သတင်းနှင့် လှုပ်ရှားမှုများ

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများဘေးကင်းလုံခြုံမှုရှိစေရေးအတွက် ၂၀၁၉ မတ်လ ၂၅ ရက်နေ့တွင်ပြဌာန်းခဲ့သည့် စားသုံးသူကာကွယ်ရေးဥပဒေနှင့်အညီ စစ်ဆေးရေးအရာရှိများခန့်အပ်တာဝန်ပေးပြီး ကုန်စည်နှင့်ဝန်ဆောင်မှုများအား ဘေးကင်းလုံခြုံမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း မိတ်ဖက်ဌာနများနှင့် ပူးပေါင်း၍ အစားအသောက်နှင့်ဆေးဝါးကွပ်ကဲရေးဦးစီးဌာနမှ ခွင့်မပြုဆိုးဆေးနှင့် တာရှည်ခံဆေးများ သတ်မှတ်ပမာဏထက်ပိုမိုပါဝင်သဖြင့် စားသုံးရန်မသင့် ကြေငြာထားသည့် စားသောက်ကုန်ပစ္စည်းများအား ဈေးကွက်အတွင်းရောင်းချမှုမရှိစေရေး ရှောင်တခင်ကွင်းဆင်းစစ်ဆေးခြင်းများ ဆောင်ရွက်လျက်ရှိပါသည်။

            စားသုံးသူရေးရာဦးစီးဌာန၊ မကွေးတိုင်းဒေသကြီးအနေဖြင့်လည်း မကွေးတိုင်းဒေသကြီးအတွင်း ဈေးကွက်တွင် ဖြန့်ဖြူးရောင်းချလျက်ရှိသော ကုန်စည်များဘေးကင်းလုံခြုံစိတ်ချရမှုရှိစေရေးအတွက် အလေးထားဆောင်ရွက်လျက်ရှိရာ (၂၄.၁.၂၀၂၂)ရက်နေ့ နံနက် (၀၉:30)အချိန်တွင် မင်းဘူးခရိုင်နှင့် မင်းဘူးမြို့နယ်စားသုံးသူရေးရာဦးစီးဌာနမှ ဝန်ထမ်းများသည် မင်းဘူးခရိုင်၊ မင်းဘူးမြို့မဈေးအတွင်းရှိ စားသောက်ကုန်များအား အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်ရဲတပ်ဖွဲ့ မြို့နယ်စည်ပင်သာယာရေးအဖွဲ့တို့ပူးပေါင်း၍ ကုန်ပစ္စည်းနမူနာများကောက်ယူ၍ Mobile Lab Van ဖြင့်နမူနာ (၂၉)မျိုးအား ဓါတ်ခွဲစစ်ဆေးခဲ့ပြီး တာရှည်ခံဆေးများသတ်မှတ်ပမာဏထက် ပိုမိုပါဝင်နေသည့် ကျောက်ဖရုံယို၊ ကွမ်းသီးစိတ်၊ ပိတ်ဆွယ်တို့အား စားသုံးသူများ အန္တရာယ်ဖြစ်နိုင်သည့်အတွက် ဈေးကွက်အတွင်းမှ သိမ်းယူဖျက်ဆီးခဲ့ပြီး ရောင်းချသူများအား ဝန်ခံကတိလက်မှတ်ရေးထိုးစေခြင်း၊ ချွတ်ဆေးများ၊ တာရှည်ခံဆေးများသုံးစွဲခြင်းမပြုစေရေး အသိပေးဆွေးနွေးခြင်းများ ဆောင်ရွက်ခဲ့ပါသည်။

            မင်းဘူးခရိုင်၊ စားသုံးသူရေးရာဦးစီးဌာနအနေဖြင့် ယခုကဲ့သို့ စားသုံးသူပြည်သူများ ဘေးကင်းလုံခြုံမှု ရှိစေရေးအတွက် တာဝန်ရှိသည့် ဌာနဆိုင်ရာများနှင့်ပူးပေါင်း၍ ရှောင်တခင်ကွင်းဆင်းစစ်ဆေးခြင်း၊ ဈေးကွက်စောင့်ကြည့်ခြင်း၊ ဓါတ်ခွဲစစ်ဆေး၍ အန္တရာယ်ရှိကုန်စည်များအား ချက်ချင်းသိမ်းဆည်းဖျက်ဆီးခြင်း၊ ရောင်းချသူများအား အသိပညာပေးရှင်းလင်းဆွေးနွေးခြင်းများကို စဉ်ဆက်မပြတ်ဆောင်ရွက်သွားမည်ဖြစ်ပါသည်။ထိုသို့ဆောင်ရွက်ခြင်းဖြင့်  စားသုံးသူပြည်သူများ ဘေးကင်းလုံခြုံသည့်ကုန်စည်များအား ရွေးချယ်ဝယ်ယူနိုင်မည့် အခွင့်အလမ်းများ ပိုမိုရရှိလာမည် ဖြစ်ပါကြောင်းတင်ပြအပ်ပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

         စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံးသူရေးရာဌာနခွဲတာဝန်ခံနှင့် သက်ဆိုင်ရာမြို့နယ်တာဝန်ခံများနှင့်အတူ ဇန်နဝါရီလ ၁၈ ရက် နေ့ မွန်းလွဲပိုင်းတွင် တောင်ငူမြို့ မြို့မဈေးနှင့် ဈေးလမ်းရှိ စားသုံးဆီထုတ်လုပ်ဖြန့်ဖြူး ရောင်းချ သောလုပ်ငန်းများသို့ လည်းကာင်း၊ ဇန်နဝါရီလ ၁၉ ရက်နေ့ နံနက်ပိုင်းတွင် ရေတာရှည်မြို့နယ် ရေနီ မြို့ရှိ စားသုံးဆီထုတ်လုပ်ဖြန့်ဖြူး ရောင်းချသော လုပ်ငန်းများသို့လည်းကာင်း သွားရောက်၍ လုပ်ငန်းရှင်များနှင့်တွေ့ဆုံပြီး စီးပွာရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက် အမှတ် ၁/၂၀၂၁ ကို ရှင်းလင်းဆွေးနွေးပြီး စားသုံးဆီထုတ်လုပ်ဖြန့်ဖြူး ရောင်းချသူများအနေဖြင့် ညွှန်ကြားချက်နှင့်အညီ လိုက်နာဆောင်ရွက်ကြရန်၊  အမှတ်တံဆိပ်ပါ စားသုံးဆီများကို ထိန်းချုပ် ကုန်စည်အဖြစ် သတ်မှတ်လိုက်ပြီးဖြစ်ပါသဖြင့် ထုတ်လုပ်သူများအနေဖြင့် အစားအသောက်နှင့် ဆေးဝါး ကွပ်ကဲရေးဦးစီးဌာန (FDA)တွင် ထောက်ခံချက်လျှောက်ထားကြရန်နှင့် ဖြန့်ဖြူးရောင်းချသူ များ အနေဖြင့်လည်း FDA ထောက်ခံချက်ပါရှိသည့် စားသုံးဆီများကို ဦးစားပေးရောင်းချကြရန် အကြံပြု ဆွေးနွေးခဲ့ပါသည်။

          အလားတူ အုတ်တွင်းမြို့နယ်တာဝန်ခံ ဒေါ်အေးအေးခိုင်သည် ဇန်နဝါရီလ ၁၉ ရက်နေ့ နံနက်ပိုင်းတွင် အုတ်တွင်းမြို့ရှိ စားသုံးဆီအရောင်းဆိုင်များသို့သွားရောက်၍ လုပ်ငန်းရှင်များနှင့် တွေ့ဆုံပြီး စီးပွာရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက် အမှတ် ၁/၂၀၂၁ ကို ရှင်းလင်းဆွေးနွေးပြီး စားသုံးဆီထုတ်လုပ်ဖြန့်ဖြူး ရောင်းချသူများအနေဖြင့် ညွှန်ကြားချက်နှင့်အညီ လိုက်နာဆောင်ရွက်ကြရန် အကြံပြုပြောကြား၍ အရောင်းဆိုင်များအတွင်း ရောင်းချနေသော စားသုံးဆီများတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/မရှိကို ကြည့်ရှုစစ်ဆေးခဲ့ကြောင်း သိရှိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံးသူရေးရာဌာနခွဲတာဝန်ခံ၊ ရေတာရှည်မြို့နယ်တာဝန်ခံတို့နှင့်အတူ ဇန်နဝါရီလ ၁၉ ရက်နေ့ နံနက်ပိုင်းက ရေတာရှည်မြို့နယ် ရေနီမြို့ရှိ အမှတ်တံဆိပ်ပါ စားသုံးဆီဖြူးဖြန့်ဖြူးရောင်းချသော လုပ်ငန်းရှင်များနှင့် တွေ့ဆုံ၍ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် ၂၀.၁၂.၂၀၂၁ နေ့တွင် ညွှန်ကြားချက်အမှတ် ၁/၂၀၂၁ ကို ထုတ်ပြန်ခဲ့ပြီး ဟင်းသီးဟင်းရွက်ဆီ (Vegetable Oil, Cooking Oil) အမျိုးအစားများနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် ပင်ရင်းပါဝင် ပစ္စည်းကို အခြေခံသော ကုန်စည်၏ အမျိုးအမည်ကို တိကျစွာ မြန်မာဘာသာဖြင့်ဖော်ပြရန်၊ ဥပမာ - ဟင်းသီးဟင်းရွက်ဆီ (စားအုန်းဆီ)၊ ဟင်းသီးဟင်းရွက်ဆီ (အဆင့်မြင့်စားအုန်းဆီ) စသည်ဖြင့် ဖော်ပြရန်၊ ကုန်စည်၏ အသားတင်ပမာဏနှင့် အရွယ်အစားတို့အား မြန်မာယူနစ်အလေးချိန် ဖြစ်သော ပိဿာ၊ ကျပ်သားတို့ကို မြန်မာဘာသာဖြင့်ဖော်ပြရန် ညွှန်ကြားထားခြင်းနှင့် စပ်လျဉ်း၍ ရှင်းလင်းဆွေးနွေးပြီး အမှတ်တံဆိပ်ပါ စားသုံးဆီများကို မြန်မာနိုင်ငံ အစားအသောက်နှင့် ဆေးဝါး အာဏာပိုင်အဖွဲ့က ထိန်းချုပ်အစားအသောက်အဖြစ် သတ်မှတ်လိုက်ပြီးဖြစ်ပါသဖြင့် အစား အသောက်နှင့် ဆေးဝါးကွပ်ကဲရေးဦးစီးဌာန (FDA) ထောက်ခံချက်ပါရှိသည့် စားသုံးဆီများကို ဦးစားပေးရောင်းချဖြန့်ဖြူးကြရန် တိုက်တွန်းပြောကြားခဲ့ပါသည်။ ထို့နောက်ခရိုင်ဦးစီးမှူးနှင့်အဖွဲ့ သည် ရေနီဈေးအတွင်းရောင်းချသည့် စားသုံးဆီများတွင် ကုန်အညွှန်းအမှတ်အသားပြည့်စုံစွာဖော်ပြ ထားခြင်းရှိ/မရှိ ကွင်းဆင်းစိစစ်ခဲ့ကြောင်း သိရှိရပါသည်။

