သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ မအူပင်ခရိုင်၊ စားသုံးသူရေးရာဦးစီးဌာန၊ မအူပင်ခရိုင်ဦးမှူးရုံးမှ ဒု-ခရိုင် ဦးစီးမှူး ဦးအောင်ဇော်ဦးနှင့် ဝန်ထမ်းများသည် ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာန၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ (၁၅.၅.၂၀၂၃)ရက်နေ့ နံနက် (၁၀:၀၀)နာရီအချိန်တွင် မအူပင်မြို့ပေါ်ရှိ ဆေးနှင့်ဆေးပစ္စည်းအရောင်းဆိုင်၊ မျက်ကပ်မှန်နှင့် မျက်စဉ်းဆေးရည်၊ မျက်စိဆေးအမျိုးမျိုးရောင်းချလျက်ရှိသော အရောင်းဆိုင်(၅)ဆိုင်သို့ သွားရောက်၍ ကောင်းမွန်သော ဆေးဝါးများ ရောင်းချမှုနှင့် ကုန်အညွှန်းအမှတ်အသားပြည်စုံစွာပါဝင်မှု ရှိ/မရှိအခြေအနေတို့ကိုဈေးကွက်စောင့်ကြည့်စစ်ဆေးခဲ့ကြပါသည်။                               

  ထိုသို့ကွင်းဆင်းစစ်ဆေးဆောင်ရွက်ရာတွင် လက်ကားအရောင်းဆိုင်ကြီးများနှင့် လက်လီဆိုင်များ ရောင်းချနေသော ဆေးဆိုင်များအနေဖြင့် ဆေးကုမ္ပဏီကြီးများမှ ဆေးများကို မှာယူရောင်းချရာတွင် အစား အသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်၊ ခွင့်ပြုချက်ပါဝင်သောဆေးနှင့် စားသုံးသူရေးရာဦးစီးဌာန၏ ထုတ်ပြန်ထားသော ကုန်အညွှန်းအမှတ်အသားဖော်ပြထားပြီး ကျန်းမာရေးဝန်ကြီးဌာနက ခွင့်ပြုထားသော ဆေးများကိုသာ ရောင်းချရန်နှင့် ကုန်အညွှန်းအမှတ်အသားမပြည့်စုံသောကုန်ပစ္စည်းများကို ရောင်းချခြင်း မပြုရန် ပြောကြားခဲ့ပြီးနောက် ခွင့်ပြုချက်၊ ထောက်ခံချက်မပါဝင်သော ကုန်စည်များကို ရောင်းချနေခြင်းတွေ့ရှိပါက သက်ဆိုင်ရာဌာနတို့၏ ဥပဒေများအတိုင်း ထိရောက်စွာအရေးယူဆောင်ရွက်သွားမည်ဖြစ်ကြောင်းနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များပါဝင်မှု မရှိသော ကုန်ပစ္စည်းများ ရောင်းချပါက စားသုံးသူကာကွယ်ရေး ဥပဒေအရလည်း အရေးယူခံရနိုင်ကြောင်း ရှင်းလင်းပြောကြားခဲ့ပြီး မြို့နယ်အတွင်းရှိ မျက်စိဆေးနှင့် မျက်ကပ်မှန်ဆေးအရောင်းဆိုင်(၅)ဆိုင်အား စစ်ဆေးခဲ့ကြောင်း သိရပါသည်။

     ညောင်တုန်းမြို့နယ် မြို့နယ်ဦးစီးမှူးဦးအောင်နှင့် ဝန်ထမ်းများ၊ ဓနုဖြူမြို့နယ်မှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများ၊ ပန်းတနော်မြို့နယ်မှ မြို့နယ်ဦးစီးမှူး ဦးပိုးဖြူပိုင်မင်းနှင့် ဝန်ထမ်းများသည်လည်း အလားတူပင် ကွင်းဆင်းစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

