သတင်းနှင့် လှုပ်ရှားမှုများ

     မွန်ပြည်နယ်၊ မော်လမြိုင်မြို့နယ်၊ လှိုင်ရပ်ကွက်၌ (၁၈.၅.၂၀၂၃) ရက်နေ့ ၊နံနက် (၁၁:၀၀) အချိန်တွင် မွန်ပြည်နယ်စားသုံးသူရေးရာဦးစီးဌာနမှ မော်လမြိုင်မြို့နယ်တာဝန်ခံ ဦးအောင်ကိုကိုနှင့် ဝန်ထမ်းများအဖွဲ့သည်   မော်လမြိုင်မြို့အတွင်းရှိ လှိုင်ရပ်ကွက်အုပ်ချုပ်ရေးမှူးတို့နှင့် ပူးပေါင်း၍ လှိုင်ရပ်ကွက်နေ ပြည်သူများအား စားသုံးသူကာကွယ်ရေး အသိပညာပေးဟောပြောပွဲ ကျင်းပကြောင်း သိရသည်။

      အဆိုပါ စားသုံးသူကာကွယ်ရေးအသိပညာပေးရာတွင်  စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဒုတိယဦးစီးမှူး ဒေါ်ခင်ကြည်က  စားသုံးသူပြည်သူများအား ဘေးအန္တရာယ်ကင်းရှင်းစေရေး၊ စားသုံးသူများ ရသင့်ရထိုက်သည့် အခွင့်အရေးများအပြည့်အဝရရှိစေရေး၊ စားသုံးသူများက ကုန်စည်နှင့် ဝန်ဆောင်မှုများ ရွေးချယ်ဝယ်ယူတတ်စေရေးနှင့် စီးပွားရေးလုပ်ငန်းရှင်များကလည်း  ကုန်စည်နှင့်ဝန်ဆောင်မှုများအား လုပ်ငန်းဆောင်ရွက်ရာတွင်  တာဝန်ယူတတ်စေရေး၊ ကုန်စည်ပေါ်တွင် ကုန်အညွှန်းအမှတ်အသားဖော်ပြမှု ပြည့်စုံစေရေး၊ ကုန်စည်တွင် ကုန်အညွှန်းအမှတ်အသား မပြည့်စုံပါက စီးပွားရေးလုပ်ငန်းရှင်များကလည်း ပြည့်စုံစွာဖော်ပြနိုင်ရန် လိုအပ်သဖြင့်ဌာနသို့ လာရောက်ဆောင်ရွက်နိုင်ရေး၊  စားသုံးသူများ အခွင့်အရေး တစ်ရပ်ဖြစ်သော နစ်နာဆုံးရှုူံးမှုအပေါ် အရေးဆိုတင်ပြ တိုင်ကြားနိုင်ရေးအတွက်  စားသုံးသူရေးရာဦးစီးဌာနတွင် တိုင်ကြားနိုင်ပါကြောင်း၊ ၎င်းတိုင်ကြားရာတွင် တိုင်ကြားနိုင်သည့် နည်းလမ်းများဖြစ်သည့် www.doca.gov.mm တွင်လည်းကောင်း၊ Consumer call Center (1535) သို့ ခေါ်ဆို၍လည်းကောင်း၊ CICC- Nay Pyi Taw Facebook Page တွင်လည်းကောင်း၊ Consumerwebsitedoca@gmail.com နှင့် ciccnpt@gmail.com တို့သို့လည်းကောင်း၊ Doca Myanmar Mobile Application တွင်ဖြစ်စေ၊ လူကိုယ်တိုင်ဖြစ်စေ (သို့မဟုတ်)  စာဖြင့်ဖြစ်စေ၊   ဖုန်းဖြင့်ဖြစ်စေနှင့် စားသုံးသူကာကွယ်ရေးဆိုင်ရာအသင်းအဖွဲ့များမှတစ်ဆင့်ဖြစ်စေ တိုင်ကြားရန် ဆွေးနွေး ဟောပြောခဲ့သည်။

