သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်ဦးစီးမှူးရုံးမှ ဝန်ထမ်းများသည် (၇.၃.၂၀၂၄)ရက်နေ့ နံနက်(၁၀း၃၀)အချိန်တွင် တိုင်းဒေသကြီးဦးစီးမှူး၊ ခရိုင်ဦးစီးမှူးတို့၏ လမ်းညွှန် မှုဖြင့် ခရိုင်/မြို့နယ် မိတ်ဖက်ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ ကျန်းမာရေးဦးစီးဌာန၊ တိုင်း/ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ဈေးကွက်အတွင်း ဆေးဝါး ပစ္စည်းများဈေးနှုန်းမြင့်တင်ရောင်းချမှုမရှိစေရေး၊ ဈေးကစားခြင်းနှင့် ဆေး၀ါးပစ္စည်းများ ပြတ်လတ်မှု ရှိ၊ မရှိနှင့် ဖြစ်သင့်ဖြစ်ထိုက်သည့်ဈေးနှုန်းများထက် ပိုမိုရောင်းချမှုမရှိစေရေး ကွင်းဆင်းစစ်ဆေးလေ့လာ ခဲ့ပါသည်။

     သရက်မြို့နယ်အတွင်းရှိ ဆေးနှင့်ဆေးပစ္စည်းအရောင်းဆိုင် (၆)ဆိုင်တို့ကို ကွင်းဆင်းစစ်ဆေး လေ့လာရာတွင် ကျန်းမာရေးဦးစီးဌာန၊ တိုင်း/ခရိုင်အစားအသောက်နှင့် ဆေးဝါးကွပ်ကဲရေးဦးစီး ဌာနမှ ဆေးဆိုင်ပိုင်ရှင်များအား ဆေးများအား စနစ်တကျ ထားရှိရန်၊ သန့်ရှင်းမှုကိုအလေးထားရန်၊ တိုင်းရင်း ဆေးနှင့် နိုင်ငံခြားဆေးများကို အတူတကွထားရှိခြင်းမပြုရန် စစ်ဆေးပြောကြားပြီး၊ စားသုံးသူရေးရာဦးစီးဌာနမှ သက်တမ်းလွန်ဆေးဝါးများရောင်းချခြင်းမပြုရန်၊ ဖြစ်သင့်ဖြစ်ထိုက်သည့် ဈေးနှုန်းထက် ပိုမိုမြှင့်တင်ရောင်းချခြင်းမပြုရန်၊ ဈေးကစားရန်ရည်ရွယ်ချက်ဖြင့် ဆေးနှင့်‌ဆေးပစ္စည်း များသိုလှောင်ထားရှိ ခြင်းမရှိစေရန်နှင့် တရားဝင်မှတ်ပုံတင်ထားခြင်းမရှိသော ဆေးနှင့်ဆေးပစ္စည်းများအား ရောင်းချခြင်းမပြုရန် အသိပညာပေး ဆွေးနွေးပြောကြားပြီး ကျန်းမာရေးဦးစီးဌာနမှ သက်တမ်းလွန်ဆေးဝါးများ သုံးစွဲပါက စားသုံးသူများဘေးအန္တရာယ်ရှိပါကြောင်း ပြောကြားခဲ့ကြောင်း သိရှိရပါသည်။

DOCA(မကွေး)

