သတင်းနှင့် လှုပ်ရှားမှုများ

    ရန်ကုန်တိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးရုံး၏ ညွှန်ကြားချက်အရ ကော့မှူးမြို့နယ်အတွင်းရှိ ဆန်အရောင်းဆိုင်များနှင့် ဆန်စက်များမှ စပါးဝယ်ယူကြိတ်ခွဲဖြန့်ဖြူးရောင်းချနေမှုအခြေအနေနှင့် စည်ပင်သာယာမြို့မဈေးအတွင်း/အပြင်၊ ရပ်ကွက်ကျေးရွာများ၌ ဝယ်ယူဖြန့်ဖြူးလက်လီ/ လက်ကာရောင်းချလျက်ရှိသော ဆန်ဆိုင်များသို့ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်စည်ပင်သာယာရေးဦးစီးဌာနမှဝန်ထမ်းများ၊   စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ၂၀၂၄ခုနှစ်၊ မတ်လ (၁၀)ရက်နေ့၊ နေ့လယ်(၁၃:၀၀)နာရီအချိန်တွင် သွားရောက်ကွင်းဆင်းစစ်ဆေးခဲ့ကြောင်းသိရှိပါသည်။

     ထိုသို့ကွင်းဆင်းစစ်ဆေးရာတွင် လတ်တလောနိုင်ငံရေးဖြစ်စဉ်များအပေါ်  သတင်းမှားများကိုအခြေခံ၍ ပြည်တွင်းဆန်ဈေးနှုန်းများတည်ငြိမ်စေရန်အတွက် ဆောင်ရွက်ရမည့်သတင်းအရ စိစစ်ကြပ်မတ်ဆောင်ရွက်သွားရန် ညွှန်ကြားလာသဖြင့် ကော့မှူးမြို့နယ်အခြေအနေအရ ရေလမ်းကြောင်းဖြင့်မဟုတ်ဘဲ ဧရာဝတီတိုင်းဒေသကြီးဘက်မှ ကုန်းလမ်းကြောင်းဖြင့် ဝင်ရောက်လာသည့် ဆန်ကုန်တင်ယာဉ်များအား သက်ဆိုင်ရာခရိုင်၊ မြို့နယ်များအနေဖြင့် ဝင်ပေါက်ဂိတ်များတွင် ပူးပေါင်းအဖွဲ့ဖြင့်လည်းကောင်း၊ မြို့နယ်အတွင်းရှိ ဆန်စက်၊ သိုလှောင်ရုံများ၊ ဆန်နှင့် ဆန်ထွက်ပစ္စည်းအရောင်းဆိုင်များအား ဆန်ဈေးနှုန်းမြှင့်တင်စေရန်ရည်ရွယ်ချက်ဖြင့် သိုလှောင်ထားရှိမှုများမရှိစေရန် ပူးပေါင်းအဖွဲ့ဖြင့် ထမ္မနိုင်ကျေးရွာရှိ အောင်ချမ်းညွှန်းဆန်စက်၊ သုခပြည့်စုံ ဆန်စက်တို့တွင် ဆန်စပါးကြိတ်ခွဲဖြန့်ဖြူးရောင်းချနေမှုအခြေအနေများကိုစစ်ဆေးခဲ့ပြီး လုပ်ငန်းရှင်များအား ဆန်ဈေးနှုန်းများမတည်မငြိမ်ဖြစ်စေရန် ရည်ရွယ်ချက်ရှိရှိဖြင့် သိုလှောင်ဖြန့်ဖြူးရောင်းရောင်းချခြင်းများမပြုလုပ်ကြရန်လိုအပ်ကြောင်း၊ တွေ့ရှိပါက စားသုံးသူကာကွယ်ရေးဥပဒေနှင့်အညီ ထိရောက်စွာအရေးယူဆောင်ရွက်သွားမည်ဖြစ်ကြောင်း သိရှိလိုက်နာကြရန် ပြောကြားခဲ့မှုကိုသိရှိရပါသည်။

DOCA(ရန်ကုန်)

