သတင်းနှင့် လှုပ်ရှားမှုများ

     ကျိုက်လတ်မြို့နယ်၊ စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းများသည် ၂၀၂၄ခုနှစ်၊ မတ်လ (၅) ရက်နေ့၊ နေ့လယ် (၁၁:၃၀) အချိန်တွင် ကျိုက်လတ်မြို့၊ အမှတ် (၅) ရပ်ကွက်ရှိ ဇေယျာသိဒ္ဓိမင်္ဂလာ ဆန်စက်သို့ သွားရောက်၍ MSMEs လုပ်ငန်းများ ဖွံ့ဖြိုးတိုးတက်ရေး ကွင်းဆင်းစိစစ် ဆောင်ရွက်ခဲ့ပါသည်။

    ထိုသို့ ကွင်းဆင်းဆောင်ရွက်ရာတွင် ဆန်စက်၏ ကြိတ်ခွဲထုတ်လုပ်မှု၊ ဆန်စပါးအရည်အသွေး ပြည့်မီရေး၊အချိန်အတွယ်များ ပြည့်မီမှန်ကန်မှုရှိ/မရှိ၊ ဆန်စပါးဈေးနှုန်းဈေးကွက် အခြေအနေများ တည်ငြိမ်မှု ရှိ/မရှိ၊ ပုဂ္ဂလိက ကဏ္ဍဖွံ့ဖြိုးတိုးတက်ရေး၊ ခေတ်မှီစက်ကိရိယာ နည်းစနစ်သစ်များ ဖွံ့ဖြိုးတိုးတက်ရေး၊ ထုတ်ကုန်လုံခြုံစိတ်ချရမှုနှင့် MSMEs လုပ်ငန်းများ ဖွံ့ဖြိုးတိုးတက်ရေးတို့အတွက် ကွင်းဆင်းစိစစ်ခဲ့ကြပါသည်။ နည်းစနစ်သစ်များ ဖွံ့ဖြိုးတိုးတက်မှသာ ထုတ်ကုန်များ ပိုမိုထုတ်လုပ်နိုင်ပြီး ဈေးကွက်စီးပွားရေးစနစ် ကျယ်ပြန့်လာနိုင်ခြင်း၊ အလုပ်သမား မိသားစုများ စားဝတ်နေရေး ပြေလည်နိုင်စေခြင်း၊ စက်ရုံမှ ထွက်ရှိသည့် စွန့်ပစ်ပစ္စည်းများ စနစ်တကျ စွန့်ပစ်ထားခြင်း ရှိ/မရှိ ကွင်းဆင်းစိစစ်ခဲ့ကြောင်း သတင်းရရှိခဲ့ပါသည်။

DOCA(ဧရာဝတီ)

    ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ ညွှန်ကြားချက်အရ ခရိုင်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးသက်နိုင်ဝင်း၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဒုတိယဦးစီးမှူး ဒေါ်လဲ့လဲ့ဌေး၊ ကုန်သွယ်ရေးဦးစီးဌာနမှ လက်ထောက်ညွှန်ကြားရေးမှူး ဦးဦးသန့်၊ စိုက်ပျိူးရေးဦးစီးဌာနမှ ဦးစီးအရာရှိဒေါ်ဆွေဆွေမြင့်၊ မြန်မာ့ဆိပ်ကမ်းအာဏာပိုင်မှ ကြီးကြပ်ရေးမှူး ဦးဝင်းနိုင် အမှတ်(၃) ရေကြောင်းရဲကွပ်ကဲမှုအဖွဲ့ခွဲမှ ရဲမှူးအောင်ကျော်ထူးနှင့်   အကောက်ခွန်ဦးစီးဌာနမှ အကောက်ခွန်မှူး ဦးအောင်နိုင်ဦးတို့ပါဝင်သော အဖွဲ့များသည် (၄-၃-၂၀၂၄) ရက်နေ့၊ နံနက် (၁၀:၀၀)နာရီအချိန်တွင် သာကေတမြို့နယ်ရှိ ( 5 Star ) ဆိပ်ကမ်းအား သွားရောက်စစ်ဆေးခဲ့ကြောင်းသိရှိရပါသည်။

      အဆိုပါ (5Star) ဆိပ်ကမ်းတွင် ဆိုက်ကပ်ထားသော MV, Royal Seven  ရေယာဉ်ဖြင့် ရန်ကုန်မြို့မှ ကော့သောင်းမြို့သို့ပို့ဆောင်မည့် ပြောင်း (Yellow Maize Corn) များကိုစစ်ဆေးခြင်းဖြစ်ရာ (Yellow Maize Corn) သည် ကုန်သွယ်ရေးဦးစီးဌာနမှ ပို့ကုန်လိုင်စင်နှင့် သက်ဆိုင်ရာဌာနများ၏ ထောက်ခံချက်များကိုရယူထားကြောင်း စိစစ်တွေ့ရှိခဲ့သဖြင့် တရားဝင်ကုန်စည်များသာဖြစ်ကြောင်းနှင့် အဆိုပါကုန်ပစ္စည်းများကို Yazar Min Industry Co., Ltd မှ ကော့သောင်းမြို့သို့ တင်ပို့ခြင်းဖြစ်ကြောင်းသိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး၏လမ်းညွှန်မှာကြားချက်အရ၊ တိုင်းဒေသကြီးကွပ်ကဲမှုအောက်ရှိ ခရိုင်ဦးစီးမှူးရုံးများအနေဖြင့် ခရိုင်အတွင်းမြို့နယ်များ တွင် ရောင်းချနေသောဘိလပ်မြေဆိုင်များတွင် ကုန်ပစ္စည်းလက်ကျန် အခြေအနေများကို သိရှိနိုင်ရန် မြေပြင်ကွင်းဆင်းစစ်ဆေးမှုများ ပြုလုပ်ခဲ့ကြောင်း သိရှိရပါသည်။

