သတင်းနှင့် လှုပ်ရှားမှုများ

               မကွေးတိုင်းဒေသကြီး၊ စားသုံးသူရေးရာဦးစီးဌာန၊ အစည်းအဝေးခန်းမတွင် ၂၀၂၂ခုနှစ်၊ မတ်လ (၃၀)ရက်နေ့ နံနက်(၁၀:၀၀)နာရီအချိန်၌ စစ်ဆေးရေးအရာရှိများ လုပ်ငန်းကျွမ်းကျင်မှုဆိုင်ရာဆင့်ပွား သင်တန်း(၁/၂၀၂၂)ကိုကျင်းပခဲ့ပါသည်။

            အဆိုပါဆင့်ပွားသင်တန်းတွင် တိုင်းဒေသကြီးဦးစီးမှူး၊ ဦးမြင့်ဝင်းက စားသုံးသူအသိပညာပေးခြင်း၊ လုပ်ငန်းရှင်နှင့်တွေ့ဆုံခြင်း၊ ဈေးကွက်စောင့်ကြည့်စစ်ဆေးခြင်း လုပ်ငန်းများကို တြိဂံပုံစံဖြင့်ချိတ်ဆက် ဆောင်ရွက်သွားရန်လိုကြောင်း၊ အသိပညာပေးမှုအပိုင်းကို လျော့ချ၍ ဈေးကွက်စောင့်ကြည့်စစ်ဆေးခြင်းများကို ဦးစားပေးဆောင်ရွက်သွားရမည်ဖြစ်ကြောင်း၊ ယနေ့ပြုလုပ်သည့်သင်တန်းသည် ရုံးချုပ်တွင် သင်တန်းတက်ရောက်ခဲ့သူများမှ ရုံးချုပ်ညွှန်ကြားချက်များကို ပြန်လည်ဆင့်ပွားပို့ချပေးမှာဖြစ်ပြီး၊ မြို့နယ်တာဝန်ခံများအနေဖြင့်လည်း လုပ်ငန်းလုပ်ဆောင်ရာတွင် ကြုံတွေ့ရသည့် အခက်အခဲများ၊ မှားယွင်းမှုများ မဖြစ်ရလေအောင် ပြန်လည်ထိန်းမတ်ပေးမည့် သင်တန်းလည်းဖြစ်ကြောင်း၊ သက်ဆိုင်ရာမြို့နယ် တာဝန်ခံများမှလည်း လုပ်ငန်းဆောင်ရွက်ရာတွင် တွေ့ကြုံရသည့် အခက်အခဲများကိုတင်ပြပြီး လိုအပ်ချက် များကို ညှိနှိုင်းဆွေးနွေးပေးမည်ဖြစ်ကြောင်း၊ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ စီမံခန့်ခွဲရေးဆိုင်ရာ ပြစ်မှုပြစ်ဒဏ်များဖြင့် အမိန့်ချမှတ်၍မရဘဲ ကုန်အညွှန်းအမှတ်အသား ပြည့်စုံမှုမရှိလျှင် တရားဥပဒေအရ ရဲစခန်းတွင် အမှုဖွင့်ဆောင်ရွက်ရမည်ဖြစ်၍ သေချာစွာလုပ်ဆောင်ရမည်ဖြစ်ကြောင်း ဆွေးနွေး ခဲ့ပါသည်။

