HighLight News

   ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ (၂၀၂၃-၂၀၂၄) ခုနှစ် မိုးစပါးသီးနှံစိုက်ခင်းများမှာ ရိတ်သိမ်းခြွေလှေ့ချိန်ရောက်ရှိလာပြီဖြစ်၍ ဒေသခံတောင်သူများအနေဖြင့် သီးထပ်သီးညှပ်ဆောင်းသီးနှံများကို အချိန်မီစိုက်ပျိုးထုတ်လုပ်နိုင်ရေးအတွက် ၂၀၂၃ခုနှစ်၊ နိုဝင်ဘာလ ဒုတိယပတ်မှစတင်ပြီး ရိတ်သိမ်းခြွေလှေ့စက်များဖြင့် လှိုင်လှိုင်ရိတ်သိမ်းခြွေလှေ့လျက်ရှိရာ ယနေ့အထိ တစ်မြို့နယ်လုံးအနေဖြင့် မိုးစပါးသီးနှံစိုက်ဧက၁၀၇၂၄ကျော်ရိတ်သိမ်းခြွေလှေ့ပြီးစီးပြီးဖြစ်ကြောင်း လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနမှသိရသည်။

    ကော့မှူးမြို့နယ်၌ (၂၀၂၃-၂၀၂၄) ခုနှစ် မိုးသီးနှံစိုက်ပျိုးရာသီတွင် ဆန်စပါးစိုက်ပျိုးထုတ်လုပ်မှုကဏ္ဍဖွံ့ဖြိုးတိုးတက်စေရန်၊ ဒေသတွင်းစားနပ်ရိက္ခာဖူလုံစေရန်နှင့် ပြည်ပသို့တင်ပို့နိုင်ရန် ရည်ရွယ်၍ ဒေသခံတောင်သူများက တစ်မြို့နယ်လုံး မိုးစပါးသီးနှံစိုက်ဧက ၈၈၀၉၉ဧကစိုက်ပျိုးနိုင်ခဲ့ကြောင်း၊ ဒေသခံတောင်သူများ အဓိကစိုက်ပျိုးသည့်သီးနှံများမှာ ရက် (၉၀) ၈၆၅၀ဧက သီးထပ်ရင် ၂၁၂၆ဧက၊ ဇီယာ ၉၉၉ဧက၊ ဧည့်မထ (အထွက်ကောင်း) ၁၉၅ဧက၊ ငစိန် ၃၃၈၄၀ဧက၊ မြီးဒုံး ၂၁၆၅၅ဧက၊ ငကျွဲ (တောင်ပျံ) ၁၉၈၀၂ဧက၊ ကောက်ညှင်း ၈၁၄ဧက၊ ငစိန် ၃၃၈၄၀ဧက၊ မြီးဒုံး ၂၁၆၅၅ဧက၊ ငကျွဲ(တောင်ပျံ) ၁၉၈၀၂ဧက၊ ကောက်ညှင်း ၈၂၄ဧက စသည့်စပါးမျိုးများကို အဓိကထားစိုက်ပျိုး ကြကြောင်းတွေ့ရှိရပါသည်။

  ယခုအခါ ဒေသခံတောင်သူများစိုက်ပျိုးထားသည့် မိုးစပါးစိုက်ခင်းများမှာ ရိတ်သိမ်းခြွေလှေ့ချိန်ရောက်ရှိလာပြီဖြစ်သောကြောင့် ဒေသခံတောင်သူများက သီးထပ်သီးညှပ်ဆောင်း သီးနှံများဖြစ်သော နွေစပါး၊ နေကြာ၊ ပဲအမျိုးမျိုး၊ နှံစားပြောင်း၊ ဖိုက်ဆံလှော်ပန်းအမျိုးမျိုးနှင့် ဟင်းသီးဟင်းရွက်သီးနှံများကို အချိန်မီ ပြန်လည်စိုက်ပျိုးလုပ်ကိုင်နိုင်ရန်အတွက် နိုဝင်ဘာလ ဒုတိယအပတ်မှစတင်ပြီး ရိတ်သိမ်းခြွေလှေ့စက်များငှားရမ်း၍ လှိုင်လှိုင်ရိတ်သိမ်းခြွေလှေ့လျက်ရှိရာ ယနေ့အထိ တစ်မြို့နယ်လုံးအနေဖြင့် မိုးစပါးစိုက်ဧက ၁၀၇၂၄ ဧကကျော်ရိတ်သိမ်းခြွေလှေ့ပြီးစီးပြီဖြစ်ရာ စပါးအထွက်နှုန်းအနေဖြင့် တစ်ဧကလျှင် ပျမ်းမျှ ၇၆.၂၅တင်းခန့်ထွက်ရှိကြောင်း ကော့မှူးမြို့နယ်၊ စီမံခန့်ခွဲရေးနှင့် စာရင်းအင်းဦးစီးဌာနမှသိရှိရပါသည်။

