သတင်းနှင့် လှုပ်ရှားမှုများ

           မကွေးတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများ လုံခြုံစိတ်ချမှုရှိစေရန် မျှော်မှန်းချက်နှင့်အညီ စားသုံးသူကာကွယ်ရေးဆိုင်ရာ အသိပညာပေးဆွေးနွေးဟောပြောခြင်း၊ ထုတ်လုပ်/ဖြန့်ဖြူး/တင်ပို့ရောင်းချသည့် စီးပွားရေးလုပ်ငန်းရှင်များသို့ စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ အသိပညာပေးရှင်းလင်းဆွေးနွေးခြင်းများကို ကျန်းမာရေးနှင့်အားကစားဝန်ကြီးဌာန၏ လမ်းညွှန်ချက်များနှင့်အညီဆောင်ရွက်လျှက်ရှိပါသည်။

          ထိုသို့ဆောင်ရွက်ရာတွင် ၂၀၂၀ ခုနှစ် အောက်တိုဘာလမှ ၂၀၂၁ ခုနှစ် ဇွန်လအထိ စားသုံးသူအသိပညာပေးခြင်း (၆၄) ကြိမ်၊ လုပ်ငန်းရှင်တွေ့ဆုံခြင်း (၁၀၄) ကြိမ်၊ သင်တန်းဖွင့်လှစ်ခြင်း (၁)ကြိမ်၊ ပြခန်းပြပွဲ (၁)ကြိမ်၊ တိုင်းကော်မတီအစည်းအဝေးကျင်းပခြင်း (၁)ကြိမ်ဆောင်ရွက်နိုင်ခဲ့ပြီး ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မြန်မာဘာသာဖြင့်ဖော်ပြရန်ပြဌာန်းချက်နှင့် ကိုက်ညီမှုရှိ/မရှိကို ကုန်အမှတ်တံဆိပ် (၁၅၉)မျိုး၊ ကုန်အမျိုးအစား/အရေအတွက် (၄၇၆)ခုတို့အား အတည်ပြု ပြန်ကြားပေးနိုင်ခဲ့ပါကြောင်း သိရှိရပါသည်။

          ၂၀၂၁ ခုနှစ်၊ ဇွန်လအတွင်း လုပ်ငန်းရှင်များနှင့်တွေ့ဆုံခဲ့ရာတွင် ရေစကြို၊ ဆိပ်ဖြူ၊ ချောက် စသည့်မြို့နယ်များတွင် ပုန်းရည်ကြီးလုပ်ငန်းများ၊ ရေသန့်လုပ်ငန်းများ၊ ဆေးဝါးတင်သွင်းဖြန့်ဖြူးရောင်းချသူလုပ်ငန်းရှင်များအား ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ လုပ်ငန်းရှင်များ အလေးထားဆောင်ရွက်နိုင်ရေး အသိပညာပေးရှင်းလင်းခြင်းများလည်း ဆောင်ရွက်ခဲ့ပါကြောင်း သိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

အသိပေး​ကြေငြာခြင်း

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် Covid 19ရောဂါကာကွယ် ကုသမှု လုပ်ငန်းစဉ်များအား အထောက်အကူဖြစ်စေရန်အတွက် ဆေးဝါးနှင့် ဆက်စပ်စက်ပစ္စည်းများ တင်သွင်းခြင်းဆိုင်ရာများအား ဆက်စပ်ဝန်ကြီးဌာနများနှင့်ပူးပေါင်း၍ ပင်လယ်ရေကြောင်း/ နယ်စပ်ကုန်သွယ်ရေးစခန်းများမှအချိန်နှစ်တပြေးညီခွင့်ပြု ဆောင်ရွက်ပေး လျက်ရှိပါသည်။

