သတင်းနှင့် လှုပ်ရှားမှုများ

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် သရက်ခရိုင်ဦးစီးမှူးရုံးမှ ဒုတိယကြီးကြပ်ရေးမှူးဦးကျော်ရွှေနှင့် ကံမမြို့နယ်တာဝန်ခံ၊ ဒုတိယဦးစီးမှူး ဒေါ်နွဲ့ယဉ်ဝင်းသည်(၆-၆-၂၀၂၄)ရက်နေ့၊ နံနက် (၀၇:၀၀)နာရီအချိန်တွင် မြို့နယ်စည်ပင်သာယာရေးအဖွဲ့၊ ကျန်းမာရေးဦးစီးဌာန၊ မြန်မာနိုင်ငံရဲတပ်ဖွဲ့တို့နှင့်ပူးပေါင်း၍ ပလတ်စတစ်အိတ်နှင့် ကြွပ်ကြွပ်အိတ်သုံးစွဲမှုလျှော့ချရေးကမ်ပိန်း (Campaign)ပြုလုပ်ခြင်းနှင့် ကြွပ်ကြွပ်အိတ်အစားထိုးအင်ဖက်များ အခမဲ့ဖြန့်ဝေခြင်းအားဆောင်ရွက် ခဲ့ကြောင်းသိရှိရပါသည်။

   ဆက်လက်၍ နံနက်(၀၈:၀၀)နာရီအချိန်တွင် စားသုံးသူများဘေးကင်းလုံခြုံစိတ်ချမှုရှိစေရေးအတွက် ကံမမြို့၊ မြို့မစည်ပင်သာယာဈေးနှင့် အမှတ်(၁)၊ (၃)ရပ်ကွက်များရှိ စားအုန်းဆီဖြန့်ဖြူး ရောင်းချသည့် လက်လီ၊လက်ကားအရောင်းဆိုင်(၅)ဆိုင်များတွင် စားအုန်းဆီများအားသတ်မှတ် ရည်ညွှန်းဈေးအတိုင်း ဖြန့်ဖြူးရောင်းချခြင်းရှိ/ မရှိ၊ လက်ကားဆိုင်များတွင် ဗီနိုင်းများချိတ်ဆွဲ၍ ဈေးနှုန်းများချိတ်ဆွဲရောင်းချခြင်းရှိ/ မရှိ၊ သတ်မှတ်ရည်ညွှန်းဈေးထက် အဆမတန်ဈေးနှုန်းမြှင့်တင်ရောင်းချခြင်းရှိ/ မရှိ၊ အလေးချိန်၊ အချိန်အတွယ်မှန်ကန်စွာ ရောင်းချခြင်းရှိ/ မရှိတို့အား ဆက်စပ်ဌာနများနှင့်ပူးပေါင်း၍ ကွင်းဆင်းစစ်ဆေးခြင်းများဆောင်ရွက်ခဲ့ပါသည်။ အဆိုပါဆိုင်ရှင်များအား စီးပွားရေးလုပ်ငန်းရှင်များ၏ တာဝန်များအကြောင်း၊ တားမြစ်ချက်များနှင့် ပြစ်မှုပြစ်ဒဏ်များအကြောင်း၊ စားအုန်းဆီရောင်းချနေသော လုပ်ငန်းရှင်များအနေဖြင့် သတ်မှတ်ရည်ညွှန်းဈေးထက် ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်အတွင်းဈေးနှုန်းမြှင့်တင်ရောင်းချခြင်းများတွေ့ရှိပါက စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော အရေးကြီးကုန်စည်နှင့်ဝန်ဆောင်မှုဥပဒေပါ  ပြစ်မှုပြစ်ဒဏ်များအရအရေးယူခြင်းခံရမည်ဖြစ်ကြောင်း အသေးစိတ်ရှင်းလင်းပြောကြားခဲ့ပြီး စားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ မြန်မာဘာသာဖြင့် ပြည့်စုံစွာဖော်ပြထားသော ကုန်စည်များကိုသာရောင်းချစေရန် အသိပညာပေးဆွေးနွေးပြောကြားခဲ့ကြောင်း သိရှိ ရပါသည်။

