HighLight News

 ချင်းပြည်နယ်အတွင်းရှိ စားသုံးသူပြည်သူများ၏ အခွင့်အရေးနှင့်အကျိုးစီးပွားကို အကာကွယ်ပေးနိုင်ရန်အတွက် စားသုံးသူကော်မတီအစည်းအဝေး(၁၁/၂၀၂၃)ကို ၂၀၂၃ခုနှစ်၊ အောက်တိုဘာလ ၂၉ရက်နေ့၊ နေ့လယ်(၁၅:၀၀)နာရီအချိန်တွင် ချင်းပြည်နယ်အစိုးရအဖွဲ့ရုံး၊ စီးပွားရေးရာဝန်ကြီး ခန်းမ၌ ကျင်းပပြုလုပ်ခဲ့ပါသည်။

     အစည်းအဝေးတွင် စားသုံးသူရေးရာကော်မတီဥက္ကဋ္ဌ စီးပွားရေးရာဝန်ကြီး ဦးဟန်ကျင့်ဇမ်းက အဖွင့်အမှာစကားပြောကြားခဲ့ပြီးနောက် ၂၀၂၃ခုနှစ်၊  ပြည်နယ်စားသုံးသူရေးရာကော်မတီ (၁၀/၂၀၂၃) အစည်းအဝေးဆုံးဖြတ်ချက်များပေါ် သက်ဆိုင်ရာကော်မတီဝင်များအနေဖြင့် ဈေးကွက်အတွင်းသို့ သက်ဆိုင်ရာဌာနများက တရားမဝင်ကုန်စည်အဖြစ်ကြေညာထားသည့် ကုန်ပစ္စည်းများ  ဈေးကွက်အတွင်းသို့ ဝင်ရောက်မှုရှိ/မရှိစစ်ဆေးခြင်း စသည့် လုပ်ငန်းဆောင်ရွက်နေမှုအခြေအနေများကို ရှင်းလင်းဆွေနွေးခဲ့ပြီး မိမိတို့စားသုံးသူကော်မတီအဖွဲ့သည် စားသုံးသူအကာကွယ်ပေးရေးလုပ်ငန်းများကို ထိထိရောက်ရောက်ဆောင်ရွက်ပေးမည့် ကော်မတီဖြစ်သည့်အတွက် ကော်မတီအဖွဲ့ဝင်များအနေဖြင့် စားသုံးသူပြည်သူများအတွက် စိတ်ရင်းစေတနာထားကာ ပိုမိုကောင်းမွန်သော/ ပိုမိုထိရောက်သော ပူးပေါင်းဆောင်ရွက်မှုများဖြင့် ရှေးဆက်လက်ဆောင်ရွက်မည်ဖြစ်ကြောင်း၊ နိဂုံးချုပ်အနေဖြင့် ချင်းပြည်နယ်အတွင်းရှိ စားသုံးသူပြည်သူအားလုံးအတွက် ဘေးအန္တရာယ်ကင်းရှင်းပြီး ပိုမိုကောင်းမွန်သောကုန်စည်နှင့်ဝန်ဆောင်မှုလုပ်ငန်းများ ဖွံ့ဖြိုးတိုးတက်လာစေရေး ဆက် လက်တာဝန်ယူဆောင်ရွက်ပေးသွားကြရန် လမ်းညွှန်မှာကြားခဲ့ကြောင်း သတင်းရရှိပါသည်။

DOCA(ချင်း)

    အွန်လိုင်းရောင်းဝယ်မှုဆိုင်ရာ မှတ်ပုံတင်နိုင်ရေးအတွက် Online Sales Bussiness လုပ်ငန်းဆောင်ရွက်လျက်ရှိသည့် လုပ်ငန်းရှင်သည် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးသို့ (၂၉-၁၁-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် လာရောက်တွေ့ဆုံဆွေးနွေးခဲ့ကြောင်းသိရသည်။

