သတင်းနှင့် လှုပ်ရှားမှုများ

          စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာ ကွယ်ရေးအသိပညာပေးဟောပြောပွဲ လုပ်ငန်းများဆောင်ရွက်ခြင်းနှင့် စားသုံးသူများသုံးစွဲသော ကုန်ပစ္စည်းများ ဘေးအန္တရာယ်ကင်းစေရန်အတွက် ဈေးကွက်စောင့်ကြည့် စစ်ဆေးဆောင်ရွက်ခြင်း များကို အဓိကထား ဆောင်ရွက်လျက်ရှိရာ ရှမ်းပြည်နယ်(မြောက်ပိုင်း)၊ ကျောက်မဲခရိုင်စားသုံးသူရေးရာ ဦးစီးဌာန၊  မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးဦးစီး ဌာန၊ မြို့နယ်ကျန်းမာရေးဦးစီးဌာနနှင့် မြို့နယ်စီမံကိန်းဦးစီးဌာနတို့မှ ပူးပေါင်း၍ (၁.၂.၂၀၂၂) ရက်နေ့၊ နံနက်(၁၀) နာရီခန့်၌ ကျောက်မဲမြို့ပေါ်တွင် ရောင်းချလျက်ရှိသည့် လျှပ်စစ်ပစ္စည်းအရောင်းဆိုင်များ၊ ကလေးကစားစရာပစ္စည်းအရောင်းဆိုင်များ၊ ဆေးဝါးနှင့်ဆက်စပ်ပစ္စည်းအရောင်းဆိုင်များ၊ အလှကုန်ပစ္စည်း အရောင်းဆိုင်များနှင့် စားသောက်ကုန်ပစ္စည်းအရောင်းဆိုင်များတို့တွင် ရှောင်တခင်ကွင်းဆင်းစစ်ဆေး ခဲ့ကြောင်း သိရှိရပါသည်။

          ထိုသို့ ရှောင်တခင်စစ်ဆေးရာ၌ ရောင်းချသည့်ကုန်ပစ္စည်းများတွင် ကုန်အညွှန်းအမှတ်အသား များအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက်ဖြစ်စေ ပြည့်စုံစွာပါဝင် ခြင်းရှိ/မရှိကို လည်းကောင်း၊ သက်တမ်းလွန် ကုန်စည်များအား ဈေးကွက်အတွင်း ရောင်းချနေမှုရှိ/မရှိကို လည်းကောင်း၊ ကုန်စည်များအား ပုံမှန်ဈေးနှုန်းထက်ပို၍ ဈေးနှုန်းမြှင့်တင်ရောင်းချနေမှုရှိ/မရှိကို လည်းကောင်း စစ်ဆေးခဲ့ပြီး စားသုံးသူကာကွယ်ရေးဥပဒေတွင် ပြဌာန်းထားသော ကုန်အညွှန်းအမှတ် အသားဆိုင်ရာများနှင့် ပတ်သက်သည့်အချက်အလက်များ စီးပွားရေးလုပ်ငန်းရှင်များ လိုက်နာ ဆောင်ရွက်ရမည့် တာဝန်များ၊ တားမြစ်ချက်များနှင့် ပြစ်မှုပြစ်ဒဏ်များကို ရှင်းလင်းဆွေးနွေးခဲ့ကြောင်း သိရှိရပါသည်။

          ၎င်းနောက် ဒေသထွက်ကုန်ပစ္စည်းများ ရောင်းချနေမှုအား စစ်ဆေးတွေ့ရှိခဲ့မှုအပေါ်စီးပွားရေး လုပ်ငန်းရှင်များအနေဖြင့် သက်ဆိုင်ရာဌာနများနှင့်ချိတ်ဆက်၍ ဆောင်ရွက်ရန်လိုအပ်သည်များကို ဆွေးနွေးခဲ့ကြောင်းနှင့် ကုန်စည်များတွင် ကုန်အညွှန်အမှတ်အသား ပြည့်စုံစွာဖော်ပြရန်လိုအပ်ကြောင်းတို့ကို အသိပညာပေးဆွေးနွေးခဲ့ကြောင်း သိရှိရပါသည်။

DOCA(ရှမ်း)

