သတင်းနှင့် လှုပ်ရှားမှုများ

          စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ်တွင် ၂၀၂၀ ပြည့်နှစ်အတွင်း မိုးစပါးစိုက်ဧက (၅၅,၄၁၀)ဧက စိုက်ပျိုးခဲ့ပြီး တရုတ်နယ်စပ်ဈေးကွက်နှင့် မန္တလေးဈေးကွက် အရောင်းအဝယ်ရှိသည့် ဆင်းဧကရီ (ခေါ်) ဆင်း-၃ စပါး (၃၄,၇၆၆)ဧကနှင့် အခြားစပါး (၂၀,၆၄၄)ဧက စိုက်ပျိုးခဲ့ပါတယ်။ ကိုဗစ်-၁၉ ကမ္ဘာ့ကပ်ရောဂါကာလမှာ မန္တလေးမြို့ ဆန်စပါးပွဲရုံများနှင့် တရုတ်နယ်စပ်များမှာ ဆင်း-၃ ဆန် အရောင်းအဝယ်ရှိလာသည့်အတွက် စပါးတင်းတစ်ရာ လျှင် (၅၆၀,၀၀၀)ကျပ်ဈေးမှ (၆၀၀,၀၀၀)ကျပ် အထိ မြင့်တက်လာတာ တွေ့ရှိရပါတယ်။

          အင်းတော်မြို့ အမေ့အိမ်ဆန်စက်လုပ်ငန်းရှင် ဦးအောင်ထွေး၏ ပြောကြားချက်အရ “ ဆန်စက်လုပ်ငန်းရှင်တွေ အားလုံးနီးပါး ဆန်ကြိတ်ခွဲလည်ပတ်နေကြရပြီး မန္တလေး ဆန်ကုန်သည်များမှ နယ်ဆင်း လာဝယ် တာတွေ ရှိနေပါတယ်။ တစ်ချို့စက်ပိုင် သူဌေးတွေကတော့ တရုတ်နယ်စပ်အထိ သွားရောင်းကြပြီး ကျွန်တော်တို့က မန္တလေးမှ ကုန်သည်တွေကို ရောင်းချပါတယ်။ မန္တလေး ဆန်ဈေးကွက်မှာ ဆန်တစ်အိတ် (၁၁၀.၇၈)ပေါင်နဲ့ ဆန်သား ၇၀ ရာခိုင်နှုန်းကို (၂၃၀၀၀) ကျပ်နှင့် ဆန်သား ၈၀ ရာခိုင်နှုန်းကို (၂၄၀၀၀) ကျပ်ဈေးရောင်းချရပါတယ်။ ယခုလို ကိုဗစ်ကာလ မိုးစပါးပေါ် ကာစမှာ ဆန်စပါးအရောင်းအဝယ်ဖြစ်ပြီး စပါးဈေးကောင်းတဲ့ အတွက် တောင်သူလယ်သမားတွေ အဆင်ပြေကြပါတယ်”ဟု ပြောကြားခဲ့ကြောင်း သိရှိရပါတယ်။

          တရုတ်နယ်စပ် ဆန်စပါးဈေးကွက်မှာ ဆင်း-၃ ဆန်အရောင်းအဝယ်ရှိတဲ့အတွက် ဆင်း-၃ စပါး အဓိကထွက်တဲ့ ကသာခရိုင်အတွင်းရှိ မြို့နယ်များနှင့် မိုးညှင်းခရိုင်အတွင်းရှိ မြို့နယ်များမှာ ဆန်စပါး အရောင်းအဝယ်ဖြစ်နေပြီး ၂၂ ဘီးတွဲကားများနှင့် မဲဇာတောင်ရိုးကိုဖြတ်ကာ မန္တလေး မြို့သို့ နေ့စဉ် (၁၀)စီးကျော် တင်ပို့နေတယ်လို့ သိရပါတယ်။ ကိုဗစ်-၁၉ ကာလ အသွားအလာ ကန့်သတ်ခံကြရပြီး အခက်အခဲတချို့ ကြုံတွေ့နေချိန်အတွင်း အခုလိုဆန်စပါး အရောင်းအဝယ် ဖြစ်လာပြီး စပါးဈေးပါ မြင့်လာသည့်အတွက် တောင်သူလယ်သမား၊ အလုပ်သမား၊ စက်ပိုင်ကုန်သည်များ စီးပွားရေးအဆင်ပြေလာကြောင်း ဆန်စပါးဈေးကွက်က သိရပါတယ်။