    မတ်ပဲသည် ဈေးကွက်ရရှိနေသော ဆောင်းသီးနှံတစ်ခုဖြစ်သည်။ မတ်ပဲကို စပါးရိတ်သိမ်းပြီး သီးထပ်သီးနှံအဖြစ်လည်း ကိုင်း၊ လယ်မြေများပေါ်တွင် စိုက်ပျိုးကြသည်။ ယခုအခါ မတ်ပဲများ စတင်ရိတ်သိမ်းနေပြီဖြစ်ပြီး ဈေးကွက်အားဖြင့် ဈေးကောင်းရနေသော ဆောင်းသီးနှံ တစ်ခုဖြစ်သည်။ မအူပင်မြို့နယ် တွင် ယခင်နှစ်က မတ်ပဲစိုက်ဧက ၆၁၁၈၈ ဧက စိုက်ပျိုးခဲ့ပြီး ယခုနှစ်တွင် ပိုမိုစိုက်ပျိုးနိုင်ကြောင်း သိရသည်။

    ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်အတွင်း မတ်ပဲများစတင် လှိုင်လှိုင်ထွက်ပေါ်နေပြီးဖြစ်သည်။ (၁၃.၃.၂၀၂၄) ရက်နေ့က မတ်ပဲ တစ်တင်းဈေးနှုန်းမှာ ၉၆၀၀၀ကျပ် ဈေးပေါက်နေပြီး ယခင်နှစ် အလားတူအချိန်တွင် မတ်ပဲဈေးနှုန်း ၆၀၀၀၀ကျပ်ဈေး ပေါက်ခဲ့သည်။ မအူပင်တွင် ကျေးရွာအုပ်စု (၈၈)အုပ်စုရှိပြီး လေးအိမ်တန်းကျေးရွာ၊ ရေလဲ၊ စွန်သိုက်၊ ငကျီးဂရက်  ကျေးရွာများတွင် တစ်ဧက လျှင် ယခုခုနှစ် မတ်ပဲ အထွက်နှုန်းမှာ တစ်ဧက ပျမ်းမျှ (၁၆) တင်းနှုန်းထွက်ဟု သိရပြီး မတ်ပဲများကို လှိုင်သာယာ၊ ရွှေပြည်သာ၊ ရွှေလင်ပန်း စက်မှုဇုန်များသို့ တင်ပို့ရောင်းချနေကြောင်း တောင်သူများထံမှ သိရပြီး၊ မတ်ပဲ အထွက်တိုးအောင် စိုက်ပျိုးလာနိုင်သည်နှင့်အမျှ တောင်သူများဝင်ငွေတိုးပြီး လူနေမှု အဆင့်မြင့်မားလာနိုင်ကြောင်း ကိုအကြံပြု ဆွေးနွေးခဲ့ကြောင်း သိရသည်။

DOCA(ဧရာဝတီ)

    (၁၃.၃.၂၀၂၄)ရက်နေ့ နံနက်(၁၁:၀၀)နာရီအချိန်က ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ခရိုင်ဦးစီးမှူး ဦးဇော်မင်းနှင့် ဝန်ထမ်းများသည် ပန်းတနော်မြို့နယ် စည်ပင်သာယာရေးအဖွဲ့၊ မြို့နယ်ရပ်ကွက်ကျေးရွာအုပ်ချုပ်ရေးမှူးတို့နှင့်အတူ ပန်းတနော်မြို့နယ် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် ပန်းတနော်အရှေ့ပိုင်းရပ်ကွက်ရှိ ကုန်မျိုးစုံရောင်းချသူ လုပ်ငန်းရှင် (၁၃)ဦးနှင့် တွေ့ဆုံကာ စားသုံးသူကာကွယ်ရေး အသိပညာပေးဟောပြောခဲ့ကြသည်။