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် ဆီကုန်သည်လုပ်ငန်းရှင်အသင်းတို့ ပူးပေါင်းစီစဉ်မှုဖြင့် စားသုံးသူ ပြည်သူများ သက်သာသောဈေးနှုန်းဖြင့် ဝယ်ယူရရှိနိုင်ရန် ရည်ရွယ်၍ ဗဟိုဘဏ်မှ ရည်ညွှန်းငွေလဲနှုန်းဖြင့် တိုက်ရိုက်ရောင်းချပေးသည့် နိုင်ငံခြားငွေ အမေရိကန် ဒေါ်လာဖြင့် မှာယူတင်သွင်းခဲ့သည့် စားအုန်းဆီအရောင်းဆိုင်များနှင့်ပတ်သက်၍ မန္တလေးတိုင်း ဒေသကြီး စားအုန်းဆီများအား သက်သာသောနှုန်းဖြင့် ပြန်လည်ရောင်းချရေး ဈေးကွက်စောင့်ကြည့် ကြပ်မတ်ရေးအဖွဲ့သည် ၂၀၂၂ ခုနှစ်၊ဇန်နဝါရီလ (၁၉) ရက်နေ့တွင် မန္တလေးမြို့၊ ချမ်းအေးသာစံ မြို့နယ်ရှိ စားသုံးဆီ အရောင်းဆိုင်များအား စားအုန်းဆီ ရောင်းချရာတွင် အလေးချိန်ပြည့်မီမှု ရှိ/မရှိ၊ အထူးဈေးနှုန်း သတ်မှတ်ချက်ဖြင့် ရောင်းချမှု ရှိ/မရှိ မြေပြင် ရောင်းချနေမှုအခြေအနေများအား ကွင်းဆင်းစစ်ဆေး ခဲ့ပါသည်။

         ကွင်းဆင်းစစ်ဆေးရာတွင် စားသုံးသူကာကွယ်ရေးနှင့် ထုတ်ကုန် လုံခြုံစိတ်ချရမှုရှိစေရေးတို့အတွက် စားသုံးဆီ/ ဟင်းသီးဟင်းရွက်ဆီ (Vegetable Oil, Cooking Oil) များတွင် ကုန်စည်၏ အမျိုးအမည်များအား မြန်မာဘာသာဖြင့် တိကျစွာ ဖော်ပြထားမှု ရှိ/မရှိ စစ်ဆေးခြင်း၊ စားသုံးဆီအရောင်းဆိုင်များအား စားသုံးသူကာကွယ်ရေးဥပဒေပုဒ်မ ၁၊ ပုဒ်မခွဲ(ခ) အရ ဤဥပဒေ၏ အခန်း(၁၈)ပါ ကုန်အညွှန်း အမှတ်အသား ဆိုင်ရာ ပြဌာန်းချက်များသည် ဥပဒေပြဌာန်းပြီး တစ်နှစ်ပြည့်မြောက်ပြီးသည့် နေ့ရက်ဖြစ်သော ၂၀၂၀ ပြည့်နှစ်၊ မတ်လ (၁၆) ရက်နေ့မှစတင်၍ အာဏာတည်ပြီးဖြစ်ကြောင်း လုပ်ငန်းရှင်များအား ရှင်းလင်းဆွေးနွေးခဲ့ပါသည်။