      ထို့သို့ ဟောပြောပြီးနောက် အပြန်အလှန်ဆွေးနွေးခြင်းပြုလုပ်ခဲ့ရာ  တက်ရောက်သည့် ပြည်သူများက  မိမိတို့ရပ်ကွက်အခြေအနေနှင့် ကုန်စည်ပစ္စည်းဝယ်ယူရာတွင် စိတ်ကျေနပ်မှု မရှိမှုအား တင်ပြခြင်း၊ ကုန်စည်၏ အလေးချိန်မမှန်မကန် ရောင်းချနေမှုအား တွေ့ရှိရ၍ တင်ပြခြင်း၊ ပြန်လည်ဖြေကြားခြင်း၊ တက်ရောက်သူ (၃၀)ဦးအား လက်ကမ်းစာစောင်ဖြန့်ဝေပေးခြင်းတို့  ဆောင်ရွက်ခဲ့ကြောင်း သိရှိရပါသည်။

DOCA(မွန်)

၂၀၂၃ ခုနှစ်၊ မေလ ၁၇ ရက်နေ့၊ နံနက် ၀၈:၀၀ အချိန်တွင် တနင်္သာရီတိုင်းဒေသကြီး ဦးစီးမှူးရုံးမှ စစ်ဆေးရေးအရာရှိနှင့် ဝန်ထမ်းများသည် တနင်္သာရီတိုင်းဒေသကြီး၊ ထားဝယ်မြို့၊ ကမ်းနားပျံကျစျေးအတွင်းရှိ အသားငါးစျေးတန်းအား သက်ဆိုင်ရာ ဌာနများဖြစ်သည့် မြန်မာနိုင်ငံမှုခင်းရဲတပ်ဖွဲ့၊ ပြည်သူ့ကျန်းမာရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ ငါးလုပ်ငန်းဦးစီးဌာန၊ စည်ပင်သာယာရေးအဖွဲ့တို့နှင့်အတူ ပူးပေါင်း၍ စျေးကွက် စောင့်ကြည့် စစ်ဆေးခြင်း ဆောင်ရွက်ခဲ့ပါသည်။

ထိုသို့ဆောင်ရွက်ရာတွင် စျေးကွက်အတွင်းရောင်းချနေသော အသား၊ ငါးနှင့် ပုစွန်များအား စားသုံးသူပြည်သူများ ဘေးအန္တရာယ်ကင်းရှင်းစွာ ဝယ်ယူစားသုံးနိုင်စေရန်အတွက် အသား၊ ငါးနှင့် ပုစွန်များတွင် ​​​​​ဖော်မလင်ဆေးရည်များ ထိုးနှံရောင်းချခြင်း ရှိ/မရှိကို အစားအသောက်နှင့်ဆေးဝါးကွပ်ကဲရေးဦးစီးဌာနမှ mobile laboratory ယာဉ်ဖြင့် စစ်ဆေးခြင်းများနှင့် အချိန်အတွယ်အလေးချိန် ပြည့်မီမှန်ကန်စွာ ရောင်းချနိုင်စေရေး စစ်ဆေးခြင်းများ ဆောင်ရွက်ခဲ့ကြောင်း သတင်းရရှိပါသည်။

 DOCA (တနင်္သာရီ)

စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဝန်ထမ်းများသည် မိတ်ဖက်ဌာနများဖြစ်သော မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ရဲတပ်ဖွဲ့တို့နှင့် ပူးပေါင်း၍ ၂၀၂၃ခုနှစ်၊ မေလ ၁၅ ရက်နေ့၊ နေ့လယ်(၁၃:၀၀)နာရီအချိန်တွင် လွိုင်ကော်မြို့၊ သီရိမင်္ဂလာဈေးအတွင်းရှိ ဆေးနှင့်ဆေးအမျိုးမျိုး ရောင်းချနေသည့်ဆေးဆိုင်များသို့ စားသုံးသူကာကွယ်ရေးဥပဒေ၊ အခန်း(၁၈) ပါ ကုန်အညွှန်းအမှတ်အသား သတ်မှတ်ချက်များနှင့် ကိုက်ညီမှုမရှိသည့် Lutein Ester Blueberry Salt Alga ဆေး၊ LB အမှတ်တံဆိပ်ပါ Lutein Bilberry Plus ဆေးနှင့် အရောင်ခွဲခြားနိုင်မှု မရှိသူများ (Colour Blind) အတွက် မျက်ကပ်မှန်များနှင့် အရည်အသွေးနိမ့်မျက်မှန်များ တရားမဝင် တင်သွင်းရောင်းချခြင်း ရှိ/မရှိ ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

ထိုသို့ဈေးကွက်စောင့်ကြည့်စစ်ဆေးရာတွင် သီရိမင်္ဂလာဈေးအတွင်းရှိဆေးဆိုင်များတွင် အဆိုပါဆေးတို့မှာ ဈေးနှုန်းအလွန်မြင့်မားခြင်း၊ ကုန်အညွှန်းအမှတ်အသားများမပါရှိခြင်းတို့ကြောင့် ဆေးဆိုင်ပိုင်ရှင်များအနေဖြင့် တင်သွင်းရောင်းချခြင်း မရှိကြောင်းနှင့် စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုမရှိသော LUTEIN ESTER BLUEBERRY SALT ALGA ဆေး၊ LB အမှတ်တံဆိပ်ပါ Lutein Bilberry Plus ဆေးနှင့် အရောင်ခွဲခြားနိုင်မှုမရှိသူများ (Colour Blind) အတွက် မျက်ကပ်မှန်များနှင့် အရည်အသွေးနိမ့်မျက်မှန်များ တင်သွင်းရောင်းချဖြန့်ဖြူးခြင်းမရှိကြောင်း စစ်ဆေးတွေ့ရှိရပြီး ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုမရှိသည့် ကုန်စည်များနှင့် တရားမဝင် တင်သွင်းလာသည့်ကုန်စည်များကို ရောင်းချဖြန့်ဖြူးခြင်းမရှိကြောင်း သတင်းရရှိပါသည်။

 DOCA (ကယား)

    စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် စစ်ဆေးရေးအရာရှိနှင့်ဝန်ထမ်းများသည် ၂၀၂၃ခုနှစ်၊ မေလတွင် မိတ္ထီလာခရိုင်အတွင်း ဆေးနှင့်ဆေးပစ္စည်းအရောင်းဆိုင် (၂၇)ဆိုင်တွင် ဆေးဝါးမှတ်ပုံတင်ထားခြင်းမရှိသော မျက်စိ အား‌ဆေး (ဖြည့်စွက်စာ) LUTEIN ESTER BLUEBERRY SALT  ALGE ဆေးဝါးအား စျေးကွက်အတွင်း ဖြန့်ဖြူး‌ရောင်းချခြင်း ရှိ/မရှိ  စျေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

