သတင်းနှင့် လှုပ်ရှားမှုများ

     စားသုံးသူ‌ရေးရာဦးစီးဌာန ရန်ကုန်တိုင်းဒေသကြီးဦး၊ အရှေ့ပိုင်းခရိုင်စီးမှူးရုံးမှ ဒေါ်မိုးမိုးကြည်(ဌာနခွဲစာရေး)နှင့် ဝန်ထမ်းများသည် မြို့နယ်ဈေးစည်ပင်သာယာရေးအဖွဲ့မှ တာဝန်ရှိသူတို့နှင့် ပူးပေါင်းကာ (၇.၆.၂၀၂၄) ရက်နေ့၊နေ့လယ် (၁၂:၀၀) နာရီတွင်  တာမွေမြို့နယ်၊ တာမွေဈေးအတွင်းရှိ ကုန်စုံဆိုင်များကို ကွင်းဆင်းစစ်ဆးမှုများ ပြုလုပ်ခဲ့ကြောင်း သိရှိရပါသည်။

     ထိုသို့စစ်ဆေးရာတွင်  အချိုရည်အမျိုးမျိုး၊ အသင့်စားခေါက်ဆွဲခြောက်ထုတ်အမျိုးမျိုး၊ စားသုံးဆီအမှတ်တံဆိပ်မျိုးစုံ၊ မြေပဲဆီဘူးအမျိုးမျိုးတို့တွင် ကုန်အညွှန်းအမှတ်အသား ဖော်ပြထားခြင်း ရှိ/ မရှိတို့ကို စစ်ဆေးရာ ကုန်အညွှန်းအမှတ်အသားများပါရှိသည်ကို  စိစစ်တွေ့ရှိခဲ့ပြီး ဆက်လက်၍ တာဝန်ရှိသူမျာက စားအုန်းဆီ‌နှင့်ပတ်သက်ပြီး ဈေးကစားရန်အလို့ငှာ စားဆီများသို လှောင်ထားခြင်းရှိ / မရှိတို့ကိုစစ်ဆေးခြင်း၊ စည်းကမ်းလိုက်နာမှုမရှိပါက အရေးကြီးကုန်စည်နှင့်ဝန်ဆောင်မှုဥပဒေအရအရေးယူခံရမည်ဖြစ်ကြောင်း အသိပညာပေးခြင်းများ ဆောင်ရွက်ခဲ့ပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးဇော်မျိုးထွန်း၊ ဦးစီးမှူးပါ (၄)ဦးတို့သည် ကျန်းမာရေးဦးစီးဌာနမှ ဒေါ်ခင်မြတ်မော်၊ ကျန်းမာရေးမှူး-၂၊ အင်းစိန်ဈေးတာဝန်ခံ ဦးလှသူ နှင့် ပူးပေါင်း၍ ၇.၆.၂၀၂၄ ရက်နေ့ ၊နံနက် (၁၀:၃၀)နာရီအချိန်တွင် အင်းစိန်မြို့နယ်၊ အင်းစိန် ဈေးရှိ ကုန်မျိုးစုံဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းစစ်ဆေးရာတွင် စားသုံးသူပြည်သူများ ဘေးအန္တရာယ်ကင်းရှင်းစေရန် အတွက် ဈေးကွက်အတွင်း ရောင်းချနေသော စားသုံးဆီအမှတ်တံဆိပ်အားလုံးတွင် ကုန်အညွှန်း အမှတ်အသားများ ပြည့်စုံမှန်ကန်စွာဖော်ပြခြင်းရှိ/မရှိ၊ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ ကုန်အညွှန်း အမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသတစ်ခု (သို့)တစ်ခုထက်ပို၍ တွဲလျက်ဖြစ်စေ၊ ရေးသားဖော်ပြရမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များနှင့်ပြစ်မှု ပြစ်ဒဏ်များအကြောင်းတို့ကို အသိပညာပေးဆွေးနွေးခဲ့ပြီး ကုန်မျိုးစုံဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

DOCA(ရန်ကုန်)

