သတင်းနှင့် လှုပ်ရှားမှုများ

     ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးအနေဖြင့် စားသုံးသူပြည်သူများ ဘေးအန္တရာယ် ကင်းရှင်းပြီး ထုတ်ကုန်လုံခြုံစိတ်ချရမှုရှိစေရန်အတွက် စစ်ဆေးရေးမှူး ဒေါ်နှောင်းနှောင်းဝင်းသည် ၂၅.၁၁.၂၀၂၂ရက်နေ့ နံနက်၉း၀၃နာရီအချိန်တွင် ဗန်းမော်မြို့၊ ဆင်ကုန်းရပ်ကွက်ရှိ၊ ကုန်မျိုးစုံရောင်းချနေသည့် ကုန်စုံဆိုင်များအား စားသုံးသူကာကွယ်ရေးဥပဒေပါကုန်အညွှန်းအမှတ်အသားဖော်ပြခြင်းနှင့် ပတ်သက်၍ ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။ ထိုသို့ ဈေးကွက်စောင့်ကြည့်စစ်ဆေးရာတွင် ကုန်မျိုးစုံရောင်းချနေသည့် ဆိုင်များမှ No(1) အမှတ်တံဆိပ် ကုလားပဲအကျက်မုန့်နှင့် ရွှေလိပ်ပြာအမှတ်တံဆိပ် အကြော်မှုန့်တို့တွင် ကုန်အညွှန်း အမှတ်အသားပြည့်စုံစွာ ဖော်ပြထားရှိမှု ရှိ မရှိ စစ်ဆေးရာတွင် ပြည့်စုံမှုရှိကြောင်း တွေ့ရှိရပါသည်။ ထို့နောက် ကုန်မျိုးစုံဆိုင်ပိုင်ရှင်များအား စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်မှ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ(၄၁)၊ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားများကို မြန်ဘာသာဖြင့် ဖြစ်‌စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ဖော်ပြရမည်ဖြစ်ကြောင်းနှင့် ကုန်အညွှန်းအမှတ်အသားပြည့်စုံမှန်ကန်သော ကုန်စည်များကိုသာ ‌ဈေးကွက်အတွင်း ရောင်းချကြရန်ရှင်းလင်းဆွေးနွေးခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

       နိုင်ငံတော်အနေဖြင့် ပြည်တွင်းဆီစက်များကို အဆင့်မီစက်ပစ္စည်းများ တိုးချဲ့တပ်ဆင်ခြင်း၊ ခေတ်မီဆီစက်အသစ်များ ထပ်မံတည်ဆောက်ခြင်းနှင့် လက်ရှိဆီစက်များ အဆင့်မြှင့်တင်ခြင်းတို့ကို ဆောင်ရွက်နိုင်ရေးအတွက် ရင်းနှီးမြှုပ်နှံမှုလိုအပ်ချက်များကို ဖြည့်ဆည်းပေးရန်ရည်ရွယ်၍ ဆီစက်လုပ်ငန်းများကို ဆီစက်လုပ်ငန်းများဖွံ့ဖြိုးရေးချေးငွေ ထုတ်ချေးသွားရန် စီစဉ်ဆောင်ရွက်လျက်ရှိပါသည်။ သို့ဖြစ်ပါ၍ တိုင်းဒေသကြီး/ ပြည်နယ်/ ပြည်ထောင်စုနယ်မြေတို့ရှိ စိတ်ပါဝင်စားသော ဆီစက်လုပ်ငန်းရှင်များအနေဖြင့် ဆီစက်လုပ်ငန်းများဖွံ့ဖြိုးရေး ချေးငွေအဆိုပြုလွှာများအား အတွင်းရေးမှူး၊ ဆီစက်လုပ်ငန်းများ၏ ချေးငွေလိုအပ်ချက်ကို လေ့လာသုံးသပ်တင်ပြရေးအဖွဲ့ (ညွှန်ကြားရေးမှူးချုပ်၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ စက်မှုဝန်ကြီးဌာန၊ ရုံးအမှတ်-၃၇၊ နေပြည်တော်)၊ ဖုန်း-၀၆၇၃-၄၀၈၃၇၈၊ e-mail ( disidgoffice@ gmail.com ) သို့ လိပ်မူ၍ လူကိုယ်တိုင် (သို့မဟုတ်) အမြန်ချောဖြင့် ပေးပို့လျှောက်ထားနိုင်ပါသည်။ (လျှောက်လွှာနှင့်စပ်လျဉ်း၍ အသေးစိတ်သိရှိလိုပါက ဖုန်းနံပါတ် ၀၉-၄၀၁၆၃၂၇၄၀ သို့ ရုံးချိန်အတွင်း ဆက်သွယ်မေးမြန်းစုံစမ်းနိုင်ပါသည်။)