     ထိုသို့လာရောက်တွေ့ဆုံဆွေးနွေးရာတွင် လုပ်ငန်းရှင်သည် Online Sales Bussiness မှတ်ပုံတင်ခြင်းနှင့်စပ်လျဉ်း၍ ဆောင်ရွက်ရမည်များကို မေးမြန်းခဲ့ရာ စားသုံးသူရေးရာဌာနခွဲတာဝန်ခံ ဦးမျိုးဝင်းနိုင်(ဦးစီးအရာရှိ)က အွန်လိုင်းရောင်းဝယ်မှုများနှင့်ပတ်သက်၍ အွန်လိုင်းစနစ်ဖြင့် ရောင်းချခြင်းလုပ်ငန်းများကို အရေးကြီးကုန်စည်နှင့်ဝန်ဆောင်မှုလုပ်ငန်းအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက အမိန့်ကြော်ငြာစာအမှတ် (၅/၂၀၂၃) ဖြင့် ထုတ်ပြန်ကြော်ငြာခဲ့ကြောင်း၊  အွန်လိုင်းစနစ်မှတစ်ဆင့် ဝန်ဆောင်မှုပေးသောလုပ်ငန်းရှင်များအနေဖြင့် မှတ်ပုံတင်ဆောင်ရွက်ခြင်းအားဖြင့် မှတ်ပုံတင်ရရှိသူသည် အွန်လိုင်းစနစ်တွင် မှတ်ပုံတင်ပါလက်မှတ်အမည်ဖြင့် ရောင်းချခွင့်ရှိမည်ဖြစ်ကြောင်း၊ အွန်လိုင်းဖြင့်မှတ်ပုံတင်ခြင်းအား eComReg System/ ecomreg.gov.mm တွင် မှတ်ပုံတင်လျှောက်ထားနိုင်ပါကြောင်း၊ လျှောက်ထားရာတွင် မိမိအသုံးပြုသော email (သို့) Mobile Phone Number ဖြင့် Sign Up (Register) ပြုလုပ်ခြင်း၊ Login ဝင်ခြင်း၊ Apply ကိုနှိပ်၍ မိမိတို့၏ Online Sales အတွက် Registration Form များကိုဖြည့်၍ မှတ်ပုံတင်ခြင်းများဆောင်ရွက်ရမည်ဖြစ်ပါကြောင်း၊ ထို့နောက် Online Payment ပေးဆောင်ပြီး မိမိ၏ Online Sales Registration Certificate ကို Print/PDF ထုတ်ယူရမည်ဖြစ်ပါကြောင်း၊ ရရှိလာသော Certificate ၏ QR Code Link ကို မိမိတို့၏ Dashboard တွင် Copy ယူ၍ မိမိတို့၏ Online Sales (eCommerce) Website များတွင်အသုံးပြုခြင်းဖြင့် ယုံကြည်စိတ်ချရသော Online Sales (eCommerce) Website များအဖြစ် ဆောင်ရွက်နိုင်မည်ဖြစ်ပါကြောင်း၊  လုပ်ငန်းမှတ်ပုံတင်လျှောက်ထားသူများအနေဖြင့် အခက်အခဲတစ်စုံတစ်ရာရှိပါက ဖုန်းနံပါတ် ၀၆၇-၄၈၄၈၅၊ ၀၆၇၄၀၈၂၂၆၊၀၁-၃၇၁၂၁၉ သို့ ဆက်သွယ်ဆောင်ရွက်နိုင်ကြောင်း အကျယ်တဝင့်ဆွေးနွေးခဲ့ပါသည်။

    အွန်လိုင်းစနစ်ဖြင့်ရောင်းချခြင်း( Online Sales)လုပ်ငန်းများမှတ်ပုံတင်နိုင်ရေးအတွက် eComReg System အား စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနအနေဖြင့် အကောင်အထည်ဖော်ဆောင်ရွက်လျက်ရှိပြီး ၂၀၂၃ခုနှစ်၊ အောက်တိုဘာလ (၂) ရက်နေ့မှစ၍ စတင်အသုံးပြုလျက်ရှိကြောင်း သတင်းရရှိပါသည်။

