သတင်းနှင့် လှုပ်ရှားမှုများ

Powered by Drupal

ကြက်သွန်ဖြူ စိုက်ပျိုးထုတ်လုပ်မှု၊ အသုံးဝင်ပုံ

            ကြက်သွန်ဖြူကို English အခေါ် garlic  ရုက္ခဗေဒ အမည် Allium sativum ဖြစ်ပါသည်။ ကြက်သွန်နီ onion ၏ မိသားစု Alliaceae ထဲမှာ ပါဝင်တဲ့ မျိုးစိတ်တစ်ခုဖြစ်ပါသည်။ အစိမ်းစားလျှင် ပူစပ်စပ် အရသာရှိသည့် ကြက်သွန်ဖြူသည် ချက်ပြုတ်လိုက်တဲ့အခါမှာတော့ ချိုသော အရသာရှိပါသည်။ ကြက်သွန်ဖြူရဲ့ အရွက်ဖြစ်တဲ့ ကြက်သွန်မိတ်နဲ့ အဖူး၊အပွင့်များကိုလည်း စားသုံး၍ရပါသည်။ ကြက်သွန်ဖြူ အမွှာများကို အစိမ်းသော်လည်းကောင်း၊ ချက်ပြုတ်၍သော်လည်းကောင်း စားသုံးလျှင် ဆေးဖက်ဝင်ပါသည်။ မချက်ပြုတ်ထားသော ကြက်သွန်ဖြူအစိမ်းကို စားသုံးခြင်းဖြင့် သွေးကြောများအတွင်း သွေးခဲခြင်းနှင့် သာမန်ထက်ပိုတဲ့ သွေးပေါင်ချိန်ကို လျော့ကျစေသော်လည်း အများအားဖြင့် ကြက်သွန်ဖြူကို ချက်ပြုတ်ပြီးမှသာ စားသုံးကြပါသည်။ မြန်မာနိုင်ငံတွင် ရှမ်းပြည်နယ်တွင် အများအပြား စိုက်ပျိုးပေါက်ရောက်သည်။ ထိုင်းနိုင်ငံသည် ၎င်းတို့ပြည်တွင်းထုတ်စားသောက်ကုန်လုပ်ငန်းမျိုးစုံအတွက် ပြည်ပမှ ကြက်သွန်ဖြူ အများအပြား ဝယ်ယူလေ့ရှိရာ ယခင်က မြန်မာနိုင်ငံ၊ ရှမ်းပြည်နယ်မှ အဓိကဝယ်ယူခဲ့သဖြင့် တောင်သူများ အကျိုးစီးပွားဖြစ်ထွန်းခဲ့သော်လည်း ၂၀၁၄ ခုနှစ်ခန့်မှ စတင်ကာ တရုတ်နိုင်ငံထွက် ကြက်သွန်ဖြူများကို အများအပြား ဝယ်ယူတင်သွင်းခဲ့သဖြင့် မြန်မာ့ကြက်သွန်ဖြူ စျေးကွက်ပျောက်ဆုံးခဲ့ရကြောင်း သိရသည်။

          ကြက်သွန်ဖြူအပင်သည် ပင်ပျော့ ပင်ငယ်တစ်မျိုးဖြစ်သည်။ ၁ ပေခန့်ထိ ရှည်သည်။ ပင်စည်မှာ ဥ၏ အောက်ခြေတွင်ရှိပြီး အနည်းငယ်မာကျော၍ အဝိုင်းငယ်ပုံသဏ္ဌာန်ရှိသည်။ ၎င်းမှအမြစ်များ ဖြာထွက်သည်။  အရွက်များ မြေပေါ်သို့ စုထွက်သည်။ ရှည်လျားသေးသွယ်၍ ပြားချပ်သော အကြောပြိုင်ရွက်များဖြစ်ပြီး  စိမ်းပြာရောင်ရှိသည်။ အပွင့်ပန်းခိုင်မှာ လုံးဝိုင်းပြီး ပန်းပွင့်များ စုပေါင်းနေသည်။ ပြာသို/တပို့တွဲတွင် ပွင့်သည်။ ဥ အဖြူရောင်ရှိပြီး သေးငယ်သည်။ ကျယ်ပြန့်သော ဘဲဥပုံဖြစ်သည်။ တစ်ဥတည်း သို့မဟုတ် အတက်များဖြင့် စုပေါင်းနေပြီး အခွံပါးဖြင့် ဖုံးအုပ်ထားသည်။

