သတင်းနှင့် လှုပ်ရှားမှုများ

            မြို့နယ်အစာအာဟာရကြီးကြပ်ရေးကော်မတီအဖွဲ့ဝင်များဖြစ်သော စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့၊ မြန်မာနိုင်ငံရဲတပ်ဖွဲ့၊ မြို့နယ်ကျန်းမားရေးဦးစီးဌာနနှင့် ပူးပေါင်း၍ ၂၉-၃-၂၀၂၂ ရက်နေ့ နံနက် ၀၉: ၀၀ နာရီအချိန်တွင် ဘားအံမြို့မဈေး၊ စူပါမားကတ်နှင့် ရပ်ကွက်များရှိ ကလေးအာဟာရအရောင်းဆိုင်များသို့ အစားအသောက်နှင့်ဆေးဝါးကွပ်ကဲရေးဦးစီးဌာနမှ ထုတ်ပြန်ထားသော Code No. (၇) လုံးမှ (၉) လုံးတွင် ပထမဂဏန်းမှာ (၂၂-၃၇) အတွင်းပါရှိပြီး၊ Code No. တွင် ပါဝင်သော စာသားများတွင် K8/SH/Z2 ပါရှိပြီး၊ သက်တမ်းကုန်ဆုံးသည့်ရက်စွဲသည် (၁-၄-၂၀၂၂) သို့မဟုတ် ဧပြီလ (၁) ရက်နေ့ စသည့်အချက်များပါရှိသော  Similac နို့မှုန့်များ ဈေးကွက်အတွင်း ရောင်းချမှု ရှိ/ မရှိ ကွင်းဆင်းစစ်ဆေးဆောင်ရွက်ခဲ့ပါသည်။

            ထိုသို့ကွင်းဆင်းစစ်ဆေးဆောင်ရွက်ရာတွင် Similac နို့မှုန့်များ ဈေးကွက်အတွင်း ရောင်းချဖြန့်ဖြူးမှုမရှိကြောင်း တွေ့ရှိရပြီး အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ခံ ဒေါ်မေသူနွယ် က Code No. များပါသည့် Similac နို့မှုန့်များ ဈေးကွက်အတွင်း ရောင်းချဖြန့်ဖြူးခြင်းမပြုရန်နှင့် ဈေးကွက်အတွင်း ဝင်ရောက်တွေ့ရှိမှုရှိပါက သက်ဆိုင်ရာဌာနကို အကြောင်းကြားပေးပါရန် ပြောကြားခဲ့ပြီး စားသုံးသူရေးရာဦးစီးဌာန၊ ဦးစီးအရာရှိ ဦးမျိုးဝင်းနိုင်က စားသုံးသူများ လုံခြုံစိတ်ချရမှုရှိစေရန်အတွက် ခွင့်ပြုချက်ရရှိထားသည့် Similac ကလေးနို့မှုန့်များကိုသာ တင်သွင်းရောင်းချပေးပါရန်နှင့် စံသတ်မှတ်ချက်နှင့်အညီ ထားသိုသိမ်းဆည်းရန် ပြောကြားခဲ့ပြီး ကုန်အညွှန်းအမှတ်အသားနှင့်စပ်လျဉ်း၍ ပါဝင်ရမည့်အချက်များ ပါဝင်ရမည်ဖြစ်ကြောင်းနှင့် သက်ဆိုင်ရာဌာန၏သတ်မှတ်ထားသည့် စည်းမျဉ်းစည်းကမ်းများကို လိုက်နာဆောင်ရွက်သွားရန် လိုအပ်ကြောင်း ပြောကြားခဲ့ပြီး လက်ကမ်းစာစောင်များလည်း ဖြန့်ဝေခဲ့ကြောင်း သိရှိရပါသည်။  

DOCA(ကရင်)  