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ဦးစီးအရာရှိ ၊ ဦးသန်းစိုး နှင့်ဝန်ထမ်းများသည် ၂၀၂၂ ခုနှစ်၊ ဇန်နဝါရီလ ၃၁  ရက်နေ့ နေလည် ၁၂:၀၀နာရီအချိန်တွင် မိတ္ထီလာမြို့နယ်၊ ဇောင်ချမ်းကုန်းရပ်ကွက်၊ အမှတ် (၈၉) ၊ ဘုရင့်နောင်လမ်းရှိ မုန့်လုပ်ငန်းရှင်များနှင့် တွေ့ဆုံ၍ အသိပညာပေး ဆွေးနွေးခဲ့ပါသည်။

          မုန့်လုပ်ငန်းရှင်များနှင့်တွေ့ဆုံပြောကြားရာတွင် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏တာဝန်များမှ ဆောင်ရန်ရှောင်ရန်အချက်များနှင့်  စားသုံးသူကာကွယ်ရေးဥပ‌ဒေ အခန်း(၁၈) ကုန်ညွှန်းအမှတ်အသားဖော်ပြခြင်းနှင့်စပ်လျဉ်း၍ ပုဒ်မ ၄၁(ခ)နှင့် (ဆ)တို့တွင် ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲ၊ သက်ဆိုင်ရာအစိုးရဌာနများက ဖော်ပြရန် သတ်မှတ်ထားသောအချက်အလက်များ၊ ကျန်းမာရေးဆိုင်ရာ ဘေးထွက်ဆိုးကျိုး (သို့မဟုတ်) ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို ဖော်ပြရာတွင် မြန်မာဘာသာဖြစ်စေ၊ မြန်မာနှင့်အခြားဘာသာတစ်ခု (သို့မဟုတ်)တစ်ခုထက်ပို၍တွဲလျက်ဖြစ်စေရေးသားဖော်ပြရမည်ဖြစ်ကြောင်း၊ မုန့်လုပ်ငန်းရှင်များအား ကုန်အညွှန်းအမှတ်အသားနှင့် စပ်လျဉ်း၍ ၂၀၂၀ခုနှစ်၊ မတ်လ (၁၆)ရက်နေ့မှစတင် အာဏာသက်ရောက်နေပြီဖြစ်ကြောင်း၊ ကုန်အညွှန်းအမှတ်အသား ပြည့်စုံစွာ မပါရှိပါက မည်သည့်စီးပွားရေး လုပ်ငန်းရှင်မဆို အ‌ရေးယူဆောင်ရွက်သွားရမည်ဖြစ်ကြောင်း၊ ကုန်အညွှန်းအမှတ်အသား ပြည့်စုံစွာမပါရှိပါက စားသုံးသူကာကွယ်ရေး ဥပဒေပုဒ်မ (၇၃)အရ (၂) နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း (၂၀၀) ထက်မပိုသော ငွေဒဏ် ဖြစ်စေ၊ ဒဏ်(၂)ရပ်လုံးဖြစ်စေ အရေးယူမှုများ ပြုလုပ်နိုင်ကြောင်း အသိပညာပေးပြောကြားခဲ့ပြီး ကုန်အညွှန်း အမှတ်အသားနှင့်ပတ်သက်၍ အခက်အခဲရှိပါက စားသုံးသူရေးရာဦးစီးဌာနသို့ လာရောက်တိုင်ပင်ဆွေးနွေးနိုင်ကြောင်းနှင့် လုပ်ငန်းရှင်များအနေဖြင့်လည်း မိမိတို့ကိုယ်တိုင်ပင်စားသုံးသူများဖြစ်ကြောင်း၊ စားသုံးသူ များ အနေဖြင့် စားသုံးသူအခွင့်အရေး ဆုံရှုံးနစ်နာမှုများ ရှိခဲ့လျှင် စားသုံးသူရေးရာဦးစီးဌာနသို့ တိုင်ကြားနိုင်ကြောင်း(သို့)DOCA Myanmar Application နှင့် စားသုံးသူရေးရာဦးစီးဌာန၏ Websit www .doca . gov . mm တွင် ဝင်ရောက်လေ့လာတိုင်ကြားနိုင်ကြောင်း အသိပညာပေးဆွေးနွေး ပြောကြားခဲ့ပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

