HighLight News

တစ်ဦးချင်းကုန်သွယ်မှုလုပ်ငန်းရှင် မှတ်ပုံတင်လက်မှတ် (ITC) ကတ်အား သက်တမ်းတိုး ခွင့်မပြုမည့်ကိစ္စ အသိပေးထုတ်ပြန်ခြင်း

ကုန်သွယ်ရေးစခန်းများနှင့် ပို့ကုန်သွင်းကုန်ရုံး(မြစ်ကြီးနား၊ မန္တလေး၊ကျိုင်းတုံ) တို့တွင် ခွင့်ပြုပေးခဲ့သည့် တစ်ဦးချင်းကုန်သွယ်မှုလုပ်ငန်းရှင်မှတ်ပုံတင်လက်မှတ်(ITC) ကတ် အသစ်ထုတ်ပေးခြင်းအား (၁.၆.၂၀၂၁) ရက်နေ့မှစ၍ ရပ်ဆိုင်းခဲ့ပြီးဖြစ်ပါသည်။
ယခုအခါ ခွင့်ပြုထုတ်ပေးထားပြီးဖြစ်သည့် တစ်ဦးချင်းကုန်သွယ်မှုလုပ်ငန်းရှင် မှတ်ပုံတင်လက်မှတ်(ITC) ကတ်များ၏ သက်တမ်းတိုးလျှောက်ထားမှုများအား (၁.၉.၂၀၂၁) ရက်နေ့မှစ၍ ခွင့်မပြုတော့ကြောင်း အသိပေးထုတ်ပြန်ကြေညာအပ်ပါသည်။
သက်တမ်းရှိ ITC ကတ်များဖြင့် ကုန်သွယ်မှုဆောင်ရွက်ခြင်းကို လက်ရှိ သက်တမ်းကုန်ဆုံးသည်အထိ ဆက်လက်ဆောင်ရွက်ခွင့်ပြုသွားမည်ဖြစ်ကြောင်း ကုန်သွယ်ရေးဦးစီးဌာနက ထုတ်ပြန်ထားပါသည်။

ပဲခူးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီးနှင့် စီးပွားရေးလုပ်ငန်းရှင်များ တွေ့ဆုံပွဲ

သတင်းနှင့် လှုပ်ရှားမှုများ

ပဲခူးတိုင်းဒေသကြီး၊ စားသုံးသူရေးရာဦးစီးဌာနမှ ဦးဆောင်၍ စိုက်ပျိုးရေးလုပ်ငန်းသုံး ဓာတ်မြေသြဇာ စျေးနှုန်းမြှင့်တင်မှု မရှိစေရေး၊ စျေးနှုန်းစျေးကွက်အခြေအနေများ တည်ငြိမ်စေရေးအတွက် ရည်ရွယ်ပြီး ပဲခူးတိုင်းဒေသကြီးအစိုးရအဖွဲ့ ၊ စီးပွားရေးရာဝန်ကြီးနှင့် စိုက်ပျိုးရေးသုံး ဓာတ်မြေသြဇာနှင့် ပိုးသတ်ဆေးရောင်းချသော ကုမ္ပဏီများ၊ စီးပွားရေးလုပ်ငန်းရှင်များ တွေ့ဆုံပွဲကို (၁.၉.၂၀၂၁) ရက်နေ့ နေ့လည်တွင် ပဲခူးတိုင်းဒေသကြီး အစိုးရအဖွဲ့ရုံး ၊ အစည်းအဝေးခန်းမ၌ ကျန်းမာရေးဌာနမှ ထုတ်ပြန်ထားသော ကိုဗစ် ၁၉ စည်းမျဉ်းစည်းကမ်းများနှင့်အညီ ကျင်းပခဲ့ပြီး အဆိုပါ အစည်းအဝေးသို့ သက်ဆိုင်ရာအစိုးရ ဌာနများနှင့် စီးပွားရေးလုပ်ငန်းရှင် (၁၅)ဦး တက်ရောက်ခဲ့ပါသည်။