    (၁၆.၅.၂၀၂၃) ရက်နေ့ ၊ နေ့လယ် (၁၃ : ၀၀ ) နာရီအချိန်တွင် ပဲခူးတိုင်းဒေသကြီး (အရှေ့) ညောင်လေးပင်ခရိုင် ၊ ညောင်လေးပင်မြို့နယ် ၊ ပြန်ကြားရေးနှင့် လူထုအခြေပြု ဗဟိုခန်းမ၌ ပြန်ကြားရေးနှင့် ပြည်သူ့ဆက်ဆံ‌ရေးဦးစီးဌာန၊ စားသုံးသူရေးရာဦးစီးဌာနတို့ပူးပေါင်း၍ စားသုံးသူကာကွယ်ရေး အသိပညာပေး ဆွေးနွေးခဲ့ကြောင်း သိရှိရသည် ။

     အဆိုပါ အသိပညာပေးဆွေးနွေးပွဲတွင် စားသုံးသူရေးရာဦးစီးဌာန ၊ မြို့နယ်တာဝန်ခံမှ စားသုံးသူကာကွယ်ရေးဥပဒေ (၂၀၁၉) ပါ ပြဌာန်းချက်များအနက် စားသုံးသူအခွင့်အရေး (၈)ချက်အား ဆွေးနွေးခဲ့ပြီး စားသုံးသူအခွင့်အရေးများ ချိုးဖောက်ခံရပါက မိမိတို့ ဦးစီးဌာနက ဖွင့်လှစ်ထားသည့် ( Consumer Call Center -1535) သို့လည်းကောင်း ၊ ညောင်လေးပင်မြို့  ၊ စားသုံးသူရေးရာဦးစီးဌာန ၊ မြို့နယ်တာဝန်ခံရုံးတွင် ဖွင့်လှစ်ထားသည့်  စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ ( Consumer Information Complaint Center-CICC) သို့ လူကိုယ်တိုင်လည်းကောင်း ၊ တယ်လီဖုန်းဖြင့်လည်းကောင်း ဆက်သွယ်၍ လာရောက်တိုင်ကြားနိုင်ပါကြောင်းတို့ကို အကျယ်တဝင့်ဆွေးနွေးခဲ့ကြောင်း သိရှိရပါသည် ။

DOCA(ပဲခူး)

ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် ထုတ်ကုန်လုံခြုံစိတ်ချရမှုရှိစေရေးအတွက် ၁၈.၅.၂၀၂၃ ရက်နေ့တွင် ကြို့ပင်ကောက်မြို့မဈေးအတွင်းရှိ တိုင်းရင်းဆေးဆိုင်များသို့ လည်းကောင်း၊ ဈေးချိုမြောက်ဖက်ရပ်ကွက်၊ အရှေ့လမ်းမတော်လမ်းရှိ ဆေးနှင့်ဆေးပစ္စည်းအရောင်းဆိုင်များသို့လည်းကောင်း သွားရောက်၍ ဈေးကွက်စောင့်ကြည့်စစ်ဆေးခဲ့ပါသည်။

ဈေးကွက်မ‌ရောက်မီနှင့် ဈေးကွက်ရောက်ပြီးကုန်စည်များကို ဈေးကွက်စောင့်ကြည့်စစ်ဆေးရာ တိုင်းရင်းဆေးအရောင်းဆိုင်များရှိ ရောင်းချသောဆိုင်များတွင် ကုန်အညွှန်းအမှတ်အသားဖော်ပြခြင်း နှင့်စပ်လျဉ်း၍ လိုက်နာဆောင်ရွက်လျက်ရှိကြောင်းနှင့် ဆေးနှင့် ဆေးပစ္စည်းအရောင်းဆိုင်များတွင် တရားမဝင်တားမြစ်ဆေးများ ရောင်းချခြင်းမရှိကြောင်းတို့ကို စစ်ဆေးတွေ့ရှိရသဖြင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များအတွက် သိသင့်သိထိုက်သည့် အကြောင်းအရာများကို အသိပညာပေးဆွေးနွေးခဲ့ပြီး စားသုံးသူကာကွယ်ရေး အသိပညာပေး လက်ကမ်းစောင်များ ဖြန့်ဝေခဲ့ကြောင်း သိရှိရသည်။

DOCA (ပဲခူး)

    ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာန မြို့နယ်တာဝန်ခံဦးသိန်းမောင်သည် ၂၀၂၃ခုနှစ် မေလ(၁၅)ရက်နေ့၊ နေ့လယ်(၁၃:၀၀)နာရီအချိန်တွင် ဒေးဒရဲမြို့ မြို့မဈေးရှိ ကုန်မျိုးစုံရောင်းချသော လုပ်ငန်းရှင်များအား မြို့နယ်တာဝန်ခံရုံး၌ စားသုံးသူကာကွယ်ရေး   အသိပညာပေး ဟောပြောပွဲကို ကျင်းပပြုလုပ်ခဲ့ပါသည်။

    ဟောပြောပွဲတွင် မြို့နယ်တာဝန်ခံဦးသိန်းမောင်က ရောင်းချနေသော ကုန်စည်များတွင် သတ်မှတ်ထားသော ကုန်အညွှန်းအမှတ်အသားဖော်ပြချက်များ ရေးသားဖော်ကြရန်၊ တားမြစ်ထားသော ကုန်စည်များရောင်းချမှုမရှိစေရန်၊လုပ်ငန်းရှင်များလိုက်နာရမည့်တာဝန်များကို သိရှိစေရန် စားသုံးသူများ နစ်နာမှုဖြစ်ပေါ်လာပါကတိုင်ကြားနိုင်ရန်၊ လုပ်ငန်းရှင်များအနေဖြင့် စားသုံးသူကာကွယ်ရေး ဥပဒေအရလိုက်နာဆောင်ရွက်မှုမရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်း သိရှိစေရန်တို့အား အသိပညာပေးဟောပြောခဲ့ပါသည်။

DOCA(ဧရာဝတီ)

   စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ စစ်ဆေးရေးမှူး ဦးမျိုးဝင်းနိုင်နှင့် ဝန်ထမ်းများသည် (၂၃-၅-၂၀၂၃) ရက်နေ့၊ နေ့လယ် (၁၄:၀၀) နာရီအချိန်တွင် စံပြလမ်းနှင့် မဟူရာလမ်းထောင့်၊ အမှတ်(၆) ရပ်ကွက်၊ ဘားအံမြို့ရှိ “စေတနာ” သောက်ရေသန့်လုပ်ငန်းသို့ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံ စားသုံးသူကာကွယ်ရေးကော်မရှင် ညွှန်ကြားချက် အမှတ်၊ (၂/၂၀၁၉) နှင့်အညီ ကိုက်ညီမှု ရှိ / မရှိ တို့ကို မိတ်ဖက်ဌာနများနှင့် ပူးပေါင်း၍ ‌ဈေးကွက်စောင့်ကြည့်စစ်ဆေးခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် ကရင်ပြည်နယ်စားသုံးသူရေးရာကော်မတီက ဈေးကွက်စောင့်ကြည့်စစ်ဆေးရာတွင် ဦးစားပေး ဆောင်ရွက်မည့်  ကုန်စည် (၁၀) မျိုးထဲမှ သောက်ရေသန့်လုပ်ငန်းဖြစ်သည့် “စေတနာ” သောက်ရေသန့်လုပ်ငန်းသို့ ကွင်းဆင်းရာတွင် ဦးစီးအရာရှိ ဦးမျိုးဝင်းနိုင်က စီးပွားရေးလုပ်ငန်းရှင်များမှ လိုက်နာရမည့်တာဝန်များအကြောင်း၊ ကုန်စည်အရည်အသွေးဆိုင်ရာနှင့် ထုတ်ကုန်လုံခြုံစိတ်ချရမှုရှိစေရေးကိုလည်းကောင်း၊  ကုန်စည်များအပေါ်တွင် ကုန်အညွှန်းအမှတ်အသား ပြည့်စုံမှန်ကန်မှုရှိစေရေးကိုလည်းကောင်း၊ မိတ်ဖက်ဌာနဆိုင်ရာများ၏ လုပ်ထုံးလုပ်နည်းဥပဒေနှင့်အညီ လိုက်နာဆောင်ရွက်သွားရန် လိုအပ်ကြောင်း အသိပညာပေး ဆွေးနွေးခဲ့ကြောင်း သတင်းရရှိပါသည်။

DOCA (ကရင်)