        စားသုံးသူရေးရာဦးစီးဌာန၊ ကချင်ပြည်နယ်ဦးစီးမှူးရုံးမှ ဦးဇေယျာအောင်(ဦးစီးအရာရှိ)နှင့် ဝန်ထမ်းများ၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့ဖြင့် ပူးပေါင်း၍ ၂၈.၃.၂၀၂၂ ရက်နေ့နှင့် ၂၉.၃.၂၀၂၂ ရက်နေ့များတွင် မြစ်ကြီးနားမြို့ရှိ Similac အမှတ်တံဆိပ် (နို့စို့ကလေးအတွက်ဖော်စပ်စာ) လက်လီလက်ကား ရောင်းချဖြန့်ဖြူးလျက်ရှိသည့် ဆေးနှင့်ဆေးပစ္စည်းအရောင်းဆိုင်၊ ကုန်စုံဆိုင် (၁၄) ဆိုင်အား ကွင်းဆင်းစစ်ဆေးခဲ့ပါသည်။

        ထိုသို့ ကွင်းဆင်းစစ်ဆေးရာတွင် အစားအသောက်နှင့်ဆေးဝါးကွပ်ကဲရေးဦးစီးဌာ၏ ညွှန်ကြားချက်ဖြစ်သော Code နံပါတ်(၇)လုံးမှ (၉)လုံးတွင် ပထမဂဏန်းမှာ(၂၂-၃၇)အတွင်း၊ Code နံပါတ်တွင်ပါဝင်သော စာသားများတွင် K8၊ SH သို့မဟုတ် Z2 ပါရှိပြီး၊ သက်တမ်းကုန်ဆုံးရက်စွဲသည် (၁.၄.၂၀၂၂) ရက်နေ့ သို့မဟုတ် ဧပြီလ (၁) ရက်နေ့ စသည့်အချက်များပါဝင်သော Similac Product များ ဈေးကွက်အတွင်းရောင်းချဖြန့်ဖြူးခြင်း ရှိမရှိနှင့် ရောင်းချဖြန့်ဖြူးမှုအား စစ်ဆေးတွေ့ရှိပါက ဈေးကွက်အတွင်းမှ တစ်ခါတည်းဖယ်ရှားနိုင်ရေး ပူးပေါင်းအဖွဲ့များဖြင့် ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

DOCA(ကချင်)

          စားသုံးသူရေးရာဦးစီးဌာန၊ မန္တလေးတိုင်း‌‌‌ဒေသကြီး၊ မိတ္ထီလာခရိုင်၊ ခရိုင်ဦးစီးမှူး၏ကြီးကြပ်မှုဖြင့် မလှိုင်မြို့နယ်တာဝန်ခံဦးရဲမြင့်ဆန်းသည် မလှိုင်မြို့၊ အမှတ် (၃) ရပ်ကွက်၊ ရေစစ်ကျောင်းလမ်းရှိ မုန့်မျိုးစုံဆိုင်များသို့ (၁၈.၃.၂၀၂၂) ရက်နေ့ နံနက် (၁၀၀၀) နာရီချိန်၌ မုန့်ဆိုင်များအတွင်း ရောင်းချလျက်ရှိသော ကုန်စည်များအား ကုန်အညွှန်းအမှတ်သားဖော်ပြရမည်အချက်များ ပါဝင်မှုရှိ/မရှိကို ကွင်းဆင်းစစ်ဆေးခဲ့ပါသည်။

            စစ်ဆေးသည့် ကုန်စည်များ၌ မြန်မာနိုင်ငံစားသုံးသူကာကွယ်‌ရေးကော်မရှင်၏ ညွှန်ကြားချက်အမှတ် (၂/၂၀၁၉) အရ ကုန်စည်အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့်အချက်များနှင့်အညီ ဖော်ပြခြင်းရှိ/မရှိတို့ကို စစ်ဆေးခဲ့ပြီး၊ လုပ်ငန်းရှင်များအနေဖြင့် ကုန်အညွှန်းအမှတ်အသား မပြည့်စုံသော ကုန်စည်များကို ထုတ်လုပ်ရောင်းချပါက စားသုံးသူကာကွယ်ရေးဥပဒေပုဒ်မ (၇၃) အရ နှစ်နှစ်ထက်မပိုသော ထောင်ဒဏ်ဖြစ်‌၊ ကျပ်သိန်းနှစ်ရာထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေချမှတ် အရေးယူခံရမည်ဖြစ်ကြောင်းကို အသိပညာပေးဆွေးနွေး ဆောင်ရွက်ခဲ့ပြီး၊ ကုန်အညွှန်းအမှတ်အသားနှင့် ပတ်သက်၍ အသိပညာပေးလက်ကမ်းစာစောင်များ းဖြန့်ဝေခဲ့ပါသည်။