          ကြက်သွန်ဖြူကို စိုက်ခင်းမြေပြုပြင်ခြင်းတွင် ထယ်နှစ်စပ်ထိုး၍ မြေညက်သည်အထိ ထွန်မွှေပေးပြီးနောက် ၄.၅x ၆ ပေရှိဘောင် အကန့်များ ပြုပြင်ရမည်။ မြေဩဇာကို တစ်ဧကလျှင် နွားချေး လှည်း ၁၀ စီး ခန့် မျှတစွာချသင့်သည်။  စိုက်ပျိုးရာတွင် မြေပြန့်တွင် သီတင်းကျွတ်လမှ တန်ဆောင်မုန်းလအတွင်း စိုက်၍ တောင်ကုန်းဒေသတွင် တပို့တွဲမှ တပေါင်းလအတွင်း စိုက်ကြသည်။ စိုက်ပျိုးရာ၌ ဥမှ ခွဲယူရရှိသော ဖွံ့ဖြိုးသည့် အတက်ငယ်ကလေးများကို စိုက်ကွက်အကန့်များတွင် ထွန်ခြစ်ဖြင့် ၆ လက်မအကွာ မြောင်းကလေးများဆွဲ၍ တစ်ခုနှင့် တစ်ခု ၃-၄ လက်မခြား စိုက်ရသည်။  အပင်ပြုစုရာတွင် စိုက်ပြီး ပထမ နှစ်လအတွင်း ၁၅ ရက်လျှင်တစ်ကြိမ် ရေပေးသွင်းရန်လိုပြီး လက်ပေါင်း ၂ ကြိမ်မျှ လိုက်ပေးရမည်။ နောက်ပိုင်းတွင် ကြက်သွန်ဥများ စတင်ကြီးထွားပြီဖြစ်၍ တစ်ပတ် သို့မဟုတ် (၁၀) ရက်လျှင် တစ်ကြိမ်ခန့် ရေပေးသွင်းရမည်။ ရိတ်သိမ်းရာ၌ ရက်ပေါင်း ၁၂၀ ခန့်ရှိလျှင် ကြက်သွန်များ ရင့်မာစပြုပြီး ပန်းပွင့်များ ထွက်လာသည်။ သို့သော်လည်း ဥ အထွက်ကို မထိခိုက်နိုင်ချေ။ ကြက်သွန်များ မဖော်မီ မြေပွအောင် ရေသွင်းပေးရမည်။ တူးဖော်ပြီးနောက် အစည်းများ စုပုံထားရသည်။ ထို့နောက် ဆေးကြော၍ အမြစ်ပိုင်းနှင့် အဖျားပိုင်းများ ဖြတ်တောက်က အရိပ်၌ ညီညာစွာဖြန့်၍ အခြောက်ခံထားရသည်။ ကြက်သွန်ဖြူတစ်ဧက စိုက်ပျိုးထုတ်လုပ်မှုကုန်ကျစရိတ်မှာ ကျပ်သိန်း(၂၀)ကျော် ကုန်ကျပါသည်။

          ကြက်သွန်ဖြူကို ကမ္ဘာတဝှမ်းမှာ ဟင်းခတ်အမွှေးအကြိုင်အဖြစ်၊ ဟင်းအနှစ်အဖြစ် ချက်ပြုတ် စားသောက်ကြပါတယ်။ ချက်ပြုတ်တဲ့ နည်းပေါ်မူတည်ပြီးတော့ အနံ့ပြောင်းလဲသွားတတ်ပါတယ်။ ကြက်သွန်ဖြူ နုနုများကို သကြား၊ ဆား၊ ဟင်းခပ်အမွှေးအကြိုင်များဖြင့် ရောနှောကာ ၃ ပတ်မှ ၆ ပတ် ကြာအောင်အချဉ်တည်ကာ ကြက်သွန်ဖြူသနပ်အဖြစ်လည်း ပြင်ဆင်စားသုံးကြပါတယ်။ အာရှတိုက်မှာ ကြက်သွန်မိတ်ကို သေးသေးလှီးကာ ကြက်ဥ၊ အသား၊ ဟင်းရွက်များနှင့်ရောမွှေကြော်ကာ ပြင်ဆင်စားသုံးလေ့ရှိကြသလို ဆန်ပြုတ်ထဲမှာလည်း ဟင်းခပ်အဖြစ်ထည့်ကာ စားသုံး ကြပါတယ်။ မြန်မာလူမျိုးများကတော့ ကြက်သွန်ဖြူကြော်ထားသည့် ကြက်သွန်ကြော်ကို လက်ဖက်နှင့် တွဲဖက် စားသုံးကြသလို၊ ဟင်းများတွင် ဖြူးကာလည်း စားကြပါသည်။ ကြက်သွန်ဖြူ အစိမ်းကို ခေါက်ဆွဲသုပ်၊ ကြာဇံသုပ် ၊ ထမင်းသုပ်၊ လက်သုပ်စုံများဖြင့် တွဲဖက်စားသုံးကြပါတယ်။ ကြက်သွန်ဖြူကို စားသုံးပါက နှလုံးရောဂါ၊ သွေးတိုးရောဂါ၊ ၊ အအေးမိခြင်း ၊ ကင်ဆာရောဂါနဲ့ ကိုလက်စထရောများခြင်းကို ကာကွယ်ပေးပါသည်။ ဒါ့အပြင် ကြက်သွန်ဖြူက သွေးထဲမှာရှိတဲ့ အချိုဓာတ် (သကြားဓာတ်) ကိုထိန်းညှိပေးတဲ့အတွက် ဆီးချို သွေးချိုရောဂါများ ဖြစ်ပွားခြင်းကို လျော့နည်းစေနိုင်ပါသည်။ အဆီကျစေသဖြင့် နေ့စဉ်မှန်မှန် စားသုံးပါက သွေးတိုးရောဂါမဖြစ်စေရန်နှင့် ဖြစ်ပွားနေသော သွေးတိုးရောဂါကို ပျောက်စေသည်။ အစားစားနေစဉ် အတူစားသုံး၍ ဖြစ်စေ၊ အစာစားပြီး ဆေးအဖြစ် အမှုန့်ပြု စားသုံးလျှင် အစာကြေ၍ လေသက်စေနိုင်သည်။ ကလေးများ လေဆန်နာဖြစ်လျှင် ကြက်သွန်ဖြူ ဥတစ်လုံးကို မီးဖုတ်ကျွေးပါက ပျောက်ကင်းနိုင်သည်။ အဆုတ်နှင့်ဆိုင်သော အဆုတ်အအေးမိ၊ အဆုတ်ပွသော ရောဂါများပျောက်ကင်းစေနိုင်သည်။ အအေးမိခြင်း နှင့် တုတ်ကွေးဖျားများကိုလည်း ပျောက်စေသည်။ ကြက်သွန်ဖြူကို အဆီထုတ်၍ တိုက်ကျွေးပါက သလိပ်ရှင်စေ၊ ချောင်းဆိုး သလိပ်ကပ်ခြင်းတို့ကို ပျောက်ကင်းစေသည်။ ရောဂါပိုးများ သေစေနိုင်သဖြင့် မြစ်ခြောက်နာ (ခေါ်) အဆုတ်နာ (တီဘီ) ရောဂါများတွင် တိုက်ကျွေးနိုင်သည်။ လိမ်းဆေးအဆီအဖြစ် နှမ်းဆီနှင့် လေးညှင်းတို့နှင့် ရောစပ်၍ ကျိုချက်ပြီး လိမ်းလျှင် ကိုယ်လက် အကိုက်အခဲ နှင့် နားကိုက်၊ နားပြည်ယိုခြင်းကို သက်သာပျောက်ကင်း နိုင်သည်။ နှလုံးနှင့် ပတ်သက်သော ရောဂါဝေဒနာရှင်များအတွက် ဆေးအနေဖြင့်သော်လည်းကောင်း၊ အစာအဟာရအဖြစ်သော်လည်းကောင်း မှန်မှန်စားသုံးပါက ဖြစ်ပွားမှုနှုန်းနှေးကွေးပြီး တဖြည်းဖြည်း သက်သာစေနိုင်သည်။ ကြာရှည် စားသုံးလျှင် ဆံပင်ကို နက်စေ၍ သုတ်ကိုပွားစေသည်။ မြစ်ပွားနာ(ခေါ်) ကင်ဆာရောဂါ ဖြစ်ပွားမှုနှုန်းနည်းစေရန်အတွက် ကြိုတင်ကာကွယ် စားသုံးနိုင်သည်။ ကြက်သွန်ဖြူ ဥတစ်လုံးကို ကြေးချိတ်ဖြင့်ဖောက်၍ ပျားရည်တွင် စိမ်ထားပြီး စားသုံးပါက အိပ်ပျော်စားဝင် အင်အားပြည့်ဖြိုးစေနိုင်ပါသည်။ သွေးတွင်းတွင်ရှိသော cholesterol ကို ကျစေသဖြင့် သွေးကြောကျည်း၊ နှလုံးရောဂါများအတွက် လွန်စွာသင့်လျော်ပါသည်။