အဆိုပါဆွေးနွေးပွဲတွင် ပဲခူးတိုင်းဒေသကြီးအစိုးရအဖွဲ့ ၊ စီးပွားရေးရာဝန်ကြီးက ပဲခူးတိုင်းဒေသကြီးအနေဖြင့် သွင်းအားစုမြေသြဇာစျေးနှုန်းများ ထူးထူးခြားခြားမြင့်တက်နေခြင်းနှင့် ပတ်သက်၍ ဖြစ်သင့်ဖြစ်ထိုက်သည်ထက် မြင့်တက်ခဲ့သည်ကို လျစ်လျူရှု၍ မရပါကြောင်း၊ လယ်ယာ စိုက်ပျိုးရေးတွင် အဓိက သွင်းအားစုဖြစ်သော မြေသြဇာလုပ်ငန်းရှင်ကြီးများအနေဖြင့် မိမိတို့ ဒေသတွင်း တောင်သူအခက်အခဲများကို ကူညီဖြေရှင်းပေးရန်နှင့် ထူးခြားစျေးနှုန်းများကို ပြန်လည်သုံးသပ်ဖြေရှင်း ပေးပါရန် တွေ့ဆုံခြင်းဖြစ်ပါကြောင်း အဖွင့်အမှာစကား ပြောကြားခဲ့ပါသည်။ ဆက်လက်၍ ပဲခူးတိုင်းဒေသကြီး ၊ စိုက်ပျိုးရေးဦးစီးဌာနမှ ဒုတိယတိုင်းဒေသကြီး ဦးစီးမှူးက စိုက်ပျိုးရေးဆိုင်ရာကိစ္စရပ်များနှင့်ပတ်သက်၍ ဆွေးနွေးပြောကြားခဲ့ပြီးနောက် ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးက ဓာတ်မြေသြဇာ စျေးနှုန်းများ မြှင့်တက်နေခြင်းနှင့် ပတ်သက်၍ အဖြေရှာရန် လိုအပ်ပါကြောင်း၊ မိမိတို့ဌာနအနေဖြင့် တင်ပြလာသည်များကို ကဏ္ဍအလိုက် ဖြေရှင်းသွားမည်ဖြစ်ပါကြောင်းနှင့် စားသုံးသူရေးရာကိစ္စရပ်များနှင့်ပတ်သက်၍ အကျယ်တဝင့် ဆွေးနွေး ပြောကြားခဲ့ပါသည်။ ထို့နောက် ပဲခူးတိုင်းဒေသကြီး ၊ အထူးစုံစမ်းစစ်ဆေးရေးဦးစီးဌာန ၊ ညွှန်ကြားရေးမှူးက မိမိတို့ဌာနအနေဖြင့် စီးပွားရေးမသမာမှု၊ ဝန်ထမ်းမသမာမှု၊ နိုင်ငံတော်မြေပေါ် မြေအောက် တရားမဝင် အဖွဲ့အစည်းကို ဖော်ထုတ်ရသော ဌာနဖြစ်ပါကြောင်းနှင့် စီးပွားရေး အခြေအနေများနှင့် ပတ်သက်၍ ဆွေးနွေးခဲ့ပြီး ပဲခူးတိုင်း‌ဒေသကြီး ၊ ပဲနှမ်းကုန်သည်အသင်း ဥက္ကဌက တောင်သူများ၏ အခက်အခဲများနှင့်ပတ်သက်၍ အကျယ်တဝင့် ဆွေးနွေးခဲ့ပြီး တွေ့ဆုံပွဲ အခမ်းအနားသို့ တက်‌ရောက်လာသူ လုပ်ငန်းရှင်များမှ ကုန်ကြွေးစနစ်ဖြင့် သွင်းအားစုများကို ယခင်နှစ် အတိုင်း အကြွေးစနစ်ဖြင့် ကုန်ကြွေးမ‌ပေးနိုင်ခြင်း၏ အဓိက အကြောင်းအရင်းမှာ စိုက်ပျိုးရေးလုပ်ငန်းသုံး ဓာတ်မြေသြဇာ ၊ ပိုးသတ်ဆေးရောင်းချသော ကုမ္ပဏီများမှ ယခုနှစ်တွင် ငွေကြိုပေးသွင်းစနစ်ဖြင့်သာ ပစ္စည်းရောင်းချခြင်းအတွက်ကြောင့် လုပ်ငန်းရှင်များမှ တောင်သူများသို့ အကြွေးစနစ်ဖြင့် ရောင်းချ၍ မရခြင်းဖြစ်ကြောင်းနှင့် သွင်းအားစုကုန်ပစ္စည်းများ သယ်ယူရာတွင် လမ်းပန်းဆက်သွယ်ရေးအရ အခက်အခဲများ ရှိပါကြောင်း ၊ မြန်မာနိုင်ငံတွင် ဓာတ်မြေသြဇာစက်ရုံ(၅) ရုံလုံး လည်ပတ်ရန် လိုအပ်ပါကြောင်းကို ဆွေးနွေးခဲ့ပြီး သက်ဆိုင်ရာဌာနဆိုင်ရာများမှ ပြန်လည်ဆွေးနွေးခဲ့ပါသည်။ ထို့နောက် ပဲခူးတိုင်းဒေသကြီးအစိုးရအဖွဲ့ ၊ စီးပွားရေးရာဝန်ကြီးက တောင်သူများ၏ လူနေမှုဘဝတိုးတက်မှသာ ဒေသတွင်းစီးပွားရေးတိုးတက်မည်ဖြစ်ပါကြောင်း သွင်းကုန်အစားထိုးသဘာဝ ဓာတ်မြေသြဇာများ ကျယ်ကျယ်ပြန့်ပြန့် ဆောင်ရွက်ရန် အသိပညာပေးရေးလုပ်ငန်းများ ပိုမိုလုပ်ဆောင်ရန် လိုအပ်ပါကြောင်းနှင့် မိမိတို့ပဲခူးတိုင်းဒေသကြီးအတွင်း အခြေခံစားသောက်ကုန်များနှင့်ပတ်သက်၍ ဆောင်ရွက်နေမှုများ အကြောင်းကို အကျဘ်တဝင့် ဆွေးနွေးပြောကြားခဲ့ကြောင်း သတင်းရရှိပါသည်။

ပဲခူးတိုင်းဒေသကြီး(DOCA)

ဖရဲသီး၊ သခွားမွှေးသီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက်များ ထုတ်ပြန်နိုင်ရေး ညှိနှိုင်းအစည်းအဝေးအား Virtual Meeting ဖြင့်ကျင်းပ

