သတင်းနှင့် လှုပ်ရှားမှုများ

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်၊ ကံမမြို့နယ်တာဝန်ခံသည် (၁၉-၁၀-၂၀၂၅)ရက်နေ့၊ နံနက်(၁၀း၃၀)နာရီအချိန်တွင် ဆန်စပါးလုပ်ငန်းကြီးကြပ်ရေးအဖွဲ့တွင် ပါဝင်သည် မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ စိုက်ပျိုးရေးဦးစီးဌာန၊ စီမံကိန်းဦးစီးဌာန၊ ရပ်ကျေးအုပ်ချုပ်ရေးမှူးတို့နှင့်အတူ အမှတ်(၁/၂/၃/၄)ရပ်ကွက်ရှိ ဆန်ဆိုင်များ အား MyRO တွင် မှတ်ပုံတင်နိုင်ရေး ကွင်းဆင်းစစ်ဆေးခဲ့ကြောင်း သိရှိရပါသည်။

          ထိုသို့ စစ်ဆေးရာတွင် ဆန်ဆိုင်များ၏ ဆန်ဝင်ရောက်မှု အခြေအနေများ၊ ဆန် လက်ကျန် အခြေအနေများအား စစ်ဆေးခဲ့ပြီး ဆန်အိတ် (၅၀၀)နှင့် စပါးတင်း(၂၅၀၀)အထက် သိုလှောင် ထားသည့် လုပ်ငန်းရှင် များအား မြန်မာနိုင်ငံ ဆန်စပါး အသင်းချုပ်မှ ထုတ်ပြန်ထားသည့် Myanmar Rice Online (MyRO)တွင် မဖြစ်မနေ မှတ်ပုံတင် ဆောင်ရွက်နိုင်ရေး၊ ဆန်အိတ်(၁၀၀မှ၅၀၀) အတွင်းရောင်းချသည့် ဆန်ဆိုင်များအား မြို့နယ်ဆန်ကုန်သည်အသင်းသို့အသင်းဝင်ရေးနှင့် ဆန် စပါးများ မှတ်ပုံတင်လျှောက်ထားမှု မရှိသည့် လုပ်ငန်းရှင်များအား တွေ့ရှိရပါက စီမံခန့်ခွဲမှု ပြစ်ဒဏ် များချမှတ်ခံရမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(မကွေး)

  မကွေးတိုင်းဒေသကြီး၊ သရက်ခရိုင်၊ ကံမမြို့နယ်တာဝန်ခံသည် (၂၀-၁၀-၂၀၂၅)ရက်နေ့၊ (၁၃း၀၀)နာရီအချိန်တွင် ကံမမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ စားသုံးသူများ ဘေးကင်းလုံခြုံ စိတ်ချရမှုရှိစေရေးအတွက်  အသိပညာပေး Talk Show ဟောပြောပွဲဆောင်ရွက် ခဲ့ကြောင်း သိရသည်။

   Talk Show ဟောပြောပွဲတွင် ကံမမြို့နယ်တာဝန်ခံ ဒေါ်နွဲ့ယဉ်ဝင်းက အွန်လိုင်းစနစ်ဖြင့် ရောင်းချခြင်းလုပ်ငန်း ဆောင်ရွက်ရာတွင် မှတ်ပုံတင်လက်မှတ် လျှောက်ထားသူ၏ လိုအပ်ချက်များ၊ Certificate ရရှိထားသည့် လုပ်ငန်းရှင်များ၏ တာဝန်(၁၅)ချက် အကြောင်းအရာများ၊ ၎င်းလုပ်ငန်းရှင်၏ တာဝန်များ ဖောက်ဖျက်ကြူးလွန်ခဲ့လျှင် အရေးယူဆောင်ရွက်ရမည့် ပြစ်မှုပြစ်ဒဏ်များအကြာင်း၊ စားသုံးသူများ နစ်နာဆုံးရှုံးမှု များရှိခဲ့ပါက ဆက်သွယ်တိုင်ကြားနိုင်သည့် စားသုံးသူ သတင်းပြန်ကြား ရေးနှင့် တိုင်ကြားမှုလက်ခံ ဆောင်ရွက်ရေးစင်တာ (CICC) မကွေးတိုင်းဒေသကြီး ဦးစီးမှူးရုံး သို့ လည်း ကောင်း၊ Consumer Call Center Hotline (1535)သို့ နေပြည်တော်ရုံးချုပ်တွင် လိုင်းခွဲ(၁)သို့ လည်းကောင်း၊ ရန်ကုန်တိုင်း ဒေသကြီးဦးစီးမှူးရုံးတွင် လိုင်းခွဲ(၂)သို့လည်းကောင်း၊ မန္တလေးတိုင်း‌ ဒေသကြီးဦးစီးမှူးရုံးတွင် လိုင်းခွဲ (၃)သို့လည်းကောင်း ပြည်တွင်းမှ မည်သည့်ဖုန်းနံပါတ်များမဆို ဆက်သွယ် တိုင်ကြားလျှင် တိုက်ရိုက်တိုင်းဒေသကြီး (သို့မဟုတ်)ပြည်နယ်များသို့ ချိတ်ဆက်ဆောင်ရွက် ပေးလျက် ရှိပါကြောင်းနှင့် သရက်ခရိုင်ဦးစီးမှူးရုံး စားသုံးသူရေးရာဦးစီးဌာနတွင် စားသုံးသူ သတင်း ပြန်ကြားရေးနှင့် လက်ခံဆောင်ရွက်ရေးစင်တာကို ၂၀၂၅ခုနှစ်၊ မတ်လမှစတင်ဖွင့်လှစ်ထားရှိပြီး ဆက်သွယ်တိုင်ကြားနိုင်ကြောင်း စားသုံးသူပြည်သူများသိရှိစေရန် အသိပညာပေး Talk Show ဟောပြောခဲ့ကြောင်း သိရှိရပါသည်။