လက်တလော Covid 19 ကုသရေးတွင်လိုအပ်နေသည် Oxygen Concentrator များတင်သွင်းမှုအတွက်  FDA ထောက်ခံချက် နှင့် သွင်းကုန်လိုင်စင်လျောက်ထားရန်မလိုအပ်သည့်အပြင် အကာက်ခွန် ၃% အတွက် လက်ငင်းပေးဆောင်ရန်မလိုဘဲ  ကြိုတင်ထုတ်ယူနိုင်ရန် ဖြေလျော့ခွင့်ပြုပေးခဲ့ပြီးဖြစ်ပါသည်။

ယခုအခါ မသမာသူ အချို့မှ
ပုံ-၂ ပါအတိုင်း ဆေးနှင့်ဆေးပစ္စည်းများတင်သွင်းမှုအား ပိတ်ပင်သည့် ရုံးစာအတုပြုလုပ်၍ စျေးကွက်တွင်စျေးနှုန်းများကြီးမြင့်လာစေရန်နှင့် ပြည်သူလူထုစိုးရိမ်ထိတ်လန့်မှုဖြစ်စေရန် Social Media တွင် ရေးသားဖေါ်ပြလာခြင်းအားစိစစ်တွေ့ရှိရပါသည်။

အဆိုပါ ရုံးစာသည် Fake News(အတု)သာဖြစ်ပြီး 
EICC အစည်းအဝေးဆုံးဖြတ်ချက်အရ နိုင်ငံခြားသုံးငွေလျှော့ချနိုင်ရေး၊ပြည်တွင်း SME လုပ်ငန်းများမှ ထုတ်လုပ်သောကုန်ပစ္စည်းများအပေါ် စျေးကွက်ယှဉ်ပြိုင်နိုင်မှုအပေါ် အကာအကွယ်ပေးနိုင်ရေးအတွက် နယ်စပ်ဒေသများမှ (ITC)ကတ်ဖြင့် တင်သွင်းခွင့်ပြုလျှက်ရှိသည့်ဆပ်ပြာ၊ဆပ်ပြာမှုန့်နှင့် သွားတိုက်ဆေးများအား ယာယီတင်သွင်းခွင့်ရပ်ဆိုင်းရန် အကြောင်းကြားသည့်စာ(ပုံ-၁)ကိုပုံဖျက်၍ အတုပြုလုပ်ထားခြင်း ဖြစ်ပါသည်။

အဆိုပါသတင်းအချက်အလက်အတုအပ ပြုလုပ် ဖြန့်ဝေသူများအား ဖေါ်ထုတ်ပြီး တည်ဆဲဥပဒေများအရ ထိရောက်စွာအရေးယူ ဆောင်ရွက်သွားမည်ဖြစ်ကြောင်းနှင့် လိုအပ်သည့်ဆေးဝါးနှင့်ဆက်စပ်စက်ပစ္စည်းများတင်သွင်းမှုအား ဖြေ့လျော့၍ အချိန့်နှင့်တပြေးညီခွင့်ပြုဆောင်ရွက်ပေးလျက်ရှိပါကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ အသိကြော်ငြာချက် ထုတ်ပြန်ထားပါကြောင်း စားသုံးသူပြည်သူများနှင့် လုပ်ငန်းရှင်များအားလေးစားစွာဖြင့် အသိပေး တင်ပြအပ်ပါသည်။

