သတင်းနှင့် လှုပ်ရှားမှုများ

    ၂၀၂၀ ပြည့်နှစ်၊ ဖေဖော်ဝါရီလ(၄)ရက်နေ့တွင် စစ်ကိုင်းတိုင်းဒေသကြီး၊ ရွှေဘိုခရိုင်၊ ရေဦးမြို့နယ် စားသုံးသူရေးရာဦးစီးဌာန မြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင် သာယာရေးကော်မတီ၊ မြို့နယ်မွေးကုဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ် ပြန်ဆက်ဦးစီးဌာန၊ မြို့နယ်တိုင်းရင်းဆေးဦးစီးဌာန၊ မြို့နယ်မီးသတ်ဦးစီးဌာန၊ မြန်မာနိုင်ငံရဲတပ်ဖွဲ့၊ မြို့မစည်ပင်သာယာဈေး စားသုံးသူရေးရာအဖွဲ့၊ ရပ်ကွက်အုပ်ချုပ်ရေးမှူးများ ပါဝင်သော စုစုပေါင်း အင်အား(၁၃)ဦးပါ ပူးပေါင်းအဖွဲ့ဖြင့် ရေဦးမြို့မ စည်ပင်သာယာဈေးအတွင်း ရောင်းချနေသည့် လက္ကားကုန်စုံဆိုင်များ၌ ဈေးကွက်စောင့်ကြည့် စစ်ဆေးမှုများ ပြုလုပ်ခဲ့ပါသည်။

      စားသုံးသူရေးရာဦးစီးဌာန၊ မြို့နယ်တာဝန်ခံမှ ဆိုင်ပိုင်ရှင်များအနေဖြင့် ယင်းတို့၏ ကုန်ပစ္စည်းများအား ရောင်းချရာတွင် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များနှင့်အညီ ဖြောင့်မတ်မှန်ကန်စွာ ရောင်းချကြရန် မှာကြားခဲ့ပြီး စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်သောစာစောင်များအား ဆိုင်ရှင်များထံသို့ ဖြန့်ဝေပညာပေး ခဲ့ကြပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

      ဧရာတီတိုင်းဒေသကြီး၊ စားသုံးသူရေးရာကော်မတီ၏ ပထမအကြိမ် ၁/၂၀၂၀ အစည်းအဝေးကို ၂၈.၁.၂၀၂၀ ရက်နေ့တွင် ပုသိမ်မြို့၊ စားသုံးသူရေးရာဦးစီးဌာန၊ တိုင်းဦးစီးမှူးရုံး၌ ကျင်းပခဲ့ရာ ဧရာဝတီတိုင်းဒေသကြီးအစိုးရအဖွဲ့ စီမံကိန်းနှင့်ဘဏ္ဍာရေးဝန်ကြီးဌာနဝန်ကြီး တိုင်းဒေသကြီးစားသုံးသူရေးရာကော်မတီဥက္ကဌ ဦးဌေးဝင်း၊ ဒုက္ကဌ ဦးဝင်းမြင့်၊ အတွင်းရေးမှူး တိုင်းဦးစီးမှူး ဦးစိုးအောင်၊ စားသုံးသူရေးရာကော်မတီဝင်များ၊ ဒုတိုင်းဦးစီးမှူး၊ ဌာနခွဲမှူးများနှင့် ခရိုင်ဦးစီးမှူးများ စုစုပေါင်း (၂၁) ဦးတက်ရောက်ခဲ့ပါသည်။

