သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူးရုံးမှ ဦးသန်းစိုး (ဦးစီးအရာရှိ) ဦးဆောင် သော ဝန်ထမ်းများသည် ၂၀၂၂ခုနှစ် ဇန်နဝါရီလ (၂၈)ရက်နေ့ ၊နံနက်(၀၉:၃၀)အချိန်တွင် မလှိုင်မြို့၊ မြို့သစ် အခြေခံပညာ အထက်တန်းကျောင်းတွင် စားသုံးသူအကာအကွယ်ပေးရေးဆိုင်ရာ  အသိပညာပေးဟောပြောပွဲ ကျင်းပပြုလုပ်ခဲ့ပါသည်။ ဦးသန်းဦးက အဖွင့်အမှာစကားပြောကြားရာတွင် စားသုံးသူရေးရာဦးစီးဌာနသည် ယခင်နှစ်များက  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့သော်လည်း Covid-၁၉ ရောဂါကူးစက်မှု အခြေအနေများကြောင့် CICC Meiktila Facebook Pageတွင် Onlineမှ လည်းကောင်း၊ ပြန်ကြားရေးနှင့်ပြည့်သူဆက်သွယ်ရေးဦးစီးဌာနနှင့် ပူးပေါင်း၍ Talk Show အစီအစဉ်များ ဖြင့်လည်းကောင်း စားသုံးသူအသိပညာပေးရေးလုပ်ငန်းများ ဆောင်ရွက်ပေးခဲ့ပါကြောင်း၊ စားသုံးသူများအနေဖြင့် မိမိတို့အခွင့်အရေးများဆုံးရှုံးနစ်နာမှုများ ဖြစ်ပေါ်လာပါက တိုင်ကြားနိုင်ပါ‌ကြောင်း၊ တိုင်ကြားမှုများကိုလည်း စားသုံးသူကာကွယ်ရေး ဥပဒေနှင့်အညီ ဖြေရှင်းဆောင်ရွက်ပေးလျက်ရှိကြောင်း ဆွေးနွေးပြောကြားခဲ့ပါသည်။ 

       ဆက်လက်၍ စားသုံးသူရေးရာဦးစီးဌာန၊ မလှိုင်မြို့နယ်တာဝန်ခံဦးရဲမြင့်ဆန်းမှ  စားသုံးသူ ကာကွယ်ရေးဥပဒေကို စားသုံးသူကာကွယ်ရေး ဥပဒေကို ၂၀၁၉ခုနှစ် ၊ မတ်လ (၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြင်ဆင်အတည်ပြုပြဌာန်းခဲ့ကြောင်း၊ စားသုံးသူများအနေဖြင့် မိမိအခွင့်အရေးများ သိရှိမှသာ ကုန်စည်(သို့)ဝန်ဆောင်မှုများအပေါ် ဆုံးရှုံးနစ်နာမှုများ ဖြစ်ပေါ်‌လာပါက အရေးဆိုတိုင်ကြားနိုင်မည်ဖြစ်ကြောင်း၊ စားသုံးသူအခွင့်အရေးများကို တိုင်ကြားမှု ဥပမာများဖြင့် စားသုံးသူများသိရှိနားလည်စေရန် စားသုံးသူကာကွယ်ရေးဥပဒေပါ စားသုံးသူအခွင့်အရေး၊ လိုက်နာရမည့်တာဝန်များနှင့်ပတ်သက်၍ အကျယ်တဝင့် ဆွေးနွေးပြောကြားခဲ့ပါသည်။ ၎င်းအပြင်အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားပြဌာန်းချက်နှင့် ပတ်သက်၍ မြန်မာဘာသာဖြင့် ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူ အသုံးပြုသင့်ကြောင်းနှင့် ကုန်အညွှန်းအမှတ်အသားနှင့်ပတ်သက်၍ သိသင့်သိထိုက်သည့် ဗဟုသုတများကို ပြောကြားခဲ့ပြီး စားသုံးသူအခွင့်အရေး နစ်နာဆုံးရှုံးမှုများရှိပါက DOCA Applicationeနှင့် www . doca. gov. mm တွင် ဝင်ရောက်တိုင်ကြားနိုင်ကြောင်း ဆွေးနွေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ပါသည်။