       ပြည်တွင်း၌ စားနပ်ရိက္ခာဖူလုံရုံသာမက အခြားလူသုံးကုန်ပစ္စည်းများနှင့် စက်မှုလုပ်ငန်းသုံး ပစ္စည်းလည်းပြတ်လပ်မှုမရှိစေရေးအတွက် နိုင်ငံတော်မှ အလေးထားဆောင်ရွက်လျှက်ရှိသည့်အတွက် တနင်္သာရီတိုင်းဒေသကြီး၊ မြိတ်ခရိုင် စားသုံးသူရေးရာဦးစီးဌာနမှ ခေတ္တခရိုင်ဦးစီးမှူးနှင့် ဝန်ထမ်းများသည် ၂၀၂၄ ခုနှစ်၊ မတ်လ (၁၀)ရက်နေ့နှင့် (၁၂)ရက်နေ့၊ နံနက်(၀၉း၃၀)အချိန်တွင် မြိတ်မြို့ပေါ်ရှိ သောက်ရေသန့်စက်ရုံများနှင့် မုန့်တိုက်များသို့သွားရောက်၍ လုပ်ငန်းနှင့်စက်ရုံသုံး ကုန်ကြမ်းပစ္စည်းများ ပြတ်လပ်မှုရှိ/မရှိ သွားရောက်ကွင်းဆင်းစုံစမ်းခဲ့ကြပါသည်။

     ထိုသို့ကွင်းဆင်း စုံစမ်းချက်အရ မြိတ်မြို့ရှိသောက်ရေသန့်သုံး ကုန်ကြမ်းပစ္စည်းများ ပြတ်လပ်မှုမရှိကြောင်းနှင့် မုန့်လုပ်ငန်းများအတွက်လည်း ပစ္စည်းများ ပြတ်လပ်မှုမရှိသေးကြောင်း သိရှိခဲ့ရပြီး ကောင်းမွန်သောကျင့်စဉ်နှင့်အညီ ထုတ်လုပ်နိုင်ရေး၊ ကုန်အညွှန်း အမှတ်အသားပြည့်စုံစွာပါရှိရေးတို့ကို ပြောကြားခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

      မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ လူထုအခြေပြုဗဟိုဌာန Community Centre ခန်းမတွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း၍ ၁၁.၃.၂၀၂၄ ရက်နေ့တွင် စားသုံးသူတိုင်ကြားမှုအပေါ် ဖြေရှင်းဆောင်ရွက်ပုံအဆင့်ဆင့်နှင့် ပတ်သက်၍ အသိပညာပေး(Talk Show) ဆွေးနွေးပွဲကို ကျင်းပပြုလုပ်ခဲ့ကြောင်း သိရသည်။

          ဆွေးနွေးပွဲတွင် ချောင်းဆုံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်မိသူဇာက Talk Show ပြုလုပ်ရခြင်း၏ ရည်ရွယ်ချက်ကို ရှင်းလင်းပြောကြားပြီး စားသုံးသူရေးရာဦးစီးဌာနမှ အငယ်တန်းစာရေး ဒေါ်ယွန်းမီမီဖူးဝေက စားသုံးသူနစ်နာဆုံးရှုံးမှုဖြစ်လာလျှင် သက်ဆိုင်ရာဦးစီးမှူးရုံးသို့ တိုင်ကြားနိုင်ကြောင်း၊ စာဖြင့်ဖြစ်စေ၊ ဖုန်းဖြင့်ဖြစ်စေ၊ website မှ ဖြစ်စေ၊ call center 1535    ကို ဖုန်းခေါ်ဆို၍ဖြစ်စေ တိုင်ကြားနိုင်ကြောင်း၊ တိုင်ကြားလာမှုအပေါ်  စိစစ်ဆောင်ရွက်သည့်နည်းလမ်းများအကြောင်း၊ တိုင်ကြားမှုတစ်ခုအပေါ် စားသုံးသူနှင့် စီးပွားရေးလုပ်ငန်းရှင်တို့အကြား စေ့စပ်ညှိနှိုင်းဖြေရှင်းဆောင်ရွက်ပေးကြောင်း ရှင်းလင်းဆွေးနွေးခဲ့ပြီး စားသုံးသူကာကွယ်ရေးဥပဒေအကြောင်းများအား ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