          အစာလည်းဆေး၊ ဆေးလည်းအစာဖြစ်တာမို့ ဘယ်လိုဘဲစားစား ကြက်သွန်ဖြူကတော့ ကျန်းမာရေးအတွက် အထူးကောင်းမွန်တဲ့ အစားအစာတစ်မျိုးဖြစ်တာကြောင့် ကြက်သွန်ဖြူမှာပါဝင်တဲ့ ဆာလဖာဒြပ်ပေါင်းဟာ အနံ့နဲ့အရသာကို ဖြစ်ပေါ်စေပြီး ကျန်းမာရေးကို အကျိုးပြုစေခြင်းကြောင့် ကြက်သွန်ဖြူကို စားသုံးသင့်ပါကြောင့် လေ့လာသိရှိရပါသည်။ သို့သော် ကြက်သွန်ဖြူက ဆေးဖက်ဝင်တယ်ဆိုပေမယ့် ပမာဏများများစားမိတဲ့အခါ ခံတွင်းနံ့ဆိုးတာ၊ ခံတွင်းပူတာ၊ ရင်ပူတာ၊ ပျို့အန်တာ၊ ဝမ်းလျှောတာတွေဖြစ်တတ်ပါတယ်။ ဒီဆိုးကျိုးတွေက များများစားလေ ပိုဆိုးလေလေပဲ ဖြစ်ပါ တယ်။ နောက်တစ်ချက်အနေဖြင့် ကြက်သွန်ဖြူက သွေးကျဲစေတဲ့ သတ္တိရှိပါတယ်။ ဒါကြောင့် နဂို သွေးမတိတ်ရောဂါရှိသူတွေ၊ သွေးကျဲဆေး သောက်နေသူတွေက ပမာဏများများစားတာကို ရှောင် သင့်ပါတယ်။ ဒီအချက်ကြောင့်ပဲ ခွဲစိတ်မှု လုပ်စရာရှိတဲ့သူတွေဆိုရင် မခွဲခင် (၂)ပတ်အလိုတည်းက ကြက်သွန်ဖြူစားတာကို ရပ်ထားသင့်ပါတယ်။ ကိုယ်ဝန်ဆောင်နဲ့ နို့တိုက်မိခင်တွေမှာလည်း ပုံမှန်အတိုင်း ချက်ပြုတ်စားတဲ့ထဲမှာပါတာက ပြဿနာမဟုတ်ပေမယ့် အလွန်အကျွံစားတာကို ဆင်ခြင်သင့်ပါတယ်။ အစာအိမ်ရောဂါရှိသူတွေအနေနဲ့လည်း အစာအိမ်နာနေတဲ့အချိန်မှာ ကြက်သွန်ဖြူ စားတာကို ရှောင့်သင့်ပါကြောင်း On Doctor  Healthcare App မှ လေ့လာသိရှိရပါသည်။

DOCA(စစ်ကိုင်း)

“(မိတ္ထီလာ/ရမည်းသင်း)ခရိုင် မြန်မာနိုင်ငံစားသုံးသူစွမ်းဆောင်မှု အညွှန်းကိန်း စစ်တမ်းကောက်ယူ”

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်‌ရေးလုပ်ငန်းကို အာဆီယံအဖွဲ့ဝင်နိုင်ငံများနှင့်အတူ အကောင်ထည်ဖော်ဆောင်ရွက်လျက်ရှိရာ စားသုံးသူပြည်သူများအနေဖြင့် စားသုံးသူကာကွယ်ရေးနှင့်စပ်လျဉ်း၍ အသိပညာရှိမှုနှင့် စွမ်းဆောင်ရည်မည်မျှရှိသည်ကို တစ်နိုင်ငံလုံးအတိုင်းအတာဖြင့် သိရှိနိုင်ရန်အတွက် စားသုံးသူစွမ်းဆောင်မှု အညွှန်းကိန်းစစ်တမ်းအားကောက်ယူသွားမည်ဖြစ်ရာ စားသုံးသူရေးရာဦးစီးဌာန၊(မိတ္ထီလာ/ရမည်းသင်း)  ခရိုင်အနေဖြင့် လူကိုယ်တိုင် (၅၀) ဦး၊ Online မှ (၃၉) ဦး၊ စုစုပေါင်း (၈၉) ဦးအား လူကိုယ်တိုင် တိုက်ရိုက်မေးမြန်းခြင်းနှင့် Online မှ မေးမြန်းခြင်း နည်းလမ်း(၂)သွယ်ဖြင့် ၂၀၂၂ခုနှစ် မေလဆန်းမှစ၍ အညွှန်းကိန်း စစ်‌တမ်းကောက်ယူခဲ့ပါသည်။

