သတင်းနှင့် လှုပ်ရှားမှုများ

      နှစ်(၅၀)ပြည့် ရွှေရတုမွန်ပြည်နယ်နေ့အထိမ်းအမှတ်ပြခန်းများကို မော်လမြိုင်မြို့၊ သမိန်ဗရမ်းကွင်း၌ မတ်လ(၁၇)ရက်နေ့မှ (၁၉)ရက်နေ့ထိ (၃)ရက်တိုင်တိုင် ဖွင့်လှစ်ပြသရာ စားသုံးသူရေးရာ ဦးစီးဌာနနှင့် မြန်မာကုန်သွယ်မှုမြှင့်တင်ရေးအဖွဲ့တို့ ပူးပေါင်းပါဝင်ပြသခဲ့ကြသည်။

     စားသုံးသူရေးရာဦးစီးဌာနပြခန်းတွင် ဌာနနှင့်ပတ်သက်သော လက်ကမ်းစာစောင်များ၊ ဥပဒေ၊ နည်းဥပဒေစာအုပ်များ၊ မြန်မာကုန်သွယ်မှုမြှင့်တင်ရေးအဖွဲ့မှ ပြည်ပဈေးကွက် အလား အလာရှိသော ဒေသထွက်ကုန်များ၊ အိန္ဒိယနှင့်တရုတ်နိုင်ငံများသို့ တင်ပို့ရန် ကြိုးစားနေသော ကွမ်းသီးခြောက်နှင့် ကွမ်းသီးနုပေါင်းများ၊ တရုတ်နိုင်ငံသို့ တင်ပို့နေသော ဝဥထုတ်ကုန်များ ပြသ ခဲ့ကြောင်း သိရှိရပါသည်။

   မွန်ပြည်နယ်နေ့အထိမ်းအမှတ်ပြခန်းများတွင်  ဌာနဆိုင်ရာပြခန်းများ၊ ဒေသထွက်ကုန် ပြခန်းများ၊ ဒေသထွက်သစ်သီးဝလံပြခန်းများ၊ MSMEs ထုတ်ကုန်အရောင်းပြခန်းများ၊ မွန်ရိုးရာ စားသောက်ဆိုင်များ ပါဝင်ပြသခဲ့ရာ အဆိုပါပြခန်းများသို့ နိုင်ငံတော်အကြီးအကဲများ လာရောက်ကြည့်ရှုအားပေးခဲ့ကြသည်။

    နှစ် (၅၀) ပြည့်ရွှေရတု မွန်ပြည်နယ်နေ့တွင် ပြခန်းများ ပြသခြင်းအပြင် ကလေးကစားကွင်းများ၊ ဇာတ်ပွဲသဘင်များ၊ ဖျော်ဖြေပွဲများဖြင့် စည်ကားသိုက်မြိုက်စွာကျင်းပခဲ့ရာ လာရောက်ကြည့်ရှုသူများဖြင့် စည်ကားလျက်ရှိကြောင်း သိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူးနှင့်ဝန်ထမ်းများသည် ကမ္ဘာ့စားသုံးသူအခွင့်အရေးများနေ့အား ဂုဏ်ပြုသောအားဖြင့် (၁၅.၃.၂၀၂၄)ရက်နေ့၊ နံနက်(၀၉:၀၀)အချိန်တွင် ပခုက္ကူပညာရေး ဒီဂရီ ကောလိပ်သို့ သွားရောက်၍ ကမ္ဘာ့စားသုံးသူအခွင့်အရေးများနေ့အကြောင်း သိကောင်းစရာများ အား အသိပညာပေးဟောပြောပွဲ ကျင်းပပြုလုပ်ခဲ့ရာ အခမ်းအနားသို့ ဆရာ၊ ဆရာမ(၃၅)ဦး၊ သင်တန်း သူ၊ သင်တန်းသား (၄၀၅)ဦး၊ စုစုပေါင်း (၄၄၀)ဦး တက်ရောက်ခဲ့ကြောင်း သိရှိရပါသည်။