DOCA(စစ်ကိုင်း)

          ၁၂.၁.၂၀၂၁ ရက်နေ့တွင် စီးပွားရေးနှင့်ကူးသန်း‌ရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ယင်းမာပင်ခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့်တာဝန်ရှိသူများသည် မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ရဲတပ်ဖွဲ့၊ ကျေးရွာအဆင့် ကျန်းမာရေးမှူး ၊ အုပ်ချုပ်ရေးမှူး၊ စားသုံးသူရေးရာအသင်းအဖွဲ့တို့နှင့်ပူးပေါင်း၍ ယင်းမာပင်မြို့နယ်၊ ဇီးတော(တောင်/မ) ကျေးရွာရှိ ကုန်စုံဆိုင်များအား ထုတ်ကုန်လုံခြုံစိတ်ချရမှု ရှိစေရန် ဈေးကွက်စောင့်ကြည့် ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

          ယင်းသို့ ဆောင်ရွက်ရာတွင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူးက ဈေးဆိုင်ရှင်များအား ကုန်ပစ္စည်းများ ရောင်းချရာတွင် ကုန်အညွှန်းအမှတ်အသားနှင့်ပတ်သက်၍ ပါဝင်သော ပစ္စည်းများ၏ ကုန်အညွှန်းကို မြန်မာဘာသာဖြင့် ဖော်ပြရန်၊ ကျန်းမာရေးဆိုင်ရာ ဘေးထွက်ဆိုးကျိုး (သို့) ဓာတ်မတည့်ကြောင်း ဖော်ပြချက်နှင့် ကြိုတင်သတိပေးချက်များ မဖြစ်မနေပါရှိရန်နှင့် ကုန်အညွှန်းအမှတ်အသား ပြည့်စုံမှုရှိစေရန် အကျယ်တဝင့် ရှင်းလင်းပြောကြားခြင်း၊ သက်တမ်းလွန် စားသောက်ကုန်များနှင့် အစားအသောက်နှင့် ဆေးဝါးကွပ်ကဲရေးဦးစီးဌာနမှ ရောင်းချရန်မသင့် ကြေညာထားသော ကုန်ပစ္စည်းများအား ရောင်းချခြင်း မရှိစေရန် ဆွေးနွေးပြောကြားပြီး ကျန်းမာရေး ရှု့ထောင့် စားသုံးသူရှု့ထောင့်အရ ထုတ်လုပ်သူ၊ ရောင်းချသူ၊ စားသုံးသူများ ပူးပေါင်းပါဝင်ဆောင်ရွက်ရန် လိုအပ်ကြောင်း ဆွေးနွေးပြောကြားခဲ့ပါသည်။

ဆက်လက်၍ ကျောက်ဆည်မြို့နယ်၊ ဗိုလ်မြင့်သူ ကုမ္ပဏီမှ ဇီးတောတောင်ရွာတွင် စိုက်ပျိုးထားသော သခွားမွှေးဧက (၄၀)  စိုက်ခင်းသို့ သွားရောက်ပြီး တစ်ဧက ကုန်ကျစရိတ် စိုက်ပျိုးထုတ်လုပ်မှု ၊ ဈေးနှုန်းဈေးကွက် ဖြန့်ဖြူးမှု အခြေအနေများအား ကွင်းဆင်း လေ့လာဆောင်ရွက်ခဲ့ကြောင်း သတင်းရရှိပါသည်။

DOCA(စစ်ကိုင်း)