           ထိုသို့ စစ်တမ်းကောက်ယူရာတွင် မိတ္ထီလာခရိုင်ဦးစီးမှူးရုံး၊ စားသုံးသူရေးရာဌာနခွဲမှ ပြည်သူ (၃၉)ဦး၏ e-mail လိပ်စာများနှင့် Messenger များသို့ Online Survey Link အား ပေးပို့၍ Online မှ တဆင့် ကောက်ယူခဲ့ပြီး၊ တိုက်ရိုက်မေးမြန်းခြင်း (၅၀) ဦးအား (မိတ္ထီလာ/ရမည်းသင်း)  ခရိုင်အတွင်းရှိ လုပ်ငန်းအုပ်စုအလိုက်၊ နယ်ပယ်အလိုက် ခွဲခြမ်းစိတ်ဖြာ၍ မြို့နယ်အလိုက် တာဝန်ပေးအပ်ထားသော မြို့နယ်တာဝန်ခံများနှင့် ဝန်ထမ်းများမှ စနစ်တကျ သွားရောက်ကွင်းဆင်း ကောက်ယူခဲ့ပါသည်။

          စစ်တမ်းကောက်ယူရာတွင် ပြည်သူများသို့ စားသုံးသူအသိပညာပေးမှုလုပ်ငန်းများ၊ စားသုံးသူ ထိခိုက်နစ်နာမှုနှင့်စပ်လျဉ်း၍ ကုစားမှုအစီအစဉ်များ၊ ကုန်အညွှန်းအမှတ်အသားနှင့် စပ်လျဉ်း၍ စားသုံးသူများ သိရှိရမည့် သတင်းအချက်အလက်များ၊ စားသုံးသူကာကွယ်‌ရေးဥပဒေပါ စားသုံးသူအခွင့်အ‌ရေးများနှင့် ပြဌာန်းချက်များအပေါ် သိရှိမှုအခြေအနေစသည့်အချက်များကို အခြေခံသည့် မေးခွန်း (၄၃)ခု ပါဝင်သော စစ်တမ်းမေးခွန်းလွှာအား စားသုံးသူပြည်သူများက မိမိတို့၏ထင်မြင်ယူဆချက်များအား လွတ်လပ်စွာဖြေကြားခဲ့ကြကြောင်းနှင့် လိုအပ်သောအကြံပြုချက်များကိုလည်း ထည့်သွင်းရေးသားခဲ့ကြကြောင်း သိရှိရပါသည်။

DOCA(မန္တလေး)

 

“မိတ္ထီလာခရိုင်တွင်း  ရွှေတောင် - ၁၀ ထွက်နှုန်းကောင်း ဝါစိုက်တောင်သူများနှင့် တွေ့ဆုံ”

            စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်ချက်ဖြင့် မိတ္ထီလာခရိုင်ဦးစီးမှူးရုံးမှ ဒုဦးစီးမှူး ဦးဖြိုးဓနလင်း၊ မြို့နယ်စိုက်ပျိုးရေးဦးစီးဌာနမှ ကန်တောင်ရှေ့တန်း စခန်းတာဝန်ခံ ဦးနေဖြိုးသူနှင့် မြေစာရင်းဦးစီးဌာနတို့ ပူးပေါင်း၍ မိတ္ထီလာမြို့ ကန်တောင်ရှေ့တန်းစခန်းအတွင်းရှိ ခင်တဲကျေးရွာအုပ်စု အောင်ကန်ကျေးရွာမှ ဝါ (၃) ဧက စိုက်ပျိုးထားသော ဦးအောင်စိုး၊ ဦးဌေးအောင်တို့အားလည်းကောင်း၊လှည်းပွဲ ကျေးရွာအုပ်စု ဝါ (၁၀) ဧကစီ စိုက်ပျိုးထားသော ဦးဝင်းမြင့်၊ ဦးဝင်းသန်း၊ ဦးခင်မောင်ရွှေတို့အား တွေ့ဆုံမေးမြန်းခဲ့ပါသည်။

          နိုင်ငံတော် စီမံကိန်းဖြင့် စိုက်ပျိုးထားသော ဝါ (၄၀၀) ဧကအား ဝါသီးနှံစိုက်ပျိုးဖြစ်ထွန်းမူ့အခြေအနေနှင့် ရေကြီးနစ်မြှပ်ထိခိုက် ပျက်စီးဆုံးရှုံးမှု့ရှိ/မရှိ ကွင်းဆင်းဆောင်ရွက်ခဲ့ပါသည်။ ဝါစိုက်ပျိုးသူတောင်သူများကို စိုက်ပျိုးရေးဦးစီးဌာနမှ ရွှေတောင် (၁၀)ဝါမျိုးနှင့် သွင်းအားစုများအား မန္တလေးတိုင်း အစိုးရအဖွဲ့မှ အစိုးရစျေးနှုန်းဖြင့် ထုတ်ယူခွင့်ပေးခဲ့ကြောင်း သိရပါသည်။

          ယခုအခါ တောင်သူများမှာသမရိုးကျ စိုက်ပျိုးခြင်းမဟုတ်ပဲမြို့နယ်စိုက်ပျိုးရေး၏ လမ်းညွှန်ချက်နှင့်အညီ သိပ္ပံနည်းကျ စိုက်ပျိုး၍ အပင်များ အောင်မြင်ဖြစ်ထွန်းပြီး အထွက်နှုန်းကောင်းမည် ဖြစ်ပါကြောင်း သိရှိရပါသည်။