        ဧရာဝတီတိုင်းဒေသကြီး စားသုံးသူရေးရာဦးစီးဌာန အစည်းအဝေးခန်းမတွင် ဇွန်လ (၆) ရက်နေ့ နံနက်ပိုင်း အလုပ်သမားညွှန်ကြားရေးဦးစီးဌာန တိုင်းဦးစီးမှူး ဦးမျိုးနိုင်မှ အလုပ်သမား ရေးရာ ဥပဒေများနှင့်ပတ်သက်၍ ရှင်းလင်းပြောကြားခြင်း၊ လူမှုဖူလုံရေးအဖွဲ့ ဒုတိယညွှန်ကြားရေး မှူး ဦးဇော်ဝင်းမှ လူမှုဖူလုံရေးအကျိုးခံစားခွင့်များနှင့်ပတ်သက်သော ဥပဒေများ ရှင်းလင်းခဲ့ပြီး အလုပ်ရုံအလုပ်သမားဥပဒေစစ်ဆေးရေးဦးစီးဌာန ဒုတိယညွှန်ကြားရေးမှူး ဒေါ်ဝေဝေဦးမှ စက်ရုံ အလုပ်ရုံအလုပ်ဌာနများတွင် စည်းကြပ်လျက်ရှိသော ဥပဒေများ ရှင်းလင်းခဲ့ပါသည်၊၊

       ဧရာဝတီတိုင်းဒေသကြီး ပုသိမ်မြို့တွင်းရှိ အလုပ်သမားများ အလုပ်သမားအခွင့်အရေးအပြည့်အဝရရှိစေရန်နှင့် လူမှုဖူလုံရေးအခွင့်အရေးများ ဆုံးရှုံးမှုမရှိစေရေး သိသင့်သိထိုက်သော ဥပဒေများ သိရှိစေရန် လာရောက်ဆွေးနွေးခြင်းဖြစ်ကြောင်းနှင့် အလုပ်သမားရေးရာ ဆက်ဆံရေး ဦးစီးဌာန လက်ထောက်ညွှန်ကြားရေးမှူး ဒေါ်လွင်လွင်ဖြိုးမှ ၂၀၁၂ ခုနှစ်၊ အလုပ်သမားရေးရာ အငြင်းပွားမှုဖြေရှင်းရေး ဥပဒေနှင့်ပတ်သက်၍ ရှင်းလင်းပြောကြားပြီး အဆိုပါဆွေးနွေးပွဲသို့ မြို့ပေါ်ရှိ အလုပ်ရှင် အလုပ်သမား ၅၁ ဦးခန့် လာရောက်ခဲ့ပြီး ရှင်းလင်းဆွေးနွေးပွဲတွင် တက်ရောက် လာသူများက သိလိုသည်များကို မေးမြန်းခဲ့ရာ သက်ဆိုင်ရာ တာဝန်ရှိသူများက ပြန်လည်ဆွေးနွေး ပြောကြားခဲ့ကြောင်း သိရသည်၊၊

DOCA(ဧရာဝတီ)

