HighLight News

   ရန်ကုန်တိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးရုံး၏ ညွှန်ကြားချက်အရ ကော့မှူးမြို့နယ်အတွင်းရှိ ဒေသခံပြည်သူများအနေဖြင့် စားသောက်ကုန်ပစ္စည်းများဝယ်ယူစားသုံးရာ၌ ဘေးကင်းလုံခြုံစေရန်နှင့် စနစ်တကျဝယ်ယူစားသုံးတတ်စေရန်ရည်ရွယ်၍ ၂၀၂၃ခုနှစ်၊ ဒီဇင်ဘာလ(၁၁)ရက်နေ့၊ နံနက် (၁၁:၃၀) နာရီအချိန်တွင် မြို့မစည်ပင်သာယာဈေးအတွင်း/အပြင်နှင့် ရပ်ကွက်များရှိ စားသောက်ကုန်ပစ္စည်းအရောင်းဆိုင်များသို့သွားရောက်ကာ လုပ်ငန်းရှင်များကိုတွေ့ဆုံ၍ ကုန်အညွှန်းအမှတ်အသားပြည့်စုံစွာဖော်ပြခြင်းမရှိသော စားသောက်ကုန်ပစ္စည်းများ ဖြန့်ဖြူးရောင်းချခြင်းမပြုရေး ဈေးကွက်အတွင်း ကွင်းဆင်းစစ်ဆေးအသိပညာပေး ခဲ့ကြောင်းသိရှိရပါသည်။

      ထိုသို့ ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာမြို့မဈေး၏ အပြင်ရပ်ကွက်များရှိ စားသောက်ကုန်ပစ္စည်းအရောင်းဆိုင်များသို့သွားရောက်၍ လုပ်ငန်းရှင်များနှင့်တွေ့ဆုံကာ စားသုံးသူပြည်သူများထံ အဓိကစားသောက်ကုန်ပစ္စည်းများဖြစ်သော စားသုံးဆီ၊ လူကြီးအဟာရဖြည့်စွက်စာအမျိုးမျိုးတို့ရောင်းချရာတွင် ထုတ်ကုန်လုံခြုံစိတ်ချမှုရှိစေရေးနှင့် စားသုံးသူများဘေးအန္တရာယ်ကင်းရှင်းစေရေးအတွက် စံချိန်စံညွှန်းများနှင့်ကိုက်ညီမှုမရှိသောစားသောက်ကုန်များ၊ ကုန်အညွှန်းအမှတ်အသားဖော်ပြချက်ပြည့်စုံစွာမပါရှိသော စားသောက်ကုန်ပစ္စည်းများ၊ အစားအသောက်နှင့် ဆေးဝါးကွပ်ကဲရေးဦးစီးဌာန(FDA)၏ခွင့်ပြုချက်မပါရှိသော လူကြီးအာဟာရဖြည့်စွက်စာများ၊ သက်တမ်းလွန်နေသောအစာအသောက်များကို ရောင်းချခြင်းမပြုစေရေး စသည့်စားသုံးသူကာကွယ်ရေးဆိုင်ရာ သိကောင်းစရာများကို အကြံပြုဆွေးနွေးခဲ့ပြီး ဈေးကွက်အတွင်း  ရောင်းချခြင်းမပြုရန် မိမိတို့၏ဈေးဆိုင်အတွင်းဖြန့်ဖြူးရောင်းချခြင်းကိုတွေ့ရှိပါက သက်ဆိုင်ရာဥပဒေ၊ လုပ်ထုံးလုပ်နည်းများနှင့်အညီ ထိရောက်စွာအရေးယူဆောင်ရွက် သွားမည်ဖြစ်ကြောင်း ရှင်းလင်းဆွေးနွေးပြောကြားခဲ့ပြီး ဈေးကွက်စောင့်ကြည့်ကွင်းဆင်း စစ်ဆေးခဲ့ပါသည်။

       အဆိုပါကွင်းဆင်းစစ်ဆေးခဲ့မှုတွင် မြို့နယ်စည်ပင်သာယာရေးဦးစီးဌာန၊ မြို့နယ်ကျန်းမာရေးဦးစီးဌာန၊မြို့နယ်စားသုံးသူရေးရာဦးစီးဌာနတို့မှ ဝန်ထမ်းများပူးပေါင်းပါဝင်ခဲ့ကြောင်းသိရှိရပါသည်။

DOCA(ရန်ကုန်)