DOCA(ရန်ကုန်)

    ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ တာချီလိတ်မြို့နယ်တာဝန်ခံရုံးမှ ဦးစိုင်းဟုန်ရှန်(ဒု-ကြီးကြပ်ရေးမှူး)သည် ၂၀၂၃ခုနှစ်၊ ဒီဇင်ဘာလ(၁)ရက်နေ့တွင် မိုင်းယောင်းမြို့နယ်၊ ဝမ်ဘိုးကျေးရွာအုပ်စု၊ ပါမုန်ကျေးရွာရှိ တောင်သူဦးနွဲ့ရှန်း၏ ငရုတ်စိုက်ခင်းသို့သွားရောက်၍ ငရုတ်စိုက်ခင်းဖြစ်ထွန်းနေမှုနှင့် ဈေးနှုန်း/ဈေးကွက်အခြေအနေတို့ကိုလေ့လာခဲ့ပါသည်။

   တောင်သူဦးနွဲ့ရှန်း၏ ငရုတ်စိုက်ခင်းသည် (၅)ဧကခန့်ကျယ်ဝန်ပြီး ဩဂုတ်လတွင် စတင်ထွန်ယက်စိုက်ပျိုးကာ အောင်မြင်စွာစိုက်ပျိုးဖြစ်ထွန်းနေသောကြောင့် နိုဝင်ဘာလကုန်ပိုင်းမှစတင်၍ ဆွတ်ခူးနေသည်ကိုတွေ့ရပါသည်။ တစ်ဧကစိုက်ပျိုးကုန်ကျစရိတ်မှာ ကျပ်(၁၆)သိန်းခန့်ရှိပြီး အကျိုးအမြတ်အနေဖြင့် တစ်ဧကလျှင် ကျပ်(၁၀)သိန်းခန့်ရှိသည်ဟုသိရှိရပါသည်။ ယခုနှစ်တွင် ငရုတ်သီးစိမ်း (၁)ကီလိုလျှင် (၂၀၀၀)ကျပ်ဖြင့် စတင်ရောင်းချနေရကြောင်း တောင်သူများထံမှသိရှိရပါသည်။

     ရှမ်းပြည်နယ်(အရှေ့ပိုင်း)၊ မိုင်းယောင်းမြို့နယ်တွင် ငရုတ်ကို နှစ်စဉ် ဆောင်သီးနှံအဖြစ်စိုက်ပျိုးကြပြီး ထွက်ရှိလာသောသီးနှံများကို ဒေသတွင်းစားသုံးရန်နှင့် မိုင်းဖြတ်မြို့နယ်၊ တာချီလိတ် မြို့နယ်တို့သို့တင်ပို့ရောင်းချ၍ အကျိုးအမြတ်များဖြစ်ထွန်းလျက်ရှိကြောင်းသိရှိရပါသည်။

DOCA(ရှမ်း)

   စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ( ၂-၁၂-၂၀၂၃) ရက်နေ့တွင် မွန်ပြည်နယ်ဆီကုန်သည်နှင့်ဆီလုပ်ငန်းရှင်များအသင်းနှင့်တွေ့ဆုံ၍ မွန်ပြည်နယ်အတွက်ခွဲဝေရရှိသည့် စားအုန်းဆီများကို မြို့နယ် (၁၀) မြို့နယ်သို့ လူဦးရေအချိုးအစားအလိုက် ဖြန့်ခွဲရောင်းချမည့်ကိစ္စရပ်နှင့်စပ်လျဉ်း၍ တွေ့ဆုံဆွေးနွေးခဲ့သည်။