DOCA(မန္တလေး)                                                                    

              စားသုံးသူရေးရာဦးစီးဌာန ၊ ကျောက်ဆည်ခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်သောအဖွဲ့သည်(၁၆.၃.၂၀၂၂)ရက်နေ့တွင် စဉ့်ကိုင်မြို့နယ်ရှိDenko(စဉ့်ကိုင်)၊Denko(ပလိပ်)နှင့် တံတားဦးမြို့နယ်ရှိ Denko(တံတားဦး) စက်သုံးဆီအရောင်းဆိုင်များအား လည်းကောင်း၊ (၁၇.၃.၂၂၀၂၂) ရက်နေ့တွင် စဉ့်ကူးမြို့နယ်ရှိ Denko(လက်ပန်လှ)နှင့် မတ္တရာမြို့နယ်ရှိ Denko(မတ္တရာ)စက်သုံးဆီအရောင်းဆိုင်များအား စားသုံးသူကာကွယ်ရေးအသိပညာပေး ဟောပြောပွဲကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည် ။ ထိုသို့စစ်ဆေးရာတွင် ကျောက်ဆည်ခရိုင် စားသုံးသူရေးရာဦးစီးဌာန ၊ ခရိုင်ဦးစီးမှူးက နိုင်ငံတော်မှစက်သုံးဆီဈေးနှုန်း မြှင့်တက်မှုမရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့်ရောင်းချပေးသည့် နိုင်ငံခြားငွေရရှိသောစက်သုံးဆီကုမ္ပဏီများမှ စက်သုံးဆီများအား အထူးဈေးနှုန်း ဖြင့်ရောင်းချလျက်ရှိကြောင်း၊ ရောင်းချရာတွင် သုံးစွဲသူများအား နိုင်ငံတော်မှသတ်မှတ်ထားသည့် အထူးစျေးနှုန်းထက်ကျော်လွန်၍မရောင်းချရန်နှင့် အချင်အတွယ် မှန်ကန်မှုရှိစေရေး၊ အရည်အသွေးကောင်းမွန်သော စက်သုံးဆီများသာရောင်းချရန် ရှင်းလင်းပြောကြားပြီး စက်သုံးဆီအရောင်းဆိုင်ရှိ Pump များမှ အထူးဈေးနှုန်းဖြင့်ရောင်းချနေသည့် စက်သုံးဆီများဖြစ်သော Diesel ၊ Premium Dieselများအား (၂၀)လီတာဝင်စံခွက်ဖြင့် ချင်တွယ်၍ မှန်ကန်မှု ရှိ/မရှိစစ်ဆေးခဲ့ပါသည်။ဆက်လက်ပြီး စက်သုံးဆီအရောင်းဆိုင်ရှိ မန်နေဂျာရုံးခန်းတွင် ဝန်ထမ်းများအား စားသုံးသူကာကွယ်ရေးဥပဒေ နှင့်ပတ်သက်သည့် အကြောင်းအရာများဖြစ်သော စားသုံးသူအခွင့်အရေး ၊ စီးပွားရေးလုပ်ငန်းရှင်များ၏တာဝန်၊ ကုန်စည်နှင့်ဝန်ဆောင်မှုနှင့်  စပ်လျဉ်း ၍အာမခံပေးထားမှုအပေါ်စားသုံးသူက တောင်းဆိုနိုင်သည့်အခွင့်အရေးများနှင့် စားသုံးသူများနစ်နာ ဆုံးရှုံးမှုရှိပါက Consumer Information & Cpmplaint Center (CICC)သို့ တိုင်ကြားနိုင်သည့် အကြောင်းအရာများအား အသေးစိတ်ရှင်းလင်းပြောကြားခဲ့ပါသည်။အလားတူ(၁၈.၃.၂၀၂၂)ရက်နေ့တွင် ပြင်ဦးလွင်ခရိုင်၊ စားသုံးသူရေးရာဦးစီးဌာန၊ ခရိုင်တာဝန်ခံမှဦးဆောင်ပြီး ပြင်ဦးလွင်မြို့နယ်ရှိ Myint Myat Htut Kuhaung စက်သုံးဆီ အရောင်းဆိုင်အားနိုင်ငံတော်မှသတ်မှတ်ထားသည့် အထူးစျေးနှုန်းများထက် ကျော်လွန်၍ မရောင်းချရန်နှင့် အချင်အတွယ် မှန်ကန်မှုရှိစေရေး၊ အရည်အသွေးကောင်းမွန်သော စက်သုံးဆီများသာရောင်းချရန်အတွက် စျေးကွက်စောင့်ကြည့် စစ်ဆေးခြင်းလုပ်ငန်းများဆောင်ရွက်ခဲ့ကြောင်း သိရှိရပါသည်။