            ဆက်လက်၍ ဒု-တိုင်းဒေသကြီးဦးစီးမှူး၊ ဒေါ်အေးအေးမိုးမှ မြို့နယ်တာဝန်ခံများအား ဈေးကွက်စောင့်ကြည့်စစ်ဆေးရာတွင် စစ်ဆေးတွေ့ရှိချက်အပေါ် သတ်မှတ်ပုံစံများတွင် ဖြည့်စွက်ရာ၌ ဆောင်ရွက်ရမည့် အစီအမံများကို အသေးစိတ်ရှင်းလင်းခဲ့ပြီး ဦးစီးအရာရှိ ဒေါ်အေးမဉ္ဇူခိုင်မှလည်း စားသုံးသူကာကွယ်ရေး နည်းဥပဒေနှင့် စပ်လျဉ်း၍ဆွေးနွေးခဲ့ပါသည်။ နေ့လည်ပိုင်း၌ ရုံးချုပ်တွင် စစ်ဆေးရေးအရာရှိသင်တန်း တက်ရောက်ခဲ့သည့် ဦးစီးမှူးဒေါ်အေးအေးခိုင်မှ စစ်ဆေးရေးအရာရှိ၏ လုပ်ငန်းတာဝန်များနှင့် ဈေးကွက်စောင့်ကြည့်စစ်ဆေးရာတွင် ကုန်အညွှန်းအမှတ်အသား ဖော်ပြချက်နှင့်စပ်လျဉ်း၍ မြန်မာဘာသာဖြင့် ဖော်ပြရမည့်အချက်အလက်များအားလည်းကောင်း၊ ဒု-ကြီးကြပ်ရေးမှူး ဦးနိုင်ဦးမှ ပြန်လည်သိမ်းဆည်းစေခြင်း (သို့မဟုတ်) တားမြစ်ခြင်း ဆောင်ရွက်ပုံအဆင့်ဆင့်အားလည်းကောင်း၊ ဒု-ဦးစီးမှူးဒေါ်ဌေးဌေးမှ တိုင်ကြားမှုများကိုစိစစ်ခြင်းနှင့် စေ့စပ်ညှိနှိုင်းဖြေရှင်းပေးခြင်းများကို  ရှင်းလင်းဆွေးနွေးခဲ့ပါသည်။

         ထို့နောက်သင်တန်းသားများမှ စားသုံးသူကာကွယ်ရေးနည်းဥပဒေနှင့်စပ်လျဉ်း၍ ဝိုင်းဝန်းဆွေးနွေးပြီး မြေပြင်ကွင်းဆင်းစစ်ဆေးရာတွင် တွေ့ကြုံရသည့် အခြေအနေများကိုလည်း တိုင်းဦးစီးမှူးရုံးမှ တာဝန်ရှိသူများနှင့် မြို့နယ်တာဝန်ခံများ၊ စစ်ဆေးရေးအရာရှိများက ဝိုင်းဝန်းဆွေးနွေး အကြံပြုခဲ့ပြီး ညနေ(၁၆:၃၀)နာရီအချိန်တွင် သင်တန်းပြီးဆုံးကြောင်း သတင်းရရှိပါသည်။

DOCA(မကွေး)

            ရန်ကုန်တိုင်းဒေသကြီး၊ မင်္ဂလာတောင်ညွှန့်မြို့နယ်ရှိ မီးသတ်ဦးစီးဌာနမှ တာဝန်ရှိဝန်ထမ်းများသည် ၂၈.၃.၂၀၂၂ ရက်နေ့၊ နံနက်(၁၀:၃၀) နာရီတွင်  စားသုံးသူရေးရာဦးစီးဌာန၊ ရန်ကုန်အ‌ရှေ့ပိုင်းခရိုင်ဦးစီးမှူးရုံးမှ ဝန်ထမ်းများနှင့် ပူးပေါင်း၍ မီးဘေးကြိုတင်ကာကွယ်ရေးလုံခြုံရေးဆိုင်ရာ အသိပညာပေးခြင်းနှင့် စစ်ဆေးခြင်းများကို အ‌ရှေ့ပိုင်းခရိုင်ဦးစီးမှူးရုံး၌ ဆောင်ရွက်ခဲ့ကြောင်းနှင့် ဟောပြောပွဲတက်ရောက် သူစုစုပေါင်း (၁၇)ဦးရှိကြောင်း သိရှိရပါသည်။

          ထိုသို့ဆောင်ရွက်ရာတွင် မြို့နယ်မီးသတ်တပ်ဖွဲ့ဦးစီးဌာနမှ လက်ထောက်မီးသတ်ဦးစီးမှူး ဦးသော်ခန့်ဝေမှ မီးလောင်မှုရှိခဲ့ပါက မီးသတ်ကားများ ထွက်ခွာရပုံအဆင့်များအကြောင်း၊ မီးလောင်မှု ကိုဖြစ်ပေါ်စေနိုင်သည့် အဓိကအချက်(၃) ချက်ရှိပါကြောင်း၊ ၎င်းတို့မှာ အခန်းတွင်းလေဝင်လေထွက် ကောင်းမွန်မှုမရှိခြင်း၊ ပစ္စည်းများ သိုလှောင်ထားရှိမှုများပြားခြင်းနှင့် အခန်းတွင်းအပူရှိန်အလွန်မြင့် တက်ခြင်းတို့ကြောင့်ဖြစ်ကြောင်း၊ ရုတ်တရက်မီးလောင်မှုများ ဖြစ်ပေါ်ခဲ့ပါက မီးစတင်လောင်မှုအပေါ် မူတည်ပြီး မကြောက်မလန့်စွာဖြင့် မီးငြိမ်းသတ်နိုင်မည့် နည်းလမ်းများအကြောင်းတို့ကို အကျယ်တဝင့်ပြောကြားခဲ့ပါသည်။