      ကွင်းဆင်းစစ်ဆေး ဆောင်ရွက်မှုများ ပြုလုပ်ရာတွင် ရန်ကုန်အရှေ့ပိုင်းခရိုင်ဦးစီး မှူးရုံးမှ စစ်ဆေးရေးမှူးများဖြစ်ကြသော ဒေါ်လဲ့လဲ့ဌေး (ဒု-ဦးစီးမှုး)နှင့် ဦးသိန်းထွန်း (ဌာနခွဲစာရေး)တို့သည် ၂.၃.၂၀၂၄ ရက်နေ့၊ နေ့လယ် (၁၄:၀၀) နာရီတွင် ဗိုလ်တထောင်ခရိုင်၊ မင်္ဂလာတောင်ညွှန့်မြို့နယ်အတွင်းရှိ အဲဗားဘိလပ်မြေအရောင်းဆိုင်နှင့် Pro One Home Center တို့တွင်လည်းကောင်း၊ ဒေါပုံမြို့နယ်ရှိ ဒေါ်လှခင်ဘိလပ်မြေအရောင်းဆိုင်တွင်လည်းကောင်း၊ သာကေတမြို့နယ်ရှိ ဒို့တာဝန်ဘိလပ်မြေအရောင်းဆိုင်တွင်လည်းကောင်း ဘိလပ်မြေရောင်းချမှု အခြေအနေတို့ကိုမေးမြန်းစုံစမ်းရာ ဘိလပ်မြေလက်ကျန်မရှိတော့ကြောင်း၊ ပစ္စည်းပြတ်လပ်သည်မှာ ၂ ရက် ၃ ရက်ရှိပြီဖြစ်ကြောင်း၊ ကျောက်ဆည်၊ မတ္တရာစသည့်မြို့နယ်များမှ တိုက်ရိုက်ပို့ပေးခြင်းဖြစ်ကြောင်း၊ ယခုအခါ နယ်အဝင်မရှိသေးကြောင်း သိရှိခဲ့ရပါသည်။

DOCA(ရန်ကုန်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ်တာဝန်ခံရုံးအနေဖြင့်  စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိရာ ၂၀၂၄ခုနှစ်၊ မတ်လ(၆)ရက်နေ့၊ နံနက် (၀၉း၀၀) နာရီအချိန်တွင် ကျွန်းလှမြို့ပေါ်ရပ်ကွက်အတွင်းရှိ ဆေးနှင့်ဆေးပစ္စည်းအရောင်းဆိုင်များအား  မြို့နယ်အထွေထွေအုပ်ချုပ်ရေးဦးစီးဌာနမှ ဒု-ဦးစီးမှူး ဒေါ်ယွန်းမီမီထွန်း၊ မြို့နယ်ရဲတပ်ဖွဲ့မှ ရဲမှူးလှဌေးနှင့်ဝန်ထမ်းများ၊ မြိုနယ်ကျန်းမာရေးဦးစီးဌာနမှ သားဖွားဆရာမများ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိ ဦးစိုးထိုက်၊ စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံ ဒေါ်ဝေဝေအောင်တို့ပူးပေါင်းကာ ဆေးနှင့်ဆေးပစ္စည်းအရောင်းဆိုင်(၄)ဆိုင်အား ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ကြပါသည်။

   ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံနှင့် တာဝန်ရှိသူများက ဌာန၏ ဆောင်ရွက်လျက်ရှိသော လုပ်ငန်းများအကြောင်း၊ ကိုဗစ်-၁၉ ကာကွယ်ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြုပစ္စည်းများ၊ ဆေးဝါးများအား ဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း(သို့မဟုတ်) ဈေးကစားရန်ရည်ရွယ်၍ သိုလှောင်ထားပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်မည်ဖြစ်ကြောင်း၊ စားသုံးသူအခွင့်အရေးနှင့် လိုက်နာဆောင်ရွက်ရမည့်တာဝန်များ၊ စီးပွားရေးလုပ်ငန်းရှင်၏တာဝန်များနှင့် ကျန်းမာရေးအထောက်အကူပြု အသုံးအဆောင်ပစ္စည်းအမျိုးမျိုး၊ ဆေးဝါးများနှင့်ပတ်သက်၍ ကုန်အညွှန်းအမှတ်အသားဖော်ပြရာတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉) ပါ လိုက်နာဆောင်ရွက်ရမည့်အချက်များအကြောင်း ဆွေးနွေးခြင်း၊ မြို့နယ်ကျန်းမာရေးဦးစီးဌာနမှ တရားမဝင်ဆေးဝါးများ၊ စံမညီဆေးဝါးများ၊ ဆေးဝါးအတုများ၊ စပ်ဆေးများ၊ သက်တမ်းလွန်ဆေးဝါးများရှိ/မရှိနှင့် ဆေးဝါးသိုလှောင်ထားသည်မျာကိုစစ်ဆေးခဲ့ပြီး ကျွန်းလှမြို့နယ်တာဝန်ခံက ညွှန်ကြားချက်အမှတ် (၂/၂၀၁၉)ပါ ကုန်အညွှန်းအမှတ်အသားပြည့်စုံစွာဖော်ပြရမည့် အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စားအုန်းဆီဖြန့်ဖြူးရေးစီမံခန့်ခွဲမှု Software နှင့်ပတ်သက်၍ ရှင်းလင်းပွဲ ၏ ပထမနေ့ဖွင့်ပွဲ အခမ်းအနားကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပဥ္စမထပ် အစည်းအဝေးခန်းမ တွင် (၄.၃.၂၀၂၄)ရက်နေ့က ကျင်းပပြုလုပ်ခဲ့ပါသည်။ (၃)ရက်တာ ကျင်းပပြုလုပ်သွားမည့် အခမ်းအနား၏ ပထမနေ့ဖွင့်ပွဲကို စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူး ဦးကျော်ကျော်လွင် နှင့် တာဝန်ရှိသူများ၊ မြို့နယ်အထွေထွေအုပ်ချုပ်ရေးဦးစီးဌာနမှ တာဝန်ရှိသူများ၊ မြို့တော်စည်ပင်သာယာရေးကော်မတီမှ တာဝန်ရှိသူများ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ တာဝန်ရှိသူများ၊ ဖိတ်ကြားထားသော ဆီကိုယ်စားလှယ် များ စုစုပေါင်း ၁၉၂ ဦး တက်ရောက်ခဲ့ကြပါသည်။

    အခမ်းအနားစတင်ချိန်တွင် စားသုံးသူရေးရာဦးစီးဌာန၏ ရန်ကုန်တိုင်းဒေသကြီးဦးစီးမှူးက အဖွင့်အမှာစကားပြောကြားခဲ့ပါသည်။ ဦးကျော်ကျော်လွင်က စားအုန်းဆီတင်သွင်းသိုလှောင် ဖြန့်ဖြူးရေးကြီးကြပ်မှုကော်မတီ၏ သတ်မှတ်ထားသည့် ဆီခွဲတမ်းများကို သက်ဆိုင်ရာပြည်နယ်နှင့် တိုင်းများကို တိတိကျကျရောက်ရှိစေရန်အတွက် Software စနစ်အကောင်အထည်ဖော်ခြင်း ဖြစ်ကြောင်းပြောကြားခဲ့ပါသည်။ ထို့နောက် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၊ ဥက္ကဌ ဦးဆန်းလင်းက အသင်းအနေနှင့် တစ်နိုင်ငံလုံးစားအုန်းဆီ မပြတ်လပ်စေရန် စီစဉ်ဆောင်ရွက်လျက်ရှိကြောင်းနှင့် အသင်းသားများအနေနှင့် နိုင်ငံတော်က သတ်မှတ်ထား သည့် သင့်တင့်မျှတသော အကျိုးအမြတ်ကိုသာရယူ၍ ဖြန့်ဖြူးရောင်းချရန် တိုက်တွန်းပြောကြား ခဲ့ပါသည်။

  ထို့နောက် Capital Connect Company Limited. မှ Product Manager ဒေါ်မြင့်သူဇာက စားသုံးဆီဖြန့်ဖြူးရေးစီမံခန့်ခွဲမှု Software စနစ်၏ ရည်ရွယ်ချက်၊ စနစ်၏ စီမံဆောင်ရွက်နိုင်မှုများ၊ စနစ်အသုံးပြုခြင်းကြောင့် ရရှိနိုင်မည့် အားသာချက်များနှင့် စနစ်၏ လုပ်ဆောင်ပုံတို့ကို ရှင်းလင်းပြောကြားခဲ့ပါသည်။ ထို့နောက်အခမ်းအနားတက်ရောက် လာသူများက သိလိုသည်များကို မေးမြန်းခဲ့ကြပြီး Capital Connect Company Limited. မှ Chief Technology Officer ဦးကျော်ဖြိုးသက်နှင့် တိုင်းဒေသကြီးဦးစီးမှူး ဦးကျော်ကျော်လွင် တို့က ပြန်လည်ရှင်းလင်းပြောကြားပေးခဲ့ကာ အခမ်းအနားအောင်မြင်စွာ ပြီးမြောက်ခဲ့ပါသည်။

DOCA(ရန်ကုန်)