သတင်းနှင့် လှုပ်ရှားမှုများ

၃၀.၆.၂၀၂၁ ရက်နေ့၊ နံနက် (၁၀:၀၀) နာရီတွင် ပြည်ပပို့ကုန်များဖြစ်သည့် ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက်များ ထုတ်ပြန်နိုင်ရေးနှင့် ပတ်သက်၍ ညှိနှိုင်းအစည်းအဝေးကို စားသုံးသူရေးရာဦးစီးဌာန၊ ညွှန်ကြားရေးမှူးချုပ်က ဦးဆောင်၍ Virtual Meeting ကျင်းပပြုလုပ်ခဲ့ရာ စိုက်ပျိုးရေးဦးစီးဌာန၊ သုတေသနနှင့် တီထွင်ဆန်းသစ်မှုဦးစီးဌာန၊ ကုန်သွယ်ရေးဦးစီးဌာန၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက်စိုက်ပျိုးထုတ်လုပ်သူများအသင်း၊ မြန်မာနိုင်ငံ ဖရဲ၊ သခွားမွှေး စိုက်ပျိုး ထုတ်လုပ်တင်ပို့ရောင်းချသူများအသင်း၊ မြန်မာနိုင်ငံ သရက်စိုက်ပျိုးထုတ်လုပ်တင်ပို့ရောင်းချ သူများအသင်း၊ မြန်မာနိုင်ငံ ကြက်သွန်နီ၊ ကြက်သွန်ဖြူနှင့် စားဖိုဆောင်သုံးသီးနှံ စိုက်ပျိုး ထုတ်လုပ်တင်ပို့ရောင်းချသူများအသင်း၊ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်နှင့် Unique Lawk Sawk Mango Public Co., Ltd. တို့မှ တာဝန်ရှိသူများနှင့် ကိုယ်စားလှယ်များ တက်ရောက်ခဲ့ကြပါသည်။
အစည်းအဝေးတွင် စီးပွားရေးနှင့် ကူးသန်း‌ရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီး ဌာနမှ ညွှန်ကြားရေးမှူးချုပ် ဦးမြင့်ချိုက အဖွင့်အမှာစကားပြောကြားရာတွင် မြန်မာနိုင်ငံ အပါအဝင် တစ်ကမ္ဘာလုံး၌ Covid-19 ကပ်ရောဂါကူးစက်မှုများကြောင့် ကုန်စည်စီးဆင်းမှု များတွင် အခက်အခဲများကြုံတွေ့နေရပါကြောင်း၊ အထူးသဖြင့်နယ်စပ်မှ ပို့ကုန်တင်ပို့မှုတွင် အခက်အခဲများ ဖြစ်ပေါ်နေပြီး ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေး ဗဟိုကော်မတီအား ဖွဲ့စည်းထားရှိပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးသည် အတွင်းရေးမှူးအဖြစ် တာဝန်ယူဆောင်ရွက်လျက်ရှိသည့်အတွက် ကုန်သွယ်မှုဆောင်ရွက်ရာတွင် အခက်အခဲများရှိပါက မိမိတို့ဦးစီးဌာနသို့ ဆက်သွယ်တင်ပြနိုင် ပါကြောင်း၊ စားသုံးသူရေးရာဦးစီးဌာနအနေဖြင့် စိုက်ပျိုးရေးအခြေခံထုတ်ကုန် စံချိန်စံညွှန်း ရေးဆွဲရေးနည်းပညာဆပ်ကော်မတီကို တာဝန်ယူဆောင်ရွက်လျက်ရှိရာ လယ်ယာထုတ်ကုန် စံချိန်စံညွှန်းများအား ဦးဆောင်ရေး ဆွဲလျက်ရှိပါကြောင်း၊ မြန်မာနိုင်ငံစံချိန်စံညွှန်းကောင်စီမှ ထုတ်ပြန်ထားသော မြန်မာစံချိန်စံညွှန်းများကို ရည်ညွှန်းအသုံးပြု၍ နယ်စပ်မှပြည်ပသို့ တင်ပို့ ရာတွင် ဈေးကွက်နှင့် ဈေးနှုန်းရရှိရေးတို့တွက် ဖရဲ၊ သခွားမွှေးသီး၊ သရက်သီးနှင့် ကြက်သွန်နီ တို့ကို အရည်အသွေးသတ်မှတ်ချက်ထုတ်ပြန်ရန် မူကြမ်းများ ပြုစုထားပါကြောင်း၊ သို့ရာတွင် Voluntary စံချိန်စံညွှန်းတစ်ခုစလုံးကို Mandatory ထုတ်ပြန်ခြင်းမဟုတ်ပါကြောင်း၊ ဈေးကွက်လိုအပ်ချက်အရ ဘေးအန္တရာယ်ကင်းရှင်းမှု (Safety) နှင့် အရည်အသွေး (Quality) မြင့်မားရေးဆိုင်ရာ လိုအပ်ချက်များကိုသာ ကိုးကားအသုံးပြုထားပါကြောင်း၊ အထူးသဖြင့် ကုန်သွယ်မှုပြုရာတွင် အရည်အသွေးပိုင်းဆိုင်ရာ စံသတ်မှတ်ချက်များနှင့်အညီ တင်ပို့နိုင်ရေး အတွက်ဖြစ်ပါကြောင်း အဖွင့်အမှာစကားပြောကြားခဲ့ပြီး အစည်းအဝေးသို့တက်ရောက်လာ သော သက်ဆိုင်ရာဌာနများနှင့် အသင်းအဖွဲ့များမှ ကိုယ်စားလှယ်များက ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက် (မူကြမ်း) အပေါ် ဝိုင်းဝန်း အကြံပြုဆွေးနွေးခဲ့ပြီး အစည်းအဝေးအား နေ့လယ် ၁၂:၀၀ နာရီအချိန်တွင် ရုပ်သိမ်းခဲ့ကြောင်း သိရှိရပါသည်။
ITQM

မိုင်းယောင်းမြို့တွင် ရော်ဘာအစေးခြစ်လုပ်ငန်းလုပ်ကိုင်ခြင်းဖြင့် ဝင်ငွေတိုး

သတင်းနှင့် လှုပ်ရှားမှုများ

ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းယောင်းမြို့နယ်၏ ဒေသခံအများစုသည် တောတောင်ရေ မြေသဘာဝကောင်းမွန်၍ ရာသီသီးနှံအလိုက် စိုက်ပျိုးရေးအဆင်ပြေသောကြောင့် လယ်ယာနှင့် ရော်ဘာစိုက်ပျိုးခြင်းကို အဓိကထားလုပ်ကိုင်ကြသည်။ ၂၀၂၀-၂၀၂၁ ဘဏ္ဍာနှစ်တွင် မိုင်းယောင်းမြို့ရှိ ရော်ဘာစိုက်ဧက (၁၇၈၆၇)ဧကခန့်ရှိပြီး ရိတ်ဧက(၅၂၀၄)ဧက အစေးခြစ်၍ (၂၇၃၀၅၅၆)ပေါင် ထွက်ရှိကြောင်း သိရှိရပါသည်။ နှစ်စဉ် ဧပြီလ(တတိယပတ်)မှ နိုဝင်ဘာလကုန်အထိ ရော်ဘာအစေးခြစ်ခြင်းကိုလုပ်ကိုင်ပြီး ကျန်(၄)လအတွင်း နှစ်ရှည်ပင်များဖြစ်သည့်အလျှောက် ပေါင်းရှင်းပေးခြင်းနှင့် သဘာဝမြေဩဇာ (နွားချေး၊ဝက်ချေး)စသည်များ ထည့်ပေးခြင်းတို့ကို လုပ်ဆောင်ပေးရပါသည်။ ရော်ဘာစေးကို တစ်ကီလိုလျှင်(၇၀၀)ကျပ်မှ (၈၅၀)ကျပ်အထိ ရရှိကြောင်းနှင့် မိုင်းယောင်းမြို့၊ ဝမ်မိုင်လုံရွာတွင် အသေးစားရော်ဘာပြားထုတ်လုပ်သည့်စက်ရုံရှိပြီး အလုပ်သများ(၁၀)ဦးခန့်ဖြင့် လုပ်ကိုင်လျှက်ရှိပြီး တရုတ်နိုင်ငံသို့အများဆုံးတင်ပို့လျှက်ရှိကြောင်း သိရှိရသောကြောင့် ရော်ဘာစေးခြစ်လုပ်ငန်းဖြင့် တောင်သူများ တဖက်တလမ်းမှ ဝင်ငွေတိုးပွားလျက်ရှိပါကြောင်း သတင်းရရှိပါသည်။

ရှမ်းပြည်နယ်(DOCA)

ASEAN SMEs အတွက် ASEAN ACCESS Portal အား ဖွင့်လှစ်ခြင်း

သတင်းနှင့် လှုပ်ရှားမှုများ

အာဆီယံ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (ASEAN SMEs) လုပ်ကိုင်ဆောင်ရွက်နေသည့် စီးပွားရေးလုပ်ငန်းရှင်များအနေဖြင့် အာဆီယံဒေသတွင်းရှိ ကုန်သွယ်ရေးနှင့် ဈေးကွက်ရရှိမှုဆိုင်ရာ သတင်းအချက်အလက်များကို ဝင်ရောက်ကြည့်ရှု လေ့လာနိုင်မည့် ASEAN Access Portal (www.aseanaccess.com)ကို ၁၆-၆-၂၀၂၁ ရက်နေ့ တွင် Online Launching ပြုလုပ်ခဲ့ပါသည်။

