HighLight News

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာနတွင် တိုင်းဒေသကြီးဦးစီးမှူးနှင့် ခရိုင်ဦးစီးမှူးများ၏ လုပ်ငန်းညှိနှိုင်းအစည်းအဝေးကို ၂၀၂၃ခုနှစ်၊ နိုဝင်ဘာလ (၂၉) ရက်နေ့၊ နေ့လယ် (၁၂:၀၀) နာရီအချိန်တွင် Virtual စနစ်ဖြင့် ကျင်းပပြုလုပ်ခဲ့ပါသည်။

    တိုင်းဦးစီးမှူးမှ ခရိုင်ဦးစီးမှူးများအနေဖြင့် လုပ်ငန်း‌ဆောင်ရွက်ပြီးစီးမှုအခြေအနေများ၊ တွေ့ကြုံရသောလုပ်ငန်းအခက်အခဲများ၊ အားသာချက်၊ အားနည်းချက်များတင်ပြလာမှုအပေါ် ဆွေးနွေး၍ သက်ဆိုင်ရာဌာနခွဲမှူးများကလည်း လုပ်ငန်းလိုအပ်ချက်များကို ခရိုင်ဦးစီးမှူးများအား ရှင်းလင်းပြောကြားခဲ့ပါသည်။

    ဆက်လက်၍ တက်ရောက်လာသောဦးစီးမှူးများနှင့် သက်ဆိုင်ရာခရိုင်မှူးများကလည်း မိမိတို့ဆောင်ရွက်နေသည့် လုပ်ငန်းပိုင်းဆိုင်ရာအခက်အခဲများ၊ တင်ပြလာမှုအပေါ် တိုင်းဦးစီးမှူးနှင့် ဌာနခွဲတာဝန်ခံများက ရှင်းလင်းဆွေးနွေးဖြေကြားပေးခဲ့ကြောင်းသိရပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဝန်ထမ်းများသည် စားသုံးသူပြည်သူများ စားသုံးသူကာကွယ်ရေးဆိုင်ရာ အသိပညာဗဟုသုတများရရှိစေရန်ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေးခြင်းများကိုဆောင်ရွက်လျက်ရှိရာ ၂၀၂၃ခုနှစ်၊ နိုဝင်ဘာလ ၃၀ရက်နေ့၊ နံနက်ပိုင်းအချိန်တွင် တောင်ငူမြို့နယ်၊ ငါးဖယ်အင်းကျေးရွာအုပ်စု၊ ကျောင်းကုန်းကျေးရွာ၏ အခြေခံပညာမူလတန်းလွန်ကျောင်း၌ ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။

     ဟောပြောပွဲတွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဌာနခွဲတာဝန်ခံ ဦးစောသန်းထိုက်ကျော်က စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူ၏အခွင့်အရေးနှင့် တာဝန်များ၊ စားသုံးသူကာကွယ်ရေးနှင့်စပ်လျဉ်း၍ ဦးစီးဌာန၏ဆောင်ရွက်ချက်များကို အသိပညာပေးဟောပြောခဲ့ပါသည်။

    ဆက်လက်၍ တောင်ငူမြို့နယ်တာဝန်ခံ ဦးမြင့်သူက ကုန်စည်များတွင် ကုန်အညွှန်းအမှတ်အသားများကိုဖော်ပြရန် စားသုံးသူကာကွယ်ရေးဥပဒေတွင် ပြဋ္ဌာန်းထားမှုများ၊ ကုန်စည်နှင့်ဝန်ဆောင်မှုများကိုဝယ်ယူရာတွင် ကုန်အညွှန်းအမှတ်အသားများကိုဖတ်ရှုပြီး ကုန်အညွှန်းအမှတ်အသားနှင့်အညီ လိုက်နာသုံးစွဲရန် အရေးကြီးပုံများ၊ ကုန်အညွှန်းအမှတ်အသားပြည့်စုံစွာဖော်ပြထားသော ကုန်စည်များကိုသာဝယ်ယူသုံးစွဲသင့်ပုံများကို ဟောပြောဆွေးနွေးခဲ့ပါသည်။

      ဟောပြောပွဲသို့ ကျောင်းသား/ကျောင်းသူ ၈၉ဦးတက်ရောက်ခဲ့ကြောင်းသိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံရုံးမှ ဝန်ထမ်းများသည် ဖြူးမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့်ကာယပညာဦးစီးဌာနတို့မှ တာဝန်ရှိသူများနှင့်အတူ ၂၀၂၃ခုနှစ်၊ နိုဝင်ဘာလ ၂၈ရက်နေ့၊ နံနက်ပိုင်းအချိန်တွင် ဖြူးမြို့နယ်၊ အခြေခံပညာမူလတန်းလွန်ကျောင်းတွင် ကျောင်းသူ/ကျောင်းသားများအား စားသုံးသူကာကွယ်ရေးဆိုင်ရာများ အသိပညာပေးဟောပြောခဲ့သည်။

