သတင်းနှင့် လှုပ်ရှားမှုများ

      ပဲခူးတိုင်းဒေသကြီး ၊ ပြည်ခရိုင်၊ စားသုံးသူရေးရာဦးစီးဌာနအနေဖြင့် ပြည်ခရိုင်အတွင်း (COVID_19) ကူးစက် ရောဂါ ကာကွယ်ကုသရေးဆိုင်ရာ ဆေးဝါးများနှင့် အိမ်သုံးဆေးဝါးများပစ္စည်းပြတ်လပ်မှုမရှိစေရေး၊ ဈေးနှုန်း အဆမတန် မြင့်တက်မှုမရှိစေရေးနှင့် ဆေးဆိုင်များပုံမှန်ဖွင့်လှစ် ရောင်းချနိုင်စေရေးအတွက် ပြည်ခရိုင် ဆေးဝါးနှင့်ဆေးပစ္စည်းဈေးကွက် စောင့်ကြည့်စစ်ဆေးကြပ်မတ်ရေးအဖွဲ့ဖြင့် ဩဂုတ်လ ( ၂၈ ) ရက်နေ့တွင် ပြည်မြို့ပေါ်ရှိ လက်လီ/လက်ကားရောင်းချနေသော ဆေးဆိုင်များသို့ကွင်းဆင်း စစ်ဆေးခြင်း ဆောင်ရွက်ခဲ့ကြပါသည်။ ယင်းသို့ ကွင်းဆင်းစစ်ဆေးခြင်းများ ဆောင်ရွက်ရာတွင် ပြည်မြို့ရှိ လက်လီ / လက်ကား ရောင်းချနေသော ဆေးဆိုင်များအနေဖြင့် ဆေးကုမ္ပဏီကြီးများမှ လိုအပ်သော ဆေးဝါးများ ပြန်လည်မှာယူရရှိလာပြီး၊ ဈေးနှုန်းများမှာလည်း အဆမတန် ကြီးမြင့်မှု မရှိတော့ခြင်း၊ ( COVID_19 ) ရောဂါနှင့်ပတ်သက်သော ဆေးဝါးများဝယ်ယူမှုနည်းပါးသွားခြင်း၊ ဆေးဆိုင်ဝန်ထမ်းများအနေဖြင့် ( COVID_19 ) ကူးစက်ရောဂါကာကွယ်ဆေးများထိုးနှံပြီးစီးပြီဖြစ်၍ ဆေးဆိုင်များမှာလည်း ပုံမှန်အချိန်အတိုင်း ဖွင့်လှစ်ရောင်းချလျက်ရှိပါကြောင်း သတင်းရရှိပါသည်။

ပဲခူးတိုင်းဒေသကြီး(DOCA)

          COVID-19 ကူးစက်မြန်ကပ်ရောဂါ ဖြစ်ပွားနေစဉ်ကာလအတွင်း ကြက်ဥအပါအဝင် စားသောက်ကုန်ပစ္စည်းများ၊ Mask အပါအဝင် ကျန်းမာရေးအထောက်အကူပြုပစ္စည်းများ ဈေးနှုန်း ရုတ်ချည်း မြင့်တက်လာသဖြင့် (ရုံးချုပ်)၏ ညွှန်ကြားချက်၊ တိုင်းဒေသကြီးဦးစီးမှူး၏ လမ်းညွှန်ချက်များဖြင့် (၁၅.၇.၂၀၂၁)ရက်နေ့နှင့် (၁၆.၇.၂၀၂၁)ရက်နေ့များတွင် မကွေးတိုင်းဒေသကြီး စားသုံးသူရေးရာဦးစီးဌာနမှ ဒု-တိုင်းဒေသကြီးဦးစီးမှူး ဦးဆောင်၍ စည်ပင်မှတာဝန်ရှိသူပါဝင်လျှက် မကွေးမြို့ မြို့မဈေးနှင့် ကန်သာဈေးများတွင် လက်လီလက်ကားရောင်းချလျက်ရှိသော ကြက်ဥအရောင်းဆိုင်များသို့ ကွင်းဆင်းစုံစမ်းခြင်းများ ဆောင်ရွက်ခဲ့ပါသည်။

          ထိုသို့ကွင်းဆင်းစုံစမ်းခဲ့ရာတွင် လက်ကားရောင်းချလျက်ရှိသော ဆိုင်ကြီးများတွင် လက်လီ ကြက်ဥတစ်လုံး (၂၀၀)ကျပ်ဖြင့် ရောင်းချသော်လည်း အလုံး(၃၀၀)အထက်ယူလျှင် (၁၄၀)နှုန်းဖြင့် ရောင်းချပေးပါကြောင်း၊ လက်လီရောင်းချသောဆိုင်များတွင် ကြက်ဥအသေးတစ်လုံး (၁၅၀)ကျပ်၊ အလတ်(၁၆၀)၊ အကြီး(၁၇၀-၁၈၀)ထိ ရောင်းချပါကြောင်း စိစစ်တွေ့ရှိရပါသည်။ လက်ကားရောင်းချ လျက်ရှိသော အရောင်းဆိုင်ကြီးမှလည်း ဥစားကြက်မွေးမြူရေးလုပ်ငန်းမှာ ငွေကြေး ရင်းနှီးမှုများပြီး ကြက်စာကိုလည်း ပြည်ပမှ မှာယူတင်သွင်းရသည့်အတွက် ဒေါ်လာဈေးမြင့်တက်လာသည်နှင့်အမျှ ထုတ်လုပ်မှုစရိတ် မြင့်တက်လာသော်လည်း ကြက်ဥဈေးနှုန်းမှာ မကောင်းသည့်အတွက် ကြက်ခြံများမှ ကြက်များကို ဇွန်လကုန်ပိုင်းတွင် ထုတ်ရောင်းလိုက်ချိန်၊ ကူးစက်ရောဂါ ပြင်းထန်လာချိန် ပြည်တွင်းစားသုံးမှု မြင့်တက်လာသည့်အတွက် ကြက်ဥဈေး မြင့်တက်လာကြောင်း၊ Stay at Home ဖြစ်သည့်အတွက် ရောဂါထိန်းချုပ်နိုင်ရေးအတွက် ကုန်စည်ဒိုင်များပိတ်သိမ်းချိန်၊ ကုန်စည်ပို့ဆောင်ရေးများ ရပ်တန့်ထားခိုက် အခိုက်အတန့်အားဖြင့် ဈေးနှုန်းမြင့်တက်ရခြင်းဖြစ်ကြောင်း လေ့လာသိရှိရပါသည်။