စားသုံးသူရေးရာဦးစီးဌာန

၃၀.၆.၂၀၂၁ ရက်နေ့၊ နံနက် (၁၀:၀၀) နာရီတွင် ပြည်ပပို့ကုန်များဖြစ်သည့် ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက်များ ထုတ်ပြန်နိုင်ရေးနှင့် ပတ်သက်၍ ညှိနှိုင်းအစည်းအဝေးကို စားသုံးသူရေးရာဦးစီးဌာန၊ ညွှန်ကြားရေးမှူးချုပ်က ဦးဆောင်၍ Virtual Meeting ကျင်းပပြုလုပ်ခဲ့ရာ စိုက်ပျိုးရေးဦးစီးဌာန၊ သုတေသနနှင့် တီထွင်ဆန်းသစ်မှုဦးစီးဌာန၊ ကုန်သွယ်ရေးဦးစီးဌာန၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက်စိုက်ပျိုးထုတ်လုပ်သူများအသင်း၊ မြန်မာနိုင်ငံ ဖရဲ၊ သခွားမွှေး စိုက်ပျိုး ထုတ်လုပ်တင်ပို့ရောင်းချသူများအသင်း၊ မြန်မာနိုင်ငံ သရက်စိုက်ပျိုးထုတ်လုပ်တင်ပို့ရောင်းချ သူများအသင်း၊ မြန်မာနိုင်ငံ ကြက်သွန်နီ၊ ကြက်သွန်ဖြူနှင့် စားဖိုဆောင်သုံးသီးနှံ စိုက်ပျိုး ထုတ်လုပ်တင်ပို့ရောင်းချသူများအသင်း၊ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်နှင့် Unique Lawk Sawk Mango Public Co., Ltd. တို့မှ တာဝန်ရှိသူများနှင့် ကိုယ်စားလှယ်များ တက်ရောက်ခဲ့ကြပါသည်။
အစည်းအဝေးတွင် စီးပွားရေးနှင့် ကူးသန်း‌ရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီး ဌာနမှ ညွှန်ကြားရေးမှူးချုပ် ဦးမြင့်ချိုက အဖွင့်အမှာစကားပြောကြားရာတွင် မြန်မာနိုင်ငံ အပါအဝင် တစ်ကမ္ဘာလုံး၌ Covid-19 ကပ်ရောဂါကူးစက်မှုများကြောင့် ကုန်စည်စီးဆင်းမှု များတွင် အခက်အခဲများကြုံတွေ့နေရပါကြောင်း၊ အထူးသဖြင့်နယ်စပ်မှ ပို့ကုန်တင်ပို့မှုတွင် အခက်အခဲများ ဖြစ်ပေါ်နေပြီး ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေး ဗဟိုကော်မတီအား ဖွဲ့စည်းထားရှိပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးသည် အတွင်းရေးမှူးအဖြစ် တာဝန်ယူဆောင်ရွက်လျက်ရှိသည့်အတွက် ကုန်သွယ်မှုဆောင်ရွက်ရာတွင် အခက်အခဲများရှိပါက မိမိတို့ဦးစီးဌာနသို့ ဆက်သွယ်တင်ပြနိုင် ပါကြောင်း၊ စားသုံးသူရေးရာဦးစီးဌာနအနေဖြင့် စိုက်ပျိုးရေးအခြေခံထုတ်ကုန် စံချိန်စံညွှန်း ရေးဆွဲရေးနည်းပညာဆပ်ကော်မတီကို တာဝန်ယူဆောင်ရွက်လျက်ရှိရာ လယ်ယာထုတ်ကုန် စံချိန်စံညွှန်းများအား ဦးဆောင်ရေး ဆွဲလျက်ရှိပါကြောင်း၊ မြန်မာနိုင်ငံစံချိန်စံညွှန်းကောင်စီမှ ထုတ်ပြန်ထားသော မြန်မာစံချိန်စံညွှန်းများကို ရည်ညွှန်းအသုံးပြု၍ နယ်စပ်မှပြည်ပသို့ တင်ပို့ ရာတွင် ဈေးကွက်နှင့် ဈေးနှုန်းရရှိရေးတို့တွက် ဖရဲ၊ သခွားမွှေးသီး၊ သရက်သီးနှင့် ကြက်သွန်နီ တို့ကို အရည်အသွေးသတ်မှတ်ချက်ထုတ်ပြန်ရန် မူကြမ်းများ ပြုစုထားပါကြောင်း၊ သို့ရာတွင် Voluntary စံချိန်စံညွှန်းတစ်ခုစလုံးကို Mandatory ထုတ်ပြန်ခြင်းမဟုတ်ပါကြောင်း၊ ဈေးကွက်လိုအပ်ချက်အရ ဘေးအန္တရာယ်ကင်းရှင်းမှု (Safety) နှင့် အရည်အသွေး (Quality) မြင့်မားရေးဆိုင်ရာ လိုအပ်ချက်များကိုသာ ကိုးကားအသုံးပြုထားပါကြောင်း၊ အထူးသဖြင့် ကုန်သွယ်မှုပြုရာတွင် အရည်အသွေးပိုင်းဆိုင်ရာ စံသတ်မှတ်ချက်များနှင့်အညီ တင်ပို့နိုင်ရေး အတွက်ဖြစ်ပါကြောင်း အဖွင့်အမှာစကားပြောကြားခဲ့ပြီး အစည်းအဝေးသို့တက်ရောက်လာ သော သက်ဆိုင်ရာဌာနများနှင့် အသင်းအဖွဲ့များမှ ကိုယ်စားလှယ်များက ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက် (မူကြမ်း) အပေါ် ဝိုင်းဝန်း အကြံပြုဆွေးနွေးခဲ့ပြီး အစည်းအဝေးအား နေ့လယ် ၁၂:၀၀ နာရီအချိန်တွင် ရုပ်သိမ်းခဲ့ကြောင်း သိရှိရပါသည်။
ITQM

            ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းယောင်းမြို့နယ်၏ ဒေသခံအများစုသည် တောတောင်ရေ မြေသဘာဝကောင်းမွန်၍ ရာသီသီးနှံအလိုက် စိုက်ပျိုးရေးအဆင်ပြေသောကြောင့် လယ်ယာနှင့် ရော်ဘာစိုက်ပျိုးခြင်းကို အဓိကထားလုပ်ကိုင်ကြသည်။ ၂၀၂၀-၂၀၂၁ ဘဏ္ဍာနှစ်တွင် မိုင်းယောင်းမြို့ရှိ ရော်ဘာစိုက်ဧက (၁၇၈၆၇)ဧကခန့်ရှိပြီး ရိတ်ဧက(၅၂၀၄)ဧက အစေးခြစ်၍ (၂၇၃၀၅၅၆)ပေါင် ထွက်ရှိကြောင်း သိရှိရပါသည်။ နှစ်စဉ် ဧပြီလ(တတိယပတ်)မှ နိုဝင်ဘာလကုန်အထိ ရော်ဘာအစေးခြစ်ခြင်းကိုလုပ်ကိုင်ပြီး ကျန်(၄)လအတွင်း နှစ်ရှည်ပင်များဖြစ်သည့်အလျှောက် ပေါင်းရှင်းပေးခြင်းနှင့် သဘာဝမြေဩဇာ (နွားချေး၊ဝက်ချေး)စသည်များ ထည့်ပေးခြင်းတို့ကို လုပ်ဆောင်ပေးရပါသည်။ ရော်ဘာစေးကို တစ်ကီလိုလျှင်(၇၀၀)ကျပ်မှ (၈၅၀)ကျပ်အထိ ရရှိကြောင်းနှင့် မိုင်းယောင်းမြို့၊ ဝမ်မိုင်လုံရွာတွင် အသေးစားရော်ဘာပြားထုတ်လုပ်သည့်စက်ရုံရှိပြီး အလုပ်သများ(၁၀)ဦးခန့်ဖြင့် လုပ်ကိုင်လျှက်ရှိပြီး တရုတ်နိုင်ငံသို့အများဆုံးတင်ပို့လျှက်ရှိကြောင်း သိရှိရသောကြောင့် ရော်ဘာစေးခြစ်လုပ်ငန်းဖြင့် တောင်သူများ တဖက်တလမ်းမှ ဝင်ငွေတိုးပွားလျက်ရှိပါကြောင်း သတင်းရရှိပါသည်။

ရှမ်းပြည်နယ်(DOCA)