   မြောက်ပိုင်းခရိုင် အင်းစိန်မြို့နယ်အတွင်းရှိ ဆေးဆိုင်များသို့ ဈေးကွက်တင်သွင်းရောင်းချလျက်ရှိသော ဆေးဝါးများအနက် အခြေခံဆေးဝါးဈေးနှုန်းဖြစ်သော ဗီတာမင်ဓာတ်ဖြည့်အားဆေး၊ ရာသီတုပ်ကွေး၊ ကိုဗစ်-၁၉ ကာကွယ်/ကုသရာတွင် အသုံးများသောဆေးဝါးများ၊ ထိုးဆေး၊ သောက်ဆေးအမျိုးမျိုး၊ Oxygen Concentrator၊ Oximeter နှင့် အောက်ဆီဂျင်အိုးအမျိုးမျိုး အစရှိသော ဆေးနှင့်ဆေးဝါးဆက်စပ်ပစ္စည်းတို့၏ ဈေးနှုန်းများကို အပတ်စဉ် ဈေးကွက်ပြတ်လပ်မှုရှိ/မရှိ ကွင်းဆင်းစစ်ဆေးစုံစမ်းလျက်ရှိပါသည်။

DOCA(ရန်ကုန်)

  ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆန်အရောင်းဆိုင်များ၊ ဆန်စက်များအား စပါးဝယ်ယူကြိတ်ခွဲဖြန့်ဖြူးရောင်းချနေမှု အခြေအနေနှင့် စည်ပင်သာယာမြို့မဈေးအတွင်း/ အပြင်ရပ်ကွက်ကျေးရွာများတွင် လက်လီ/လက်ကား ဝယ်ယူဖြန့်ဖြူးရောင်းချလျက်ရှိသော ဆန်ဆိုင်များ သို့ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်စည်ပင်သာယာရေးဦးစီးဌာနမှဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်းအဖွဲ့သည် ၂၀၂၃ခုနှစ်၊ ဒီဇင်ဘာလ (၇) ရက်နေ့၊ နေ့လယ် (၁၃:၀၀) နာရီအချိန်တွင် သွားရောက်စစ်ဆေးခဲ့ကြောင်းသိရသည်။

     ထိုသို့ကွင်းဆင်းစစ်ဆေးရာတွင် လတ်တလောနိုင်ငံရေးဖြစ်စဉ်များအပေါ်  သတင်းမှားများကိုအခြေခံ၍း ပြည်တွင်းဆန်ဈေးနှုန်းများ မတည်မငြိမ်ဖြစ်စေရန် ဆောင်ရွက်ရမည့်သတင်းအရ စိစစ်ကြပ်မတ်ဆောင်ရွက်သွားရန် ညွှန်ကြားထားသဖြင့် ကော့မှူးမြို့နယ်အခြေအနေအရ ရေလမ်းကြောင်းဖြင့်မဟုတ်ဘဲ ဧရာဝတီတိုင်းဒေသကြီးဘက်မှ ကုန်းလမ်းကြောင်းဖြင့်ဝင်ရောက်လာသည့် ဆန်ကုန်တင်ယာဉ်များအား သက်ဆိုင်ရာခရိုင်/ မြို့နယ်များမှ ဝင်ပေါက်ဂိတ်များတွင် ပူးပေါင်းအဖွဲ့ဖြင့်လည်းကောင်း၊ မြို့နယ်အတွင်းရှိ ဆန်စက်၊ သိုလှောင်ရုံများ၊ ဆန်နှင့်ဆန်ထွက်ပစ္စည်းအရောင်းဆိုင်များအား ဆန်ဈေးနှုန်းမြှင့်တင်စေရန် ရည်ရွယ်ချက်ဖြင့် သိုလှောင်ထားရှိမှုများမရှိစေရန် ပူးပေါင်းအဖွဲ့ဖြင့် ဝါးဘလောက်သောက်ကျေးရွာရှိ (အောင်ဇေယျာဝင်း)ဆန်စက်၊ (ရွှေတိုးလေး)  ဆန်စက်တို့တွင် ဆန်စပါးကြိတ်ခွဲဖြန့်ဖြူးရောင်းချနေမှုအခြေအနေ၊ ကျေးရွာအတွင်းရှိ ဆန်ဆိုင်များတွင် ဆန်ဖြန့်ဖြူးရောင်းချနေမှုအခြေအနေများကိုစစ်ဆေးခဲ့ပြီး လုပ်ငန်းရှင်များအား ဆန်ဈေးနှုန်းများမတည်မငြိမ်ဖြစ်စေရန် ရည်ရွယ်ချက်ရှိရှိဖြင့် သိုလောင်ခြင်းဖြန့်ဖြူးရောင်းချခြင်းများမပြုလုပ်ကြရန်နှင့် တွေ့ရှိပါက စားသုံးသူကာကွယ်ရေးဥပဒေနှင့်အညီ ထိရောက်စွာအရေးယူဆောင်ရွက်သွားမည်ဖြစ်ကြောင်း အသိပညာပေးကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် မိုးစပါးရိတ်သိမ်းပြီးသွားသော တောင်သူများသည် (၂၀၂၃-၂၀၂၄) ခုနှစ်၊ စိုက်ပျိုးရာသီဆောင်းသီနှံ မတ်ပဲစိုက်ပျိုးရန် ပြင်ဆင်လျက်ရှိကြောင်းသိရသည်။ မကျီးတန်းရပ်ကွက် ကာပလိန်းကွင်း၊ ကွင်းအမှတ် ၂၉၃၊ ဦးပိုင်အမှတ်(၁၀/၁)၊ (၁၀/၃) မှ ဦးအောင်မိုးနှင့်ဦးပြုံးပိုင် လယ်ယာမြေ (၁၀) ဧက မြေပြုပြင်နေမှုအခြေအနေအား ၂၀၂၃ခုနှစ်၊ ဒီဇင်ဘာလ (၆) ရက်နေ့၊ နံနက် (၁၁:၃၀) နာရီအချိန်တွင် သွားရောက်ကွင်းဆင်း စစ်ဆေးခဲ့ကြောင်းသိရသည်။