          ကွင်းဆင်းစစ်ဆေးသည့်အဖွဲ့သည် သက်ဆိုင်ရာဌာနများမှ တာဝန်ရှိသူများနှင့်အတူ ကြက်ဥများ လက်လီရောင်းချလျက်ရှိသော အရောင်းဆိုင်များသို့ စားသုံးသူများလိုအပ်သည်ထက် ပိုမိုဝယ်ယူခြင်းမပြုစေရေး အသိပညာပေးခြင်း၊ လုပ်ငန်းရှင်များအား ဈေးကစားခြင်းမျိုးမပြုစေရေး၊ အရေးကြီးကုန်စည်နှင့် ဝန်ဆောင်မှုဥပဒေအရ အမိန့်ကြော်ငြာစာ ပြဌာန်းထားပြီးဖြစ်၍ အလွန်အကျွံ ဈေးနှုန်းမြှင့်တင်ရောင်းချပါက ဥပဒေအရ အရေးယူခံရမည်ဖြစ်ကြောင်း ချပြရှင်းလင်းဆွေးနွေးခြင်း၊ စားသုံးသူပြည်သူများအနေဖြင့်လည်း စိုးရိမ်ကြောင့်ကျစိတ်များဖြင့် အရေအတွက် များများဝယ်ယူခြင်း မပြုစေလိုပါကြောင်း အသိပေးဆွေးနွေးခြင်းများ ဆောင်ရွက်ခဲ့ကြပါကြောင်း သတင်းရရှိပါသည်။

စားသုံးသူရေးရားဦးစီးဌာန၊ မကွေးတိုင်းဒေသကြီး

(၂.၉.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။

(၃၀.၈.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။

       လွိုင်ကော်မြို့အတွင်း ရောင်းချနေသည့် ဆေးဝါးနှင့်ဆေးပစ္စည်းဆိုင်များအား ဈေးကွက်အတွင်း ဈေးနှုန်းအဆမတန်မြှင့်တင်ရောင်းချခြင်း မရှိစေရေးအတွက် ကယားပြည်နယ် ဆေးဝါးနှင့် ဆေးပစ္စည်း ဈေးကွက်စောင့်ကြည့်စစ်ဆေးကြပ်မတ်ရေးအဖွဲ့ ဥက္ကဌ ဦးစန်းဝင်း ဦးဆောင်သည့် အဖွဲ့သည် ၂၀၂၁ ခုနှစ်၊ ဩဂုတ် လ (၁၉)ရက်နေ့ နံနက် (၁၀:၀၀)အချိန်တွင် မြို့ပေါ်ရပ်ကွက်အတွင်းရှိ ဆေးဝါးနှင့်ဆေးပစ္စည်းဆိုင်များအား ကွင်းဆင်းစစ်ဆေးခြင်းများ ဆောင်ရွက်ခဲ့ကြသည်။ အဆိုပါ ကွင်းဆင်းစစ်ဆေးရာတွင် ဆေးဝါးနှင့်ဆေးပစ္စည်း ဈေးကွက်စောင့်ကြည့်စစ်ဆေး ကြပ်မတ်ရေးအဖွဲ့သည် Covid-19 ရောဂါကူးစက်မှု မြင့်မားနေသည့်ကာလတွင် ဈေးကွက်အတွင်း ကူးစက်ရောဂါ ကာကွယ်၊ ကုသရေးဆေးဝါး၊ ဆေးပစ္စည်းများနှင့် အထောက်အကူပြုပစ္စည်းများ ပြတ်လပ်မှုမရှိစေရေး၊ သတ်မှတ်အရည်အသွေးနှင့် ဈေးနှုန်းမှန်ကန်စေရေး၊ ဆေးဆိုင်များ အားလုံး နေ့စဉ်ပုံမှန်ဖွင့်လှစ်ရောင်းချရေးနှင့် ဆေးဝါးနှင့် ဆေးပစ္စည်းကုမ္ပဏီများနှင့် ဆေးဆိုင်များမှ ဝန်ထမ်း များအား ကိုဗစ်-၁၉ ရောဂါကာကွယ်ဆေးထိုးနှံနိုင်ရေး ဦးစားပေး ကူညီဆောင်ရွက်ပေးရန် အသိပေး ပြောကြားခဲ့ကြောင်း သိရှိရပါသည်။

ကယားပြည်နယ် (DOCA)