      ရန်ကုန်တိုင်းဒေသကြီးအတွင်း မြို့နယ်အလိုက် စားအုန်းဆီဖြန့်ဖြူးရောင်းချမည့်ကိစ္စရပ်များနှင့် ပတ်သက်၍ လုပ်ငန်းညှိနှိုင်းအစည်းအဝေးကို ရန်ကုန်တိုင်းဒေသကြီးအစိုးရအဖွဲ့၊ မင်္ဂလာခန်းမ၌ ၅-၆-၂၀၂၄ ရက်နေ့တွင် ကျင်းပပြုလုပ်ခဲ့ပါသည်။ အခမ်းအနားကို ရန်ကုန်တိုင်းဒေသကြီး အစိုးရအဖွဲ့၊ ဝန်ကြီးချုပ်ဦးစိုးသိန်း၊ စီးပွားရေးရာဝန်ကြီး ဦးမျိုးမြင့်အောင်၊ စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်၊ ဌာနဆိုင်ရာများမှ တာဝန်ရှိသူများ၊ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းမှ တာဝန်ရှိသူများ၊ ပြည်ပမှ စားအုန်းဆီ တင်သွင်းသည့်ကုမ္ပဏီများမှ တာဝန်ရှိသူများ၊ စုစုပေါင်း(၁၀၇)ဦးတက်ရောက်ခဲ့ကြပါသည်။ အခမ်းအနားစတင်ချိန်တွင် ရန်ကုန်တိုင်းဒေသကြီးအစိုးရအဖွဲ့၊ ဝန်ကြီးချုပ် ဦးစိုးသိန်းက အဖွင့်အမှာစကားပြောကြားခဲ့ပြီး စီးပွားရေးရာဝန်ကြီး ဦးမျိုးမြင့်အောင်က ရန်ကုန်တိုင်းဒေသကြီး အတွင်း စားသုံးဆီရောင်းချနိုင်ရေး စီစဉ်ဆောင်ရွက်ထားရှိမှုအခြေအနေများကို ရှင်းလင်းတင်ပြခဲ့ ပါသည်။ ထို့နောက် ရန်ကုန်တိုင်းဒေသကြီးအစိုးရအဖွဲ့ရုံး၊ အတွင်းရေးမှူး ဦးညီညီမင်းက စားသုံးဆီရောင်းချရာတွင် မြို့နယ်အထွေထွေအုပ်ချုပ်ရေးဦးစီးဌာနများမှ တာဝန်ရှိသူများက ဝိုင်းဝန်းပူးပေါင်းဆောင်ရွက်ပေးမည့် အခြေအနေများကို ရှင်းလင်းပြောကြားခဲ့ပါသည်။ ဆက်လက်၍ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဒုတိယဥက္ကဌ ဦးမောင်မောင်ဇော်၊ ရန်ကုန်တိုင်းဒေသကြီး ဒုတိယတိုင်းရဲတပ်ဖွဲ့မှူး ရဲမှူးကြီးမျိုးကြည်၊ ရန်ကုန်တိုင်းဒေသကြီး အထူးစုံစမ်းစစ်ဆေးရေးဦးစီးဌာနမှ လက်ထောက်ညွှန်ကြားရေးမှူး ဦးအောင်ကြီး၊ ရန်ကုန်တိုင်းဒေသကြီးဥပဒေချုပ်ရုံး ညွှန်ကြားရေးမှူး ဦးထိန်လင်းကျော်၊ ရန်ကုန်တိုင်းဒေသကြီး စားသုံးသူရေးရာဦးစီးဌာန ညွှန်ကြားရေးမှူး ဦးကျော်ကျော်လွင်နှင့် မရမ်းကုန်းခရိုင် စီမံအုပ်ချုပ်ရေးအဖွဲ့ဥက္ကဌ ဦးကျော်သက်ခိုင်တို့က ဆက်လက်ရှင်းလင်းတင်ပြခဲ့ပါသည်။ ထို့နောက် အထွေထွေဆွေးနွေးခြင်းအစီအစဉ် ပြုလုပ်ခဲ့ကြပြီး ရန်ကုန်တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးမျိုးမြင့်အောင်က နိဂုံးချုပ်စကားပြောကြားကာ အစည်းအဝေးပြီးမြောက်ခဲ့ပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်အရ မြောက်ပိုင်းခရိုင်ဦးစီးမှူးရုံး၊ မှော်ဘီမြို့နယ်ခွဲရုံးမှ ဒေါ်ဖြူဖြူမြင့်၊ ဒုကြီးကြပ်ရေးမှူးပါ (၂)ဦး တို့သည် ၆.၆.၂၀၂၄ ရက်နေ့တွင် မှော်ဘီမြို့နယ် စားအုန်းဆီလက်ကားကိုယ်စားလှယ်  ဦးသိန်းသန်းစိုးနှင့် ဦးတင်မင်းဦးဆိုင်များသို့ ဈေးနှုန်းမြှင့်တင်ရောင်းချမှုရှိ/မရှိ ကွင်းဆင်းစစ်ဆေးခဲ့ပါသည်။

    ထိုသို့ ကွင်းဆင်းစစ်ဆေးရာတွင် အမှတ်(၁၉၇)၊ ကွမ်းခြံပိုင်ဈေးလမ်း၊ တပ်ကြီးကုန်းရှိ ဦးသိန်းသန်းစိုးဆိုင်နှင့် ရွှေမြယာကျေးရွာ၊ ရောင်နီဈေးရှိ ဦးတင်မင်းဦးဆိုင်သို့ သွားရောက် စစ်ဆေးခဲ့ရာ စားအုန်းဆီများကို စားသုံးသူပြည်သူများထံသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ထုတ်ပြန်ပေးလျက်ရှိသော စားအုန်းဆီတစ်ပိဿာ ရည်ညွှန်းဈေးအပေါ် အခြေခံ၍ သယ်ယူပို့ဆောင်ခပါ ကုန်ကျစရိတ်  အမြတ် (၂)ရာခိုင်နှုန်း တွက်ချက်၍  ဖြန့်ဖြူးရောင်းချရန်နှင့် ဈေးနှုန်းမြှင့်တင်ရောင်းချပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်ခြင်းခံရမည်ဖြစ်ကြောင်း အသိပညာပေး ပြောကြားခဲ့ပါသည်။

DOCA(ရန်ကုန်)