          ကရင်ပြည်နယ်ရေသန့်လုပ်ငန်းရှင်အသင်း၏ ဖိတ်ကြားချက်အရ ၂.၂.၂၀၂၂ ရက်နေ့၊ နေ့လည် ၁၂း၀၀ နာရီအချိန်တွင် မြဝတီမြို့ ရွှေကမ္ဘာ ဟိုတယ်အစည်းအဝေးခန်းမ၌ မိတ်ဖက်ဌာနများဖြစ်သော စက်မှုကြီးကြပ်နှင့်စစ်ဆေးရေးဦးစီးဌာ၊ မြဝတီခရိုင် စားသုံးသူရေးရာဦးစီးဌာနနှင့် မြဝတီ သောက်ရေ သန့်လုပ်ငန်းရှင်များအသင်းတွေ့ဆုံ၍ သောက်ရေသန့်လုပ်ငန်းများအကြောင်းနှင့် ပတ်သက်၍ ဆွေး နွေးမှုများ ပြုလုပ်ခဲ့ကြပါသည်။

          အဆိုပါအစည်းအဝေးတွင် ကရင်ပြည်နယ် သောက်ရေသန့်လုပ်ငန်းရှင်များအသင်း ဥက္ကဌ ဦးအောင်ကျော်သူက ဘားအံမြို့ရှိ သောက်ရေသန့်လုပ်ငန်းရှင်များအသင်းကို (၄၂)ဦး ဖွဲ့စည်းထားပြီး ၂၀၁၉ခုနှစ်မှာ စတင်၍ ဖွဲ့စည်းခဲ့ခြင်းဖြစ်ကြောင်း၊ ဘားအံ၊ ကော့ကရိတ်၊မြဝတီ၊ ဘုရားသုံးဆူ ကရင်ပြည်နယ်အသင်းအနေဖြင့် ဖွဲ့စည်းထားခြင်းဖြစ်ကြောင်း၊ ဘားအံမြို့တွင် သောက်ရေသန့် လုပ်ငန်းရှင်များ အသင်းဆွေးနွေးညှိနှိုင်းမှုများကို လစဉ်အဆက်မပျက် ဆွေးနွေးညှိနှိုင်းတိုင်ပင်ကြကြောင်း၊ မြဝတီမြို့သို့ ပထမအကြိမ်လာရောက်၍ ဌာနဆိုင်ရာများကိုပါ ဖိတ်ကြားပြီး သောက်ရေ သန့်လုပ်ငန်းမှာ အဆင့်တစ်ခုအနေဖြင့် ရပ်တည်နိုင်ရန် ပူးပေါင်းကြိုးပန်းဆောင်ရွက်လိုပါကြောင်း၊ FDA ဌာန၏ အမိန့်ညွှန်ကြားချက်များ၊ စားသုံးသူရေးရာ ဦးစီးဌာန၏ ကုန်အမှတ်တံဆိပ်နှင့် ပတ်သက်၍ ညွှန်ကြားချက်များကို လိုက်နာ၍ ဆောင်ရွက်ကြရန်နှင့် မြဝတီသောက်ရေသန့်လုပ်ငန်းရှင် အသင်းအဖွဲ့တွင် အကြောင်း အမျိုးမျိုးကြောင့် အသင်းမဝင်ရသေးသော လုပ်ငန်းရှင်များကိုလည်း အသင်းအဖွဲ့တွင်ပါဝင်လာအောင်ဆောင်ရွက် ရန်လိုအပ် ပါကြောင်း ဌာနဆိုင်ရာများအနေဖြင့်လည်း လိုအပ်သောအကူအညီညွှန်ကြားချက်များကို တင်ပြဆွေးနွေးပေးနိုင်ပါရန်နှင့် ရေသန့် လုပ်ငန်းရှင်များမှလည်း ရင်းနှီးဖော်ရွေစွာ ဆွေးနွေစေလိုကြောင်း အဖွင့်အမှာ စကားပြောကြားခဲ့ပါသည်။