အဆိုပါ ASEAN Access Portal ကို ဂျာမနီနိုင်ငံ ဖွံ့ဖြိုးမှုပူးပေါင်းဆောင်ရွက်ရေးအဖွဲ့ (GIZ) နှင့် ထိုင်းနိုင်ငံ၊ အသေးစားနှင့် အလတ်စားစီးပွားရေးလုပ်ငန်းများ မြှင့်တင်ရေးရုံးတို့မှ ပူးပေါင်းရေး ဆွဲခဲ့ပါသည်။ ASEAN Access Portal တွင် အာဆီယံ‌ဒေသတွင်းရှိ စိတ်ဝင်စားဖွယ်ကောင်းသော စီးပွားရေးလုပ်ငန်းများကို ကုန်သွယ်ရေးနှင့် ဈေးကွက်ရရှိမှုဆိုင်ရာ သတင်းအချက်အလက်များနှင့်အတူဖော်ပြခြင်းနှင့် ဈေးကွက်အသစ်များရရှိရေးအတွက် လိုအပ်သော ဝန်ဆောင်မှုများနှင့် ဝန်ဆောင်မှုပေးသည့် အဖွဲ့အစည်းများကို ဖော်ပြထားပါသည်။

မြန်မာနိုင်ငံအနေဖြင့် SME ကဏ္ဍအတွက် Focal ဌာနအဖြစ်ဆောင်ရွက်သော စက်မှုကြီးကြပ်ရေးနှင့် စစ်ဆေးဦးစီးဌာနမှ National SMEs Webportal အား ရေးဆွဲပြုစုလျက်ရှိပါကြောင်း၊ ASEAN Access Portal သည် အာဆီယံအဖွဲ့ဝင်နိုင်ငံများ၏ National SMEs Webportal မှသည် ASEAN SMEs Portal ဆီသို့ ချိတ်ဆက် ဆောင်ရွက်သွားရန်ဖြစ်ပြီး ကုန်သွယ်မှုကဏ္ဍတွင် ပါဝင်ပတ်သက်သူများအားလုံး အထူးသဖြင့် SME လုပ်ငန်းရှင်များ၊ SME Service Provider များက SME လုပ်ငန်းများလည်ပတ်ရာတွင် လိုအပ်သည့် Service/ Products များ ကို လေ့လာနိုင်မည်ဖြစ်ပါကြောင်း၊ အဆိုပါ Website တွင် Register ကို Free of Charge ပြုလုပ်နိုင်ပြီး လုပ်ငန်းဆိုင်ရာ အချက်အလက်များကို Upload ပြုလုပ်၍ချိတ်ဆက်ဆောင်ရွက်နိုင်ပါကြောင်း၊ ASEAN SME Webportal အနေဖြင့် အာဆီယံ SME များအတွက် “One-Stop Service” ဖြစ်လာရန် ရည်ရွယ်ပါကြောင်း၊ Portal အား ဝင်ရောက်လေ့လာခြင်းဖြင့် အာဆီယံအဖွဲ့ဝင်နိုင်ငံများအလိုက် ချမှတ်ထားသော SME လုပ်ငန်းများနှင့် သက်ဆိုင်သည့် ကုန်သွယ်မှုဆိုင်ရာဥပဒေ၊ စည်းမျဉ်းစည်းကမ်းများ၊ စိုက်ပျိုးရေးကဏ္ဍ ဖွံ့ဖြိုးတိုးတက်မှုအခြေအနေ၊ ဈေးနှုန်းဈေးကွက်အခြေအနေများ၊ အွန်လိုင်းသင်တန်းများ (Online Trainings)နှင့် SME Service Provider များကို တစ်နေရာတည်းတွင် လေ့လာခွင့်ရရှိသည့်အတွက် အကျိုးကျေးဇူးများစွာရရှိနိုင်မည်ဖြစ်ရာ ဝင်ရောက်လေ့လာသင့်ကြောင်း သိရှိရပါသည်။

သတင်း/အရည်အသွေး

ASEAN Access Portal Link - http://www.aseanaccess.com

ပဲခူးတိုင်းဒေသကြီး ဆန်စပါး ကဏ္ဍဖွံဖြိုးတိုးတက်ရေး အလုပ်ရုံဆွေးနွေးပွဲ ကျင်းပ

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန ပဲခူးတိုင်းဒေသကြီး၊ ပဲခူးခရိုင်အတွင်း ဆန်စပါးကဏ္ဍ ဖွံ့ဖြိုးတိုးတက်နိုင်ရေးအတွက် စိုက်ပျိုးသည်မှ ကြိတ်ခွဲထုတ်လုပ်တင်ပို့ ရောင်းချသည် အထိ Supply Chain တစ်ခုလုံး တွင် ပါဝင်သည့် ဌာနဆိုင်ရာများ၊ အသင်းအဖွဲ့များနှင့် လုပ်ငန်းရှင်များ ဟန်ချက်ညီစွာ ပူးပေါင်းပါဝင် ဆောင်ရွက်နိုင်ရေးနှင့် ပြုပြင်ပြောင်းလဲ ဖြည့်ဆည်းရန် လိုအပ်နေသည့် ဆန်စပါးကဏ္ဍမှ လိုအပ်ချက်များကို ပူးပေါင်း အဖြေရှာ ဖြေရှင်းနိုင်ရေး ရည်ရွယ်၍ (၁၆.၆.၂၀၂၁) ရက်နေ့ နံနက် ၁၀ : ၀၀ နာရီတွင် ပဲခူးခရိုင်အတွင်းရှိ ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး ထုတ်လုပ်သူ တောင်သူ (၃၁)ဦးနှင့် တိုင်းဒေသကြီး အဆင့် ဌာနဆိုင်ရာအသီးသီးမှ တာဝန်ရှိသူများ တက်ရောက်ကြသည့် အလုပ်ရုံဆွေးနွေးပွဲကို ပဲခူးတိုင်းဒေသကြီးဦးစီးမှူးရုံး၌ ကျင်းပခဲ့ပါသည်။

အဆိုပါဆွေးနွေးပွဲတွင် ပဲခူးတိုင်းဒေသကြီး ၊ စီမံအုပ်ချုပ်ရေးကောင်စီဝင် (၁) ဗိုလ်မှူးကြီးလှမျိုးရွှေ က စပါး အထွက်နှုန်းကောင်းရန် မျိုးကောင်းမျိုးသန့်များ ရွေးချယ် စိုက်ပျိုးခြင်း၊ မြေယာများ စနစ်တကျပြုပြင်စိုက်ပျိုးခြင်း၊ သွင်းအားစုများစနစ်တကျ ထည့်သွင်း စိုက်ပျိုးခြင်း၊ ကောင်းမွန်သော စိုက်ပျိုးရေး ဆိုင်ရာ အခြေခံအလေ့အကျင့်ကောင်း(Good Agricultural Practices G.A.P )စနစ်ဖြင့့်် စိုက်ပျိုးရေး၊ ဈေးကွက်စီးပွားရေးစနစ်အရ လုပ်ငန်းရှင်များ အနေဖြင့် ဆန်စပါးကို လွတ်လပ်စွာ ရောင်းဝယ်ခွင့်ရှိသည်နှင့်အညီ ပြည်တွင်းစားသုံးရန်နှင့် ပြည်ပတင်ပို့ရန် ဆန်များကို အရည်အသွေးမီ ဆန်များ ကြိတ်ခွဲထုတ်လုပ် ရောင်းချနိုင်ရေး ကြိုးပမ်းဆောင်ရွက်သွားရန် တိုက်တွန်းကြောင်း အဖွင့်အမှာစကားပြောကြားခဲ့ပါသည်။