          ဟောပြောပွဲသို့ ဆရာ/ဆရာမ၊ကျောင်းသား/ကျောင်းသူ စုစုပေါင်း (၂၉၆)ဦး တက်ရောက်ခဲ့ပြီး နံနက် (၁၁:၀၀) နာရီတွင် ရုတ်သိမ်းခဲ့ပါသည်။

DOCA(မန္တလေး)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မိတ္ထီလာခရိုင် ဦးစီးမှူးရုံးမှ ဦးစီးအရာရှိ၊ ဦးသန်းစိုးနှင့် မလှိုင်မြို့နယ် တာဝန်ခံဦးရဲမြင့်ဆန်းတို့သည် (၂၈.၁.၂၀၂၂) ရက်နေ့ နံနက် (၁၀:၃၀) နာရီ အချိန်တွင် မလှိုင်မြို့နယ် ဝါးခွကျေးရွာ  ဦးမျိုးချစ်(အိမ်ရှင်) အကြော်စုံလုပ်ငန်း လုပ်ကိုင်သူနှင့် တွေ့ဆုံဆွေးနွေးခဲ့ရာ ဦးစီးအရာရှိ၊ ဦးသန်းစိုးမှ ယခုထုတ်လုပ်လျက်ရှိသော (အိမ်ရှင်) အကြော်စုံလုပ်ငန်းမှ အာလူးကြော်၊ ကုလားပဲမှုန့် အချောင်းကြော်တို့တွင် စားသုံးသူကာကွယ်ရေးဥပဒေအရ ကုန်ညွှန်းအမှတ်သားများပြည့်စုံစွာ ဖော်ပြပါရှိရေး အကျယ်တဝင့်ရှင်းလင်းဆွေးနွေးခဲ့ပြီး၊ မလှိုင်မြို့နယ် တာဝန်ခံမှ လုပ်ငန်းစတင်ကာလနှင့် ကုန်ကြမ်းဝယ်ယူသုံးစွဲမှု၊ ကုန်ချောဖြန့်ဖြူးရာဒေသ၊ အကျိုးအမြတ်များကို တွေ့ဆုံမေးမြန်းခဲ့ပါသည်။

            အိမ်ရှင်အမည်ဖြင့် အာလူးကြော်လုပ်ငန်းကို ၂၀၁၃ ခုနှစ်မှ စတင်တည်ထောင်လုပ်ဆောင်ခဲ့ရာ အောင် မြင်ခဲ့သည့် အကြော်မှာ ကုလားပဲချောင်းကြော်၊ အာလူးကြော်ဖြစ်ပြီး၊ လုပ်ငန်းစတင်ချိန်က ကုန်ကြမ်းကိုမလှိုင် မြို့မစျေးမှ ဝယ်ယူရကြောင်း၊၂၀၁၇ ခုနှစ်မှစ၍ အောင်ပန်းမြို့သို့ မှာယူသုံးစွဲခဲ့ပြီး ပျမ်းမျှ တလလျှင် အာလူး ၃၀၀ ပိဿာ၊ ကုလားပဲမှုန့် ၂၀၀ ပိဿာ၊ ဆီ ၂၅၀ ပိဿာခန့်ကြော်ရကြောင်း၊ ၁ ရက် ကြော်၊ ၃ ရက်ထုတ်ပိုးပြီး၊ ရောင်းချရကြောင်း၊ လုပ်သားအင်အား (၃၀)ဦး ဖြင့်လုပ်ကိုင်ပြီး၊ အကျိုးအမြတ်မှာ ၁၀ ရာခိုင်နှုန်းရှိကြောင်း၊ ကျောက်ဆည်၊ သာစည်၊ ရမည်းသင်း၊ မြစ်သား၊ စဥ့်ကိုင်မြို့ များသို့ ဖြန့်ဝေ‌ရောင်းချနေကြောင်း သိရှိရပါသည်၊၊