         ထို့နောက် စားသုံးသူရေးရာဦးစီးဌာန မြဝတီခရိုင်ဦးစီးမှူး ဦးနိုင်မိုးကိုမှ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များအကြောင်း၊ စားသုံးသူကာကွယ်ပေးရေးဥပဒေများအကြောင်း နှင့် စားသုံးသူနှင့် လုပ်ငန်းရှင်များအကြား အငြင်းပွား မှုမဖြစ်ပေါ်စေရန် စီးပွားရေးလုပ်ငန်းရှင်တို့၏ လိုက်နာရမည့် တာဝန်နှင့်တားမြစ်ချက်များအကြောင်း၊ စားသုံးသူကာကွယ်ရေးဥပဒေ ပုဒ်မ ၁၊ ပုဒ်မခွဲ (ခ) အရ ဤဥပဒေ အခန်း(၁၈)ပါ ကုန်အညွှန်းအမှတ်အသားဆိုင်ရာပြဌာန်းချက်များသည် ဥပဒေပြဌာန်းပြီး တစ်နှစ်ပြည့်မြောက်ကျော်လွန်ပြီဖြစ်၍ ၂၀၂၀ မတ်လ ၁၆ရက်နေ့မှစတင်၍ အာဏာတည်ပြီဖြစ်၍ လုပ်ငန်းရှင်များအနေဖြင့် မိမိတို့ ထုတ်လုပ်သော ကုန်စည်၏တံဆိပ်အမှတ်အသားများတွင် ကုန်အညွှန်းအမှတ်အသားနှင့်ပတ်သက်၍ ကုန်စည်အမျိုးအမည်၊ အရွယ်အစား အသားတင် ပမာဏ၊ ထားသိုပုံအညွှန်းတို့ကို မဖြစ်မနေ ထည့်သွင်းဖော်ပြရမည်ဖြစ်ကြောင်း၊ သောက်ရေသန့်လုပ်ငန်းရှင် များသည် ကုန်အညွှန်အမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့တင်ပြစိစစ်လျှောက်ထား နိုင်ပါကြောင်း၊ မိမိတို့ဌာနမှလည်း ပြည်နယ်/ ရုံးဌာနအဆင့်ဆင့်သို့ တင်ပြပြီး အမြန်ဆောင်ရွက်ပေးသွားမည်ဖြစ်ကြောင်း၊ ကုန်အညွှန်း အမှတ်အသားပြည့်စုံမှန်ကန်ပြီဖြစ်ပါက လုံခြုံစိတ်ချရသောထုတ်ကုန်များကို ဈေးကွက်အတွင်းရှိ စားသုံးသူလက်ဝယ်သို့ ဘေး အန္တရာယ်ကင်းရှင်းစွာ ရောင်းချနိုင်မည်ဖြစ်ကြောင်း၊ မြဝတီမြို့ သောက်ရေသန့်လုပ်ငန်းရှင်များအသင်း ဈေးကွက်၊ ဈေနှေုန်းအဆင်ပြေတည်ငြိမ်စေရေးနှင့် လုပ်ငန်းရှင်များအချင်းချင်းအငြင်းပွားမှုမဖြစ်ပေါ်စေဘဲညှိနှိုင်းကြရန်၊ မြဝတီသောက်ရေ သန့်လုပ်ငန်းရှင်များအသင်း ရှင်သန်ထမြောက်ရေး သက်ဝင်လှုပ်ရှားစေရေးအတွက် အသင်းအဖွဲ့ခိုင်မာအားကောင်းလာမှသာ လုပ်ငန်းရှင်များအနေဖြင့် အသင်းအပေါ်ယုံကြည်မှုရှိလာပြီး အသင်းတောင့်တင်းခိုင်မာလာမည်ဖြစ်ကြောင်း၊ အသင်းအနေဖြင့် စဉ်ဆက်မပျက် စည်းဝေးဆောင်ရွက်စေလိုကြောင်း၊ အသင်းအဖွဲ့ ဖွဲ့စည်းခြင်းနှင့်ပတ်သက်၍ မိမိတို့ဌာနမှ အားပေးကူညီဆောင်ရွက်လျက်ရှိပြီး လိုအပ်သည့် အကူအညီအကြံဉာဏ်များ ဆက်လက်ပံပိုးဆောင်ရွက်မည်ဖြစ်ပါကြောင်း၊ မိမိတို့ဌာနအနေဖြင့် သောက်ရေသန့်လုပ်ငန်းများအပြင် ဟင်းသီးဟင်းရွက်ဆီနှင့် ကုန်အညွှန်းအမှတ်အသားနှင့်ဖော်ပြခြင်းနှင့်စပ်လျဉ်း၍ လုပ်ငန်းရှင်များလိုက်နာဆောင်ရွက်ရမည်များအကြောင်းကို အကျယ်တဝင့် ဆွေးနွေးပြောကြားခဲ့ပါသည်။