   ထိုသို့ကွင်းဆင်းစစ်ဆေးခဲ့ရာတွင် စစ်ဆေးရေးအရာရှိမှ ဆေးဆိုင်ပိုင်ရှင်များအား အစားအသောက်နှင့်ဆေးဝါးကွပ်ကဲရေးဦးစီးဌာနမှ ဆေးဝါးမှတ်ပုံတင်ထားခြင်းမရှိသော မျက်စိအားဆေး (ဖြည့်စွက်စာ) ဖြစ်သော LUTEIN ESTER BLUEBERRY SALT  ALGE ဆေးဝါးအား စျေးကွက်အတွင်း ရောင်းချမှုမပြုကြရန်၊ ထုတ်လုပ်သည့်နိုင်ငံ၊ ထုတ်လုပ်/တင်သွင်းသည့် ကုမ္ပဏီ၊ ဆေးဝါးမှတ်ပုံတင်အမှတ် Import Resgistration No. (IR) များ ဖော်ပြထားသော ဆေးနှင့်ဆေးပစ္စည်းများကို ရောင်းချကြရန်၊ စားသုံးသူကာကွယ်ရေးဥပ‌ဒေ(၂၀၁၉) ၊ အခန်း (၁၀) ပါ စီးပွားရေးလုပ်ငန်းရှင်၏တာဝန်များကို သိရှိလိုက်နာဆောင်ရွက်ရန် ကွင်းဆင်းစစ်ဆေးကာ အသိပညာပေးဆွေးနွေးခဲ့ပြီး၊ ဆေးနှင့်ဆေးပစ္စည်းအရောင်းဆိုင် (၂၇) ဆိုင်တွင် တရားမဝင်သော မျက်စိအားဆေး (ဖြည့်စွက်စာ)ဖြစ်သော LUTEIN ESTER BLUEBERRY SALT  ALGE ဆေးဝါးများ ရောင်းချမှုမရှိကြောင်း စစ်ဆေးတွေ့ရှိရပါသည်။

DOCA(မန္တလေး)

    ဧရာဝတီတိုင်းဒေသကြီး၊ ပုသိမ်မြို့၊ အစားအသောက်နှင့်ဆေးဝါးကွပ်ကဲရေးဦးစီးဌာန တိုင်းဦးစီးမှူး ၊ စားသုံးသူရေးရာဦးစီးဌာန၊ တိုင်းဦးစီးမှူးနှင့် လက်ထောက်ညွှန်ကြားရေးမှူးတို့သည် ငွေဆောင်မြို့နယ်ခွဲကျေးရွာတွင်း တရားဝင်မှတ်ပုံတင်ထားခြင်းမရှိသော ဆေးဝါးများရောင်းချနေ ကြောင်း တာဝန်သိပြည်သူတစ်ဦးမှ သတင်းပေးပို့မှုအပေါ် ငွေဆောင်မြို့နယ်ခွဲ အထွေထွေ အုပ်ချုပ်ရေးမှူးရုံးမှတာဝန်ရှိသူများ၊ မြန်မာနိုင်ငံရဲတပ်ဖွဲ့ဝင်များနှင့် အတူသွားရောက်စစ်ဆေးခဲ့ရာ တရားဝင်အထောက်အထားတင်ပြနိုင်ခြင်းမရှိသော နိုင်ငံခြားဖြစ်ဆေးဝါး Purtier Placental ငွေရောင်၊ အဖြူရောင်ကိုယ်ထည်ဘူး (1 x 60 PCS) ၊ C/O-New Zeland (၂) ဘူးအား တွေ့ရှိ၍ အဖွဲ့နှင့် သိမ်းဆည်းခဲ့ပါသည်။

    ထိုသို့ သိမ်းဆည်းခဲ့သည့် ဆေးဘူး (၂) ဘူးမှာ အများပြည်သူသုံးစွဲရန် မသင့်လျော်သောကြောင့် အကောက်ခွန်ဦးစီးဌာန၊ အထွေထွေအုပ်ချုပ်ရေးဦးစီးဌာန၊ ရဲတပ်ဖွဲ့၊ စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနစသည့် ဌာနစုံအဖွဲ့များဖြင့် ပုသိမ်မြို့နယ် အကောက်ခွန်ဦးစီးဌာနမှူးရုံးတွင် (၁၆.၅.၂၀၂၃) ရက်နေ့၊ နံနက် (၁၀:၀၀) နာရီတွင် လုပ်ထုံးလုပ်နည်းများနှင့်အညီ အဖွဲ့ဝင်များ ရှေ့မှောက်တွင် ဖျက်ဆီးခဲ့ကြောင်း သိရပါသည်။

DOCA(ဧရာဝတီ)