          ဆက်လက်၍ ရုံးအတွင်းရှိ လျှပ်စစ်မီးကြိုးများ၊ မီးငြိမ်းသတ်ရန်ရေကန်၊ မီးသတ်ဆေးဘူးအသုံးပြုပုံတို့ကို ကြည့်ရှုစစ်ဆေးပေးခဲ့ရာ အရှေ့ပိုင်းခရိုင်ဦးစီးမှူး ဦးဇော်မင်းလတ်မှ ယခုကဲ့သို့ လာရောက်အသိပညာပေးခြင်းနှင့် စစ်ဆေးပေးခြင်းများအတွက် အထူးပင်ကျေးဇူးတင်ရှိပါကြောင်း ပြန်လည်ပြောကြားပေးခဲ့ပြီး ဟောပြောပွဲအား နေ့လည် (၁၁:၃၀) နာရီအချိန်တွင် ရုတ်သိမ်းခဲ့ကြောင်း သိရှိရပါသည်။

DOCA(ရန်ကုန်)

            ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ တောင်ငူမြို့နယ်တာဝန်ခံ ဦးမြင့်သူနှင့် ဒုတိယဦးစီးမှူး ဦးနေစိုးထက်တို့သည် တောင်ငူမြို့ မြို့မဈေးကြီးအပြင်တန်းနှင့် အနီးတဝိုက်ရှိ ခြင်ဆေးခွေရောင်းချသည့် ဆိုင်များသို့ သွားရောက်၍ ခြင်ဆေးခွေများတွင် ကုန်အညွှန်းအမှတ်အသား ပြည့်စုံစွာဖော်ပြထားခြင်း ရှိ /မရှိကို စောင့်ကြည့်စစ်ဆေးခဲ့ပါသည်။

              ထိုသို့ကွင်းဆင်းစောင့်ကြည်စစ်ဆေးစဉ် မြို့နယ်တာဝန်ခံသည် ခြင်ဆေးခွေများ ဖြန့်ဖြူး ရောင်းချရာတွင် ကုမ္ပဏီ၏ မှတ်ပုံတင်အမှတ်၊ စိုက်ပျိုးရေးဦးစီးဌာန၊ သီးနှံကာကွယ်ရေးနှင့်ပိုးသတ်ဆေးဌာနမှ ထုတ်ပေးထားသော ပိုးသတ်ဆေးမှတ်ပုံတင်အမှတ်၊ ထုပ်ပိုးပစ္စည်းမှတ်ပုံတင်များ၊ သက်ဆိုင်ရာအစိုးရဌာနများက ဖော်ပြရန် သတ်မှတ်ထားသော အချက်အလက်များပါရှိသော ခြင်ဆေးခွေများကိုသာ ဖြန့်ဖြူးရောင်းချကြရန် အသိပညာပေးခဲ့ပါသည်။

              ဈေးကွက်အတွင်းတွင် အထက်ပါအချက်အလက်များ မပါရှိသော ကျင်းဟုံ ခြင်ဆွေးခွေ များကို ရောင်းချပါက ထုတ်ကုန်လုံခြုံစိတ်ချရမှုရှုထောင့်ဘက်မှ ပထမအဆင့် အနေဖြင့် ဖြန့်ဖြူးရောင်းချနေသော ဆိုင်များအား အသိပညာပေးခြင်း၊ သတိပေးခြင်းများ ဆောင်ရွက်ပြီး လိုက်နာမှုမရှိပါက ဒုတိယအဆင့်အနေဖြင့် ဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း သိရှိရပါသည်။