        ဆွေးနွေးပွဲတွင် တက်ရောက်လာကြသော သောက်ရေသန့်လုပ်ငန်းရှင်များက မိမိတို့အနေဖြင့် ဌာနဆိုင်ရာများ၏ လမ်းညွှန်ချက်၊ ညွှန်ကြားချက် အကြံပြုချက်၊ လိုက်နာရမည့် အချက်များကို လိုက်နာဆောင်ရွက်သွားမည်ဖြစ်ကြောင်းနှင့် ရေသန့်တံဆိပ်များကိုလည်း စစ်ဆေးခံ နိုင်အောင်ဆောင်ရွက်သွားမည်ဖြစ်ကြောင်းပြောကြားခဲ့ပါသည်။ ဆွေးနွေးပွဲသို့ ဌာနဆိုင်ရာမှ(၈)ဦး၊ လုပ်ငန်းရှင် (၁၄)ဦး စုစုပေါင်း (၂၂)ဦးတက်ရောက်ခဲ့ပြီး (၁၅:၁၀) နာရီ အချိန်တွင် အခမ်းအနား ပြီးမြှောက်ခဲ့ပြီး တက်ရောက်လာကြသော လုပ်ငန်းရှင်များအား စားသုံးသူကာကွယ်ရေးလက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ကရင်)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများ ဘေးကင်းလုံခြုံမှုရှိစေရေးအတွက် ၂၀၁၉ မတ်လ ၁၅ ရက်နေ့တွင်ပြဌာန်းခဲ့သည့် စားသုံးသူကာကွယ်ရေးဥပဒေနှင့်အညီ စားသုံးသူကာကွယ်ရေးဆိုင်ရာ အသိပညာပေးဆွေးနွေးခြင်း၊ စားသုံးသူကာကွယ်ရေးဥပဒေပါ ပြဌာန်းချက်များအား သိရှိလိုက်နာ ဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေး အသိပညာပေးခြင်း၊ ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်လာစေရေး  အတွက် စိုက်ပျိုးမွေးမြူသူတောင်သူများ၊ စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း၊ သတင်းအချက်အလက်ဖြန့်ဝေခြင်းလုပ်ငန်းများ ဆောင်ရွက်လျှက်ရှိပါသည်။

           မကွေးတိုင်းဒေသကြီး၊ စားသုံးသူရေးရာဦးစီးဌာန၊ မကွေးခရိုင်ဦးစီးမှုးရုံးမှ ဒု-ခရိုင်ဦးစီးမှူး ဦးမျိုးဝင်း ဦးဆောင်သောအဖွဲ့သည် ဈေးကွက်တွင် ဖြန့်ဖြူးရောင်းချလျှက်ရှိသောကုန်စည်များ ဘေးကင်းလုံခြုံ စိတ်ချရမှုရှိစေရေးအတွက် (၂.၂.၂၀၂၂)ရက်နေ့ နံနက် (၀၉:၀၀) နာရီတွင် မကွေးမြို့ မြို့မဈေးနှင့် နံနက် (၁၀:၀၀)နာရီတွင် မကွေးမြို့ကန်သာဈေးတို့အား မိတ်ဖက်ဌာနဖြစ်သော မြို့နယ်စည်ပင်သာယာရေးအဖွဲ့နှင့် ပူးပေါင်းပြီး အသင့်စားခေါက်ဆွဲ၊ ကြာဇံထုတ်များသည် စားသုံးသူများ ဘေးအန္တရာယ်ကင်းရှင်းမှု ရှိ/မရှိ ၊ ထုတ်ကုန်လုံခြုံစိတ်ချရမှု ရှိ/မရှိ ၊ စားသုံးသူကာကွယ်ရေးဥပဒေ (၂၀၁၉)နှင့် အညီ ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြထားမှု ရှိ/မရှိ တို့ကို ကိုဗစ်-၁၉ စည်းကမ်းများနှင့်အညီ စျေးကွက်စောင့်ကြည့် စစ်ဆေးခြင်းဆောင်ရွက်ခဲ့ပါသည်။