ဆက်လက်၍ ပဲခူးတိုင်းဒေသကြီး စိုက်ပျိုးရေးဦးစီးဌာန၊ ဒုတိယတိုင်းဒေသကြီးဦးစီးမှူးက စျေးကွက်တန်းဝင် မျိုးကောင်းမျိုးသန့်မျိုးစေ့ ထုတ်လုပ်သိုလှောင်ဖြန့်ဖြူးပေးခြင်း၊ စိုက်ကွင်းကြီး များရှိှ တောင်သူ များအား ခေတ်မှီစိုက်ပျိုးနည်းစနစ်များနှင့် ရိတ်သိမ်းချိန်လွန် နည်းပညာ ဆွေးနွေး ပညာပေးခြင်း လုပ်ငန်းများ ဆောင်ရွက်လျက်ရှိကြောင်း၊ အစိုးရတာဝန်ရှိသူများ အသင်းအဖွဲ့များနှင့် ပူးပေါင်းဆောင်ရွက်၍ ထွက်ရှိသည့် သီးနှံများကို ပြည်တွင်း/ပြည်ပစျေးကွက်တွင် စျေးကောင်းရရှိအောင် စွမ်းဆောင်ခြင်း နှင့် လူငယ်မျိုးဆက်သစ် တောင်သူများအား ပျိုးထောင်ပေးလျက်ရှိကြောင်း ရှင်းလင်းဆွေးနွေးခြင်း၊ ပဲခူးတိုင်းဒေသကြီး စက်မှုကြီးကြပ်ရေး နှင့် စစ်ဆေးရေးဦးစီးဌာန ၊ ဒုတိယညွှန််ကြားရေးမှူးက ပုဂ္ဂလိက စက်မှုလုပ်ငန်းများကို သတ်မှတ်ထားသည့် နည်းလမ်းများနှင့်အညီ လုပ်ငန်းအရွယ်အစားသတ်မှတ်၍ မှတ်ပုံတင်ခြင်း လုပ်ငန်းများဆောင်ရွက်လျက်ရှိပြီး SME လုပ်ငန်း၏အဓိကကျသော ငွေကြေးလိုအပ်မှုအတွက် အထာက် အကူပြုနိုင်ရန် ချေးငွေရရှိ‌ရေး ပံ့ပိုးမှုများ ဆောင်ရွက် လျက်ရှိကြောင်း ရှင်းလင်းဆွေးနွေးခြင်း၊ ပဲခူးတိုင်းဒေသကြီး၊ လယ်ယာမြေစီမံခန့်ခွဲရေးနှင့် စားရင်းအင်းဦးစီးဌာန လက်ထောက်ညွှန်ကြားရေးမှူးက လယ်ယာမြေစီမံခန့်ခွဲ ရေးနှင့် ပတ်သက်သည့် ဥပဒေများ ၊ စည်းမျဉ်းစည်းကမ်း များကို ရှင်းလင်းဆွေးနွေးခြင်း၊ ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးမှ မြန်မာနိုင်ငံ၏ ဆန်စပါး စိုက်ပျိုးထုတ်လုပ်မှု ၊သုံးစွဲမှု ၊ပိုလျှံမှု စာရင်းနှင့် စျေးနှုန်းစျေးကွက်အ‌ခြေအနေများ၊ စပါး (၁)ဧက ထုတ်လုပ်မှုကုန်ကျစရိတ်အပေါ် တောင်သူ အကျိုးအမြတ်ရရှိနုင်မှု အခြေအနေများ ၊မိမိနိုင်ငံမှ ဆန်စပါး တင်ပို့နိုင်မှုအပေါ် နိုင်ငံအလိုက် စျေးကွက်ရရှိမှုနှင့် ကမ္ဘာ့ဆန်တင်သွင်းမှုအပေါ် မြန်မာနိုင်ငံမှ တင်ပို့နိုင်မှုနှင့် စျေးကွက်ရရှိမှု အခြေအနေများအား အကျယ်တဝင့်ရှင်းလင်းဆွေးနွေးခြင်းများ ဆောင်ရွက်ခဲ့ပါသည်။

ထို့နောက် တက်ရောက်လာသည့် ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး ထုတ်လုပ်သူ တောင်သူများ၏ လယ်ယာ စိုက်ပျိုးရေး၊ ကြိတ်ခွဲရေး ၊ ကုန်သွယ်ရေး နှင့် ပတ်သက်သည့် မေးမြန်းမှုများကို သက်ဆိုင်ရာ ဌာန အသီးသီးမှ ပြန်လည်ရှင်းလင်း ဖြေကြားမှုများ ဆောင်ရွက်ခဲ့ပြီး အခမ်းအနားကို (၁၄:၀၀) နာရီတွင် ရုတ်သိမ်းခဲ့ကြောင်း သတင်းရရှိပါသည်။

ပဲခူးတိုင်းဒေသကြီး(DOCA)

စားသုံးသူများ ထိရောက်စွာ အကာအကွယ်ပေးနိုင်ရေးနှင့် ကုန်ထုတ်စွမ်းအား အရည် အသွေးမြင့်မားရေး ရည်ရွယ်၍ စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ အလုပ်ရုံဆွေးနွေးပွဲ ကျင်းပခြင်း

သတင်းနှင့် လှုပ်ရှားမှုများ

နေပြည်တော်၊ ဇွန် (၂၁)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ အလုပ်ရုံဆွေးနွေးပွဲ (၁/၂၀၂၁) ဖွင့်ပွဲအခမ်းအနားကို စားသုံးသူရေးရာဦးစီးဌာန၊ ညီလာခံခန်းမ၌ ကျင်းပပြုလုပ်ခဲ့ရာ ပြည်ထောင်စုဝန်ကြီး ဒေါက်တာပွင့်ဆန်း တက်ရောက်အမှာစကား ပြောကြားခဲ့ပါသည်။