     အဆိုပါဟောပြောမှုတွင် မအူပင်ခရိုင်ဦးစီးမှူးက လုပ်ငန်းရှင်များအား စားသုံးသူကာကွယ်ရေး ဥပဒေ (၂၀၁၉)ပါ အခန်း(၁၀)ပါ စီးပွားရေးလုပ်ငန်းရှင်လိုက်နာရမည့်တာဝန်များ၊ အခန်း(၁၈) ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ဖော်ပြရမည့် အချက်အလက်များအကြောင်းကို လုပ်ငန်းရှင်များအား ရှင်းလင်းပြီး၊ သက်ဆိုင်ရာဌာနတို့၏ အချိန်နှင့်တပြေးညီ တားမြစ်ထုတ်ပြန်ထားသော ကုန်စည်များကို ရောင်းချခြင်းမပြုရန်၊ ဌာနများ၏ ကုန်စည်၊ ဝန်ဆောင်မှုနှင့် စပ်လျဉ်းသည့် ညွှန်ကြားချက်များကို လိုက်နာဆောင်ရွက်ရန်၊ စားသုံးသူကာကွယ်ရေး လုပ်ငန်းစဉ်နှင့် ပတ်သက်၍ စီးပွားရေးလုပ်ငန်းရှင်များ အသေးစိတ် သိရှိလိုပါက Consumer Call Center 1535 သို့ ဆက်သွယ်မေးမြန်းနိုင််ပြီး၊ စားသုံးသူကာကွယ်ရေးဆိုင်ရာ လုပ်ငန်းစဉ်များ လှုပ်ရှားမှုဆိုင်ရာသတင်းများကို လေ့လာလိုပါက www.doca.gov.mm “စားသုံးသူရေးရာဦးစီးဌာန” website နှင့် Facebook page တွင် ဝင်ရောက်လေ့လာနိုင်ကြောင်းနှင့် လုပ်ငန်းရှင်များက သိရှိလိုသည်များ မေးမြန်းခဲ့၍ အပြန်အလှန်ဆွေးနွေးခဲ့ကြောင်း သိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး ၊ မအူပင်ခရိုင်၊ မအူပင်မြို့နယ်တွင် (၁၃-၃-၂၀၂၄)ရက်နေ့ ၊ နံနက် (၁၀:၀၀) နာရီအချိန်၌ အစား အသောက်နှင့် ဆေးဝါးကွပ်ကဲရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၏ အဖွဲ့ဝင်များနှင့်အတူ ဓနုဖြူမြို့နယ် ၊ အစားအသောက်နှင့် ဆေးဝါးကြီးကြပ်ကွပ်ကဲရေး ကော်မတီအဖွဲ့ဝင်များဖြစ်သည့် မြို့နယ်အထွေထွေအုပ်ချုပ်ရေးဦးစီးဌာန ၊ မြန်မာနိုင်ငံရဲတပ်ဖွဲ့ ၊ မြို့နယ်စည်ပင်သာယာရေးအဖွဲ့ ၊ မြို့နယ်ဥပဒေရုံးနှင့် စားသုံးသူရေးရာဦးစီးဌာနမှ အဖွဲ့ဝင်များပူးပေါင်း၍ ဓနုဖြူ မြို့နယ်အတွင်းရှိ ဆေးနှင့်ဆေးပစ္စည်းများလက်လီ၊ လက်ကားရောင်းချနေသော ဆေးဆိုင်များအား  ကွင်းဆင်းစစ်ဆေးခဲ့ပါသည်။