Source: SME Development Department,MOI

DOCA(ITQM)

         စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်ခင်သူဇာဝင်း၊ အားကစားနှင့်ကာယပညာဦးစီးဌာန၊ မြို့နယ်အားကစားမှူး ဒေါ်သူဇာထွေးတို့နှင့်အတူ နိုဝင်ဘာလ ၂၃ ရက်နေ့ မွန်းလွဲပိုင်းက တောင်ငူမြို့ အမှတ် ၁၀ ရပ်ကွက်ရှိ အုတ်ကျွတ် (၁) အခြေခံပညာအလယ်တန်းကျောင်းခွဲ၌ပြုလုပ်သည့် အသိပညာပေးဟောပြောပွဲတွင် စားသုံးသူကာကွယ်ရေးဆိုင်ရာ သိကောင်းစရာများကို ဟောပြောခဲ့ရာ ကျောင်းသားကျောင်းသူ ၉၂ ဦး တက်ရောက်ခဲ့ပါသည်။

            ထို့အတူ စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်နှင့် တောင်ငူမြို့နယ်တာဝန်ခံ ဦးစီးမှူး ဦးမြင့်သူတို့သည့် နိုဝင်ဘာလ ၂၄ ရက်နေ့ မွန်းလွဲပိုင်းတွင် တောင်ငူမြို့ အမှတ် ၁၂ ရပ်ကွက်ရှိ၊ ဇောင်ချမ်းတောင်  အခြေခံပညာမူလတန်းလွန်ကျောင်းတွင် ကျောင်းသား/ကျောင်းသူ ၈၀ ဦးတို့အား စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။

            ဟောပြောပွဲများတွင် စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူ၏အခွင့်အရေးနှင့်တာဝန်များ၊ စားသုံးသူရေးရာဦးစီးဌာန၏ဆောင်ရွက်ချက်များ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့်အကြောင်းများ၊ စားသုံးသူနစ်နာဆုံးရှုံးမှုများဖြစ်ပေါ်ပါက တိုင်ကြားနိုင်ခြင်းများကို အကျယ်တဝင့်ဟောပြောခဲ့ကြောင်း သိရှိရပါသည်။

DOCA(ပဲခူး)

      စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာကွယ်ရေးအသိပညာပေး ဟောပြောပွဲလုပ်ငန်းများ ဆောင်ရွက်ခြင်းနှင့် စားသုံးသူများဘေး အန္တရာယ်ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့် စစ်ဆေး ခြင်း လုပ်ငန်းများ လုပ်ဆောင်လျှက်ရှိပါသည်။ ၂၀၂၂ ခုနှစ်၊ နိုဝင်ဘာလ ၂၁ ရက်နေ့ နေ့လယ် (၁၃း၀၀) အချိန်တွင် စားသုံးသူရေးရာ ဦးစီးဌာန၊မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူး ဦးဇော်မင်းနှင့် ဝန်ထမ်းများသည် မိတ္ထီလာမြို့နယ်၊ Super 5 Superstore သို့သွားရောက်၍ စားသောက်ကုန်နှင့် မုန့်မျိုးစုံနှင့် လူသုံးကုန်တို့တွင် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ပြည့်စုံစွာ ထည့်သွင်းဖော်ပြခြင်းရှိ/မရှိ စျေးကွက် စောင့်ကြည့်စစ်ဆေးခဲ့ပါသည်။ ထိုသို့ဈေးကွက်စောင့်ကြည့်စစ်ဆေးခဲ့ရာတွင် ဆိုင်လုပ်ငန်းရှင်များအား လက်ရှိရောင်း ချနေ သော ကုန်စည်များတွင်ကုန်အညွှန်း အမှတ်အသားဖော်ပြချက်များကို စားသုံးသူကာကွယ်ရေး (၂၀၁၉) နှင့်အညီ မြန်မာဘာသာဖြင့် ထည့်သွင်းဖော်ပြလာစေရန်ရည်ရွယ်၍ စျေးကွက်စောင့်ကြည့် စစ်ဆေးခြင်းဖြစ်ကြောင်းနှင့် ၂၀၂၀ခုနှစ်၊မတ်လ(၁၆)ရက်နေ့မှစ၍ စတင်အာဏာသက်ရောက်နေပြီ ဖြစ်ကြောင်း၊ လုပ်ငန်းများအနေဖြင့် မိမိတို့ရောင်းချသည့် ကုန်စည်နှင့်ပတ်သတ်၍ ပါဝင်ရမည့် အမျိုးအမည်၊ အရွယ်အစား၊ အရေအတွက်(သို့) အသားတင်ပမာဏ၊ ထားသိုသိမ်းဆည်းပုံအညွှန်း၊ ဓါတ်မတည့်ကြောင်း‌ဖော်ပြချက်တို့ကို မြန်မာဘာသာဖြင့် မဖြစ်မနေထည့်သွင်း ဖော်ပြရမည် ဖြစ်ကြောင်း၊ အဆိုပါအချက်အလက်များပါဝင်သည့် စားသောက်ကုန်နှင့် မုန့်မျိုးစုံနှင့် လူသုံးကုန် များကိုသာ ရောင်းချသွားရန်နှင့် ကုန်အညွှန်းအမှတ်အသား ပြည့်စုံစွာမပါရှိပါက မည်သည့်စီးပွားရေး လုပ်ငန်းရှင်မဆို စားသုံးသူကာကွယ်ရေးဥပဒေ ပုဒ်မ (၇၃)အရ (၂)နှစ်ထက်မပိုသော ထောင်ဒဏ် ဖြစ်စေ ၊ ကျပ် သိန်း (၂၀၀)ထက် မပိုသော ငွေဒဏ်ဖြစ်စေ၊ ဒဏ်(၂)ရပ်လုံးဖြစ်စေ အရေးယူမှုများ ပြုလုပ်နိုင်ကြောင်း အသိပညာပေး ဆွေးနွေးပြောကြားခဲ့ပြီး ကုန်အညွှန်းအမှတ်အသားတပ်ဆင်ရန် နားမလည်၍ အခက်အခဲဖြစ်သော လုပ်ငန်းရှင်များရှိပါကစားသုံးသူရေးရာဦးစီးဌာနသို့ လာရောက် တိုင်ပင်ဆွေးနွေးနိုင်ကြောင်း၊ စီးပွားရေးလုပ်ငန်းရှင်များအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို သိရှိလိုပါ က DOCA Myanmar Application နှင့် စားသုံးသူရေးရာဦးစီးဌာန၏ Website www.doca.Gov.mm တွင် ဝင်ရောက်လေ့လာ တိုင်ကြားနိုင်သည်ကို ဆွေးနွေးပြောကြားခဲ့ပြီး လက်ကမ်းစာစောင်များအား ဖြန့်ဝေခဲ့ကြောင်း သိရှိရပါသည်။

DOCA(မန္တလေး)