ပြည်ထောင်စုဝန်ကြီးက အမှာစကားပြောကြားရာတွင် စားသုံးသူရေးရာဦးစီးဌာနနှင့် ဆက်စပ်သည့် ဘာသာရပ်များအပြင် အခြားဝန်ကြီးဌာန (၆)ခု၏ လုပ်ငန်း သဘောတရားများပါ ဆွေးနွေးသွားမည်ဟု သိရှိရကြောင်း၊ စားသုံးသူရေးရာဦးစီးဌာနက ဥပဒေအရ ခန့်အပ်ထားတဲ့ စစ်ဆေးရေးအရာရှိများသည် ဈေးကွက်စောင့်ကြည့် စစ်ဆေးသောအခါ လုံခြုံစိတ်ချရမှုမရှိသည့် ကုန်စည်နှင့်ဝန်ဆောင်မှုများ မည်ကဲ့သို့ စီမံခန့်ခွဲရမည်ဆိုသည့် အကြောင်းအရာများ အဓိက ဆွေးနွေးသွားမည်ဟု သိရှိရကြောင်း၊ ဘေးအန္တရာယ်ရှိသော ကုန်စည်များကို သတိပေးခြင်း၊ သိမ်းဆည်းခြင်းနှင့်တားမြစ်ခြင်း လုပ်ငန်းစဉ်များအတွက် စနစ်တကျနှင့် ဆောင်ရွက်နိုင်ရန် ဆွေးနွေးသွားမည်ဟု သိရှိရကြောင်း၊ ထို့ကြောင့် ဆွေးနွေးပွဲသို့ တက်ရောက်လာကြသည့် စစ်ဆေးရေးမှူးများအနေဖြင့် လက်တွေ့နယ်ပယ်တွင် အတွေ့အကြုံများနှင့် ဘာသာရပ်ဆိုင်ရာ ကျွမ်းကျင်သူများ၏ ဆွေးနွေးချက်များ ပေါင်းစပ်ပြီး နောက်ဆုံးတွင် စံလုပ်ထုံး လုပ်နည်းတစ်ခု ရလာသည်အထိ ဆွေးနွေးကြစေလိုကြောင်း လမ်းညွှန်မှာကြားခဲ့ပါသည်။

အလုပ်ရုံဆွေးနွေးပွဲ ဖွင့်ပွဲအခမ်းအနားသို့ ဒုတိယဝန်ကြီး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ နည်းပြအရာရှိများနှင့် တိုင်းဒေသကြီးနှင့်ပြည်နယ်များက စစ်ဆေးရေးမှူး (၄၉)ဦးတို့ တက်ရောက်ကြပြီး (၅)ရက်တာ ကာလအတွင်း ဆွေးနွေးကြမည်ဟု သတင်းရရှိပါသည်။

စားသုံးသူရေးရာဦးစီးဌာန

အိတ်ဖွင့်တင်ဒါခေါ်ယူခြင်း

သတင်းနှင့် လှုပ်ရှားမှုများ

၁။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနပိုင် အောက်ဖော်ပြပါ သိုလှောင်ရုံနှင့် မြေတို့အား အိတ်ဖွင့်တင်ဒါစနစ်ဖြင့် ငှားရမ်းမည်ဖြစ်ကြောင်း ကြော်ငြာအပ်ပါသည်-

(၁)နှစ်သက်တမ်းငှားရမ်းခြင်း

Lot -1 (က) ရန်ကုန်တိုင်းဒေသကြီး၊ လှိုင်မြို့နယ်၊ ဓမ္မသုခကျောင်းလမ်းရှိ မြေ (၉၀' x ၅၀') နှင့် မြေ(၇၉' x ၈၂')

(၃)နှစ်သက်တမ်းငှားရမ်းခြင်း

Lot-2 (ခ) မန္တလေးတိုင်းဒေသကြီး၊ ချမ်းမြသာစည်မြို့နယ်၊ မြို့ဟောင်းရပ်ရှိ သိုလှောင်ရုံ အမှတ် (၁၁) (၁၅၀x၆၀) (သွပ်၊ သွပ်၊ ကွန်)

(ဂ) တင်ဒါပုံစံရောင်းချမည့်ရက် - (၁၅.၆.၂၀၂၁) ရက်မှ (၁၄.၇.၂၀၂၁)ရက်ထိ

(ရုံးချိန်အတွင်း)

(ဃ) တင်ဒါပုံစံရောင်းချရန် - (၁၄.၇.၂၀၂၁)ရက် ညနေ(၁၆:၀၀)နာရီ

ပိတ်မည့်နေ့/အချိန်

(င) တင်ဒါယှဉ်ပြိုင်ရမည့်ရက်/အချိန်- (၁၅.၇.၂၀၂၁)ရက်နေ့၊ (၁၃:၀၀)နာရီ

(စ) တင်ဒါတင်သွင်းရမည့်နေရာ - စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃)၊ နေပြည်တော်။

(ဆ) စာရင်းပေးသွင်းရမည့်နေရာ - ရုံးအမှတ်(၅၂)၊ နေပြည်တော်

(ဇ) တင်ဒါစည်းကမ်းချက်များ - (၁၇.၆.၂၀၂၁)ရက်နေ့ (၁၁:၀၀)နာရီ

ရှင်းလင်းမည့်နေ့/အချိန်/နေရာ ရုံးအမှတ်(၅၂)၊ နေပြည်တော်

(ဈ)တင်ဒါပုံစံရောင်းချမည့်နေရာ - စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ စီမံရေးရာဌာနခွဲ၊ အမှတ်(၂၂၈/၂၄၀)၊ ဒုတိယထပ်၊ ကမ်းနားလမ်းနှင့်ရွှေဘုံသာလမ်းထောင့်၊ ရန်ကုန်မြို့၊

တိုင်းဒေသကြီးဦးစီးမှူးရုံး၊ မန္တလေးမြို့။

(ည) Deposit ပေးသွင်းမှု - တင်ဒါစည်းကမ်း သတ်မှတ်ချက်ပုံစံတွင် ဖော်ပြထားပြီး ဖြစ်ပါသည်။

၂။ စားသုံးသူရေးရာဦးစီးဌာနမှ ငှားရမ်းမည့် သိုလှောင်ရုံနှင့် မြေတို့၏ မျက်မြင်အခြေအနေအား သက်ဆိုင်ရာမြို့နယ်များသို့ သွားရောက်ကြည့်ရှု့နိုင်ပြီး အသေးစိတ်အချက်အလက်များကို သိရှိလိုပါက တင်ဒါပုံစံဝယ်ယူရမည့်နေရာသို့ လူကိုယ်တိုင်ဖြစ်စေ၊ ဖုန်း ၀၁-၂၅၀၄၃၂၊ ၀၂-၄၀၃၆၃၃၈ သို့ ဆက်သွယ် စုံစမ်းမေးမြန်းနိုင်ပါသည်။