DOCA(မကွေး)

       ဧရာဝတီတိုင်းဒေသကြီး ၊ ဖျာပုံခရိုင် ၊ ကျိုက်လတ်မြို့ အမှတ်(၅) ရပ်ကွက်ရှိ “ဦးဌေးဝင်း” မုန့်ဟင်းခါးဖို လုပ်ငန်းသို့ မြို့နယ်တာဝန်ခံနှင့် ဝန်ထမ်းများသည် ၂၀၂၄ ခုနှစ်၊ ဇွန်လ (၅) ရက်နေ့၊ နံနက်(၁၀:၀၀)နာရီအချိန်တွင် သွားရောက်၍ ဈေးကွက်မရောက်မီ ကုန်စည်များကို ကွင်းဆင်းစိစစ် ခဲ့ကြပါသည်။

          ထိုသို့ကွင်းဆင်းစိစစ်ရာတွင် ကုန်စည်များအား စားသုံးသူများဘေးအန္တရာယ်ကင်းရှင်းစေရေး ၊ SMEs လုပ်ငန်းများ ဖွံ့ဖြိုးတိုးတက်ရေးအတွက် ငွေကြေးရင်းနှီးမြုပ်နှံထားရှိမှုများ ၊ လုပ်သားအင်အား (၅) ဦးထိ အသုံးပြုထားမှု၊ ဈေးနှုန်းဈေးကွက်အခြေအနေများ ၊ ကုန်စည်အပေါ် အကျိုးအမြတ်ရရှိမှု အခြေအနေအကြောင်း ၊ စီးပွားရေးလုပ်ငန်းရှင်များ၏ တာဝန်များ ၊ တားမြစ်ချက်များ၊ ကုန်စည်နှင့် စပ်လျဉ်း၍ အာမခံပေးမှု၊ ကုန်စည်အပေါ် တာဝန်ရှိမှု၊ ကုန်စည်များတွင် ကုန်အညွှန်းအမှတ်အသား ဆိုင်ရာအချက်များ ၊ ကုန်စည်(သို့) ဝန်ဆောင်မှု့အပေါ် တာဝန်ရှိမှု့ ၊ ပြစ်မှုနှင့် ပြစ်ဒဏ်များကို ရှင်းလင်း ပြောကြားခဲ့ကြောင်း သတင်းရရှိပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်တာဝန်ခံသည် တိုင်းဒေသကြီးဦးစီးမှူး၏လမ်းညွှန်မှု၊ မင်းဘူးခရိုင်ဦးစီးမှူးနှင့် မြို့နယ်စီမံအုပ်ချုပ်ရေးအဖွဲ့၏ အနီးကပ်ကြီးကြပ်မှုတို့ဖြင့် (၅.၆.၂၀၂၄)ရက်နေ့၊ နံနက်(၀၈:၃၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ခရိုင်ဦးစီးမှူးရုံးမှ ဌာနခွဲတာဝန်ခံများနှင့်အတူ ပွင့်ဖြူမြို့ပေါ်ရှိစားအုန်းဆီများ လက်လီဖြန့်ဖြူးရောင်းချနေမှု အခြေအနေအား ကွင်းဆင်းစစ်ဆေးခဲ့ကြောင်းသိရှိရပါသည်။