  ထိုသို့‌ တွေ့ဆုံဆွေးနွေးရာတွင် မွန်ပြည်နယ်ဆီကုန်သည်နှင့်ဆီလုပ်ငန်းရှင်များအသင်းနှင့်တွေ့ဆုံ၍ စားအုန်းဆီဖြန့်ဖြူးရာတွင် လုပ်ဆောင်ရမည့်လုပ်ငန်းစဉ်(မူကြမ်း)နှင့် စပ်လျဉ်း၍လည်းကောင်း၊ မွန်ပြည်နယ်အတွင်း မြို့နယ် (၁၀) မြို့နယ်သို့ဖြန့်ခွဲရောင်းချရာတွင် လုပ်ဆောင်ရမည့်လုပ်ငန်းစဉ်များနှင့်စပ်လျဉ်း၍လည်းကောင်း၊ မြို့နယ်အလိုက် ဆိုင်တင်ရောင်းချမည့် ဆိုင်များစာရင်းတင်ပြရန်ကိစ္စနှင့်စပ်လျဉ်း၍လည်းကောင်း ဆွေးနွေးခဲ့ကြကြောင်းသိရှိရပါသည်။

DOCA(မွန်)

    အဂတိလိုက်စားမှုတားဆီးကာကွယ်ရေးအသိပညာပေးရှင်းလင်းခြင်းကို (၃၀-၁၁-၂၀၂၃) ရက်နေ့၊ နေ့လယ် (၁၃း၀၀) နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံး၌ ဦးစီးအရာရှိ ဦးမျိုးဝင်းနိုင်ကဦးဆောင်၍ ပြုလုပ်ခဲ့ကြောင်းသိရသည်။

 ဦးမျိုးဝင်းနိုင် (ဦးစီးအရာရှိ)က  အဂတိလိုက်စားမှုတားဆီးကာကွယ်ရေးလုပ်ငန်းများကို အောင်မြင်စွာအကောင်အထည်ဖော်ဆောင်ရွက်နိုင်ရေးအတွက် ဝန်ကြီးဌာနအလိုက် အဂတိလိုက်စားမှု တာဆီးကာကွယ်ရေးအဖွဲ့များဖွဲ့စည်း၍ အဂတိလိုက်စားမှုပြဿနာပေါ်ပေါက်နိုင်သောအခြေအနေများကို ကြိုတင်စိစစ်ဖော်ထုတ်ခြင်း၊ ဥပဒေနှင့်အညီ အရေးယူဆောင်ရွက်ခြင်း၊ အဂတိလိုက်စားမှုအန္တရာယ်ဖြစ်နိုင်ခြေရှိမှုကို ဆန်းစစ်အကဲဖြတ်ခြင်းနှင့် အဂတိလိုက်စားမှုများဆက်လက်မဖြစ်ပေါ်စေရေးအတွက် တားမြစ်ထိန်းချုပ်ခြင်း၊ အဂတိလိုက်စားမှုကြောင့် နိုင်ငံတော်ပိုင် ငွေကြေးပစ္စည်းများ၊ လူ့အဖွဲ့အစည်းနှင့် နိုင်ငံသားများ၏ အခွင့်အရေးနှင့်အကျိုးစီးပွားများကို ထိခိုက်မှုမရှိစေရေးအတွက် အကာအကွယ်ပေးခြင်း၊ အဂတိလိုက်စားမှုကျူးလွန်သူများအား ထိရောက်စွာအရေးယူခြင်း၊ ဝန်ထမ်းများအနေဖြင့် အဂတိလိုက်စားမှုတိုက်ဖျက်ရေးဥပဒေကိုသိရှိနားလည်ပြီး အဂတိကင်းစင်သည့် ဝန်ထမ်းကောင်းများဖြစ်လာစေရန်ရည်ရွယ်၍ ရှင်းလင်းဆွေးနွေးခဲ့ခြင်းဖြစ်ကြောင်း၊ ဝန်ထမ်းများအနေဖြင့် လုပ်ငန်းများဆောင်ရွက်ရာတွင် ဥပဒေ၊ နည်းဥပဒေ၊ လုပ်ထုံး/ လုပ်နည်း စံသတ်မှတ်ချက်များနှင့်အညီ အဂတိတရားကင်းရှင်းစွာ အလေးထားဆောင်ရွက်နိုင်ရေး အကျယ်တဝင့်ဆွေးနွေးခဲ့ပါသည်။ အဆိုပါဟောပြောပွဲတွင် ပြည်နယ်မှ ဝန်ထမ်း(၁၃)ဦးတက်ရောက်ခဲ့ပြီး အစည်းအဝေးကို နေ့လယ် (၁၅း၀၀) နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(ကရင်)