တင်ဒါစိစစ်ရေးကော်မတီ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန

အရာတော်မြို့နယ် သနပ်ခါးစိုက်ပျိုးထုတ်လုပ်တင်ပို့ရောင်းချသူများအသင်းနှင့် တွေ့ဆုံ

သတင်းနှင့် လှုပ်ရှားမှုများ

စားသုံးသူရေးရာဦးစီးဌာနအနေဖြင့် လုပ်ငန်းတာဝန်တစ်ရပ်ဖြစ်သော ပြည်တွင်းကုန်သွယ် ကုန်သွယ်မှု မြှင့်တင်ရေးလုပ်ငန်းများ ဆောင်ရွက်ရန်အတွက် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ဒုတိယ တိုင်းဒေသကြီးဦးစီးမှူး၊ မုံရွာခရိုင် ဦးစီးမှူးနှင့်အဖွဲ့သည် ၂၀၂၁ ခုနှစ် ဇွန်လ (၃)ရက်နေ့တွင် အရာတော်မြို့နယ်တာဝန်ခံရုံး၌ အရာတော်မြို့နယ် သနပ်ခါးစိုက်ပျိုးထုတ်လုပ် တင်ပို့ရောင်းချသူများအသင်းနှင့် တွေ့ဆုံခဲ့ပါသည်။

အရာတော်မြို့နယ် သနပ်ခါးစိုက်ပျိုးထုတ်လုပ်တင်ပို့ရောင်းချသူများအသင်းကို ၂၀၁၄ခုနှစ်၊ နိုဝင်ဘာလက အလုပ်အမှုဆောင်(၂၅)ဦးဖြင့် စတင်ဖွဲ့စည်းခဲ့ပါသည်။ အရာတော်မြို့နယ်တွင် သနပ်ခါး စိုက်ဧက(၆)သောင်းခန့်ရှိပြီး သနပ်ခါးမြို့တော် အရာတော်ဟုပင် တင်စားခေါ်ဝေါကြပါသည်။ အရာတော်မြို့ အဝင်တွင် သနပ်ခါးရောင်းသည့် ဈေးတန်းအဖြစ်လည်းကောင်း၊ သနပ်ခါးအသင်း အနေဖြင့် သနပ်ခါးပွဲရုံအဖြစ်လည်းကောင်း ဖွင့်လှစ်၍ သနပ်ခါးတုံးများကို လက်လီ၊ လက်ကား ရောင်းချလျက်ရှိရာ အရွယ်အစား၊ အရည်အသွေး၊ အပင်အရှည်ပေါ် မူတည်၍ တစ်ပင်လျှင် ငွေကျပ် (၄,၀၀၀) မှ (၁၀,၀၀၀) ကြားထိ ပေါက်ဈေးအသီးသီး ရရှိပြီး တိုင်းဒေသကြီးအတွင်း ဈေးကွက်များအပြင် မန္တလေး၊ ရန်ကုန်၊ နေပြည်တော်နှင့် ဧရာဝတီတိုင်းဒေသကြီးများသို့လည်း အမှာစာများဖြင့် တင်ပို့ရောင်းချလျက်ရှိကြပါသည်။ အချို့ သနပ်ခါးအသင်းသားများမှာ သနပ်ခါးမှ တန်ဖိုးမြှင့် ထုတ်ကုန် ( Value Added ) အဖြစ် ဘုရားဆင်တုတော်၊ စိတ်ပုတီး၊ အုပ်/ခွက်၊ အမြစ်မှုန့်၊ အပွေးမှုန့်၊ သနပ်ခါးဆပ်ပြာ၊ သနပ်ခါးရေမွှေး၊ ဆေးဝါးအဖြစ် အကြောပြေလိမ်းဆေး၊ နှလုံး အားတိုးဆေး စသည့်များ ထုတ်လုပ်ပြီး ဈေးကွက်များရှာဖွေရောင်းချလျက်ရှိကြပါသည်။ ယခု အချိန် တွင် COVID-19 ရောဂါနှင့် လမ်းပန်းဆက်သွယ်ရေးခက်ခဲမှုကြောင့် အရောင်းအဝယ် ပါးလျက်ရှိကြောင်း သနပ်ခါးအသင်း အတွင်းရေးမှူးထံမှ သိရှိရပါသည်။

စစ်ကိုင်းတိုင်းဒေသကြီး(DOCA)

စစ်တွေမြို့ပေါ်ရှိ ငါးမုန့်(ပါပရာ)လုပ်ငန်းရှင်များအား ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ တွေ့ဆုံဆွေးနွေးခြင်း

သတင်းနှင့် လှုပ်ရှားမှုများ

စစ်တွေမြို့ပေါ်ရှိ ငါးမုန့်(ပါပရာ) ထုတ်လုပ်ဖြန့်ဖြူးရောင်းချနေကြသော လုပ်ငန်းရှင်များနှင့် တေွ့ဆုံဆွေးနွေးခြင်းကို ရခိုင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူးရုံး အစည်းအဝေးခန်းမ၌ (၃.၆.၂၀၂၁)နေ့တွင် ကျင်းပပြုလုပ်ခဲ့ပါသည်။ အဆိုပါဆွေးနွေးပွဲ ကျင်းပရခြင်း၏ ရည်ရွယ်ချက်မှာ ငါးမုန့်(ပါပရာ) ထုတ်လုပ်သည့်လုပ်ငန်းရှင်များမှ ၎င်းတို့ထုတ်လုပ်သည့် ကုန်ပစ္စည်းများပေါ်တွင် ကုန်းအညွှန်းအမှတ်အသားဖော်ပြခြင်းကို ၂၀၁၉ စားသုံးသူကာကွယ်ရေးဥပဒေအရ လိုက်နာ ဆောင်ရွက်စေရန်ဖြစ်ပါသည်။

ဆွေးနွေးပွဲသို့ ရခိုင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူး ဦးတင်ဇော်ထွန်း၊ ပြည်နယ်စားသုံးသူရေးရာ ဌာနခွဲတာဝန်ခံ ဒေါ်အေးအေးသန်း၊ စစ်တွေခရိုင်ဦးစီးမှူး ဦးမောင်လှဝင်း၊ ထုတ်ကုန်လုံခြုံစိတ်ချရမှုဌာနခွဲ တာဝန်ခံ ဒေါ်နှင်းအေးခိုင်၊ FDA မှ တာဝန်ရှိသူတစ်ဦးနှင့် စစ်တွေမြို့ပေါ်ရှိ ငါးမုန့်(ပါပရာ) လုပ်ငန်းရှင် (၁၁)ဦး တက်ရောက်ခဲ့ကြပါသည်။