              စားသုံးသူရေးရာဦးစီးဌာန   ပဲခူးတိုင်းဒေသကြီး၊ ပဲခူးခရိုင်အတွင်း ဆန်စပါးကဏ္ဍ ဖွံ့ဖြိုးတိုးတက်နိုင်ရေးအတွက် စိုက်ပျိုးသည်မှ ကြိတ်ခွဲထုတ်လုပ်တင်ပို့ ရောင်းချသည် အထိ Supply Chain တစ်ခုလုံး တွင် ပါဝင်သည့် ဌာနဆိုင်ရာများ၊ အသင်းအဖွဲ့များနှင့် လုပ်ငန်းရှင်များ ဟန်ချက်ညီစွာ ပူးပေါင်းပါဝင် ဆောင်ရွက်နိုင်ရေးနှင့် ပြုပြင်ပြောင်းလဲ ဖြည့်ဆည်းရန် လိုအပ်နေသည့် ဆန်စပါးကဏ္ဍမှ လိုအပ်ချက်များကို ပူးပေါင်း အဖြေရှာ ဖြေရှင်းနိုင်ရေး ရည်ရွယ်၍ (၁၆.၆.၂၀၂၁) ရက်နေ့   နံနက် ၁၀ : ၀၀ နာရီတွင် ပဲခူးခရိုင်အတွင်းရှိ     ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး  ထုတ်လုပ်သူ တောင်သူ   (၃၁)ဦးနှင့် တိုင်းဒေသကြီး အဆင့် ဌာနဆိုင်ရာအသီးသီးမှ တာဝန်ရှိသူများ တက်ရောက်ကြသည့် အလုပ်ရုံဆွေးနွေးပွဲကို ပဲခူးတိုင်းဒေသကြီးဦးစီးမှူးရုံး၌ ကျင်းပခဲ့ပါသည်။

          အဆိုပါဆွေးနွေးပွဲတွင် ပဲခူးတိုင်းဒေသကြီး ၊ စီမံအုပ်ချုပ်ရေးကောင်စီဝင် (၁) ဗိုလ်မှူးကြီးလှမျိုးရွှေ က စပါး အထွက်နှုန်းကောင်းရန် မျိုးကောင်းမျိုးသန့်များ ရွေးချယ် စိုက်ပျိုးခြင်း၊ မြေယာများ စနစ်တကျပြုပြင်စိုက်ပျိုးခြင်း၊ သွင်းအားစုများစနစ်တကျ ထည့်သွင်း စိုက်ပျိုးခြင်း၊  ကောင်းမွန်သော စိုက်ပျိုးရေး ဆိုင်ရာ အခြေခံအလေ့အကျင့်ကောင်း(Good Agricultural Practices G.A.P )စနစ်ဖြင့့်် စိုက်ပျိုးရေး၊ ဈေးကွက်စီးပွားရေးစနစ်အရ လုပ်ငန်းရှင်များ အနေဖြင့် ဆန်စပါးကို လွတ်လပ်စွာ ရောင်းဝယ်ခွင့်ရှိသည်နှင့်အညီ ပြည်တွင်းစားသုံးရန်နှင့် ပြည်ပတင်ပို့ရန် ဆန်များကို အရည်အသွေးမီ ဆန်များ ကြိတ်ခွဲထုတ်လုပ် ရောင်းချနိုင်ရေး ကြိုးပမ်းဆောင်ရွက်သွားရန် တိုက်တွန်းကြောင်း အဖွင့်အမှာစကားပြောကြားခဲ့ပါသည်။