       စားသုံးသူရေးရာဦးစီးဌာနမှ၊ ခရိုင်ဦးစီးမှူး ဦးသန်းပိုနှင့်အဖွဲ့သည် စစ်ကိုင်းတိုင်းဒေသကြီး၊ ပင်လည်ဘူးမြို့နှင့် ထီးချိုင့်မြို့ရှိ စည်ပင်သာယာဈေးများအတွင်း ရောင်းချနေသော ဈေးဆိုင်များအား ဈေးကွက်စောင့်ကြည့်စစ်ဆေးခြင်းကို ၂၀၂၁ ခုနှစ် ဇန်နဝါရီလ(၁၁)ရက်နေ့နှင့် ဇန်နဝါရီလ (၁၅)ရက်နေ့တွင် မြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် မြို့နယ် မီးသတ်ဦးစီးဌာနတို့ဖြင့် ပူးပေါင်းစစ်ဆေးခဲ့ပါသည်။

        ထိုသို့ စစ်ဆေးရာတွင် အဓိကအနေဖြင့် တားမြစ်ကုန်စည်များ၊ သက်တမ်းလွန် စားသောက်ကုန်များ ရောင်းချမှု ရှိ၊ မရှိ စစ်ဆေးခြင်း၊ ကိုဗစ်-၁၉ ကာလအတွင်း ကုန်စည်များအား ဈေးနှုန်း မြှင့်တင်ရောင်းချခြင်း ရှိ၊မရှိ စစ်ဆေးခြင်းနှင့် ကုန်စည်များတွင် ကုန်ပစ္စည်း အမျိုးအစားအလိုက် မြန်မာစာဖြင့် ဖော်ပြရမည့် အချက်များ ထည့်သွင်းရောင်းချခြင်း ရှိ၊ မရှိ စစ်ဆေးခဲ့ပြီး ရောင်းချသူ ဆိုင်ရှင်များအား ၎င်းတို့ရောင်းချသော ကုန်ပစ္စည်း အမျိုးအစားအလိုက် ကုန်အညွှန်းအမှတ်အသားများ ထည့်သွင်းရောင်းချနိုင်ရန် အသိပညာပေးဆွေးနွေးခဲ့ပြီး ညွှန်ကြားချက် (၂/၂၀၁၉) လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

      ၁၇.၁.၂၀၂၁ ရက်နေ့တွင် မော်လမြိုင်ကုန်စည်ဒိုင်ဖွံ့ဖြိုးတိုးတက်ရေးအတွက် ရှေ့ဆက်လုပ်ဆောင်ရမည့်လုပ်ငန်းစဉ်ဆွေးနွေးပွဲကို National Enlightement Institute Office (NEI) တွင်ကျင်းပပြုလုပ်ရာ မော်လမြိုင်ကုန်စည်ဒိုင်ဥက္ကဌနှင့် အလုပ်အမှုဆောင်များ၊ စားသုံးသူရေးရာဦးစီးဌာနမှ ပြည်နယ်ဦးစီးမှူးနှင့်ဝန်ထမ်းများ၊ NEIမှ အုပ်ချုပ်မှု    ဒါရိုက်တာနှင့်ဝန်ထမ်းများ စုစုပေါင်း(၂၉)ဦး တက်ရောက်ပါသည်။