   ၂၀၂၃ခုနှစ်၊ နိုဝင်ဘာလ (၃၀)ရက်နေ့၊ နံနက်(၉း၀၀)နာရီအချိန်တွင် နေပြည်တော်၊ အစားအသောက်နှင့်ဆေးဝါးကွပ်ကဲရေးဦးစီးဌာနခန်းမ၌ စားသုံးဆီထုတ်လုပ်/ထုပ်ပိုးသော လုပ်ငန်းရှင်များအား ကောင်းမွန်သောထုတ်လုပ်မှုကျင့်စဉ်နှင့်အညီ ဆောင်ရွက်နိုင်ရေး အသိပညာပေးသင်တန်းပြုလုပ်ခဲ့ပါသည်။ အဆိုပါသင်တန်းတွင် စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးက အရာထမ်း/အမှုထမ်း(၅)ဦး၊ ဆီစက်လုပ်ငန်းရှင်(၁၂)ဦးနှင့် ဌာနဆိုင်ရာဝန်ထမ်း(၈)ဦးတို့တက်ရောက်ခဲ့ကြပြီး အစားအသောက်နှင့်ဆေးဝါးကွပ်ကဲရေးဦးစီးဌာန၊ အစားအသောက်ဌာနခွဲမှ ညွှန်ကြားရေးမှူး၊ ဒေါက်တာပြည့်ဖြိုးက ကောင်းမွန်သန့်ရှင်းသောထုတ်လုပ်မှုကျင့်စဉ်နှင့် စားသုံးဆီထုတ်လုပ်မှုနည်းစဉ်များနှင့်ပတ်သက်၍ ရှင်းလင်းပြောကြားခြင်း၊ ဒုတိယညွှန်ကြားရေးမှူး ဒေါက်တာဝင်းလဲ့ဖြူက အသင့်ထုပ်ပိုးထားသောအစားအသောက်များ အမှတ်တံဆိပ်ကပ်ခြင်းဆိုင်ရာ အမိန့်ညွှန်ကြားချက်အမှတ်(၈/၂၀၂၂)တွင်ပါဝင်သည့် မဖြစ်မနေဖော်ပြရမည့်အချက်များနှင့် FDA ‌ထောက်ခံချက်ရရှိရန် ဆောင်ရွက်ထားရှိရမည့် အချက်(၇၂)ချက်တို့ကိုရှင်းလင်းပြောကြားခြင်း၊ ဒုတိယညွှန်ကြားရေးမှူး၊ ဒေါက်တာဥက္ကာဖြိုးက အစားအသောက်ထုတ်လုပ်ခြင်းထောက်ခံချက်အား Online e-submission system ဖြင့် လျှောက်ထားနိုင်မှုလုပ်ငန်းစဉ်နှင့်ပတ်သက်၍ ရှင်းလင်းဆွေးနွေးခဲ့ပါသည်။ ၎င်းနောက် နေ့လယ်(၁၅း၀၀)နာရီအချိန်တွင် သင်တန်းပြီးဆုံးမှုစစ်ဆေးခြင်း (Post Test) ပြုလုပ်၍ တက်ရောက်လာသော ဆီလုပ်ငန်းရှင်များအား သင်တန်းတက်ရောက်ကြောင်းလက်မှတ်များပေးအပ်ပြီး ညနေ (၁၆း၀၀)နာရီအချိန်တွင် သင်တန်းပြီးမြောက်ကြောင်းသိရှိရပါသည်။

DOCA(နေပြည်တော်)