DOCA(ပဲခူး)

           စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးအနေဖြင့် မန္တလေးခရိုင်အတွင်းရှိ စက်ဆီ၊ ချောဆီနှင့် ရေနံထွက်ပစ္စည်းများ တင်သွင်း၊ ထုတ်လုပ်၊ ဖြန့်ဖြူး၊ ရောင်းချလျက်ရှိသည့် အရောင်းဆိုင်များနှင့် Facebook/Online အသုံးပြု၍ မှတ်ပုံတင်ထားခြင်းမရှိသော ဆေးဝါးများ၊ အလှကုန်ပစ္စည်းများနှင့် ခွင့်ပြုချက်မပါသော စားသောက်ကုန်များ ရောင်းချမှု ရှိ/မရှိ (၂၈-၃-၂၀၂၂) ရက်နေ့ တွင် လက်ထောက်ညွှန်ကြားရေးမှူး ဦးဆောင်ကာ ဈေးကွက်စောင့်ကြည့်စစ်ဆေးခြင်း ဆောင်ရွက် ခဲ့ပြီး အတုအပပြုလုပ်ရောင်းချခြင်းမပြုရန် တရားဝင် လိုင်စင်များဖြင့် ဖြန့်ဖြူးရောင်းချသွားရန်၊ စားသုံးသူကာကွယ်ရေးဥပဒေအခန်း (၁၈)ပါ ကုန်အညွှန်းအမှတ်အသားဖော်ပြချက်များနှင့်အညီ ရောင်းချသွားရန် လိုက်နာဆောင်ရွက်မှုမရှိပါက ဥပဒေနှင့်အညီ ဖော်ထုတ်အရေးယူဆောင်ရွက်သွားမည်ဖြစ်ကြောင်း ရှင်းလင်းပြောကြားခဲ့ပြီး စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(မန္တလေး)

          စားသုံးသူရေးရာဦးစီးဌာန၊ နေပြည်တော်ဦးစီးမှူးရုံး၌ ၂၀၂၂ ခုနှစ်၊ မတ်လ ၃၀ ရက်နေ့ နံနက် (၁၀း၀၀)နာရီတွင် နေပြည်တော်ဆီကုန်သည်နှင့်ဆီလုပ်ငန်းရှင်များအသင်း၏ ပထမအကြိမ်လုပ်ငန်း ညှိနှိုင်းအစည်းအဝေး ကျင်းပပြုလုပ်ခဲ့ပါသည်။ အဆိုပါ အစည်းအဝေးတွင် စားသုံးသူရေးရာဦးစီးဌာန မှ တာဝန်ရှိသူများနှင့် နေပြည်တော်ဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌ၊ ဒုတိယဥက္ကဋ္ဌများနှင့် အသင်းသား/သူများ၊ စုစုပေါင်း(၃၅)ဦး တက်ရောက်ခဲ့ပါသည်။

       ၎င်းအသင်းသည် ၂၈-၉-၂၀၂၁ ရက်နေ့တွင် ပြည်ထောင်စုနယ်မြေ၊ နေပြည်တော် အတွင်းရှိ ဆီလုပ်ငန်းရှင်(၁၉)ဦးဖြင့် ပေါင်းစုဖွဲ့စည်းထားသောအသင်းဖြစ်ပြီး အသင်းသက်တမ်းမှာ(၆)လ ကြာမြင့်ပြီ ဖြစ်ပါသည်။ ယခုအခါ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်း၍ စားသုံးသူပြည်သူများထံသို့ စားအုန်းဆီများ ကို သက်သာသော အထူးဈေးနှုန်းဖြင့် ဖြန့်ဖြူးရောင်းချပေးလျက်ရှိကြောင်း သိရှိ ရပါသည်။

           အဆိုပါ အစည်းအဝေးတွင် အသင်းဝင်များက အသင်း၏(၆)လတာ ကာလအတွင်း လုပ်ငန်း ဆောင်ရွက်ချက်များ၊ ရှေ့ဆက်လက်ဆောင်ရွက်မည့် လုပ်ငန်းများနှင့်ပတ်သတ်၍ ညှိနှိုင်းဆွေးနွေးခဲ့ကြောင်း သတင်းရရှိပါသည်။