          ရှေးဦးစွာ ဧရာဝတီတိုင်းဒေသကြီး၊ စားသုံးသူရေးရာကော်မတီဥက္ကဌ စီမံကိန်းနှင့်ဘဏ္ဍာရေးဝန်ကြီးဌာနဝန်ကြီး ဦးဌေးဝင်းက မြန်မာနိုင်ငံစားသုံးသူကာကွယ်ရေးကော်မရှင်ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးမှ ဥက္ကဌ အဖြစ်ပါဝင်၍ အဖွဲ့ဝင် (၂၁) ဦးဖြင့် ၃၀.၉.၂၀၁၉ ရက်နေ့တွင် ဖွဲ့စည်းခဲ့ပြီး  ဧရာဝတီတိုင်းဒေသကြီး စားသုံးသူရေးရာကော်မတီကိုလည်း ဖွဲ့စည်းခဲ့ပြီးဖြစ်ပါကြောင်း၊ စားသုံးသူကာကွယ်ရေးလုပ်ငန်းသည် အရေးကြီးပြီး ကျယ်ပြန့်စွာဆောင်ရွက်ရမှာဖြစ်သလို ယခုအခါ စားသုံးသူရေးရာကော်မတီများဖွဲ့စည်းပြီး ဖြစ်သည့်အတွက် စားသုံးသူကာကွယ်ရေးလုပ်ငန်းများကို ပိုမိုလျှင်မြန်စွာဆောင်ရွက်နိုင်မှာဖြစ်ကြောင်း စားသုံးသူကာကွယ်ရေးဥပဒေ အခန်း(၁၈)အရ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ၂၀၂၀ ပြည့်နှစ် မတ်လ(၁၆) ရက်နေ့တွင် စတင်အာဏာတည်မှာဖြစ်သည့်အတွက် စားသုံးသူများအနေဖြင့် မိမိတို့ပြည်တွင်းတွင်ထုတ်လုပ်သည့် ကုန်စည်များအပြင် ပြည်ပနိုင်ငံများမှ တင်သွင်းသည့် ကုန်စည်များကို ဝယ်ယူအသုံးပြုရာတွင် ဘေးအန္တရာယ် ကင်းရှင်းရန်လိုအပ်သလို စားသုံးသူကာကွယ်ရေး အသိပညာပေးလုပ်ငန်းများကို ထိရောက်သောနည်းလမ်းများဖြင့်် ဆောင်ရွက်ရမှာဖြစ်ပြီး ဆက်လက်ဆောင်ရွက်ရမည့်လုပ်ငန်းများကို ပူးပေါင်းဆောင်ရွက်ပေးကြပါရန် ပြောကြားခဲ့ပါသည်။

          ထို့နောက် စားသုံးသူရေးရာကော်မတီ အတွင်းရေးမှူး ဧရာဝတီတိုင်းဒေသကြီးဦးစီးမှူး ဦးစိုးအောင်(အတွင်းရေးမှူး)က တိုင်းစားသုံးသူရေးရာဦးစီးဌာန၏ လက်ရှိ စားသုံးသူကာကွယ်ရေးလုပ်ငန်း ဆောင်ရွက်နေမှုများ တိုင်ကြားမှုများကို လက်ခံဆောင်ရွက်ပေးမှုများနှင့် ကော်မတီသို့ အဆုံးအဖြတ်ပေးရန်နှင့်အတည်ပြုပေးရန် အချက်များအား တင်ပြခဲ့ပြီး ကော်မတီ၏ ရှေ့ဆက်ဆောင်ရွက်ရမည့် လုပ်ငန်းများအပေါ် တက်ရောက်လာသော ကော်မတီဝင်များမှ ဖြည့်စွက်ဆွေးနွေးခဲ့ကြပါသည်။

ဧရာတီတိုင်းဒေသကြီး
စားသုံးသူရေးရာဦးစီးဌာန

       ၂၉.၁.၂၀၂၀ ရက်နေ့ တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာန၊  စိုက်ပျိုးရေးဦးစီးဌာနနှင့် မြန်မာနိုင်ငံပြောင်း လုပ်ငန်းအသင်း တို့ပူးပေါင်း၍ အစေ့ထုတ်ပြောင်းသီးနှံကဏ္ဍဖွံ့ဖြိုးတိုးတက်ရေးအလုပ်ရုံဆွေးနွေးပွဲကို ဧရာဝတီတိုင်းဒေသကြီး၊ ဟင်္သာတခရိုင်၊ အင်္ဂပူမြို့နယ်၊ ညောင်ကျိုးအုပ်စု၊ နိဂြောဓာရုံကျောင်းတိုက် ဓမ္မဗိမာန်တော်၌ ကျင်းပပြုလုပ်ခဲ့ပြီး တောင်သူများနှင့် ဖိတ်ကြားထားသူများ စုစုပေါင်း (၂၆၈) ဦး တက်ရောက်ခဲ့ပါသည်။