ဆွေးနွေးပွဲတွင် ပြည်နယ်ဦးစီးမှူး ဦးတင်ဇော်ထွန်းမှ စားသုံးသူရေးရာဦးစီးဌာနသည် စားသုံးသူကာကွယ်ရေးဥပဒေကို ၂၀၁၉ မတ်လ (၁၅)ရက်နေ့တွင် ပြဌါန်းခဲ့ပြီး စားသုံးသူကာကွယ်ရေးလုပ်ငန်းများဖြစ်သည့် စားသုံးသူအသိပညာပေးခြင်း၊ လုပ်ငန်းရှင်များနှင့် တွေ့ဆုံဆွေးနွေးခြင်း၊ ဈေးကွက်စောင့်ကြည့်စစ်ဆေးခြင်းလုပ်ငန်းများကို ဌာနဆိုင်ရာများနှင့်ပူးပေါင်း၍ ဆောင်ရွက်လျက်ရှိပါကြောင်း၊ ဆက်လက်၍ ဥပဒေပါ စားသုံးသူများ၏ အခွင့်အရေးနှင့်တာဝန်များကိုလည်းကောင်း၊ စီးပွားရေးလုပ်ငန်းရှင်များ လိုက်နာဆောင်ရွက်ရမည့် တာဝန်များနှင့် ပြစ်မှုပြစ်ဒါဏ်များကိုလည်းကောင်း၊ လုပ်ငန်းရှင်များအနေဖြင့် ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ၂၀၁၉ စားသုံးသူကာကွယ်ရေးဥပဒေပါ ပြဌါန်းချက်များနှင့်အညီ လိုက်နာဆောင်ရွက်ရန်လိုအပ်ပါကြောင်း ရှင်းလင်းပြောကြားခဲ့ပါသည်။

ထို့နောက် ပြည်နယ်ဦးစီးမှူးရုံးမှ ဌာနခွဲတာဝန်ခံများနှင့် စစ်တွေခရိုင်ဦးစီးမှူးတို့က ကုန်အညွှန်းအမှတ်အသားနှင့်ကိုက်ညီမှုမရှိသော ကုန်စည်များကို ထုတ်လုပ်၊ ဖြန့်ဖြူး၊ ရောင်းချခြင်းများ မပြုလုပ်ရန်၊ ကုန်ပစ္စည်း ထုတ်လုပ်ရာတွင် ကုန်အညွှန်းအမှတ်အသားဆိုင်ရာ ဖော်ပြချက်များအား လိုက်နာဆောင်ရွက်ကြရန်၊ ကုန်ပစ္စည်းများပေါ်တွင် ဖော်ပြရမည့် ကုန်အညွှန်းအမှတ်အသားနှင့်ပတ်သက်၍ ငါးမုန့်(ပါပရာ)တစ်မျိုးတည်းမဟုတ်ဘဲ လုပ်ငန်းရှင်များမှ မိမိတို့လုပ်ငန်းမှ ထုတ်လုပ်သည့် ကုန်စည်များအားလုံးကိုလည်း လိုက်နာဆောင်ရွက်ရန် လိုအပ်ကြောင်း၊ ၎င်းအပြင် စားသုံးသူများအနေဖြင့် ကုန်စည်/ဝန်ဆောင်မှုများကို ဝယ်ယူသုံးစွဲရာတွင် နစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်ရန်အတွက် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)ကိုဖွင့်လှစ်ပြီး လုပ်ငန်းရှင်နှင့် စားသုံးသူများအကြား စေ့စပ်ညှိနှိုင်းဖြေရှင်းပေးလျက်ရှိပါကြောင်း၊ ကုန်ပစ္စည်းထုတ်လုပ်သည့်လုပ်ငန်းနေရာများသည်လည်း သန့်ရှင်းမှုရှိရန် လိုအပ်ပါကြောင်း ရှင်းလင်းဆွေးနွေးခဲ့ပြီး အသိပညာပေးလက်ကမ်းစာစောင်များဖြန့်ဝေပေးခဲ့ပါသည်။ ထို့နောက် FDA မှ တာဝန်ရှိသူကလည်း စားသုံးသူများ ဘေးဉပါဒ်ကင်းရှင်းစွာဖြင့် သုံးစွဲနိုင်ရေး GHP ၊ GMP နှင့်အညီထုတ်လုပ်ရန် လိုအပ်ပါကြောင်း၊ ငါးမုန့်(ပါပရာ)စားသောက်ကုန်အား GHP နှင့်ညီညွတ်ပါက Chemical နှင့် Micro စစ်ဆေးပေးပြီး ထောက်ခံချက်ပေး၍ ရပါကြောင်း ပြောကြားခဲ့ပါသည်။

လုပ်ငန်းရှင်များမှ မိမိတို့ထုတ်လုပ်သည့် ငါးမုန့်(ပါပရာ)လုပ်ငန်းသည် ရာသီချိန်ပေါ် မူတည်ပြီး မိုးဉီးကျ ငါးပေါများစွာရရှိသည့်အချိန်တွင်သာ ထုတ်လုပ်နိုင်ပြီး ဆောင်းဦးကာလတွင် အနည်းငယ်သာထုတ်လုပ်နိုင်သည့်အတွက် တစ်ပိုင်တစ်နိုင်လုပ်ငန်းသာ ဖြစ်ပါကြောင်း၊ တာရှည်ခံဆေးနှင့် ဓါတုဆေးဝါးများ သုံးစွဲထားခြင်းမရှိပါကြောင်း၊ စားသုံးသူကာကွယ်ရေး ဥပဒေပါ ပြဌါန်းချက်များကိုလည်း လိုက်နာဆောင်ရွက်သွားမည်ဖြစ်ပါကြောင်း ပြန်လည်ဆွေးနွေးခဲ့ကြကြောင်း သိရှိရပါသည်။

ရခိုင်ပြည်နယ်(DOCA)

Languages

Main menu

ပဲခူးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီးနှင့် စီးပွားရေးလုပ်ငန်းရှင်များ တွေ့ဆုံပွဲ

မိုင်းယောင်းမြို့တွင် ရော်ဘာအစေးခြစ်လုပ်ငန်းလုပ်ကိုင်ခြင်းဖြင့် ဝင်ငွေတိုး

ASEAN SMEs အတွက် ASEAN ACCESS Portal အား ဖွင့်လှစ်ခြင်း

ပဲခူးတိုင်းဒေသကြီး ဆန်စပါး ကဏ္ဍဖွံဖြိုးတိုးတက်ရေး အလုပ်ရုံဆွေးနွေးပွဲ ကျင်းပ

အိတ်ဖွင့်တင်ဒါခေါ်ယူခြင်း

အရာတော်မြို့နယ် သနပ်ခါးစိုက်ပျိုးထုတ်လုပ်တင်ပို့ရောင်းချသူများအသင်းနှင့် တွေ့ဆုံ

Pages

You are here

HighLight News

Pages