   ထိုသို့စစ်ဆေးရာတွင် ပွင့်ဖြူမြို့နယ်အတွင်း စားအုန်းဆီများထုတ်ယူရောင်းချနေသော ဆီကုန်သည်(၉)ဦး၏ စားသုံးသူပြည်သူများအား စားအုန်းဆီရောင်းချပေးနေမှုအခြေအနေများ၊ သတ်မှတ်ဈေးနှုန်းအားပွင့်လင်းမြင်သာစွာ ဗီနိုင်းများချိတ်ဆွဲရေးသားဆောင်ရွက်နေမှုအခြေအနေများ၊ အ‌လေးချိန်နှင့်သတ်မှတ်အရေအတွက် ပြည့်ဝစွာရောင်းချပေးခြင်းရှိ/ မရှိအခြေအနေများအား ကွင်းဆင်းစစ်ဆေးခဲ့ပြီး သတ်မှတ်ဈေးနှုန်းအတိုင်းမရောင်းချဘဲ ဈေးနှုန်းမြှင့်တင်ရောင်းချခြင်းများ၊ ဈေးကစားရန်ရည်ရွယ်၍ သိုလှောင်ထားရှိခြင်းများစုံစမ်းတွေ့ရှိရပါက အရေးကြီးကုန်စည်နှင့် ဝန်ဆောင်မှုဥပဒေအရ တရားစွဲဆိုခြင်းများ ဆောင်ရွက်သွားမည်ဖြစ်ကြောင်း ဆွေးနွေးခဲ့ကြောင်း သိရှိရပါသည်။

DOCA(မကွေး)

      မကွေးတိုင်းဒေသကြီး၊ မကွေးခရိုင်၊ မကွေးမြို့နယ်၌ ၂၀၂၄ခုနှစ်၊ မေလ(၂၅)ရက်‌နေ့မှစတင်၍ မုန်တိုင်းအရှိန်အဟုန်ကြောင့် သီးနှံစိုက်ကွင်းများ ဒေသခံတောင်သူများ၌ မိုးဦးသီးနှံများကို မိုးကောင်းသောက်လယ်ယာမြေများ၌ စတင်စိုက်ပျိုးလျက်ရှိကြောင်း မြို့နယ်စိုက်ပျိုးရေးဦးစီးဌာနမှသိရှိရပါသည်။

    မကွေးမြို့နယ်ရှိ ဒေသခံတောင်သူများအား မိုးကောင်းသောက်ယာမြေများ၌ မိုးဦးသီးနှံအဖြစ် နှမ်းနှင့်မြေပဲသီးနှံစိုက်ခင်းများအတွင်း ပဲစဉ်းငုံသီးနှံကို သီးညှပ်စိုက်ပုံစံဖြင့်အများဆုံးစိုက်ပျိုးလေ့ရှိပြီး နေကြာ၊ ပဲတီစိမ်းနှင့် အခြားသီးနှံများကိုလည်းစိုက်ပျိုးကြကြောင်း၊ ယခုနှစ်အတွင်း ဆီထွက်သီးနှံ စိုက်ပျိုးမှုတိုးတက်ရေး အထူးဇုန်လုပ်ငန်းအဖြစ် မိုးနှမ်း၊ မိုးမြေပဲနှင့် မိုးနေကြာစိုက်ပျိုးနိုင်ရန်ဆောင်ရွက်လျက်ရှိကြောင်း၊ သီးနှံစိုက်ခင်းများတွင် တစ်ဧကအထွက်နှုန်းတိုးတက်ရေးနှင့် သီးနှံစိုက်ပျိုးမှုပုံစံမှန်ကန်စေရေးအတွက် သီးနှံစိုက်ပျိုးမှုအဆင့်အလိုက် ဆောင်ရွက်ရမည့် လုပ်ငန်းစဉ် ဇယားကားချပ်များဖြင့် တောင်သူများအားအသိပညာပေးရှင်းလင်းခြင်း လုပ်ငန်းများကိုကွင်းဆင်း ဆောင်ရွက်ပေးလျှက်ရှိကြောင်း မြို့နယ်စိုက်ပျိုးရေးဦးစီးဌာနမှ သိရှိရပါသည်။

