စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့်ခရိုင်ဦးစီးမှူးတို့၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးတွင် တွဲဖက်တာဝန်ထမ်းဆောင်နေသော ဂန့်ဂေါခရိုင်ဦးစီးမှူး ဒေါ်မွန်မွန်စိုး၊ နှင့် ဒု-ဦးစီးမှူး ဒေါ်သူဇာကျော်တို့သည် စားသုံးသူကာကွယ်ရေးဥပဒေအကြောင်းကို ကျေးလက်ဒေသနေ မိဘပြည်သူများသိရှိစေရန်အတွက်ရည်ရွယ်၍ (၁၇.၅.၂၀၂၃)ရက်နေ့ နံနက် (၁၁:၀၀)နာရီအချိန်တွင် ပခုက္ကူမြို့နယ်၊ ကျွန်းညိုကြီး(ရွာသစ်)ကျေးရွာ၌ စားသုံးသူမိဘပြည်သူ (၁၀၅)ဦးအား စားသုံးသူကာကွယ်ရေးအသိပညာပေးဟောပြောဆွေးနွေးခဲ့ပါသည်။
ကျေးရွာအုပ်ချုပ်ရေးမှူးက ကြိုဆိုနှုတ်ခွန်းဆက်စကားပြောကြားခဲ့ပြီးနောက် ဂန့်ဂေါခရိုင်ဦးစီးမှူး ဒေါ်မွန်မွန်စိုးက စားသုံးသူရေးရာဦးစီးဌာန၏သမိုင်းကြောင်း၊ ဌာနဖြစ်ပေါ်လာပုံအဆင့်ဆင့်၊ ဌာနမှဆောင်ရွက်နေသော လုပ်ငန်းဆောင်ရွက်ချက်များ၊ စားသုံးသူကာကွယ်ရေးဥပဒေဆိုသည်မှာ စားသုံးသူ၏အခွင့်အရေးနှင့်အကျိုးစီးပွားကို ကာကွယ်ပေးပြီး စားသုံးသူနှင့်စီးပွားရေးလုပ်ငန်းရှင်တို့အကြား သတ်မှတ်ဆောင်ရွက်ပေးသည့်မျှတမှုရှိသော လုပ်ငန်းစဉ်ကို ဆိုလိုခြင်းဖြစ်ကြောင်း၊ယခုလို စားသုံးသူကာကွယ်ရေးအသိပညာပေး ဟောပြောပွဲကျင်းပခြင်းဖြင့်စားသုံးသူ၏အခွင့်အရေးကို သိရှိနားလည်ပြီးအပြည့်အဝ တောင်းဆိုတတ်ပြီး ကုန်စည်(သို့)ဝန်ဆောင်မှုများ၊ အစားအသောက်/ အသုံးအဆောင်များကို ဝယ်ယူ/အသုံးပြုသည့်အခါ ကုန်အညွှန်းအမှတ်အသား များပြည့်စုံစွာပါရှိသည့် ကုန်ပစ္စည်း/ အစားအသောက်များကိုရွေးချယ်ဝယ်ယူ တတ်ကြောင်း၊စားသုံးသူရေးရာ ဦးစီးဌာနအနေဖြင့် စားသုံးသူပြည်သူများအပေါ်အကျိုးပြုကာကွယ်ပေးနေသောဌာန ဖြစ်ကြောင်းဆွေးနွေးခဲ့ပါသည်။
ဆက်လက်၍ ကျေးရွာနေ မိဘပြည်သူများအနေဖြင့် စားသုံးသူ၏အခွင့်အရေးများကို နစ်နာဆုံးရှုံးသည်ဟု ထင်မြင်ယူဆမိပါက ပြေစာဖြတ်ပိုင်း၊ သက်သေအထောက်အထားများနှင့်တကွ သက်ဆိုင်ရာတိုင်းဒေသကြီး/ပြည်နယ် CICC ရုံးများ၊ အင်တာနက်စာမျက်နှာ၊ မိုဘိုင်း Application၊ Facebook စာမျက်နှာ၊ www.doca.gov.mm Website စာမျက်နှာ၊ Consumer CallCenter (1535) တို့မှတစ်ဆင့်တိုင်ကြားနိုင်ကြောင်း၊ မိမိတို့၏ ပခုက္ကူခရိုင်ဦးစီးမှူးရုံးသို့လည်း အချိန်မရွေးလာရောက်တိုင်ကြားနိုင်ကြောင်း၊ မိဘပြည်သူများထံသို့ ဖြန့်ဝေထားသောလက်ကမ်းစာစောင်များတွင် ရုံးဖုန်းနံပါတ်များပါရှိကြောင်း၊ ယခုလို စားသုံးသူအသိပညာပေးဟောပြောပွဲကို တက်ရောက်ခြင်းအားဖြင့် အသိပညာ ဗဟုသုတများ ရရှိမည်ဖြစ်ကြောင်း၊ ဟောပြောပွဲ မတက်ရောက်နိုင်သော မိသားစုဝင်များ၊ မိတ်ဆွေအပေါင်းအသင်းများကို ပြန်လည်မျှဝေပေးပါက တစ်ဦးမှတစ်ဦးလက်ဆင့်ကမ်းရင်း အသိပညာများတိုးပွားလာမည်ဖြစ်ကြောင်း၊ ဌာနအနေဖြင့်လည်း ဘက်ပေါင်းစုံမှ ပြည်သူများကိုများ စွာအကျိုးပြုဆောင်ရွက်ပေးလျက်ရှိကြောင်း အသိပညာပေးဟောပြောဆွေးနွေးပါသည်။
ဒု-ဦးစီးမှူး ဒေါ်သူဇာကျော်က ဆွေးနွေးရာတွင် စားသုံးသူရေးရာဦးစီးဌာန၏ ဆောင်ပုဒ်ဖြစ်သော "စားသုံးသူအခွင့်အရေး ဦးစားပေး" ဟူသည့်အတိုင်း စားသုံးသူ၏အခွင့်အရေးနှင့်တာဝန်များကို ဦးစားပေးရှင်းလင်းခဲ့ကြောင်း၊ ပြည်သူတိုင်းသည် စားသုံးသူဖြစ်ပြီး စားသုံးသူတိုင်းတွင် စားသုံးသူအခွင့်အရေးရှိကြောင်း၊ မိမိ၏အခွင့်အရေးကို သဘောပေါက်နားလည်မှသာ တောင်းဆိုနိုင်မည်ဖြစ်ကြောင်း၊ အစားအသောက်/ ကုန်ပစ္စည်း(သို့)ဝန်ဆောင်မှုကို ဝယ်ယူအသုံးပြုလျှင် စိတ်ကျေနပ်မှုရှိရန်လိုအပ်ကြောင်း၊ ဘေးအန္တရာယ်ကင်းရှင်းစွာအသုံးပြုနိုင်ကြောင်း၊ သတင်းအချက်အလက်ရယူခွင့်ရှိကြောင်း၊ စိတ်ကြိုက်ရွေးချယ်နိုင်ကြောင်း၊ နစ်နာဆုံးရှုံးမှုကိုတင်ပြခွင့်၊ တိုင်ကြားခွင့်၊ ကုစားခွင့်များရှိကြောင်း၊ အသိပညာဗဟုသုတများ သိရှိလေ့လာနိုင်ကြောင်း၊ ကောင်းမွန်သော ပတ်ဝန်းကျင်တွင် နေထိုင်ခွင့်များပါရှိကြောင်းရှင်းလင်းဆွေးနွေးပါသည်။
စားသုံးသူ၏တာဝန်များဆွေးနွေးရာတွင် စားသုံးသူများသည် မိမိဝယ်ယူအသုံးပြုသည့် ကုန်ပစ္စည်း/ဝန်ဆောင်မှု/အစားအသောက်နှင့်ပတ်သက်၍ လမ်းညွှန်ချက်များကို လိုက်နာဆောင်ရွက်ရန်၊ တန်ဖိုးနှင့်အညီပေးချေရန်၊ မဟုတ်မမှန်ပြောဆိုမှုများရှောင်ကြဉ်ရန်၊ အငြင်းပွားမှုညှိနှိုင်းနေစဉ် မဟုတ်မမှန် ပြောဆို/ရေးသားမှုများရှောင်ကြဉ်ရန် စသည့်အချက်များပါဝင်ကြောင်း၊ တက်ရောက် လာသူ ကျေးရွာသူ/သားများအနေဖြင့် စားသုံးသူ၏အခွင့်အရေးနှင့်တာဝန်များကိုသိရှိ နားလည်ပြီး အခွင့်အရေးများကို တောင်းဆိုနိုင်ပါကြောင်း၊ တာဝန်များကိုလည်း လိုက်နာ၍ အသိပညာဗဟုသုတ များဆထက်ထမ်းပိုးတိုပွားပြီး ကောင်းကျိုးများစွာရရှိနိုင်ပါကြောင်း အသိပညာပေးဟော ပြော ဆွေးနွေးခဲ့ပါသည်။
DOCA(မကွေး)