          ယခုအချိန်အထိ ဝါပင်များမှာ ဖြစ်ထွန်းအောင်မြင်၍ ပျက်စီးဆုံးရှုံးမှုမရှိကြောင်း ဝါဂွမ်းများကို (၅)လပိုင်းအကုန်တွင် စတင်ကောက်ရမည်ဖြစ်ကြောင်း၊ ဝါစျေးနှုန်းနှင့် စျေးကွက်ကောင်းမွန်လိုကြောင်း သိရှိရပါသည်။

DOCA(မန္တလေး)

ဖျာပုံမြို့နယ်ရှိ စတိုးဆိုင်များအား ဈေးကွက်စောင့်ကြည့်စစ်ဆေးခြင်း

              စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဖျာပုံခရိုင်၊ ဖျာပုံမြို့နယ် ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် စည်ပင်သာယာရေးအဖွဲ့မှ ဝန်ထမ်းများ လိုက်ပါ၍ မေလ(၁၈)ရက်နေ့ နံနက်(၁၀:၀၀)နာရီတွင် မြို့ပေါ်(၅)လမ်းမကြီးရှိ စတိုးဆိုင်များသို့သွားရောက်၍  စားသုံးသူကာကွယ်ရေးဥပဒေ ပုဒ်မ(၁၅) (ခ) စစ်ဆေးရေးအရာရှိ၏ လုပ်ငန်းတာဝန်များအရ ကုန်အညွှန်းအမှတ်အသားတွင် ဖော်ပြရမည့်အချက်များ ပါဝင်မှုရှိ/မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

        ကွင်းဆင်းစစ်ဆေးရာတွင် ငှက်သိုက်အရည်ပုလင်းအမျိုးအစားတစ်ခုပေါ်တွင် မြန်မာဘာသာ စာသားများမပါရှိဘဲ ဗီယက်နမ်ဘာသာစာသားဖြင့်ဖော်ပြထားရှိသောကြောင့် ကုန်အညွှန်းအမှတ်အသားဖော်ပြခြင်းဆိုင်ရာ ပြည့်စုံမှုမရှိသည်ကို စစ်ဆေးတွေ့ရှိရသဖြင့် စားသုံးသူကာကွယ်ရေးဥပဒေ ပုဒ်မ(၄၁)(၄၃) နှင့် ကိုက်ညီမှုမရှိသည့်အတွက် ယင်းကုန်စည်အား ဆက်လက်ရောင်းချခြင်းမပြုရန် သတိပေးတားမြစ်ခဲ့ကြောင်းသတင်းရရှိပါသည်။

DOCA(ဧရာဝတီ)

ပြည်မြို့အတွင်း စိုက်ပျိုးရေး၊ မွေးမြူရေး၊ ကုန်ထုတ်လုပ်မှုမြင့်မားတိုးတက်ရေး ဆွေးနွေးပွဲများကျင်းပ

          ပဲခူးတိုင်းဒေသကြီးအတွင်း စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှုတိုးတက်မြင့်မားရေးလုပ်ငန်းညှိနှိုင်းအစည်းအဝေးတွင် ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ်မှ '' မြို့နယ်တစ်မြို့နယ်လျှင် စိုက်ပျိုးရေး၊ မွေးမြူးရေး နှင့် ကုန်ထုတ်လုပ်မှု တိုးတက်မြင့်မားရေးဆောင်ရွက်ရန်အတွက် တစ်လလျှင် ကျေးရွာ (၁၀)ရွာအား ရွေးချယ်ပြီးဆောင်ရွက်ရန်" လမ်းညွှန်မှာကြားချက်နှင့်အညီ စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်မှ မြို့နယ်တာဝန်ခံ ဦးထွန်းနိုင်လင်းနှင့် ဝန်ထမ်းများသည် မိတ်ဖက် ဌာနဆိုင်ရာများဖြစ်ကြသည့် ထွေ/အုပ်၊ စိုက်ပျိုးရေး၊ တိမွေးကု၊ ဆည်မြောင်း၊ ကျေးလက်လမ်း၊ ကျေးလက်ဖွံ့၊ လဝကနှင့် မြန်မာလယ်ယာဖွံ့ဖြိုးရေးဘဏ်တို့မှ တာဝန်ရှိသူများနှင့် ပူးပေါင်း၍ ပြည်မြို့နယ် မြောင်းဆုံကျေးရွာ၊ ဘုန်းတော်ကြီးကျောင်း ဓမ္မာရုံ၌ (၁၇.၅.၂၀၂၂)ရက်နေ့ နေ့လည် (၁၃:၀၀)နာရီမှ (၁၇:၃၀) နာရီတွင် စိုက်ပျိုးရေး၊ မွေးမြူရေး နှင့် ကုန်ထုတ်လုပ်မှုမြင့်မားတိုးတက်ရေး အလုပ်ရုံဆွေးနွေးပွဲအား ကျင်းပပြုလုပ်ခဲ့ပါသည်။