    မိုးကောင်းသောက်ယာမြေဖြစ်၍ မိုးရွာချိန်တွင် ဦးအောင်စိုက်ပျိုးရကြောင်း၊ တောင်သူအားလုံးမှ ယာလုပ်ငန်းခွင်ဝင်တဲ့အချိန်ကာလတူကြ၍ မိုးပွင့်တာနဲ့ တပြိုင်တည်းနီးပါး စိုက်ပျိုးကြပါကြောင်း၊ လုပ်သားလိုအပ်ချက်နဲ့ လယ်ယာသုံးစက်ကိရိယာ(ထွန်စက်)လိုအပ်ချက် အခက်အခဲများရှိသော်လည်း တောင်သူများမှာ ကိုယ့်မိသားစုလုပ်အားနှင့် ပင်တိုင်အလုပ်သမား လုပ်အားကိုသာအားကိုးနေရကြောင်း၊ တစ်ဧကကို နှမ်းမျိုးစေ့နှစ်ပြည်ခန့်ကုန်ကျပြီး  ရက်ပေါင်း (၉၀)မှ(၁၀၀)ကြား နှမ်းအမျိုးအစားပေါ်မူတည်၍ တစ်ဧကကို (၁၂)တင်းခန့်ထွက်ရှိပြီး တောင်သူအများစုမှာ စျေးကောင်းရသည့် စမုံနက်ကိုဦးစားပေးစိုက်ပျိုးကြပါကြောင်း၊ ယခင်နှစ်ကသီးနှံပေါ်ချိန်တွင် စမုံနက်နဲ့ပဲစဉ်းငုံသီးနှံမှာ ပြန်လည်ရောင်းချချိန်တွင် စျေးကောင်းရရှိခဲ့ပါကြောင်း မကွေးမြို့နယ်၊ ဆားတိုင်ကန်ကျေးရွာမှ တောင်သူဦးမြင့်သိုင်းဝင်းထံမှ သိရှိရပါသည်။

    မကွေးမြို့နယ်အတွင်းရှိကျေးရွာများတွင် ယခုရက်ပိုင်းမိုးဖြင့် မိုးသီးနှံများကိုတစ်နယ်လုံးစတင် စိုက်ပျိုးလျက်ရှိကြောင်း၊ ယခုနှစ်စိုက်ပျိုးရာသီတွင် ဆီထွက်သီးနှံစိုက်ပျိုးထုတ်လုပ်မှုတိုးတက်မြင့်မားရေး အထွက်နှုန်းတိုးတက်ရေးနှင့် ဒေသအတွင်းစားသုံးဆီဖူလုံစေရေးတို့အတွက် မိုးသီးနှံထွက်သီးနှံအဖြစ် နှမ်း၊ မြေပဲ၊ နေကြာသီးနှံများကို တိုးချဲ့စိုက်ပျိုးသွားရန် လျာထားဆောင်ရွက်လျက်ရှိကြောင်း သိရှိရပါသည်။

DOCA(မကွေး)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေး၊ ချောက်ခရိုင်အတွင်းရှိဝန်ထမ်းများသည် ဌာန၏မျှော်မှန်းချက်ဖြစ်သော “ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်ရေးနှင့် စားသုံးသူ ကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများအပြင် စားသုံးသူကာကွယ်ရေးအသိပညာပေးဆွေးနွေးခြင်းနှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်းများကို လစဉ်လျာထားချက်ချမှတ် ဆောင်ရွက်လျက်ရှိပါသည်။

    မကွေး၊ ချောက်ခရိုင်အတွင်း၌ မြို့နယ်(၆)ခုရှိရာ ၂၀၂၄-ခုနှစ်၊ မေလအတွင်း စားသုံးသူကာကွယ်ရေးအသိပညာပေးဆွေး‌နွေးခြင်း (၁၁)ကြိမ်နှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်း (၂၃)ကြိမ် ဆောင်ရွက်နိုင်ခဲ့ပြီး  စားသုံးသူကာကွယ်‌ရေးဥပဒေပါ စားသုံးသူများရရှိနိုင်မည့် အခွင့်အရေးများ၊ လိုက်နာရမည့်တာဝန်များ၊ စီးပွားရေးလုပ်ငန်းရှင်တို့လိုက်နာရမည့်တာဝန်များ၊ တားမြစ်ချက်များ၊ ပြစ်မှု/ ပြစ်ဒဏ်များနှင့် စားသုံးသူများနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သူများ၊ တိုင်ကြားပုံနည်းလမ်းများအား အသေးစိတ်ရှင်းလင်းဆွေးနွေးခဲ့ကြကြောင်း သိရှိရပါသည်။

DOCA(မကွေး)