             ဆက်လက်၍ ပဲခူးတိုင်းဒေသကြီး စိုက်ပျိုးရေးဦးစီးဌာန၊ ဒုတိယတိုင်းဒေသကြီးဦးစီးမှူးက  စျေးကွက်တန်းဝင် မျိုးကောင်းမျိုးသန့်မျိုးစေ့ ထုတ်လုပ်သိုလှောင်ဖြန့်ဖြူးပေးခြင်း၊ စိုက်ကွင်းကြီး များရှိှ တောင်သူ များအား ခေတ်မှီစိုက်ပျိုးနည်းစနစ်များနှင့် ရိတ်သိမ်းချိန်လွန် နည်းပညာ ဆွေးနွေး ပညာပေးခြင်း လုပ်ငန်းများ ဆောင်ရွက်လျက်ရှိကြောင်း၊ အစိုးရတာဝန်ရှိသူများ အသင်းအဖွဲ့များနှင့် ပူးပေါင်းဆောင်ရွက်၍ ထွက်ရှိသည့် သီးနှံများကို ပြည်တွင်း/ပြည်ပစျေးကွက်တွင် စျေးကောင်းရရှိအောင် စွမ်းဆောင်ခြင်း နှင့် လူငယ်မျိုးဆက်သစ် တောင်သူများအား ပျိုးထောင်ပေးလျက်ရှိကြောင်း  ရှင်းလင်းဆွေးနွေးခြင်း၊ ပဲခူးတိုင်းဒေသကြီး စက်မှုကြီးကြပ်ရေး နှင့် စစ်ဆေးရေးဦးစီးဌာန ၊ ဒုတိယညွှန််ကြားရေးမှူးက  ပုဂ္ဂလိက စက်မှုလုပ်ငန်းများကို သတ်မှတ်ထားသည့် နည်းလမ်းများနှင့်အညီ လုပ်ငန်းအရွယ်အစားသတ်မှတ်၍ မှတ်ပုံတင်ခြင်း လုပ်ငန်းများဆောင်ရွက်လျက်ရှိပြီး SME လုပ်ငန်း၏အဓိကကျသော ငွေကြေးလိုအပ်မှုအတွက် အထာက် အကူပြုနိုင်ရန် ချေးငွေရရှိ‌ရေး ပံ့ပိုးမှုများ ဆောင်ရွက် လျက်ရှိကြောင်း ရှင်းလင်းဆွေးနွေးခြင်း၊ ပဲခူးတိုင်းဒေသကြီး၊ လယ်ယာမြေစီမံခန့်ခွဲရေးနှင့် စားရင်းအင်းဦးစီးဌာန  လက်ထောက်ညွှန်ကြားရေးမှူးက  လယ်ယာမြေစီမံခန့်ခွဲ ရေးနှင့် ပတ်သက်သည့် ဥပဒေများ ၊ စည်းမျဉ်းစည်းကမ်း များကို ရှင်းလင်းဆွေးနွေးခြင်း၊ ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးမှ မြန်မာနိုင်ငံ၏ ဆန်စပါး စိုက်ပျိုးထုတ်လုပ်မှု ၊သုံးစွဲမှု ၊ပိုလျှံမှု စာရင်းနှင့် စျေးနှုန်းစျေးကွက်အ‌ခြေအနေများ၊ စပါး (၁)ဧက ထုတ်လုပ်မှုကုန်ကျစရိတ်အပေါ် တောင်သူ အကျိုးအမြတ်ရရှိနုင်မှု အခြေအနေများ ၊မိမိနိုင်ငံမှ ဆန်စပါး တင်ပို့နိုင်မှုအပေါ် နိုင်ငံအလိုက် စျေးကွက်ရရှိမှုနှင့် ကမ္ဘာ့ဆန်တင်သွင်းမှုအပေါ် မြန်မာနိုင်ငံမှ တင်ပို့နိုင်မှုနှင့် စျေးကွက်ရရှိမှု အခြေအနေများအား အကျယ်တဝင့်ရှင်းလင်းဆွေးနွေးခြင်းများ ဆောင်ရွက်ခဲ့ပါသည်။

              ထို့နောက် တက်ရောက်လာသည့် ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး  ထုတ်လုပ်သူ တောင်သူများ၏ လယ်ယာ စိုက်ပျိုးရေး၊ ကြိတ်ခွဲရေး ၊ ကုန်သွယ်ရေး နှင့် ပတ်သက်သည့် မေးမြန်းမှုများကို သက်ဆိုင်ရာ ဌာန အသီးသီးမှ ပြန်လည်ရှင်းလင်း ဖြေကြားမှုများ ဆောင်ရွက်ခဲ့ပြီး အခမ်းအနားကို (၁၄:၀၀) နာရီတွင် ရုတ်သိမ်းခဲ့ကြောင်း သတင်းရရှိပါသည်။

ပဲခူးတိုင်းဒေသကြီး(DOCA)