DOCA(မန္တလေး)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ဟင်္သာတခရိုင်၊ ကြံခင်းမြို့၊ မြို့နယ်တာဝန်ခံသည် ပြန်ကြားရေးနှင့် ပြည်သူ့ဆက်ဆံရေးဦစီးဌာန၊ လူထုအခြေပြုဗဟိုဌာန Community Centre ၌ (၇.၂.၂၀၂၂) နေ့ ၊ နံက် (၁၀:၀၀) တွင် ကြံခင်းမြို့ပေါ်ရှိ ငါးမုန့် ကြော်၊ အာလူးကြော်လုပ်ငန်းရှင်များအား စားသုံးသူကာကွယ်ရေး အသိပညာပေး ဟောပြာခဲ့ပါ သည်။

          ဟောပြောပွဲတွင် စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံ ဦးကျော်နိုင်ဝင်းက စားသုံးသူကာကွယ်ရေးဥပဒေ အခန်း(၉) ပါ စားသုံးသူ၏ အခွင့်အရေးနှင့်တာဝန်များ၊ အခန်း(၁၀) ပါ စီးပွားရေးလုပ်ငန်းရှင်၏ တာဝန်များ၊ အခန်း(၁၈) ပါ ကုန်အညွှန်းအမှတ်အသားဖော်ပြခြင်းဆိုင်ရာ စီးပွားရေးလုပ်ငန်းရှင်များ လိုက်နာရမည့်အချက်များနှင့် မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက် ၂/၂၀၁၉ ပါ ကုန်စည်အုပ်စုအလိုက် မြန်မာဘာသာဖြင့်ကုန်အညွှန်းအမှတ်အသားဖော်ပြရမည့် အသေးစိတ်စီစစ်ချက်များကို ရှင်းလင်းဆွေးနွေးခဲ့ပါသည်။ တက်ရောက်လာသူ လုပ်ငန်းရှင်များမှလည်း ကုန်အညွှန်းအမှတ်ဖော်ပြခြင်းနှင့် ပတ်သက်သည့် သိလိုသည်များကို မေးမြန်းဆွေးနွေးခဲ့ပြီး၊ လုပ်ငန်းရှင် (၁၀)ဦးတက်ရောက်ခဲ့ကာ၊ တက်ရောက်သူများအား စားသုံးသူကာကွယ်ရေး အသိပညာပေး လက်ကမ်းစာစောင်မျာကိုလည်း ဖြန့်ဝေပေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန

ဧရာဝတီတိုင်းဒေသကြီး

        မန္တလေးတိုင်းဒေသကြီး၊ မိတ္ထီလာမြို့၊ နန်းတော်ကုန်း(၁)ရပ်ကွက်၌ ထုတ်လုပ်တင်သွင်းရောင်းချနေသော ပေါင်မုန့်/ကိတ်မုန့် ပိုင်ရှင်တစ်ဦးသည် ၎င်း၏ အမှတ်တံဆိပ်တွင် ထည့်သွင်းဖော်ပြသွားမည့် ကုန်အညွှန်းအမှတ်အသားများတွင် စားသုံးသူကာကွယ်ရေးဥပဒေပြဌာန်းချက်များနှင့်အညီ ကိုက်ညီမှုရှိ/မရှိနှင့် လိုအပ်ချက်များ ပြင်ဆင်ပြုပြင်နိုင်ရန်အတွက် ၂၀၂၂ခုနှစ်၊ ဇန်နဝါရီလ၂၇ ရက်နေ့တွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး ဦးဇော်မင်းနှင့် တွေ့ဆုံဆွေးနွေးခဲ့ပါသည်။