DOCA(ကရင်)

  ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆန်အရောင်းဆိုင်များနှင့် ဆန်စက်များ၏ စပါးဝယ်ယူကြိတ်ခွဲဖြန့်ဖြူးရောင်းချနေမှု အခြေအနေနှင့် စည်ပင်သာယာမြို့မဈေးအတွင်း/ အပြင်၊ ရပ်ကွက်၊ ကျေးရွာများ၌ လက်လီ/လက်ကား ဝယ်ယူဖြန့်ဖြူးရောင်းချလျက်ရှိသော ဆန်ဆိုင်များသို့ ၂၀၂၃ခုနှစ်၊ နိုဝင်ဘာလ (၂၅) ရက်နေ့၊ နေ့လယ် (၁း၀၀)နာရီအချိန်တွင်သွားရောက်၍ ကွင်းဆင်းစစ်ဆေးခဲ့ကြောင်းသိရသည်။ 

   ထိုသို့ကွင်းဆင်းစစ်ဆေးရာတွင်  ပြည်တွင်းဆန်ဈေးနှုန်းများမတည်မငြိမ်ဖြစ်ပေါ်ခြင်းများမရှိစေရေး စီစစ်ကြပ်မတ်ဆောင်ရွက်သွားရန် ညွှန်ကြားလာသဖြင့် ကော့မှူးမြို့နယ်အခြေအနေအရ ရေလမ်းကြောင်းဖြင့်မဟုတ်ဘဲ ဧရာဝတီတိုင်းဒေသကြီးဘက်မှ ကုန်းလမ်းကြောင်းဖြင့်ဝင်ရောက်လာသည့် ဆန်ကုန်တင်ယာဉ်များအား သက်ဆိုင်ရာခရိုင်၊ မြို့နယ်များမှ ဝင်ပေါက်ဂိတ်များတွင် ပူးပေါင်းအဖွဲ့ဖြင့်လည်ကောင်း  မြို့နယ်အတွင်းရှိ ဆန်စက်သိုလှောင်ရုံများ ဆန်နှင့်ဆန်ထွက်ပစ္စည်းအရောင်းဆိုင်များအား ဆန်ဈေးနှုန်းမြှင့်တက်စေရန်ရည်ရွယ်ချက်ဖြင့် သိုလှောင်ထားရှိမှုများမရှိစေရန် ပူးပေါင်းအဖွဲ့ဖြင့် ထမ္မနိုင်ကျေးရွာရှိ သုခပြည့်စုံဆန်စက်၊ ရွှေနဂါးဆန်စက်တို့တွင် ဆန်စပါးကြိတ်ခွဲဖြန့်ဖြူးရောင်းချနေမှုအခြေအနေ၊ ကျေးရွာအတွင်းရှိ ဆန်ဆိုင်များတွင် ဆန်ဖြန့်ဖြူးရောင်းချနေမှုအခြေအနေများကိုစစ်ဆေးခဲ့ပြီး လုပ်ငန်းရှင်များအား ဆန်ဈေးနှုန်းများမတည်မငြိမ်ဖြစ်စေရန်ရည်ရွယ်ချက်ဖြင့် သိုလှောင်ခြင်း၊ ဖြန့်ဖြူးရောင်းချခြင်းများမပြုလုပ်ကြရန်နှင့် တွေ့ရှိပါက စားသုံးသူကာကွယ်ပေးရေးဥပဒေနှင့်အညီ ထိရောက်စွာအရေးယူဆောင်ရွက်သွားမည်ဖြစ်ကြောင်း အသိပညာပေးကွင်းဆင်းစစ်ဆေးခဲ့ကြောင်းသိရသည်။