        ဆွေးနွေးပွဲတွင် ဦးထွန်းနိုင်လင်းက စားသုံးသူရေးရာဦးစီးဌာန ဖွဲ့စည်းရခြင်း၏ရည်ရွယ်ချက်၊ လက်ရှိဆောင်ရွက်လျှက်ရှိသော စားသုံးသူကာကွယ်ရေးလုပ်ငန်းများ၊ ပြည်တွင်း ကုန်သွယ်မှုဖွံ့ဖြိုးရေး လုပ်ငန်းများနှင့် သီးနှံစိုက်တောင်သူ အစုအဖွဲ့ဖွဲ့စည်းခြင်းဖြင့် မျိုးကောင်း၊ မျိုးသန့်များရယူ၍ တစ်စုတစ်စည်းတည်း စိုက်ပျိုးနိုင်ခြင်း၊ သွင်းအားစုများကို ဈေးနှုန်း ချိုသာစွာဖြင့် ကုမ္ပဏီမှ တိုက်ရိုက်ရယူနိုင်ခြင်း၊ နည်းပညာများအား တစ်စုတစ်စည်းတည်း ရယူနိုင်ခြင်း၊ ထုတ်ကုန်ကို စုစည်းထားနိုင်ပြီး ရောင်းသူဈေးကွက်/ တောင်သူဈေးကွက် ဖော်ဆောင်နိုင်ခြင်း၊ Contract Forming စနစ်ဆောင်ရွက်နိုင်ခြင်း၊ စက်မှုလယ်ယာစနစ် အဆင့်မြင့် လယ်ယာစနစ်ဖော်ဆောင်နိုင်ခြင်း၊ ချေးငွေများရယူ၍  လယ်ယာသုံးစက်ကရိယာများဝယ်ယူနိုင်ခြင်း၊ အရည်အသွေးကောင်းသီးနှံများ ထုတ်လုပ်လာနိုင်သဖြင့် ပြည်ပဈေးကွက်သို့ ထိုးဖောက်နိုင်၍ တောင်သူ၏ ဘဝ အဆင့်အတန်းမြင့်လာနိုင်မှာဖြစ်ကြောင်း တောင်သူ (၇၀)ဦးတို့အား အသိပညာပေး ဆွေးနွေး ဟောပြောခဲ့ကြောင်း သိရှိရပါသည်။

DOCA(ပဲခူး)

ရွှေဘိုခရိုင်၌ ဆီနှင့်ကုန်မျိုးစုံရောင်းဝယ်ရေးလုပ်ငန်းရှင်နှင့်တွေ့ဆုံ၍ အသိပညာပေးဆွေးနွေး

             စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးဦးဆောင်သောဝန်ထမ်းများအဖွဲ့သည် မေလ(၂၀)ရက်နေ့၊ နံနက်(၁၁:၀၀)နာရီအချိန်တွင် ရွှေဘိုမြို့၊ အမှတ်(၆)ရပ်ကွက်ရှိ ထွန်းဆီနှင့် ကုန်မျိုးစုံရောင်းဝယ်ရေးလုပ်ငန်းရှင်နှင့် တွေ့ဆုံဆွေးနွေးခဲ့ရာ  စားသုံးဆီများဖြန့်ဖြူးရောင်းချရာ၌ စားသုံးဆီအရည်အသွေးနှင့် ချိန်တွယ်သည့်ပိဿာကိုက်ညီမှုရှိစေရေး၊ စားသုံးသူများ ဘေးအန္တရာယ်ကင်းရှင်းစေရန်အတွက် ဖော်ပြရန်လိုအပ်သော ကုန်အညွှန်းအမှတ်အသားအချက်အလက်များ ပြည့်စုံမှုရှိစေရေး၊ စားသုံးသူကာကွယ်ရေးဉပဒေပါ စားသုံးသူအခွင့်အရေး (၈)ချက်နှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်စည်နှင့်စပ်လျဉ်း၍ အာမခံချက်ပေးခြင်း၊ ကုန်စည်နှင့်စပ်လျဉ်း၍ အာမခံချက်ပေးထားမှုအပေါ် စားသုံးသူကတောင်းဆိုနိုင်သည့်အခွင့်အရေး၊ ကုန်စည် (သို့မဟုတ်) ဝန်ဆောင်မှုအပေါ်တာဝန်ရှိမှု၊ ကုန်အညွှန်းအမှတ်အသားဖော်ပြခြင်းအကြောင်းများကို အကျယ်တဝင့်ဆွေးနွေးခဲ့ပြီး  စားသုံးသူရေးရာဦးစီးဌာနနှင့် ပတ်သက်သော သတင်းအချက်အလက်များအား သိရှိစုံစမ်းလိုလျှင် www.doca.gov. mm website နှင့် DOCA Myanmar Moblie Application တွင် ဝင်ရောက်လေ့လာနိုင်ကြောင်း၊ စားသုံးသူရေးရာဦးစီးဌာန Facebook Page တွင်လည်း ကြည့်ရှုနိုင်ကြောင်း၊ Consumer Call Centerများသို့ ဆက်သွယ်စုံစမ်းနိုင်ကြောင်းနှင့် ကုန်စည်နှင့်ဝန်ဆောင်မှုများကြောင့် စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုများ ဖြစ်ပေါ်ခဲ့ပါက တိုင်ကြားနိုင်ကြောင်း အသိပညာပေးဆွေးနွေးခဲ့ပါသည်။

DOCA(စစ်ကိုင်း)

မြိတ်မြို့၊ ဆိပ်ငယ်ရပ်၊ စည်ပင်သာယာစျေးကြီး၌ အသိပညာပေးဟောပြောဆွေးနွေး

            တနင်္သာရီတိုင်း‌ဒေသကြီး၊ စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ဝန်ထမ်းများသည် စားသုံးသူကာကွယ်ရေးလုပ်ငန်းများ ခိုင်မာတိုးတက်စေရေး၊ စားသုံးသူများ ဘေးအန္တရာယ်ကင်းရှင်းရေးအတွက်ရည်ရွယ်၍ (၂၀.၅.၂၀၂၂)ရက်နေ့၊ နေ့လည်(၁း၀၀)နာရီအချိန်တွင် မြိတ်မြို့၊ ဆိပ်ငယ်ရပ်၊ စည်ပင်သာယာစျေးအတွင်းရှိ အစည်းအဝေးခန်းမ၌ စားသောက်ကုန်၊ အလှကုန်နှင့် အိမ်သုံးဆေးဝါးများ ရောင်းချနေသူများအား အသိပညာပေးဟောပြောဆွေးနွေးခြင်း ဆောင်ရွက်ခဲ့ပါသည်။

          ဟောပြောဆွေးနွေးရာတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက်အပါအဝင် စျေးကွက်အတွင်းရောင်းချနေ‌သော ကုန်ပစ္စည်းများတွင် ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြခြင်းများ၊ စားသုံးသူကာကွယ်ရေးဥပဒေပါ စားသုံးသူများ၏ ရရှိနိုင်သောအခွင့်အရေး(၈)ချက်နှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ဘေးအန္တရာယ်ကင်းရှင်းသောကုန်စည်များ ရောင်းချနိုင်ရေးတို့ကို ပြောကြားပြီး ကုန်အညွှန်းအမှတ်အသား ဖော်ပြထားသော အသိပညာပေးလက်ကမ်းစာစောင်များဖြန့်ဝေပေးခြင်း ဆောင်ရွက်ခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

ဖျာပုံမြို့နယ် အစားအသောက်နှင့် ဆေးဝါးကြီးကြပ်ရေးအဖွဲ့မှ ဆေးဝါးအရောင်းဆိုင်များ တွင် တရားမဝင်ဆေးဝါးများအား ကွင်းဆင်းစစ်ဆေး

         ဧရာဝတီတိုင်းဒေသကြီး ၊ဖျာပုံခရိုင် ၊ဖျာပုံမြို့နယ်အတွင်းရှိ ဆေးနှင့်ဆေးပစ္စည်းအရောင်းဆိုင်များအား ခရိုင်တိုင်းရင်းဆေးဦးစီးဌာနမှ ဦးဆောင်၍  မြို့နယ်အစားအသောက်နှင့် ဆေးဝါးကြီးကြပ်ရေးအဖွဲ့ဖြစ်သော ထွေ/အုပ်၊ ကျန်းမာရေး၊ စည်ပင်၊ မီးသတ်တပ်ဖွဲ့၊ သတင်းနှင့်ပြန်ကြားရေး၊ စားသုံးသူရေးရာဦးစီးဌာနတို့ လိုက်ပါ၍ မေ(၁၇)ရက်နေ့ နံနက်(၁၀:၀၀)နာရီအချိန်က မြို့နယ်အတွင်း တရားမဝင်ဆေးဝါးနှင့် ဆေးပစ္စည်းများ ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြသည်။

          အဆိုပါ ဆေးဆိုင်များတွင် အာရှရွှေကြယ် အဆစ်အမြစ်ရောင်ရောဂါသောက်ဆေးနှင့် Online ပေါ်တွင် ရောင်းချနေသည့် ရသေ့ဆေး သို့မဟုတ် ထိုင်းဗိန်းတောဆေး၊ Bella  Plus  Plaster များ၊ ထုတ်လုပ်သည့်နိုင်ငံ၊ ထုတ်လုပ်/တင်သွင်းသည့် ကုမ္ပဏီ၊ ဆေးဝါးမှတ်ပုံတင်အမှတ်များဖော်ပြခြင်းမရှိသည့် ဆေးနှင့်ဆေးပစ္စည်းများအား စားသုံးသူပြည်များ ဘေးအန္တရာယ်မရှိစေရေး၊ ဈေးကွက်အတွင်း ကျယ်ကျယ် ပြန့်ပြန့်ရောင်းချမှုရှိ/မရှိနှင့် အများပြည်သူကျန်းမာရေးအတွက်လည်းကောင်း၊ တရားဝင် အခွန်အခများပေးသွင်း၍ ရောင်းချနေသူများ၏ အကျိုးစီးပွားထိခိုက်နစ်နာမှုမရှိစေရေးအတွက်လည်းကောင်း၊ အရေးယူဆောင်ရွက်ရန် ကွင်းဆင်းစစ်ဆေးခဲ့ကြကြောင်း သိရသည်။

DOCA(ဧရာဝတီ)

ကရင်ပြည်နယ်၊ လှိုင်းဘွဲ့မြို့နယ်၊ ရွှေဂွန်းကျေးရွာရှိ စီးပွားရေးလုပ်ငန်းရှင်များအား ပြည်တွင်းထုတ်ကုန်များ ဖွံ့ဖြိုးတိုးတက်စေရန်အတွက် အသိပညာ‌ပေး ဆွေးနွေးပွဲကျင်းပ

           စားသုံးသူရေးရာဦးစီးဌာန၊ ကရင်ပြည်နယ်၊ ပြည်နယ်ဦးစီးမှူး ဦးသန်းဦးနှင့် ဝန်ထမ်းများသည် ၂၁-၅-၂၀၂၂ ရက် (စနေနေ့)၊ နံနက် ၀၉:၀၀ နာရီအချိန်တွင် ကရင်ပြည်နယ်၊ လှိုင်းဘွဲ့မြို့၊ ရွှေဂွန်းကျေးရွာ၌ စိုက်ပျိုးရေး၊ မွေးမြူရေးလုပ်ငန်းများ လုပ်ကိုင်သည့် စီးပွားရေးလုပ်ငန်းရှင်များနှင့်တွေ့ဆုံ၍ ဈေးကွက်စီးပွားရေးစနစ်နှင့်အညီ ပုဂ္ဂလိက ကဏ္ဍဖွံ့ဖြိုးတိုးတက်အောင် အားပေးမြှင့်တင်ဆောင်ရွက်ရန်နှင့် စားသုံးသူ ကာကွယ်ရေးနည်းဥပဒေအကြောင်းများ ကျယ်ကျယ်ပြန့်ပြန့် သိရှိနိုင်စေရေးအတွက် ဆွေးနွေးပွဲပြုလုပ်ခဲ့ကြောင်း သိရသည်။