          စားသုံးသူများ ထင်ယောင်ထင်မှား မဖြစ်စေရေးနှင့် အခြေခံလိုအပ်ချက်အပေါ် စိတ်ကျေနပ်မှု ရှိစေရေးအတွက် သက်ဆိုင်ရာ စီးပွားရေးလုပ်ငန်းရှင်များအနေဖြင့် ဈေးကွက်အတွင်း ဖြန့်ဖြူး ရောင်းချသည့် ဟင်းသီးဟင်းရွက်ဆီ (Vegetable Oil, Cooking Oil) ဖော်ပြချက်အပေါ် ကုန်စည်၏ အမျိုးအမည်ကို တိကျစွာ မြန်မာဘာသာဖြင့် ဟင်းသီးဟင်း ရွက်ဆီ (စားအုန်းဆီ) သို့မဟုတ် ဟင်းသီးဟင်းရွက်ဆီ (အဆင့်မြင့်စားအုန်းဆီ) ဟု ဖော်ပြရန်နှင့် အသားတင်ပမာဏနှင့်အရွယ်အစား တို့အား မြန်မာအလေးချိန်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့် ဖော်ပြရမည်ဖြစ် ကြောင်းနှင့် ဟင်းသီးဟင်းရွက်ဆီ တင်သွင်း၊ ထုတ်လုပ်၊ ဖြန့်ဖြူး ရောင်းချမှုတို့နှင့်ပတ်သက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ထားသည့် ညွှန်ကြားချက်အမှတ် (၁/၂၀၂၁) သည် ညွှန်ကြားချက် ထုတ်ပြန်သည့် (၂၀-၁၂-၂၀၂၁) ရက်နေ့မှ (၆)လ ပြည့်မြောက်ပြီး သည့်နေ့ရက်မှ စတင်ပြီး စတင်အာဏာသက်ရောက်မည်ဖြစ်ကြောင်း၊ ညွှန်ကြားချက်အား လိုက်နာမှု မရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်မည် ဖြစ်ကြောင်း ရှင်းလင်း ဆွေးနွေးခဲ့ပြီး (၁/၂၀၂၁) ညွှန်ကြားချက်အား စားသုံးဆီအရောင်းဆိုင်ပိုင်ရှင်များထံ အသိပညာပေး ဖြန့်ဝေခြင်းများ ဆောင်ရွက်ခဲ့ကြောင်း သိရှိရပါသည်။

စားသုံးသူရေးရာဦးစီးဌာန(မန္တလေးတိုင်းဒေသကြီး)

          စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဇန်နဝါရီလ ၁၇ ရက်နေ့ မွန်းလွဲ ၁:၃၀ နာရီက တောင်ငူမြို့၊ အမှတ် ၁၈ ရပ်ကွက်ရှိ ဇေယျာသီရိမိဘမဲ့အမျိုးသမီးဂေဟာတွင် ပြုလုပ်သည့် စားသုံးသူကာကွယ်ရေးဆိုင်ရာ အသိပညာပေးဟောပြောပွဲသို့ တက်ရောက်၍ အဖွင့် အမှာစကားပြောကြားပါသည်။ အဆိုပါဟောပြောပွဲတွင် တောင်ငူမြို့နယ်တာဝန်ခံ ဦးမြင့်သူက စားသုံးသူ အခွင့်အရေးနှင့် တာဝန်များ၊ မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထား သော ကုန်ပစ္စည်းများကို ဝယ်ယူစားသုံးတတ်ရန် အရေးကြီးပုံများကို ရှင်းလင်းဟောပြောပါသည်။ ထို့နောက် ခရိုင်ရုံးဝန်ထမ်းများ စုပေါင်းလှူဒါန်းသည့် ပဲနို့ အချိုရည်များ၊ ကိတ်မုန့်များနှင့် Mask များကို လှူဒါန်းရာ ဂေဟာအုပ်ချုပ်ရေးမှူး ဆရာကြီး ဒေါ်နန္ဒထေရီက လက်ခံရယူပြီး ဂုဏ်ပြုမှတ်တမ်းလွှာ ပြန်လည်ပေးအပ်ကာ ကျေးဇူးတင်စကား ပြောကြားခဲ့ပါသည်။ ဟောပြောပွဲသို့ ဂေဟာမှ ကျောင်းသူ ၈၄ ဦး တက်ရောက်ကြောင်း သိရှိရပါသည်။

DOCA(ပဲခူး)