       ဟောပြောပွဲတွင် စားသုံးသူရေးရာဦးစီးဌာန၊ ဌာနခွဲမှူး ဒေါ်ပပလင်းက စားသုံးသူ၏အခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုမဖြစ်ပေါ်စေရေးအတွက် စားသုံးသူရေးရာဦးစီးဌာနမှ ဆောင်ရွက်လျက်ရှိသည်များ၊ ကုန်စည်များဝယ်ယူရာတွင် ကုန်အညွှန်းအမှတ်အသားများဖတ်ရှုရန် အရေးကြီးပုံများကို ဟောပြောဆွေးနွေးခဲ့သည်။

     ထို့အတူ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အိမာဟိန်းက စာဖတ်ခြင်း၏အကျိုးကျေးဇူးများကိုလည်းကောင်း၊ အားကစားနှင့်ကာယပညာဦးစီးဌာန၊ မြို့နယ်အားကစားမှူး ဒေါ်ယဉ်သူဇာလွင်က လူငယ်နှင့်အားကစားလှုပ်ရှားခြင်း၏အကြောင်းကိုလည်းကောင်း ဟောပြောခဲ့သည်။

     ဟောပြောပွဲသို့ ကျောင်းသားကျောင်းသူ ၇၀ဦးတက်ရောက်ခဲ့ကြောင်းနှင့် ဟောပြောပွဲအပြီးတွင် မြို့နယ်တာဝန်ခံ စစ်ဆေးရေးမှူး ဒေါ်သန္တာစိုးသည် ကျောင်းမုန့်ဈေးတန်းတွင်ရောင်းချလျက်ရှိသော အသင့်စားမုန့်များနှင့် အချိုရည်များ၌ မြန်မာဘာသာဖြင့် ကုန်အညွှန်းအမှတ်အသားဖော်ပြထားခြင်းရှိ/မရှိကို စောင့်ကြည့်စစ်ဆေးခဲ့ကြောင်းသိရှိရပါသည်။

DOCA(ပဲခူး)

    ပဲခူးတိုင်း (အနောက်ပိုင်း)ရှိ ပြည်မြို့နယ်တွင် ရွှေဆံတော်ဘုရားပွဲအား ယခု ၂၀၂၃ခုနှစ်တွင် စည်ကားသိုက်မြိုက်စွာကျင်းပပြုလုပ်ကြသည်။ ရွှေဆံတော်ဘုရားမြတ်စွယ်တော်လှည့်ပွဲအား တန်ဆောင်မုန်းလဆန်း (၁၁)ရက်နေ့မှ တန်ဆောင်မုန်းလပြည့်နေအထိ (၅)ရက်တိုင်တိုင် ပွဲတော်ကျင်းပပြုလုပ်သည်။ ပြည်မြို့၊ ရွှေဆံတော်စေတီတော်မြတ်၏ ရင်ပြင်ပေါ်တွင်ရှိသော မြတ်စွယ်တော်ဂန္ဓကုဋီတိုက်၌ မြန်မာသက္ကရာဇ် ၁၃၈၅ခုနှစ်၊ တန်ဆောင်မုန်းလဆန်း (၁၁)ရက်နေ့၊ ညနေ(၅း၀၀)နာရီအချိန်တွင် ကိန်းဝပ်ဆံပယ်တော်အပူဇော်ခံပြီး မြတ်စွယ်တော်အား ၁၂၄ကြိမ်မြောက် ဖွင့်လှစ်ပူဇော်ပွဲတွင် အခမ်းအနားဖြင့် ရင်ပြင်တော်ပေါ်၌ လက်ယာရစ်(၃)ပတ်လှည့်လည် အပူဇော်ခံပြီးနောက် တန်ဆောင်မုန်းလဆန်း(၁၃)ရက်နေ့၌ မြို့တွင်းသို့ လှည့်လည်အပူဇော်ခံပါသည်။ ပြည်မြို့ရှိ လေးဆူဓာတ်ပျော် ရွှေဆံတော်ဗုဒ္ဓပူဇနိယဘုရားပွဲတော်ကြီးကျင်းပရာ မြို့တွင်းသို့ မြတ်စွယ်တော်လှည့်လည်အပူဇော်ခံပွဲတွင် ယိမ်းကားများဖြင့် အလှပြဖျော်ဖြေရာတွင် နှစ်စဉ် မပါမဖြစ် ပါဝင်ကပြသည့်ယိမ်းမှာ လှေလှော်ယိမ်းနှင့်စည်တော်ယိမ်းတို့ဖြစ်သည်။ ထို့ပြင် အခြားယိမ်းကားများလည်းပါဝင်ပြီး မြို့ပေါ်ရပ်ကွက်မှ ယိမ်းကားများတွင် တေးသံရှင်အဆိုတော်များလည်း ပါဝင်သီဆိုဖျော်ဖြေကြပါသည်။ ပွဲဈေးတန်းအတွင်း မြန်မာရိုးရာအစားအသောက်များ လာရောက်ရောင်းချရာတွင် ဒေသထွက်အစားအစာများဖြစ်ပြီး ပွဲတော်ဈေးအတွင်းသာ အလွယ်တကူဝယ်ယူစားသောက်၍ရနိုင်သည့် ရေမုန့်၊ ဘိန်းမုန့်၊ ကောက်ညှင်းခြေထောက်၊ ကောက်ညှင်းဆိုင်း၊ မုန့်သိုင်းချုံ၊ မုန့်ပျားအုန် စသည့်ဒေသအခေါ်အဝေါ်အစားအစာများကိုလည်း ဝယ်ယူစားသောက်နိုင်ပါသည်။ ထို့ပြင် လူ့အသုံးအဆောင်ပစ္စည်းများ၊ ကလေးကစားစရာပစ္စည်းများ၊ သနပ်ခါးတုံးများနှင့် အဝတ်အထည်များ လာရောက်ရောင်းချကြပါသည်။