   ထိုသို့စစ်ဆေးရာတွင် ဆေးပစ္စည်းအရောင်းဆိုင်များ၌ လုပ်ငန်းလိုင်စင်ရှိ/မရှိ၊ ရောင်းချခွင့်လိုင်စင် ရှိ/မရှိနှင့် သက်တမ်းလွန် ဆေးဝါးများရောင်းချမှုရှိ/မရှိ ၊ သက်ဆိုင်ရာမှ ထုတ်ပြန်ထားသော သုံးစွဲရန်မသင့် ဆေးဝါးနှင့် အလှကုန်များရောင်းချနေမှုရှိ/မရှိ စစ်ဆေးခဲ့ပါသည်။ ဓနုဖြူမြို့နယ်၊စားသုံးသူရေးရာဦးစီးဌာနမှ စစ်ဆေးရေးတာဝန်ရှိသူမျာက မြန်မာနိုင်ငံစားသုံးသူကာကွယ်ရေးကော်မရှင်မှ ညွှန်ကြားချက်အမှတ် (၂/၂၀၁၉) ဖြင့် ထုတ်ပြန်ခဲ့ပြီး ၄င်းညွှန်ကြားချက်များတွင် ဆရာဝန်ညွှန်ကြားချက် မလိုသော အိမ်သုံးဆေးဝါး သောက်ဆေးအမျိုးမျိုးနှင့် လိမ်းဆေးအမျိုးမျိုး၊ အဟာရဖြည့်စွက်စာအမျိုးမျိုး၊ တိုင်းရင်းဆေး အမျိုးမျိုးတို့တွင် ကုန်အမှတ်တံဆိပ်၊ အမျိုးအမည် ၊ အရွယ်အစားအရေအတွက်နှင့် အသားတင်ပါဝင်မှု ပမာဏ ၊ ထားသို သိမ်းဆည်းပုံ အညွှန်း ၊ သုံးစွဲပုံနည်းလမ်း ၊ ဘေးထွက်ဆိုးကျိုး၊ ကြိုတင်သတိပေးချက်စသည့် ကုန်အညွှန်းအမှတ်အသား ဖော်ပြခြင်းဆိုင်ရာအချက်အလက်များအား မြန်မာဘာသာဖြင့် ပြည်စုံမှန်ကန်စွာဖော်ပြထားရန်လိုအပ်ကြောင်း၊ စားသုံးသူကာကွယ်ရေးဥပဒေပါ ကုန်အညွှန်း အမှတ်အသား ဖော်ပြခြင်းဆိုင်ရာ အချက်အလက်များ ပါဝင်မှုမရှိသော ကုန်စည်များရောင်းချပါက စားသုံးသူကာကွယ်ရေးဥပဒေအရ အရေးယူခံရနိုင်ကြောင်း ရှင်းလင်းပြောကြားခဲ့ပြီး မြို့နယ်အတွင်းရှိ ဆေးပစ္စည်းအရောင်းဆိုင် (၆)ဆိုင်အား စစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

     ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ ရန်ကုန်တောင်ပိုင်းခရိုင်ဦးစီးမှူးရုံးအောက်ရှိ ဒလမြို့နယ်အတွင်း စားသုံးသူပြည်သူများ စားအုန်းဆီအမျိုးမျိုးတို့ကို ဝယ်ယူစားသုံးရာတွင် ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရန်ရည်ရွယ်၍ ၂၀၂၄ခုနှစ်၊ မတ်လ(၈)ရက်နေ့၊ နံနက် (၁၁:၀၀) နာရီအချိန်တွင် စည်ပင်သာယာမြို့မဈေးအတွင်း/အပြင်ရှိ ကုန်ခြောက်ဆိုင်များသို့သွားရောက်၍ ဈေးကွက်ကွင်းဆင်းစစ်ဆေးခဲ့ကြပါသည်။

     ထိုသို့ကွင်းဆင်းစစ်ဆေးရာ၌ မြို့နယ်စည်ပင်သာယာဦးစီးဌာနမှ ဈေးတာဝန်ခံနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်း၍ ဒလမြို့နယ်၊ ကမာကဆစ်ရပ်ကွက်ရှိ စည်ပင်သာယာမြို့မဈေးအတွင်း/ အပြင်ရှိ ကုန်ခြောက်ဆိုင်နှင့် ကုန်စုံဆိုင်များသို့သွားရောက်ခဲ့ပြီး လုပ်ငန်းရှင်များနှင့်တွေ့ဆုံကာ မိမိတို့ဈေးဆိုင်များရှိ စားအုန်းဆီအမျိုးမျိုးပေါ်တွင် ကုန်အညွှန်းအမှတ်အသားဖော်ပြရာတွင် ကုန်ပစ္စည်း၏အမျိုးအမည်၊ အရွယ်အစား၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားသာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ပြည့်စုံစွာဖော်ပြထားခြင်းမရှိသော စားအုန်းဆီအမျိုးမျိုးတို့ကို ရောင်းချခြင်းမပြုလုပ်စေရန်နှင့် စံချိန်စံညွှန်းနှင့်ကိုက်ညီသော ကုန်ပစ္စည်းများကိုသာ ဝယ်ယူဖြန့်ဖြူးရောင်းချပေးကြရန်အတွက် စားသုံးသူဆိုင်ရာသိကောင်းစရာများကို အကြံပြုပြောကြားခဲ့ပြီး ဈေးကွက်ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)