        ပဲခူးတိုင်းဒေသကြီး၊ ပြည်ခရိုင်တွင် ၂၀၂၂-၂၀၂၃ ခုနှစ်တွင် မိုးစပါးစိုက်ဧက (၂၂၆၄၉၆) ဧက စိုက်ပျိုးပြီး ၃၈၇၁၆ ဧက ရိတ်သိမ်းပြီးဖြစ်ပါသည်။ မိုးစပါးအထွက်နှုန်းအနေဖြင့် (၈၀.၇၃) တင်းထွက်ရှိပြီး အထွက်တင်းမှာ ၃၁၂၅၆၃၅ တင်းထွက်ရှိပြီးဖြစ်ပါသည်။ ပြည်မြို့နယ်တွင် မိုးစပါးစိုက်ဧက ၇၄၆၄၂ ဧကတွင် ၄၇၀၅ ဧက ရိတ်သိမ်းပြီး တစ်ဧကအထွက်နှုန်းအနေဖြင့် ၈၃ တင်းကျော်ထွက်ရှိပါသည်။ ပေါက်ခေါင်းမြို့နယ်တွင် ၄၆၇၅၇ ဧက စိုက်ပျိုးထားရှိပြီး ယခုအချိန်အထိ ၂၄၁၄ ဧက ရိတ်သိမ်း၍ တစ်ဧကအထွက်နှုန်းအနေဖြင့် ၈၂ တင်းကျော်ထွက်ရှိပါသည်။ ရွှေတောင်မြို့နယ်တွင် မိုးစပါးစိုက်ဧက ၅၈၁၆၃ ဧကတွင် ၂၁၄၁၇ ဧက ရိတ်သိမ်းပြီး၍ တစ်ဧကလျှင် တင်း ၈၀ ခန့်ထွက်ရှိပါသည်။ ပန်းတောင်းမြို့နယ်တွင် ၄၆၉၃၄ ဧက စိုက်ပျိုး၍ ၁၀၁၈၀ ဧက ရိတ်သိမ်းပြီး တစ်ဧကအထွက်နှုန်းမှာ တင်း ၈၀ ကျော်ထွက်ရှိကြောင်း သိရှိရပါသည်။

       စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံနှင့်ဝန်ထမ်းများသည် (၂၂.၁၁.၂၀၂၂) ရက်နေ့ နံနက်ပိုင်းတွင် မိုးစပါးရိတ်သိမ်းနေသော နေရာသို့သွားရောက်၍ ကွင်းဆင်းလေ့လာခဲ့ရာ ပန်းတောင်းမြို့နယ်၊ ဝန်လိုရပ်ကွက်၊ စည်သာကွင်းတွင် မိုးစပါးစိုက်ပျိုးရိတ်သိမ်းသူ ဦးတင့်လွင်မှ မိုးစပါးစိုက်ဧက ၁၂ ဧကရှိပြီး ယခုအချိန်တွင်ရိတ်သိမ်းပြီးဖြစ်ပါသည်။ စိုက်ပျိုးသောစပါးမျိုးများမှာ မှော်ဘီစပါးမျိုးဖြစ်ပြီး တစ်ဧကလျှင် တင်း (၆၀) ခန့်ထွက်ရှိသည်ဟု သိရှိရပါသည်။ တစ်ဧကရိတ်သိမ်းခြွေလှေ့ခအနေဖြင့် (၈) သောင်းကျပ် ပေးချေရသည်ဟု သိရှိရပါသည်။ မိုးစပါးတစ်ဧကလျှင် စိုက်ပျိုးထုတ်လုပ်ကုန်ကျစရိတ်အနေဖြင့် ၂၈၀၀၀၀၀ ကျပ်ကျော်ကုန်ကျ၍ စပါးတင်း (၁၀၀) လျှင် ယခုပေါက်ဈေးမှာ ၁၂၅၀၀၀၀ ကျပ်ရရှိသည်ဟု သိရှိရပါသည်။ ထို့ကြောင့် တစ်ဧကဝင်ငွေမှာ ၇၅၀၀၀၀ ကျပ်ရရှိ၍ တစ်ဧကအကျိုးအမြတ်အနေဖြင့် ၄၇၀၀၀၀ ကျပ်ခန့်ရရှိသည်ဟု သိရှိရပါသည်။

        မိုးစပါးစိုက်ပျိုးသူတောင်သူများအနေဖြင့် စိုက်ပျိုးစရိတ်နှင့်သွင်းအားစုများ ဈေးမြင့်လာသော်လည်း စပါးဈေးများမြင့်တက်လာသဖြင့် တောင်သူများအဖို့ အကျိုးအမြတ်ရရှိသော်လည်း မိုးစပါးမှာ နွေစပါးလောက် အထွက်နှုန်းမများသဖြင့် အကျိုးအမြတ် ရသင့်သလောက် မရသော်ငြားလည်း တောင်သူများအတွက် တွက်ခြေကိုက်သည်ဟု သိရှိရပါသည်။

DOCA(ပဲခူး)