          ရှေးဦးစွာ ဧရာဝတီတိုင်းဒေသကြီး စီမံကိန်းနှင့်ဘဏ္ဍာရေးဝန်ကြီး ဦးဌေးဝင်းက အစေ့ထုတ်ပြောင်းသီးနှံသည် ပြည်ပပို့ကုန် အလားအလာရှိသော သီးနှံဖြစ်သည့်အပြင် ထို‌ဒေသမှာ နှစ်စဉ် စိုက်ဧက တိုးတက်စိုက်ပျိုးနေသော သီးနှံဖြစ်သည့်အတွက် သီးနှံအလိုက်အသင်းအဖွဲ့ အစုအဖွဲ့ ဖွဲ့စည်းပြီးဆောင်ရွက်ခြင်းအားဖြင့် စိုက်ပျိုးနည်းပညာများ၊ ဈေးနှုန်းသတင်းများ၊ မျိုးကောင်းမျိုးသန့် စိုက်ပျိုးနိုင်ရေး တို့ကိုကျယ်ကျယ်ပြန့်ပြန့် သိရှိဆောင်ရွက်နိုင်မှာ ဖြစ်ပါကြောင်း၊ မိမိတို့ဒေသထုတ်ကုန်များကို ပြည်တွင်းဈေးကွက်သာမက ပြည်ပသို့ပါ တင်ပို့နိုင်ရေးအတွက် ယခုလို စိုက်ပျိုးရေးပညာ ရှင်များ၊ မျိုးစေ့ ကုမ္ပဏီများ လုပ်ငန်းရှင်များနှင့်တွေ့ဆုံနိုင်ရေးအတွက် အလုပ်ရုံဆွေးနွေးပွဲကို ကျင်းပရခြင်းဖြစ်ကြောင်း မိရိုးဖလာစိုက်ပျိုးနေသော စပါး/ပဲ တို့အပြင် အကျိုးအမြတ် ရရှိနိုင်သော အစေ့ထုတ်ပြောင်းသီးနှံကို ခေတ်မီနည်းစနစ်များအညီ စိုက်ပျိုးနိုင်ရေးနှင့် တောင်သူများအနေဖြင့် မိမိတို့သိလိုသည်များကို သက်ဆိုင်ရာဌာနမှ ပညာရှင်များနှင့် ဆွေးနွေးကြရန် တိုက်တွန်းခဲ့ပါသည်။

          ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာန ဒုတိယညွှန်ကြားရေးမှူးချုပ် ဦးအောင်မောင်းက ဝန်ကြီးဌာနအောက်ရှိ ဦးစီးဌာနများ၏ လုပ်ငန်းဆောင်ရွက်မှုများအကြောင်းနှင့် မိမိတို့ စားသုံးသူရေးရာဦးစီးဌာနအနေဖြင့် စားသုံးသူ ကာကွယ်ရေးအပြင် ပြည်တွင်းကုန်သွယ်မှုဖွံ့ဖြိုးရေးကိုပါ ဆောင်ရွက်လျက်ရှိသည့်အတွက် ယခုကဲ့သို့ ဆွေးနွေးပွဲကို ကျင်းပရကြောင်း ဧရာဝတီတိုင်းဒေသကြီးသည် မြန်မာနိုင်ငံ၌ ပြောင်းစိုက်ပျိုးမှုတွင် အဆင့် (၅) နေရာ တွင်ရှိသည့်အတွက် ယခုကဲ့သို့ အစေ့ထုတ်ပြောင်း သီးနှံကဏ္ဍဖွံ့ဖြိုးတိုးတက်ရေး အလုပ်ရုံဆွေးနွေးပွဲကို ဧရာဝတီတိုင်းဒေသကြီးမှာ ပထမအကြိမ် ကျင်းပခြင်းဖြစ်ကြောင်း၊ သီးနှံစိုက်ပျိုးရာမှာ တောင်သူများတွေ့ကြုံရတဲ့အခက်အခဲ စိန်ခေါ်မှုတွေကို ဝိုင်းဝန်းဆွေးနွေး အဖြေရှာနိုင်ဖို့၊ အရည်အသွေးမီ ဈေးကောင်းရရှိနိုင်ဖို့၊ ခေတ်မီ စိုက်နည်းစနစ်သိရှိဖို့၊ တစ်ဧက အထွက်နှုန်းတိုးတက်စေဖို့၊ တစ်ဧကကုန်ကျစရိတ် လျော့ချနိုင်ဖို့နှင့် မိမိတို့နိုင်ငံမှ ထွက်ရှိသော အစေ့ထုတ်ပြောင်းသီးနှံ တင်ပို့နိုင်သော ပမာဏမှ အိမ်နီးချင်းနိုင်ငံဖြစ်သော တရုတ်နိုင်ငံ၏ ပြောင်းလိုအပ်ချက်ပမာဏရဲ့ အနည်းငယ်သာရှိသည့်အတွက် တောင်သူများအနေဖြင့် မိမိတို့စိုက်ပျိုးထွက်ရှိသည့် သီးနှံများကို အရည်အသွေးမီထုတ်လုပ်ပြီး ဈေးကောင်းရရှိရန် ကြိုးစားဆောင်ရွက်နိုင်ရေး တို့ကိုဆွေးနွေးခဲ့ပါသည်။