        အဆိုပါ တွေ့ဆုံဆွေးနွေးမှုအရ ပေါင်မုန့်/ကိတ်မုန့်လုပ်ငန်းတွင် မုန့်အမျိုးအစား (၉)မျိုး ပြုလုပ်ကြောင်း၊ ထောပတ် မုန့်ကြွပ်၊ ကြက်သားကိတ်လိတ်၊ ဆီသန့်ကိတ်မုန့်၊ စက်လှီးပေါင်မုန့်၊နို့ပေါင်မုန့် ၊ကြက်သားလိတ်ပေါင်မုန့်၊ ပဲပေါင်မုန့်၊ ငှက်ပျောယို ပေါင်မုန့်၊ မုန့်ကြွပ် စသည့်မုန့်များကို မိသားစုတစ်နိုင်တစ်ပိုင် ထုတ်လုပ်သောလုပ်ငန်းဖြစ်ပြီး မိတ္ထီလာမြို့အတွင်းသာ (၃)ရက်တစ်ခါ ဈေးကွက်အတွင်း ဖြန့်ဖြူးရောင်းချလျက်ရှိကြောင်းသိရှိခဲ့ရပါသည်။ ထို့နောက် ခရိုင်ဦးစီးမှူးက မုန့်အမျိုးအစားအလိုက် ကုန်အညွှန်းအမှတ်အသားများအား ပြည့်စုံစွာ ဖော်ပြရန်အတွက် မြန်မာနိုင်ငံစားသုံးသူကာကွယ်ရေးကော်မရှင် ထုတ်ပြန်ထားရှိသည့် ကုန်အညွှန်းအမှတ်အသားဖော်ပြခြင်းဆိုင်ရာ အမိန့်ကြော်ငြာစာအမှတ် (၂/၂၀၁၉)အား ထုတ်ပြန်ထားရှိကြောင်းကိုလည်းကောင်း၊ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တွဲလျက်ရှိစေ ဖော်ပြရမည့်အချက်အလက်များကိုလည်းကောင်း ရှင်းလင်းဆွေးနွေးပြောကြားခဲ့ပါသည်။

       ယင်းသို့ ဌာနနှင့် လုပ်ငန်းရှင်များအကြား ပူးပေါင်းဆောင်ရွက်ခြင်းဖြင့် ပြည်သူလူထုများထံ ဘေးကင်းလုံခြုံသောထုတ်ကုန်များကို ရောင်းချလာနိုင်မည်ဖြစ်ပြီး စားသုံးသူများအနေဖြင့်လည်း ထုတ်ကုန်များ ဝယ်ယူရာတွင် မှန်ကန်ပြည့်စုံသော သတင်းအချက်အလက်များကို ရရှိကာ ရွေးချယ်ဝယ်ယူလာနိုင်မည်ဖြစ်ပါသည်။

DOCA (မန္တလေး)

             တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့၊ အထွေထွေအုပ်ချုပ်ရေးဦးစီးဌာန၊ ပြည်သူ့ကျန်းမာရေးဦးစီးဌာနတို့နှင့် ပူးပေါင်း၍ ၂၀၂၂ ခုနှစ်၊ ဖေဖော်ဝါရီလ ၁၁ ရက်နေ့ နံနက် (၉:၀၀)တွင် ထားဝယ်မြို့ ပေါ်ရှိ ကမ်းနားဈေးသို့ သွားရောက်ပြီး စားအုန်းဆီနှင့် ယိုးဒယားအသားလုံးများတွင် မြန်မာဘာသာဖြင့် ကုန်အညွှန်းအမှတ်အသားများ ဖော်ပြပါရှိသောကုန်ပစ္စည်းများကို ရောင်းချမှုရှိစေရေးနှင့် ယုံကြည်စိတ်ချရသော ကုန်ပစ္စည်းများ၊ အရည်အသွေးပြည့်ဝသောကုန်ပစ္စည်းများကို ရောင်းချနိုင်စေရေး ဈေးကွက်စောင့်ကြည့် ကွင်းဆင်းစိစစ်ဆောင်ရွက်ခဲ့ပါသည်။

          ထိုသို့ စျေးကွက်စောင့်ကြည့်စစ်ဆေးရာတွင် တနင်္သာရီတိုင်းဒေသကြီး၊ ထားဝယ်ခရိုင် စားသုံးသူရေးရာဦးစီးဌာနအနေဖြင့် ဈေးကွက်အတွင်း စားသုံးသူများစားသုံးရန် အာမခံချက်မရှိသော/ လုံခြုံစိတ်ချရမှုမရှိသော အစားအသောက်ကုန်များကို မရောင်းချနိုင်စေရေး အသိပညာပေးပြောကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန

တနင်္သာရီတိုင်းဒေသကြီး