     ထိုသို့ကွင်းဆင်းစစ်ဆေးခဲ့ရာတွင် ထွန်ရေးပြင်ဆင်နေသူ ဦးအောင်မိုးနှင့်ဦးပြုံးတို့က  မိမိတို့လယ်၌ စပါးရိတ်သိမ်းပြီးနောက် လယ်ယာမြေများထဲမှ ကောက်ရိုးမြတ်များကို မီးရှို့ရှင်းလင်းကြောင်း၊ ထို့နောက် သံလင်ပန်းတပ်ဆင်ထားသော ထွန်စက်ကြီးများဖြင့် မြေကြီးကို တစ်လွှာလှန်ထယ်ထိုးခြင်းလုပ်ငန်းကိုဆောင်ရွက်ထားကြောင်း၊ နောက်ထပ် နှစ်ရက်သုံးရက်မြေစိုင်ခဲများအဖြစ်ထားရှိကြောင်း၊ ကွန်ပေါင်းဓာတ်မြေဩဇာအမျိုးအစားကို မြေခံထားကာ မြေစိုင်မြေခဲများကြေညက်အောင် နောက်ထပ်နှစ်လွှာမောင်းပြီးမှသာ မျိုးပဲကြဲကာ၊ ပဲမျိုးစေ့များဖုံးအုပ်၍ တလွှာထပ်မံထွန်ယက်ရမည်ဖြစ်ကြောင်းပြောကြားခဲ့ပြီး စိုက်ပျိုးရေးဦးစီးဌာနမှ မြို့နယ်မန်နေဂျာ ဦးသက်နိုင်က မြေအမျိုးအစားပြုစုပျိုးထောင်မှုပုံစံ၊ စိုက်ပျိုးမှုနည်းစနစ်ကောင်းမှန်ရန်တို့နှင့် စိုက်ပျိုးချိန်၊ ဆွတ်ခူးချိန်တို့အား အချိန်မီစိုက်ပျိုးခူးဆွတ်နိုင်ရေး ပိုးမွှားများကျရောက်မှုရှိပါက အချိန်မီ ပိုးသတ်ဆေးပတ်ဖြန်းနိုင်ရေးတို့အား တောင်သူများသိရှိနိုင်ရန် ရှင်းလင်းပြောကြားခဲ့ကြောင်းသိရသည်။

    အဆိုပါကွင်းဆင်းစစ်ဆေးခဲ့ရာတွင် မြို့နယ်ဥက္ကဋ္ဌ ဗိုလ်မှူးထွန်းဇော်မင်း၊ ဒုတိယမြို့နယ်အုပ်ချူပ်ရေးမှူး ဦးစည်သူ၊ စိုက်ပျိုးရေးဦးစီးဌာနမှ မြို့နယ်မန်နေဂျာ ဦးသက်နိုင်၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနမှ မြို့နယ်ဦးစီးမှူး ဦးစိုးတင့်နှင့် စားသုံးသူရေးရာဦးစီးဌာနမှမြို့နယ် တာဝန်ခံဦးတင်မင်းတို့ပူးပေါင်းပါဝင်ခဲ့ကြောင်းသိရှိရပါသည်။

DOCA(ရန်ကုန်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ပခုက္ကူခရိုင်ဦးစီးမှူး၏ ကြီးကြပ်မှုဖြင့် (၄-၁၂-၂၀၂၃) ရက်နေ့၊ နံနက်(၁၀:၀၀)နာရီအချိန်တွင် ပခုက္ကူမြို့၊ အမှတ်(၆)ရပ်ကွက်ရှိ အမှတ်(၇)အခြေခံပညာမူလတန်းကျောင်း၌ အသိပညာပေးဟောပြောပွဲပြုလုပ်ခဲ့ရာ ကျောင်းသား/ ကျောင်းသူ (၁၉၇) ဦးနှင့် ဆရာ၊/ဆရာမ (၁၀) ဦး၊ စုစုပေါင်း (၂၀၇) ဦးတို့တက်ရောက်ခဲ့ကြပါသည်။