     ၈.၃.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးခန်း၌ နှစ် (၅၀) ပြည့် မွန်ပြည်နယ်နေ့ ပြခန်းများတွင် စားသုံးသူရေးရာဦးစီးဌာနအနေဖြင့် ပါဝင်ပြသနိုင်ရေး လုပ်ငန်းညှိနှိုင်း အစည်းအဝေးကို ကျင်းပပြုလုပ်ခဲ့ရာ အဆိုပါ အစည်းအဝေးသို့ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူး၊ ဒုပြည်နယ်ဦးစီးမှူးနှင့် သက်ဆိုင်ရာဌာနခွဲတာဝန်ခံများ၊ မြန်မာကုန်သွယ်မှုမြှင့်တင်ရေးအဖွဲ့မှ ပြည်နယ်ဦးစီးမှူး၊ ကွမ်းသီးလုပ်ငန်းရှင်များနှင့် ဝဥလုပ်ငန်းရှင်များ တက်ရောက်ခဲ့သည်။

     အဆိုပါအစည်းအဝေးတွင် စားသုံးသူရေးရာဦးစီးဌာနနှင့် မြန်မာကုန်သွယ်မှု မြှင့်တင်ရေးအဖွဲ့တို့ ပူးပေါင်းပြသမည့်အပြင် ပြည်ပပို့ကုန်အလားအလာရှိသော ကွမ်းသီးနှင့် ဝဥများကို ပြခန်းတွင် ထည့်သွင်းပြသသွားမည်ဖြစ်ကြောင်း ဆွေးနွေး ခဲ့ပြီး ပြခန်းများ ပြင်ဆင်မည့်ကိစ္စရပ်များ၊ ကုန်ပစ္စည်းများ ခင်းကျင်းမည့်ကိစ္စများ၊ စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေမည့်ကိစ္စများ၊ ပြခန်းတာဝန်ချထားမည့်ကိစ္စများနှင့်စပ်လျဉ်း၍ ဆွေးနွေးခဲ့ကြောင်း သိရှိရပါသည်။

DOCA(မွန်)

     ၈.၃.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ပြည်နယ်ဦးစီးမှူးရုံးခန်း၌ မွန်ပြည်နယ် ကွမ်းသီးစိုက်ပျိုးထုတ်လုပ်တင်ပို့ရောင်းချသူများ အသင်းဥက္ကဋ္ဌနှင့် တွေ့ဆုံဆွေးနွေးခဲ့သည်။

    ထိုသို့ တွေ့ဆုံဆွေးနွေးရာတွင် ကွမ်းသီးများ ပြည်တွင်း၌ ရောင်းချမှုအခြေအနေ၊ ဝယ်ယူမှုအခြေအနေ၊ ဈေးနှုန်းအခြေအနေ၊ ပြည်ပတင်ပို့မှုအခြေအနေများအား ဆွေးနွေးခဲ့ရာ ကွမ်းသီးများအား ရေးမြို့နယ်၊ ကျိုက်မရောမြို့နယ်၊ မော်လမြိုင်မြို့နယ်တို့မှ ဝယ်ယူရရှိပြီး လက်ရှိအချိန်တွင် တစ်ပိဿာလျှင် ရေးကွမ်းသီး (၃၀၀၀) ကျပ်၊ မော်လမြိုင်ကွမ်းသီး   (၂၀၀၀) ကျပ်ဖြင့် ဝယ်ယူရရှိကြောင်း၊ ပြည်တွင်းဖြန့်ဖြူးမှုအနေဖြင့် မွန်ပြည်နယ်အတွင်းနှင့်  ရန်ကုန်၊ မန္တလေး၊ မုံရွာ ဒေသများသို့ တင်ပို့ရကြောင်း၊ ပြည်ပတင်ပို့မှုအနေဖြင့် အိန္ဒိယနိုင်ငံသို့ တင်ပို့လျက်ရှိပြီး ကွမ်းသီးနုများကို ကွမ်းသီးနုပေါင်းအဖြစ် တန်ဖိုးမြှင့်ထုတ်လုပ်ပြီး  တရုတ်နိုင်ငံသို့ တင်ပို့ရန် ကြိုးစားလျက်ရှိကြောင်း ဆွေးနွေးခဲ့ပါသည်။

DOCA(မွန်)