          စားသောက်ကုန်ထုတ်လုပ်ရောင်းချသူ၊ ဖြန့်ဖြူးရောင်းဝယ်ဖောက်ကားသူ လုပ်ငန်းရှင်များအား စားသုံးသူကာကွယ်ရေးဥပဒေ-၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသား ပြည့်စုံစွာ ဖော်ပြထားသော ကုန်စည်များကိုသာ ဆိုင်တင်‌ရောင်းချရန်နှင့် မြန်မာနိုင်ငံ စားသုံးသူကာကွယ်ရေး ကော်မရှင်မှ ထုတ်ပြန်ထားသည့် ညွှန်ကြားချက် အမှတ်(၂/၂၀၁၉)အရ အသင့်စားခေါက်ဆွဲ၊ ကြာဇံများ၌ “သုံးစွဲပုံ အညွှန်း၊ ထားသိုသိမ်းဆည်းပုံ အညွှန်းနှင့် ဓာတ်မတည့် ကြောင်းဖော်ပြချက်” များကို မြန်မာဘာသာဖြင့်မဖြစ်မနေဖော်ပြရမည်ဟု ဖော်ပြထားကြောင်း ကုန်အညွှန်းအမှတ်အသားနှင့် စပ်လျဉ်း၍ ၂၀၂၀.ခုနှစ်၊ မတ်လ(၁၆)ရက် နေ့မှစ၍ အာဏာသက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသား ပြည့်စုံစွာ ဖော်ပြမှုမရှိပါသည့် ကုန်စည်များကို ရောင်းချဖြန့်ဖြူးခွင့်မရှိကြောင်း၊  ကုန်အညွှန်းအမှတ်အသား ပြည့်စုံစွာ ဖော်ပြမှုမရှိပါက စားသုံးသူကာကွယ်ရေးဥပဒေ ပုဒ်မ(၇၃)အရ (၂)နှစ်ထက်မပိုသော ထောင်ဒဏ်ဖြစ်စေ၊ကျပ်သိန်း(၂၀၀)ထက်မပိုသော ငွေဒဏ်ဖြစ်စေ၊ ပြစ်ဒဏ် (၂)ရပ်လုံးဖြစ်စေ အရေးယူမှုခံရနိုင်ကြောင်း အသိပေးရှင်းလင်းဆွေးနွေးခဲ့ပြီး  ကုန်အညွှန်းအမှတ်အသားဖော်ပြမှုနှင့်ပတ်သက်၍ အခက်အခဲရှိပါက “စားသုံးသူရေးရာဦးစီးဌာန” သို့ လာရောက် ဆွေးနွေးတိုင်ပင်နိုင်ကြောင်းနှင့် လုပ်ငန်းရှင်များအနေဖြင့်လည်း မိမိတို့ကိုယ်တိုင်ပင် စားသုံးသူများပင်ဖြစ်ကြောင်း၊ စားသုံးသူများအနေဖြင့် စားသုံးသူအခွင့်အရေးများ ဆုံးရှုံးနစ်နာမှုရှိခဲ့ပါက စားသုံးသူရေးရာဦးစီးဌာနသို့ တိုင်ကြားနိုင်ကြောင်းနှင့် DOCA Myanmar Application နှင့် စားသုံးသူရေးရာဦးစီးဌာန၏ doca.gov.mm (Website) တွင်လည်း ဝင်ရောက်လေ့လာတိုင်ကြားနိုင်ပါကြောင်း  ဆွေးနွေးပြောကြားခဲ့ပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

          စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ဦးသန်းစိုး (ဦးစီးအရာရှိ) ဦးဆောင်သော ဝန်ထမ်းများသည် ၂၀၂၂ခုနှစ်၊ ဇန်နဝါရီလ (၂၇)ရက်နေ့ ၊ နံနက်(၉း၃၀)အချိန်တွင် မလှိုင်မြို့၊ အ.ထ.က(ခွဲ)ကူကြီးကုန်းကျောင်းတွင် စားသုံးသူအကာအကွယ်ပေးရေးဆိုင်ရာ  အသိပညာပေး ဟောပြောပွဲ ကျင်းပပြုလုပ်ခဲ့ပါသည်။ ဟောပြောပွဲတွင် စားသုံးသူရေးရာဦးစီးဌာနသည် ယခင်နှစ် များက  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့သော် လည်း Covid-၁၉ ရောဂါကူးစက်မှု အခြေအနေများကြောင့်CICC Meiktila Facebook Page (Online)မှ လည်းကောင်း၊ ပြန်ကြားရေးနှင့်ပြည့်သူဆက်သွယ်ရေးဦးစီးဌာနနှင့် ပူးပေါင်း၍ Talk Show အစီအစဉ်များဖြင့်လည်းကောင်း၊ စားသုံးသူအသိပညာပေးရေးလုပ်ငန်းများ ဆောင်ရွက် ပေးခဲ့ပါကြောင်း၊ စားသုံးသူများအနေဖြင့် မိမိတို့အခွင့်အရေးများဆုံးရှုံးနစ်နာမှုများ ဖြစ်ပေါ်လာပါ က တိုင်ကြားနိုင်ပါ‌ကြောင်း၊ တိုင်ကြားမှုများကိုလည်းစားသုံးသူကာကွယ်ရေးဥပဒေနှင့်အညီ ဖြေ ရှင်း ဆောင်ရွက်ပေးလျက်ရှိကြောင်း အဖွင့်အမှာစကားပြောကြားခဲ့ပါသည်။ 

          ထို့နောက် စားသုံးသူရေးရာဦးစီးဌာန၊ မလှိုင်မြို့နယ်တာဝန်ခံဦးရဲမြင့်ဆန်းက စားသုံးသူ ကာကွယ်ရေးဥပဒေကို ၂၀၁၉ခုနှစ် ၊ မတ်လ (၁၅)ရက်နေ့တွင် ပြဌာန်းခဲ့ကြောင်း၊ ဥပဒေတွင် အခန်း(၂၅)ခန်း၊ ပုဒ်မ(၈၄)ခု ပါဝင်သော ဥပဒေအသစ်ကို ပြင်ဆင်အတည်ပြု ပြဌာန်းခဲ့ကြောင်း၊ စားသုံးသူများအနေဖြင့် မိမိတို့၏အခွင့်အရေးများကို သိရှိမှသာ ကုန်စည်(သို့)ဝန်ဆောင်မှုများအပေါ် ဆုံးရှုံးနစ်နာမှုများ ဖြစ်ပေါ်‌လာပါက အရေးဆိုတိုင်ကြားနိုင်မည်ဖြစ်ကြောင်း၊ စားသုံးသူအခွင့်အရေးများကို တိုင်ကြားမှုဥပမာများဖြင့် စားသုံးသူများသိရှိနားလည်စေရန် စားသုံးသူကာကွယ်ရေးဥပဒေပါ စားသုံးသူအခွင့်အရေး၊ လိုက်နာရမည့်တာဝန်များနှင့်ပတ်သက်၍ အကျယ်တဝင့်ဆွေးနွေးပြော ကြားခဲ့ပါသည်။ ၎င်းအပြင် အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားပြဌာန်းချက်နှင့်ပတ်သက်၍ မြန်မာဘာသာဖြင့် ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူ အသုံးပြုသင့်ကြောင်းနှင့် ကုန်အညွှန်းအမှတ်အသားနှင့်ပတ်သက်၍ သိသင့်သိထိုက်သည့် ဗဟုသုတများကို ပြောကြားခဲ့ပြီး စားသုံးသူအခွင့်အရေး နစ်နာဆုံးရှုံးမှုများရှိပါက DOCA Application နှင့် www.doca.gov.mm website တွင် ဝင်ရောက်တိုင်ကြားနိုင်ကြောင်း ဆွေးနွေးခဲ့ပါသည်။  ဟောပြောပွဲတွင် ကျောင်းသား(၉၃)ဦး၊ ကျောင်းသူ (၁၂၆)ဦး၊ ဆရာ/ဆရာမ(၁၅)ဦး စုစုပေါင်း(၂၁၉)ဦး တက်ရောက်ခဲ့ပြီး စားသုံးသူရေးရာအသိပညာပေးလက်ကမ်းစာစောင်များ ဖြန့်ဝေခဲ့ပြီး ဟောပြောပွဲအား နံနက်(၁၁း၀၀)နာရီတွင် ရုတ်သိမ်းခဲ့ပါသည်။

DOCA(မန္တလေး)