          ထို့နောက် တောင်သူများမှ သိရှိလိုသော မေးမြန်းဆွေးနွေးမှုများကို စားသုံးသူရေးရာဦးစီးဌာန ဒုတိယညွှန်ကြားရေးမှူးချုပ် ဦးအောင်မောင်း၊ စိုက်ပျိုးရေးဦးစီးဌာနမှ ဒုတိုင်းဦးစီးမှူး ဦးဌေးလွင်နှင့် မြန်မာနိုင်ငံပြောင်းလုပ်ငန်းအသင်းဥက္ကဌ ဦးမင်းခိုင်တို့မှ ပြန်လည်ရှင်းလင်းဆွေးနွေးခဲ့ကြပါသည်။

ဧရာဝတီတိုင်းဒေသကြီး

စားသုံးသူရေးရာဦးစီးဌာန

       စားသုံးသူရေးရာဦးစီးဌာန၊   ရှမ်းပြည်နယ်ဦးစီးမှူးရုံးမှ         တာဝန်ရှိသူများသည် (၂၉.၁.၂ဝ၂ဝ) ရက်နေ့ ၌  ရပ်စောက်မြို့၊ အ.ထ.က(၁) ကျောင်းနှင့် အ.ထ.က(ဗထူးတပ်) ကျောင်းများတွင် သွားရောက်၍ စားသုံးသူကာကွယ်ရေး အသိပညာပေး ဟောပြောဆွေးနွေးပွဲ ပြုလုပ် ကျင်းပခဲ့ပါသည်။

          အဆိုပါဟောပြောပွဲတွင် စားသုံးသူကာကွယ်ရေးဥပဒေ(၂ဝ၁၉) အကြောင်း၊ စားသုံးသူအခွင့်အရေးနှင့်တာဝန်များ၊ စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ကုန်စည်များတွင် ဖော်ပြရမည့် အချက်အလက်များအကြောင်းကိုလည်းကောင်း၊ စားသုံးသူများမှ ရရှိနိုင်သည့်အခွင့်အရေး (၈) ချက်၊ အစားအသောက်၊ ကုန်စည်နှင့်ဝန်ဆောင်မှုများကို ရယူသုံးစွဲရာတွင် စားသုံးသူများ၏ ထိခိုက်နစ်နာ ဆုံးရှုံးမှုများအတွက် တိုင်ကြားမှုများအား ညှိနှိုင်း ဖြေရှင်းပေးနေမှုများအကြောင်းကိုလည်းကောင်း၊ ထိခိုက်နစ်နာမှုများကြုံလာပါက တိုင်ကြားမှုပုံစံနှင့် တိုင်ကြားနိုင်သည့် နည်းလမ်းများကို လည်းကောင်း ရှင်းလင်းဆွေးနွေးခဲ့ကြပါသည်။

          အဆိုပါဟောပြောပွဲတွင် ရပ်စောက် အ.ထ.က(၁)ကျောင်းမှ ကျောင်းသား/သူ (၃၆၈)ဦး နှင့် အ.ထ.က(ဗထူးတပ်)ကျောင်းမှ ကျောင်းသား/သူစုစုပေါင်း( ၅၉၂ )ဦး တက်ရောက်ခဲ့ကြပြီး၊ အသိပညာပေးလက်ကမ်းစာစောင်များအား ဖြန့်ဝေကာ တက်ရောက်လာသော ကျောင်းသား/သူများမှလည်း ၄င်းတို့သိရှိလိုသည်များကို အပြန်အလှန် မေးမြန်းဆွေးနွေးခဲ့ကြပါသည်။

တောင်ကြီးခရိုင်

စားသုံးသူရေးရာဦးစီးဌာန

    ရှမ်းပြည်နယ်(အရှေ့ပိုင်း)ကျိုင်းတုံမြို့ရှိ အသေးစားစားသောက်ကုန်ထုတ်လုပ်မှုလုပ်ငန်း ရှင် များအား ၂၄.၁.၂၀၂၀ရက်နေ့တွင် စားသုံးသူရေးရာဦးစီးဌာန ဒုတိယပြည်နယ် ဦးစီးမှူးရုံး (ကျိုင်းတုံ) ၌ စားသုံးသူကာကွယ်ရေးဥပဒေ (၂၀၁၉) ပါ ကုန်အညွှန်း အမှတ်အသားဆိုင်ရာအချက်များ ရှင်းလင်းဆွေးနွေးခဲ့ကြပါသည်။