    ခရိုင်ဦးစီးမှူး ဦးဝေဠုအောင်က ဆွေးနွေးရာတွင် ဌာန၏သမိုင်းကြောင်းနှင့်  လုပ်ငန်း ဆောင် ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ  စားသုံးသူကာကွယ်ရေးဥပဒေပါ အကြောင်းအရာများ၊ ကမ္ဘာ့စားသုံးသူအခွင့်အရေးများနေ့ ဖြစ်ပေါ်လာပုံ၊ ၂၀၁၆ ခုနှစ်မှစ၍ နှစ်စဉ် ကျင်းပခဲ့ သည့် မြို့ကြီးများနှင့် ဆောင်ပုဒ်များအကြောင်းနှင့် ယနေ့ကျရောက်သော ၂၀၂၄ခုနှစ် ဆောင်ပုဒ်မှာ "မျှတအလေးမူ တာဝန်ယူ၊ စားသုံးသူအကျိုးပြု ဉာဏ်ရည်တု"ဖြစ်ကြောင်း ကျယ်ကျယ်ပြန့်ပြန့် သိရှိစေရန် အသိပညာပေး ဆွေးနွေးဟောပြောခြင်းနှင့် စားသုံးသူအခွင့်အရေးနှင့် တာဝန်များအကြောင်း၊ စားသုံးသူနစ်နာဆုံးရှုံးမှုများအတွက် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက် ရေးစင်တာ(CICC) ဖွင့်လှစ်ထားရှိကြောင်း အသေးစိတ်ရှင်းလင်းဆွေးနွေးခဲ့ပြီး စားသုံးသူထိခိုက် နစ်နာမှုနှင့်စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများ နှင့် နည်းလမ်းများအကြောင်း၊ စားသုံးသူရေးရာ ကိစ္စများစုံစမ်းမေးမြန်းရန်အတွက် Consumer Call Center (၁၅၃၅) အား ဖွင့်လှစ်ထားကြောင်း၊  အနာဂတ်တွင် ကောင်းမွန်သာယာသောဘဝ၌ နေထိုင်နိုင်ရန်အတွက် စားသုံးသူများ၊ စီးပွားရေးလုပ်ငန်းရှင်များ၊ ဌာနဆိုင်ရာများ၊ NGO ၊ INGO  အသင်းအဖွဲ့ များအားလုံး ဝိုင်းဝန်းပူးပေါင်းဆောင်ရွက်သွားရန် လိုအပ်ကြောင်း၊ Power Point ဖြင့် ကျယ်ကျယ်ပြန့်ပြန့်ဆွေးနွေးခဲ့ပါသည်။

     ထို့နောက် စားသုံးသူရေးရာဦးစီးဌာနမှ လုပ်ငန်းဆောင်ရွက်မှုမှတ်တမ်း Video Clip အား ပြသခြင်းနှင့် အမေးအဖြေကဏ္ဍတွင် မေးခွန်းများမေးမြန်းပြီး ဖြေဆိုနိုင်သူများအား အမှတ်တရ လက်ဆောင်ပစ္စည်းများ ပေးအပ်ခဲ့ပြီး ကျောင်းအုပ်ထံသို့လည်း စားသုံးသူကာကွယ်ရေးဥပဒေစာအုပ်နှင့် ကမ္ဘာ့စားသုံးသူအခွင့်အရေးများနေ့ လက်ကမ်းစာစောင်များကို ပေးအပ်ခဲ့ကြောင်း သိရှိရပါသည်။

DOCA(မကွေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူ များ ကုန်စည်နှင့်ဝန်ဆောင်မှုများ အသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှု ရှိစေရေးကို အစဉ်တစိုက် ဆောင်ရွက်လျက်ရှိသကဲသို့ နယ်ပယ်အစုံ၊ အသက်အရွယ်အစုံ၊ အလွှာအုပ်စု အစုံရှိ ပြည်သူအများ စားသုံးသူရေးရာကိစ္စရပ်များနှင့်ပတ်သက်၍ အသိပညာ၊ ဗဟုသုတများ တိုးပွားစေရေးအတွက်လည်း ဟောပြောပွဲများ ကျင်းပဆောင်ရွက်လျက်ရှိပါသည်။

     စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင်ဦးစီးရုံးမှ ချောင်းဦးမြို့နယ် တာဝန်ခံ ဒေါ်ဇင်မာနွယ်(ဦးစီးမှူး)သည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ (၁၁.၃.၂၀၂၄)ရက်နေ့၊ နေ့လယ်(၁၃:၀၀)နာရီအချိန်တွင် ၎င်းဌာနရှိ လူထုအခြေပြုဗဟိုဌာန (Community Center) ခန်းမ၌ ကမ္ဘာ့စားသုံးသူအခွင့်အရေးများနေ့အထိမ်းအမှတ် အသိပညာပေး Talk Show ကျင်းပပြုလုပ်ခဲ့ပါသည်။

       အဆိုပါ Talk Show တွင် ကမ္ဘာ့စားသုံးသူအခွင့်အရေးများနေ့ စတင်ဖြစ်ပေါ်လာပုံ၊ မြန်မာ နိုင်ငံတွင် ကမ္ဘာ့စားသုံးသူအခွင့်အရေးများနေ့ စတင်ကျင်းပခဲ့သည့်ခုနှစ်၊ ကျင်းပခဲ့သည့်နေရာနှင့် ဆောင်ပုဒ်များ၊ နှစ်စဉ်ကျင်းပခဲ့သည့် ခုနှစ်၊ နေရာနှင့်ဆောင်ပုဒ်များ၊ ၂၀၂၄ ခုနှစ် မတ်လ(၁၅)ရက်နေ့ တွင် ကျရောက်မည့် ကမ္ဘာ့စားသုံးသူအခွင့်အရေးများနေ့ ဆောင်ပုဒ်နှင့် ဆောင်ပုဒ်ရည်ရွယ်ချက်များ၊ ဆောင်ပုဒ်ပါ AI ၏ အဓိပ္ပာယ်ဖွင့်ဆိုချက်များ၊ AI နည်းပညာ၏ အားသာချက်၊ အားနည်းချက်များ၊ စစ်ကိုင်းတိုင်းဒေသကြီးတွင် ကျင်းပပြုလုပ်မည့် အခမ်းအနားအစီအစဉ်များ စသည့် အကြောင်းအရာ များကို အကျယ်တဝင့် ဆွေးနွေးခဲ့ကြကြောင်း သတင်းရရှိပါသည်။

         မြို့သစ်ရပ်ကွက်ရှိ လူသုံးကုန်ပစ္စည်း အရောင်းဆိုင်များ၊ စတိုးဆိုင်များသို့ ဈေးကွက်စောင့်ကြည့် စစ်ဆေးခဲ့ကြောင်း သတင်းရရှိပါသည်။

        ထိုသို့ဆောင်ရွက်ရာတွင် မုံရွာမြို့၊ မြို့သစ်ရပ်ကွက်ရှိ လူသုံးကုန်၊ စားသောက်ကုန်ပစ္စည်း အရောင်းဆိုင်များနှင့် စတိုးဆိုင်များတွင်  ကုန်အညွှန်းအမှတ်အသားနှင့် ပြည့်စုံမှုမရှိသော ကုန်စည်များ ရောင်းချနေခြင်း ရှိ/မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏ တာဝန်များနှင့် ကုန်အညွှန်းအမှတ်အသား ပြည့်စုံမှုမရှိသော ကုန်စည်များအား တင်သွင်းရောင်းချခြင်း မပြုကြရန် ပြောကြားခဲ့ပြီး လက်ကမ်းစာစောင်များ ပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)