DOCA(မန္တလေး)       

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး ဦးဇော်မင်းနှင့်ဝန်ထမ်းများသည်သာစည်မြို့အတွင်းရှိ (တောင်ကြီး-မိတ္ထီလာ)ကားလမ်းရှိ စက်သုံးဆီအရောင်းဆိုင်များသို့(၂၁.၃.၂၀၂၂) ရက်နေ့ (၀၉၀၀) နာရီအချိန်တွင် ရှမ်းရွှေတောင် စက်သုံးဆီအရောင်းဆိုင်နှင့် Moon Sun စက်သုံးဆီအရောင်းဆိုင်များသို့ သွားရောက်၍ စက်သုံးဆီများအား အထူးစျေးနှုန်းဖြင့်ရောင်းချနေမှု အခြေအနေများ၊ စျေးနှုန်းများ၊ အချိန်အတွယ်ပမာဏများ ပြည့်စုံမှန်ကန်စွာ ရောင်းချမှုရှိစေရေး စျေးကွက်စောင့်ကြည့်စစ်ဆေးခြင်းများ ကွင်းဆင်းဆောင်ရွက်ခဲ့ပါသည်။

             ထိုသို့ ကွင်းဆင်းဆောင်ရွက်ရာတွင် အဆိုပါ စက်သုံးဆီအရောင်းဆိုင်များအနေဖြင့် နိုင်ငံတော်ဗဟိုဘဏ်က ရည်ညွှန်းစျေးနှုန်းဖြင့် ရောင်းချပေးသည့် အမေရိကန်ဒေါ်လာဖြင့် ပြည်ပမှတင်သွင်းသော စက်သုံးဆီများအား သတ်မှတ်စျေးနှုန်းများအတိုင်းရောင်းချစေရေး၊ ပြည်သူလူထုလက်ဝယ်သို့ အမှန်တကယ် ရောင်းချစေရေး၊ သတ်မှတ်စျေးနှုန်းများအတိုင်း ရောင်းချစေရေး/အခြင်အတွယ်များ မှန်ကန်စွာရောင်းချစေရေး၊ ယာဉ်တစ်စီးချင်းအလိုက် ကုမ္ပဏီသတ်မှတ်ထားသည့်အတိုင်း ရောင်းချနေသည်။ သို့သော်လည်း ရောင်းချခွင့်ရရှိသည့် စက်သုံးဆီပမာဏအတိုင်း အမှန်တကယ်ရောင်းချစေရေး၊ အများပြည်သူသိရှိစေရန်အတွက် အထူးစျေးနှုန်း ဆိုင်းဘုတ်များကို ဆိုင်ရှေ့မျက်နှာစာများတွင် မြင်သာထင်သာအောင်ချိတ်ဆွဲထားစေရေးစသည်များအား အဓိကထား စစ်ဆေးခဲ့ကြောင်း သိရှိရပါသည်။

DOCA(မန္တလေး)