    ဆွေးနွေးပွဲတွင် ဒုတိယပြည်နယ်ဦးစီးမှူးက စားသုံးသူကာကွယ်ရေးဥပဒေသစ်အရ ပြည်တွင်/ပြည်ပထုတ်ကုန်များတွင် ကုန်အညွှန်းအမှတ်အသား ဖော်ပြရမည့်အချက်နှင့်ပတ်သက်၍ သတ်မှတ်ကာလသည် ယခု ၂၀၂၀ခုနှစ် မတ်လ(၁၆)ရက်နေ့တွင် စတင်အသက်ဝင်လာမည်ဖြစ်၍ ဒေသတွင်းရှိ စီးပွားရေးလုပ်ငန်းရှင်များအား ခေါ်ယူဆွေးနွေးရခြင်းဖြစ်ကြောင်း၊ အသေးစားစားသောက်ကုန် ထုတ်လုပ်မှုကဏ္ဍဖွံ့ဖြိုးတိုးတက်ရေး သည် SME ကဏ္ဍဖွံ့ဖြိုးတိုးတက်ရေးအတွက် လုပ်ငန်းတာဝန် တစ်ရပ်အဖြစ်လည်းပါဝင်ပါကြောင်း၊ ပြည်တွင်းရင်းနှီမြှုပ်နှံမှုလုပ်ငန်းများ၊ ပုဂ္ဂလိကလက်လီ/လက် ကားရောင်းချမှုလုပ်ငန်းကို ပြည်တွင်း၌ ခွင့်ပြုထားပြီးဖြစ်၍ ပြည်ပထုတ်ကုန်များဝင်ရောက်လာပါက စျေးကွက်ယှဉ်ပြိုင်နိုင်ရေး မိမိတို့၏ထုတ်ကုန်များအား အရည်အသွေးမီ ထုတ်လုပ်သွားရန်လိုအပ်မည် ဖြစ်ပါကြောင်း၊ ပြည်တွင်း ကုန်စည်ပြပွဲများတွင်လည်းဝင်ရောက် ပြသခြင်ဖြင့် အသေးစား စားသောက်ကုန်လုပ်ငန်းများ ပြည်တွင်း/ပြည်ပစျေးကွက်ထိုးဖောက်နိုင်မှာဖြစ်ကြောင်း၊ မိမိတို့ကုန်စည်များတွင် ထည့်သွင်းဖော်ပြထား သော ကုန်အညွှန်းအမှတ်အသားပြည့်စုံမှန်ကန်မှုရှိမရှိ ဌာနသို့တင်ပြ၍ စိစစ်ဆောင်ရွက်စေလိုကြောင်း  ပြည်တွင်းထုတ်ကုန်စည်များအား နိုင်ငံတကာ စျေးကွက် တွင်ထိုးဖောက် ဝင်ရောက် နိုင်ရေးကိုလည်း ဒေသအတွင်းတန်ဖိုးမြှင့်ထုတ်ကုန်ထုတ်လုပ်သည့် စားသောက်ကုန်လုပ်ငန်းများမှ အရည်အသွေးမီ၊ အဆင့်မီ ထုတ်လုပ်သည့် လုပ်ငန်းများကို မိမိတို့ဝန်ကြီးဌာန မှစေလွတ် ထားသည့် နိုင်ငံအသီးသီးတွင် တာဝန်ထမ်းဆောင်နေသော စီးပွားရေးသံမှူးများမှတဆင့် စျေးကွက်ချိတ်ဆက် ဆောင်ရွက်ပေးလျှက်ရှိကြောင်း၊ ၂၀၁၉ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဆိုင်ရာအချက်များ၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ် ၂/၂၀၁၉ ပါ ကုန်အညွှန်းအမှတ်အသားဖော်ပြရာတွင် ကုန်စည်အုပ်စုအလိုက် ပါဝင်ရမည့်အချက်များ၊ စစ်ဆေးရေးအရာရှိလုပ်ငန်းတာဝန်များနှင့် စျေးကွက်စောင့်ကြည့်စစ်ဆေးနေမှုအခြေအနေများ၊ စီးပွားရေး လုပ်ငန်းရှင်၏တာဝန်များနှင့် လိုက်နာရမည့်အချက်များအား အသေးစိတ်ရှင်းလင်းဆွေးနွေးခဲ့ကြောင်း သတင်းရရှိပါသည်။

ကျိုင်းတုံခရိုင်

စားသုံးသူရေးရာဦးစီးဌာန