       ၂၀၂၄ ခုနှစ်၊ မတ်လ ၁၉ ရက်‌နေ့၊ နံနက် (၀၉:၀၀)နာရီ အချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊     ရေးလမ်းရှိ ရွှေမြင့်မိုရ် ယာဉ်ရပ်နားစခန်းသို့ မြန်မာနိုင်ငံဆီကုန်သည်များနှင့်   ဆီလုပ်ငန်းရှင်များအသင်းမှ ထားဝယ်ခရိုင်ဆီ ကုန်သည်များနှင့် ဆီလုပ်ငန်းရှင်များအသင်းသို့ ယာဉ်မောင်း ဦးယဉ်ထွေး၊  ယာဉ်အမှတ် 9K/7917၊ FUSO မော်တော်ယာဉ်ဖြင့်   တင်ဆောင်လာသော စားအုန်းဆီ ၁ ပေပါလျှင်ပိသာ ( ၁၁၀)     ပါသည့် စားအုန်းဆီ ၉၃ ပေပါသည် ရောက်ရှိလာခဲ့သဖြင့် တိုင်းဒေသကြီးစားသုံးသူရေးရာဦးစီးမှူး ဦးစိုးဦးနှင့် တာဝန်ရှိသူများကသွားရောက်စစ်ဆေးခဲ့ပါသည်။ အဆိုပါ စားအုန်းဆီ ၉၃ ပေပါအား   ထားဝယ်မြို့၊ အိုးလုပ်ရပ်ကွက်၊ နိဗ္ဗာန်လမ်းရှိ ဦးဘိုသစ်၏ ယမုံလှိုင်ကုန်စုံဆိုင်အပါအဝင် အထိုင်ရောင်းချနေသည့် ဆီဆိုင် (၁၄) ဆိုင်တို့မှ သတ်မှတ်ရည်ညွှန်း ဈေးအတိုင်း ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

    ဧရာဝတီတိုင်းဒေသကြီး ၊ ဖျာပုံခရိုင်၊ ဘိုကလေးမြို့နယ် စားသုံးသူရေးရာဦးစီးဌာနမှ မြို့နယ် တာဝန်ခံနှင့် ဝန်ထမ်းတို့သည် ၂၀၂၄ခုနှစ်၊ မတ်(၁၄)ရက်နေ့၊ နေ့လယ်(၁၃:၀၀)အချိန်တွင် ဘိုကလေးမြို့(၁)ရပ်ကွက် ဗိုလ်ဗထူးလမ်း “မိုး” သုံးထောင့်မုန့်လုပ်ငန်းရှိ လုပ်သား(၅)ဦးအား စားသုံးသူကာကွယ်ရေးအသိပညာပေးဟောပြောခြင်းကို ဆောင်ရွက်ခဲ့ပါသည်။

    အဆိုပါ အသိပညာပေးဟောပြောပွဲတွင် စားသုံးသူကာကွယ်ရေးဥပဒေနှင့်ပတ်သက်၍ စားသုံးသူများ လုံခြုံစိတ်ချရမှုရှိစေရေး၊ စားသုံးသူအခွင့်အရေးနှင့် တာဝန်များ၊ စားသုံးသူများအနေဖြင့် ကုန်စည်နှင့်ဝန်ဆောင်မှုများဝယ်ယူခြင်းမပြုမီ သတိပြုဆောင်ရွက်ရမည့်အချက်များ၊ စားသုံးသူက  တောင်းဆိုနိုင်သည့်အခွင့်အရေးများ ၊ မည့်သည့်စီးပွားရေးလုပ်ငန်းရှင်မဆို ကုန်အညွှန်း အမှတ်အသား  ဖော်ပြခြင်းနှင့်စပ်လျဉ်း၍ ကုန်စည်အမျိုးအစားလိုက်သတ်မှတ်များနှင့်အညီ သိသာ ထင်ရှားစွာဖော်ပြ ဖော်ပြရမည့်အချက်များ၊ မိမိတို့ဌာနအနေဖြင့် စားသုံးသူများဘေးအန္တရာယ် ကင်းရှင်းပြီး လုံခြုံစိတ်ချရမှုရှိသည့် အရည်အသွေးမီကုန်စည်များကိုသာ သုံးစွဲနိုင်ရေးအတွက် ဆောင်ရွက်လျက်ရှိကြောင်း၊ စားသုံးသူနစ်နာဆုံးရုံးမှု တစ်စုံတစ်ရာဖြစ်ပေါ်လာပါက လူကိုယ်တိုင် လည်းကောင်း ၊  သက်ဆိုင်ရာဦးစီးမှူးရုံးသို့  သက်သေခံအထောက်အထားနှင့်အတူ   တိုင်ကြားနိုင် ကြောင်းနှင့် Call Center  1535 သို့ ဆက်သွယ်တိုင်ကြားနိုင်ကြောင်း ရှင်းလင်းဟောပြော ခဲ့ပါကြောင်း သတင်းရရှိပါသည်။   

DOCA(ဧရာဝတီ)