          အဆိုပါဆွေးနွေးပွဲတွင် စားသုံးသူရေးရာဦးစီးဌာနမှ ပြည်နယ်ဦးစီးမှူး ဦးသန်းဦးက  ဌာန၏ မျှော်မှန်းချက်၊ ရည်မှန်းချက်များအကြောင်း ၂၀၂၂ခုနှစ်၊ ဇန်နဝါရီလ ၁၈ ရက်နေ့က ထုတ်ပြန်လိုက်သည့် စားသုံးသူကာကွယ်ရေးနည်းဥပဒေကို အကျယ်တဝင့်ရှင်းလင်းဆွေးနွေးပြီး၊ ပြည်တွင်းကုန်သွယ်မှုဖွံ့ဖြိုးရေး အထောက်အကူ ဖြစ်စေရန်အတွက် ရွှေဂွန်းကျေးရွာတွင် အဓိကအနေဖြင့် ပဲပုတ်နှင့် မြေပဲကို အများဆုံး စိုက်ပျိုးကြပြီး မတ်ပဲတို့ကိုပါ စိုက်ပျိုးသင့်ကြောင်း၊ ဈေးကွက်လေ့လာကြည့်ရာတွင် မတ်ပဲ သည် ပြည်ပမှ ဈေးကောင်းပေးသည့်ပဲဖြစ်ကြောင်း၊ စိုက်ပျိုးရေးကို ပိုမိုတိုးချဲ့ရန်လိုအပ်ပါက မိမိဒေသထဲမှာ စိုက်ပျိုးရေးသိပ္ပံသင်တန်းတက်ထားသည့် လူငယ်နှင့်ပူးပေါင်း၍ စိုက်ပျိုးရေးလုပ်ငန်းများ လုပ်ကိုင်လျှင် ပိုမိုကောင်းမွန်လာမည်ဖြစ်ပါကြောင်း၊ စားသုံးဆီနှင့်ပတ်သက်၍ ကုန်အညွှန်းအမှတ်အသားဖော်ပြထားသည့် ဆီကိုသာ စားသုံးသင့်ကြောင်း၊ စားသုံးသူ ကာကွယ်ရေးနှင့် ပြည်တွင်းကုန်သွယ်မှုဆိုင်ရာ အချက်အလက်များကို သိရှိလိုပါက မိမိတို့ဌာနနှင့် ဆက်သွယ်ဆောင်ရွက်နိုင်ပါကြောင်း ရှင်းလင်းပြောကြားခဲ့ပြီး တက်ရောက်လာသူများက သိလိုသည်များကို မေးမြန်းရာ ပြည်နယ်ဦးစီးမှူးက ပြန်လည်ရှင်းပြခဲ့ပြီး နေ့လယ် ၁၃:၃၀ နာရီအချိန်တွင် ဆွေးနွေးပွဲကို ရုတ်သိမ်းခဲ့ကြောင်း သိရပါသည်။

DOCA(ကရင်)  

 

ဓနုဖြူမြို့နယ် ထီကွေ့ကျေးရွာတွင်  ပြည်သူများအား စားသုံးသူကာကွယ်ရေး အသိပညာပေး ဟောပြောပွဲ အောင်မြင်စွာကျင်းပပြီးစီး

           စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဓနုဖြူမြို့နယ်၊ မြို့နယ်ဦးစီးမှူး ဦးဝင်မင်းစိုးနှင့် ဝန်ထမ်းများသည် (၂၃.၅.၂၀၂၂) ရက်နေ့ နံနက် (၁၀:၃၀) မှ (၁၂:၃၀) နာရီအချိန်ထိ ဌာနဆိုင်ရာများနှင့် ပူးပေါင်း၍ ထီကွေ့ ပြည်သူ ၁၈ ဦးအား စားသုံးသူကာကွယ်ရေး အသိပညာပေးဟောပြောပွဲ ပြုလုပ်ခဲ့ကြပါသည်။        

                အဆိုပါ အသိပညာပေးဟောပြောပွဲတွင် ဌာနဆိုင်ရာ မိတ်ဖက် ဌာနများဖြစ်သော ကျန်းမာရေးဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ပါဝင်ပြီး အသိပညာပေး ဟောပြောမှုများ ပြုလုပ်ခဲ့ကြပါသည်။

              ၎င်း ဟောပြောပွဲတွင် ဓနုဖြူမြို့နယ်မြို့နယ်ဦးစီးမှူး ဦးဝင်းမင်းစိုးမှ စားသုံးသူရေးရာဦးစီးဌာန၏ စားသုံးသူကာကွယ်ပေးရေးဥပဒေများအကြောင်း၊ စားသုံးသူအခွင့်အရေးနှင့် စားသုံးသူများလိုက်နာရမည့် တာဝန်များအကြောင်း၊  စားသုံးသူများ ကုန်စည်ကို ရွေးချယ်ဝယ်ယူ အသုံးပြုရာတွင် ကုန်အညွှန်းအမှတ်အသား ပါဝင်သော ကုန်စည်များကိုသာ ရွေးချယ်ဝယ်ယူကြရန်နှင့်  ကုန်စည်ဝယ်ယူအသုံးပြုရာတွင် နစ်နာဆုံးရှုံးမှုရှိလာပါက နစ်နာဆုံးရှုံးမှုအတွက် စားသုံးသူရေးရာဦးစီးဌာနသို့ တိုင်ကြားနိုင်ကြောင်း၊ စားသုံးသူကာကွယ်ပေးရေးလုပ်ငန်းများအကြောင်း သိရှိလိုပါကလည်း doca.gov.mm Website တွင် ဝင်ရောက်လေ့လာနိုင်ကြောင်း အသိပညာပေး ဆွေးနွေးခဲ့ပါသည်။ တက်ရောက်လာသော ပြည်သူများမှ သိရှိလိုသည်များကို မေးမြန်းကြရာ မြို့နယ်ဦးစီးမှူးမှ အပြန်အလှန်ရှင်းလင်း ဖြေကြားပြီး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(ဧရာဝတီ)

Pages

Subscribe to RSS - သတင်းနှင့် လှုပ်ရှားမှုများ