယ်အတွင်း ထုတ်လုပ်နေသောလုပ်ငန်းရှင်များကိုလည်း စားသုံးသူရေးရာဦးစီးဌာနမှ ကုန်အညွှန်းအမှတ်အသားပြည့်စုံစွာဖော်ပြခြင်းနှင်ပတ်သက်၍ အခမဲ့ဆောင်ရွက်ပေးနေကြောင်းနှင့် “ကုဋေစိုး” ဆီစက်မှ ထုတ်လုပ်နေသောဆီများကို  မိမိတို့ကိုယ်ပိုင်အမှတ်တံဆိပ်ကပ်၍ ကုန်အညွှန်းအမှတ်အသားလျှောက်ထားရန် တိုက်တွန်းပြောကြားခဲ့ပါသည်။ ထို့နောက် စားသုံးသူကာကွယ်ပေးရေးဥပဒေပါ စီးပွားရေးလုပ်ငန်းရှင်များလိုက်နာဆောင်ရွက်ရမည့် တာဝန်များအကြောင်းကို ရှင်းလင်းဆွေးနွေးပြောကြားခဲ့ပြီးနောက် ညွှန်ကြားချက်အမှတ်(၂/၂၀၁၉)ပါ စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    ၂၀၂၃ခုနှစ်၊ နိုဝင်ဘာလ(၂၃)ရက်နေ့၊ နေ့လယ်(၁၃:၀၀)နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံး၌ ဝန်ထမ်းများစွမ်းဆောင်ရည်မြှင့်တင်ရေးအထောက်အကူပြု Thursdays Talk အမှတ်စဉ်(၉/၂၀၂၃) ကျင်းပပြုလုပ်ခဲ့ကြောင်းသိရသည်။

    အဆိုပါ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု Thursdays Talk အသိပညာပေးဟောပြောဆွေးနွေးပွဲကို ပြည်နယ်ဦးစီးမှူး(ကိုယ်စား)ဦးစီးအရာရှိ ဦးမျိုးဝင်းနိုင်က အဖွင့်အမှာစကားပြောကြားခဲ့ပြီးနောက် စီမံရေးရာဌာနခွဲမှ ဒေါ်ဇူးမီမီဇော်မင်း(အငယ်တန်းစာရေး)က       “ဆန်လုံးညို(ခေါ်)လုံးတီဆန်အကြောင်းသိကောင်းစရာ” အကြောင်းကိုလည်းကောင်း၊ ဒေါ်စောပြည့်မာလာ (အငယ်တန်းစာရေး) က “စားသုံးဆီနှင့်ကျန်းမာရေး” အကြောင်းကိုလည်းကောင်း အသီးသီးရှင်းလင်းဆွေးနွေးခဲ့ကြပြီး တက်ရောက်လာသူများက သိလိုသည်များကိုပြန်လည်မေးမြန်းဆွေးနွေးခဲ့ကြောင်းသိရှိရသည်။

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးအနေဖြင့် ဝန်ကြီး၊ ဌာနရုံးချုပ်တို့၏ လမ်းညွှန်ချက်များနှင့်အညီ ကြာသပတေးနေ့ စကားဝိုင်း(Thursdays Talk)ကို လစဉ်ကျင်းပပြုလုပ်ခြင်းဖြစ်ကြောင်း၊ ကြာသပတေးနေ့ စကားဝိုင်း (Thursdays Talk) ကျင်းပပြုလုပ်ခြင်းကြောင့်  ဝန်ထမ်းများအနေဖြင့် အသိပညာဗဟုသုတများ အချင်းချင်းဝေမျှနိုင်မည်ဖြစ်ပြီး လုပ်ငန်းခွင်စွမ်းဆောင်ရည်မြင့်မားစေရေးအတွက် အထောက်အကူဖြစ်နိုင်မည်ဖြစ်ကြောင်းနှင့် အခမ်းအနားသို့ ဝန်ထမ်း(၁၄)ဦးတက်ရောက်ကာ ၎င်းအခမ်းအနားကို နေ့လယ်(၂)နာရီအချိန်တွင် ရုပ်သိမ်းခဲ့ကြောင်းသိရပါသည်။

DOCA(ကရင်)

    မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ မြို့နယ်တာဝန်ခံနှင့်ဝန်ထမ်းများသည် (၂၁-၁၁-၂၀၂၃) ရက်နေ့တွင် ဘီးလင်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန (ဘီးလင်း) ခန်းမ၌ ဒီဂျစ်တယ်ငွေကြေးဆိုင်ရာ စားသုံးသူအသိပညာပေး (Talk Show) ပြုလုပ်၍ ဟောပြောဆွေးနွေးခဲ့ကြောင်းသိရပါသည်။

  အဆိုပါဆွေးနွေးပွဲတွင် ဘီးလင်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူး ဒေါ်အေးမျိုးမျိုးစံ(ဦးစီးအရာရှိ)က ဒီဂျစ်တယ်ငွေကြေးဆိုင်ရာနှင့်ပတ်သက်၍ ဆွေးနွေးမေးမြန်းခဲ့ရာ စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံရုံးမှ ဒေါ်ဇင်ဖြူဝင်း(ဦးစီးမှူး)က စားသုံးသူပြည်သူများ ကျယ်ကျယ်ပြန့်ပြန့်အသုံးပြုလာသည့် ဒီဂျစ်တယ်ငွေကြေးဆိုင်ရာအသိပညာဗဟုသုတများရရှိပြီး လိမ်လည်လှည့်ဖြားခံရမှုနှင့် ထိခိုက်နစ်နာဆုံးရှုံးမှုမရှိစေရေးတို့အတွက် ရည်ရွယ်၍ဆွေးနွေးခြင်းဖြစ်ကြောင်း၊ ဒီဂျစ်တယ်ငွေကြေးဆိုင်ရာနှင့်ပတ်သက်၍ Mobile Wallet (ဖုန်းပိုက်ဆံအိတ်) အကြောင်း၊ Mobile Wallet (ဖုန်းပိုက်ဆံအိတ်)များအသုံးပြုပုံ၊ အသုံးဝင်ပုံ၊ လက်ရှိအသုံးပြုနေသော Mobile Wallet (ဖုန်းပိုက်ဆံအိတ်)အမျိုးအစားများနှင့် စားသုံးသူပြည်သူများအနေဖြင့် ကုန်စည် (သို့) ဝန်ဆောင်မှုများဝယ်ယူသုံးစွဲခြင်းကြောင့် ထိခိုက်နစ်နာမှုတစ်စုံတစ်ရာဖြစ်ပေါ်လာပါက တိုင်ကြားနိုင်သည့်နည်းလမ်းများကို ဆွေးနွေးပြောကြား၍ ဌာနက ဂျာနယ်နှင့်လက်ကမ်းစာစောင်များကို ဘီးလင်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၏ စာကြည့်တိုက်သို့ပေးအပ်ခဲ့ပါကြောင်း သတင်းရရှိပါသည်။

DOCA(မွန်)