    ဟောပြောပွဲတွင် အမှတ်(၇)အခြေခံပညာမူလတန်းကျောင်းမှ ကျောင်းအုပ်ဆရာမကြီးက ကြိုဆိုနှုတ်ခွန်းဆက်စကားပြောကြားခဲ့ပြီး ဦးစီးမှူး ဒေါ်ကြည်ကြည်စိုးက စားသုံးသူရေးရာဦးစီးဌာန၏သမိုင်းကြောင်းနှင့် ဌာန၏ဆောင်ရွက်နေသော လုပ်ငန်းဆောင်ရွက်ချက်များကို ရှင်းလင်းဆွေးနွေးခဲ့ပါသည်။

    ၎င်းနောက် ဒုတိယဦးစီးမှူး ဒေါ်ဝါဝါကြည်က စားသုံးသူရေးရာဦးစီးဌာန၏ဆောင်ပုဒ်ဖြစ်သော "စားသုံးသူအခွင့်အရေး ဦးစားပေး"ဟူသည့်အတိုင်း စားသုံးသူ၏အခွင့်အရေးနှင့်တာဝန်များကို ဦးစားပေးရှင်းလင်းခဲ့ပြီး ပြည်သူတိုင်းသည် စားသုံးသူဖြစ်ပြီး စားသုံးသူတိုင်းတွင် စားသုံးသူအခွင့်အရေးရှိကြောင်း၊ မိမိ၏အခွင့်အရေးကို သဘောပေါက်နားလည်မှသာ တောင်းဆိုနိုင်မည်ဖြစ်ကြောင်း၊ အစားအသောက်နှင့်ဝန်ဆောင်မှုကို ဝယ်ယူအသုံးပြုလျှင် စိတ်ကျေနပ်မှုရှိရန်လိုအပ်ကြောင်း၊ ဘေးအန္တရာယ်ကင်းရှင်းစွာအသုံးပြုနိုင်ကြောင်း စသည့်မိမိတို့ရရှိမည့်အခွင့်အရေးများကို ရှင်းလင်းဆွေးနွေးခဲ့ပါသည်။

     ဒုတိယဦးစီးမှူး ဒေါ်ပပရွှေက စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားများတွင် ဖော်ပြရမည့်အချက် (၈)ချက်အား တက်ရောက်လာသည့် ကျောင်းသား/ ကျောင်းသူများနှင့် ဆရ/၊ ဆရာမများကို ကျယ်ကျယ်ပြန့်ပြန့်ရှင်းလင်းခဲ့ပြီး ယခုကဲ့သို့ ကုန်အညွှန်းအမှတ်အသားများမပါလျှင် ဝယ်ယူစားသောက်ခြင်းမပြုစေလိုကြောင်း၊ ကုန်အညွှန်းအမှတ်အသားများပြည့်စုံမှသာလျှင် သုံးစွဲစေလိုကြောင်း၊ စားသုံးသူမိဘပြည်သူများက တိကျစွာ လိုက်နာဆောင်ရွက်ရန်လိုအပ်ကြောင်း ရှင်းလင်းပြောကြားခဲ့ပါသည်။

   ဆက်လက်၍ ဦးစီးမှူး ဒေါ်ကြည်ကြည်စိုးက မိဘပြည်သူများအနေဖြင့် အခွင့်အရေးများကိုသိရှိပြီး နစ်နာဆုံးရှုံးမှုရှိခဲ့လျှင် တိုင်ကြားနိုင်ရန် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ “CICC” ရုံးများဖွင့်လှစ်ထားရှိပြီးဖြစ်ကြောင်း၊ တိုင်ကြားနိုင်ကြောင်း၊ ထို့ပြင် Facebook စာမျက်နှာတွင်လည်းကောင်း၊ DOCA Myanmar Application တွင်လည်းကောင်း၊ Consumer Call Center ဖွင့်လှစ်ထားသည့် (1535) တွင်လည်းကောင်း တိုင်ကြားနိုင်ကြောင်းများနှင့် တိုင်ကြားနိုင်သူများအကြောင်းကိုလည်း ကျယ်ကျယ်ပြန့်ပြန့် ရှင်းလင်းဆွေးနွေးခဲ့ပါသည်။ တက်ရောက်လာသည့် ကျောင်းသား/ကျောင်းသူများနှင့် ဆရာ/ ဆရာမများက သိရှိလိုသည်များကိုမေးမြန်းခဲ့ရာ ပြန်လည်ဖြေကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)