      အစည်းအဝေးတွင် ဝဥကဏ္ဍ၊ ရာဘာကဏ္ဍ၊ သားငါးကဏ္ဍတို့ကို ဦးစားပေးဆွေးနွေးခဲ့ကြပြီး ဆက်လက်၍ ကုန်စည်ဒိုင် တံဆိပ်ဝိုင်းပြုလုပ်ရေးကိစ္စ၊ ကုန်စည်ဒိုင်ငါးဈေးနှုန်းများ ဖော်ပြရာတွင် အဓိကကျသော ငါးအမျိုးအမည်များ၏ ဈေးနှုန်းများကို ဦးစားပေးဖော်ပြရန်နှင့် Warehouse၊ Cold store များ မွန်ပြည်နယ်အတွင်း ပုဂ္ဂလိကပိုင်လုပ်ငန်းများမှ မိမိတို့အစီအစဉ်ဖြင့် တည်ဆောက်နေမှုများနှင့်ပတ်သက်၍ Cold Store အရေအတွက်၊ သိုလှောင်သော ပမာဏ၊ သိုလှောင်သောအမျိုးအမည်တို့ကို သိရှိနိုင်ရေးအတွက် စားသုံးသူရေးရာဦးစီးဌာန၊ NEI၊ စက်မှုကြီးကြပ်ရေးဦးစီးဌာနတို့မှပူးပေါင်းပြီး အစည်းအဝေးကျင်းပပြုလုပ်ကာ တွေ့ဆုံဆွေးနွေးကြရန် အတည်ပြုခဲ့ကြပါသည်။ ကုန်စည်ပို့ဆောင်ရေး ကားဂိတ်များ၏ အမည်စာရင်းများအား ကုန်စည်ဒိုင် Pageတွင် တင်ပြနိုင်ရေး ဆောင်ရွက်သွားမည်ဖြစ်ကြောင်း၊ ဈေးနှုန်းများနှင့်ပတ်သက်သော အကြောင်းအရာများကို သက်ဆိုင်ရာကဏ္ဍအသီးသီးရှိ ကုန်သည်လုပ်ငန်းရှင်များနှင့်လည်း Meeting ပြုလုပ်သင့်ကြောင်း၊ သက်ဆိုင်ရာလုပ်ငန်းတူ အသင်းအဖွဲ့တစ်ခုခြင်းစီအလိုက်တစ်လလျှင်(၂)ကြိမ် Meeting ပြုလုပ်ရန် ဆွေးနွေးဆုံးဖြတ်ခဲ့ကြကြောင်း သတင်းရရှိပါသည်။

DOCA(မွန်ပြည်နယ်)

          ၁၅.၁.၂၀၂၁ ရက်နေ့တွင် ဗန်းမော်ခရိုင် စားသုံးသူရေးရာဦးစီးဌာန CICC ရုံးခန်း၌ ပေါက်ကုန်းရပ်ကွက်မှ စားသုံးသူပြည်သူများကို စားသုံးသူကာကွယ်ရေးအသိပညာပေးဟောပြောပွဲ ပြုလုပ်ခဲ့ပါသည်။ ၎င်းဟော‌ပြောပွဲတွင် ဒု-ဦးစီးမှူး ဒေါ်နှောင်းနှောင်းဝင်းက စားသုံးသူကာကွယ်ရေးဥပဒေပါ အဓိပ္ပာယ်ဖွင့်ဆိုချက်များ၊ စားသုံးသူအခွင့်အရေးနှင့်တာဝန်များ၊ ကုန်စည်/ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူတောင်းဆိုနိုင်သည့်အခွင့်အရေးများ၊ အရေးကြီးကုန်စည်နှင့်ဝန်ဆောင်မှုဥပဒေ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာ ဖော်ပြရမည့်အချက်များ၊ စားသုံးသူနစ်နာဆုံးရှုံးမှုများအတွက် တိုင်ကြားမှု ဆောင်ရွက်ရာတွင် website ၊ Mobile Application တို့မှတဆင့် ဆောင်ရွက်နိုင်မည့် အခြေအနေနှင့် စေ့စပ်ညှိနှိုင်းဖြေရှင်းဆောင်ရွက်ပေးသည့် အခြေအနေများ၊ ဗန်းမော်ခရိုင် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ(CICC) ဖွင့်လှစ်ထားရှိမှုနှင့် ဆောင်ရွက်ပေးနေမှုအခြေအနေတို့ကို ရှင်းလင်းဆွေးနွေးဟောပြောခဲ့ပြီး တက်ရောက်သူများမှ သိရှိလိုသည်များကို မေးမြန်းခဲ့ရာ ပြန်လည်ရှင်းလင်းဖြေကြားဆွေးနွေးခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန
ကချင်ပြည်နယ်