    ပြည်မြို့ရှိ လေးဆူဓာတ်ပျော် ရွှေဆံတော်ဗုဒ္ဓပူဇနိယဘုရားပွဲတော်ကြီး၏ ထူးခြားချက်မှာ နှစ်စဉ်  မြတ်စွယ်တော်အား လှည့်လည်အပူဇော်ခံပွဲမပြုလုပ်ဘဲ (၃)နှစ်မှတစ်ကြိမ်သာကျင်းပပြုလုပ်သည်မှာ ထူးခြားချက်ဖြစ်ကြောင်းသိရှိရပါသည်။

DOCA(ပဲခူး)

   စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် (၂၉-၁၁-၂၀၂၃) ရက်နေ့၊ နံနက် (၁၁း၃၀) နာရီအချိန်တွင် မော်လမြိုင်မြို့၊ နည်းပညာတက္ကသိုလ်ဝင်းအတွင်းရှိ ရွှေဇီဝသဘာဝဇီဝမြေဩဇာစက်ရုံသို့သွားရောက်၍ စက်ရုံတာဝန်ခံနှင့်တွေ့ဆုံဆွေးနွေးခဲ့သည်။

    ထိုသို့တွေ့ဆုံဆွေးနွေးရာတွင် ပြည်နယ်ဦးစီးမှူးက စက်ရုံလည်ပတ်မှုအခြေအနေ၊ ကုန်ကြမ်းဝယ်ယူစုဆောင်းမှုအခြေအနေ၊ ထုတ်လုပ်မှုအခြေအနေ၊ ဖြန့်ဖြူးမှု၊ ဈေးနှုန်း/ဈေးကွက်နှင့် ရှေ့ဆောင်ရွက်မည့်အစီအစဉ်များကိုဆွေးနွေးခဲ့ရာ စက်ရုံတာဝန်ခံက ကုန်ကြမ်းများဖြစ်သော မြေဆွေး၊ ကောက်ရိုး၊ ကြက်ချေး၊ နွားချေး စသည်တို့ကို မော်လမြိုင်၊ မုဒုံ၊ ကျိုက်မရော စသည့်မြို့နယ်များမှ ဝယ်ယူရရှိပြီး တစ်လလျှင် အိတ်ရေ (၃၀၀၀) ခန့်ထုတ်လုပ်ကြောင်း၊ ၎င်းတို့စက်ရုံအနေဖြင့် သဘာဝမြေဩဇာအမျိုးအစားပေါင်း (၆) မျိုးထုတ်လုပ်ပြီး မွန်ပြည်နယ်အပါအဝင် မြန်မာနိုင်ငံအနှံ့အပြားသို့ ဖြန့်ချိလျက်ရှိကြောင်းဆွေးနွေးခဲ့ပါသည်။

DOCA(မွန်)