    အဆိုပါကွင်းဆင်းစစ်ဆေးခဲ့ရာတွင် ကော့မှူးမြို့နယ်၊ အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်ရဲမှူး၊ ဒုရဲအုပ်နှင့်တပ်ဖွဲ့ဝင်များ၊ လူဝင်မှုကြီးကြပ်ရေးဦးစီးဌာနမှ ဦးစီးမှူး၊ မြို့နယ်မီးသတ်ဦးစီးမှူး၊ စည်ပင်သာယာရေးဦးစီးဌာနမှ ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်းပါဝင်ခဲ့ကြကြောင်းသိရှိရပါသည်။

DOCA(ရန်ကုန်)

   စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၏ ဝန်ထမ်းထုဆန္ဒဖော်ထုတ်ပွဲကို ၂၀၂၃ခုနှစ်၊ နိုဝင်ဘာလ ၂၉ရက်နေ့၊ နံနက်(၁၁း၀၀)နာရီအချိန်တွင် ရန်ကုန်တိုင်းဒေသကြီးဦးစီးမှူးရုံးအစည်းအဝေးခန်းမ၌ ကျင်းပပြုလုပ်ခဲ့ရာ တက်ရောက်ဝန်ထမ်းအင်အား (၂၇)ဦးတက်ရောက်ခဲ့ကြပြီး  ခရိုင်ဦးစီးမှူးရုံးများမှ Zoom Meeting ဖြင့် တက်ရောက်ခဲ့ကြပါသည်။ အဆိုပါ ဝန်ထမ်းထုဆန္ဒဖော်ထုတ်ပွဲတွင် ဒုတိယတိုင်းဒေသကြီးဦးစီးမှူး ဦးတင်မိုးအောင်က ရှေ့ဆက်ဆောင်ရွက်ရမည့်လုပ်ငန်းများနှင့်ပတ်သက်၍ ဆောင်ရွက်ရန်အချက်များကို လမ်းညွှန်မှာကြားခဲ့ပြီး တိုင်းဒေသကြီးဦးစီးမှူးရုံးနှင့် ခရိုင်ဦးစီးမှူးရုံးများမှ ဝန်ထမ်းများက တင်ပြရန်ရှိသည်တို့ကို ပြန်လည်ဆွေးနွေးတင်ပြခဲ့ကြောင်းသိရှိရပါသည်။

   ဝန်ထမ်းထုဆန္ဒဖော်ထုတ်ပွဲနှင့်အတူ နှစ်ပတ်လျှင်(၁)ကြိမ် ကျင်းပပြုလုပ်သည့် (Thursday Talk) အသိပညာပေးဆွေးနွေးပွဲကို ကျင်းပပြုလုပ်ခဲ့ရာ အသိပညာပေးဆွေးနွေးပွဲအား ဒုတိယတိုင်းဒေသကြီးဦးစီးမှူးဦးဆောင်၍ တက်ရောက်ဝန်ထမ်းအင်အား(၂၇)ဦးဖြင့် ကျင်းပပြုလုပ်ခဲ့ပါသည်။

   အဆိုပါ Thursday Talk အသိပညာပေးဆွေးနွေးပွဲ၌ စီမံရေးရာဌာနခွဲမှ ဒေါ်ခိုင်သင်းရီ၊ အငယ်တန်းစာရေးက ဦးရဲဦး- မြန်မာပြန်၏ “နှုတ်ချို သျှိုတစ်ပါး ခေါင်းစဉ်ဖြင့် အကျယ်တဝင့်ဆွေးနွေးပြောကြားခဲ့ပြီး တက်ရောက်သူများက ပြန်လည်မေးမြန်းခြင်း၊ အမေးအဖြေကဏ္ဍများဖြင့် ကျင်းပပြုလုပ်ခဲ့ကြောင်းသိရှိရပါသည်။

DOCA(ရန်ကုန်)                                                 

    ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်၊ ဈေးကွက်အတွင်း ဖြန့်ဖြူးရောင်းချလျက်ရှိသော စားသောက်ကုန်ပစ္စည်းများအနက် သောက်ရေသန့်အမျိုးမျိုး၊ စည်သွပ်ဘူးအမျိုးမျိုးတို့ကို ဝယ်ယူသုံးစွဲရာ၌ စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးရည်ရွယ်၍ ၂၀၂၃ခုနှစ်၊ နိုဝင်ဘာလ(၂၂)ရက်နေ့၊ နံနက် (၁၁း၀၀)နာရီအချိန်တွင် စည်ပင်သာယာမြို့မဈေးအတွင်း/ အပြင်နှင့် ဈေးသစ်ရပ်ကွက်အတွင်းရှိ ကုန်စုံဆိုင်၊ စတိုးဆိုင်များသို့သွားရောက်ကာ လုပ်ငန်းရှင်များနှင့်တွေ့ဆုံ၍ စားသောက်ကုန်များအပေါ်တွင် ကုန်အညွှန်းအမှတ်အသားပြည့်စုံစွာဖော်ပြထားခြင်းရှိ/ မရှိ ကွင်းဆင်းစစ်ဆေးခဲ့သည်။

     ထိုသို့ ကွင်းဆင်းစစ်ဆေးခဲ့ရာ မြို့နယ်စည်ပင်သာယာရေးဦးစီးဌာနမှ တာဝန်ရှိသူများ၊ မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံတို့သည် မြို့နယ်စည်ပင်သာယာမြို့မဈေးအတွင်း၊ အပြင်နှင့်ရပ်ကွက်ကုန်စုံဆိုင်၊ စတိုးဆိုင်တို့တွင် ဖြန့်ဖြူးရောင်းချလျက်ရှိသော သောက်ရေသန့်ဘူးများအပေါ်တွင် ဖော်ပြပါရှိရမည့် ထားသိုသိမ်းဆည်းပုံအညွှန်း၊ ထုတ်လုပ်ကုန်ဆုံးရက်၊ စည်သွပ်ဘူးများအနေဖြင့် ထားသိုသိမ်းဆည်းပုံအညွှန်း၊ သုံးစွဲပုံနည်းလမ်း၊ ဓာတ်မတည့်ကြောင်းဖော်ပြချက်၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ ခွင့်ပြုချက်အမှတ်အသား၊ စတင်ထုတ်လုပ်သည့်ရက်စွဲ၊ ကုန်ဆုံးမည့်ရက်စွဲတို့မဖြစ်မနေဖော်ပြပါရှိသော သောက်ရေသန့်အမျိုးမျိုး၊ စည်သွပ်ဘူးအမျိုးမျိုးနှင့် အခြားစားသောက်ကုန်ပစ္စည်းများကိုသာ မိမိတို့၏ခရိုင်များတွင် ဖြန့်ဖြူးရောင်းချကြရန်၊ ကုန်အညွှန်းအမှတ်အသားပြည့်စုံစွာမပါရှိသော စားသောက်ကုန်များ၊ စံချိန်၊ စံညွှန်းများနှင့်ကိုက်ညီမှုမရှိသော စားသောက်ကုန်များမှာ စားသုံးသူပြည်သူများကို ဘေးအန္တရာယ်ဖြစ်စေနိုင်သောကြောင့် မိမိတို့အနေဖြင့် သတိပြုဝယ်ယူဖြန့်ဖြူးရောင်းချကြရန်နှင့် သက်ဆိုင်ရာဌာနများမှတားမြစ်ထားသော စားသောက်ကုန်ပစ္စည်း၊ လူသုံးကုန်ပစ္စည်းများ၊ မိမိတို့၏ဆိုင်များတွင် ဖြန့်ဖြူးရောင်းချနေခြင်းအား စစ်ဆေးတွေ့ရှိပါက သက်ဆိုင်ရာဌာနများ၏ ဥပဒေနှင့်အညီ ထိရောက်စွာအရေးယူဆောင်ရွက်သွားမည်ဖြစ်ကြောင်း လုပ်ငန်းရှင်များကို အသိပညာပေး၍ ဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)