DOCA(မကွေး)

  စီးပွားရေးနှင့်ကူးသန်း‌ရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်တွင် ဆန်သိုလှောင်ရုံများအား မြို့နယ်ဆန်စပါးလုပ်ငန်းကြီးကြပ်ရေး အဖွဲ့ အတွင်းရေးမှူး ဒေါ်မြတ်မြတ်မိုး ဦးဆောင်၍ ဆန်စပါးလုပ်ငန်းကြီးကြပ်ရေးအဖွဲ့များမှ မြို့ပေါ်ရှိ ဆန်သိုလှောင်ရုံများအား (၁၇.၁၀.၂၀၂၅)ရက်နေ့၊ နံနက်(၁၀:၀၀)အချိန်တွင် ကွင်းဆင်းစစ်ဆေးခဲ့ ကြောင်း သိရသည်။

          ထိုသို့ စစ်ဆေးရာတွင် ဆန်စက်များ၏ ကြိတ်ခွဲထုတ်လုပ်မှု၊ MyRO တွင် မှတ်ပုံတင်ထားသည့် ဆန်စပါးသိုလှောင်ရုံများ၏ ကုန်ရ/ ကုန်ထုတ် လက်ကျန်စာရင်းများ ရေးသွင်းထားခြင်းရှိ/မရှိ စစ်ဆေးခဲ့ ပြီး ဆန်စီးဝင်/ စီးထွက်စာရင်းများ Update စာရင်းရေးသွင်းနိုင်ရေးနှင့် ဆန်ဆိုင်များအနေဖြင့် အိတ် (၅၀၀)အထက် ဆန်လက်ကျန်များ သိုလှောင်ထားသော်လည်း မှတ်ပုံတင်ထားခြင်းမရှိသည်ကို စိစစ် တွေ့ရှိရပါက ဥပဒေအရ အရေးယူခြင်းခံရနိုင်ကြောင်း၊ စပါးဆန်စျေးနှုန်းများ တည်ငြိမ်စေရေးအတွက် စပါးများ ဝယ်ယူစုဆောင်းခြင်းလုပ်ငန်းများ ဆောင်ရွက်ရာတွင် စပါးပွဲစား (ကြားပွဲစား)များအား ထိန်း ကျောင်းနိုင်ရန် ကြားပွဲစား စိစစ်ရေးကတ်များ ထုတ်ပေးပြီး လုပ်ငန်းတာဝန် များကိုလည်း သတ်မှတ် ပေးလျက်ရှိကြောင်း ဆွေးနွေးပြောကြားခဲ့ကြောင်း သိရှိရပါသည်။

          ချောက်မြို့ပေါ်တွင် ဆန်ကုန်သည် (၁၀)ဦးရှိပြီး MyRO တွင် မှတ်ပုံတင်ထားသည့် ဆန်စပါး သိုလှောင်ရုံ (၁၂)လုံး၊ စလေမြို့တွင် ဆန်ကုန်သည် (၄)ဦး၊ MyRO တွင် မှတ်ပုံတင်ထားသည့် ဆန်စပါး သိုလှောင်ရုံ (၄)လုံးရှိကြောင်းနှင့် လက်ရှိအခြေအနေတွင် ဆန်စျေးနှုန်းအနေဖြင့် တည်ငြိမ်လျက်ရှိပါ ကြောင်း သိရှိရပါသည်။

DOCA(မကွေး)

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံး အစည်းအဝေး ခန်းမ၌ ၂၀၂၅ခုနှစ်၊ အောက်တိုဘာလ (၁၆.၁၀.၂၀၂၅ ရက်နေ့မှ ၁၇.၁၀.၂၀၂၅ ရက်နေ့အထိ) စားသုံးသူ ကာကွယ်ရေးဆိုင်ရာ အသိပညာပေးသင်တန်း (၃/၂၀၂၅)အား သင်တန်း(၂)ရက်တာဖြင့် အွန်လိုင်းနှင့် လည်းကောင်း၊ လူကိုယ်တိုင်လည်းကောင်း သင်တန်းကျ င်းပခြင်းများ ဆောင်ရွက်ခဲ့ရာ တိုင်းဒေသကြီး ဦးစီးမှူး ဦးရဲမျိုးလွင်မှ အဖွင့်အမှာစကားပြောကြားခဲ့ကြောင်း သိရသည်။  

    အဆိုပါသင်တန်းတွင် စားသုံး/ ထုတ်လုံကြီးကြပ်သူ အရာရှိ ဒေါ်စုစုထွန်းမှ Online Sales ရောင်း ချခြင်းနှင့်စပ်လျဉ်း၍ သိရှိလိုက်နာရမည့် အချက်များအကြောင်းအား လည်းကောင်း၊ ဒေါ်စန္ဒာစိုးလွင်မှ စားသုံးသူရေးရာဌာနခွဲ၏ လုပ်ငန်းစဉ်များနှင့် စားသုံးသူကာကွယ်ရေးဥပဒေ အခန်း(၃/ ၄/ ၅/ ၆)နှင့် ပတ်သက်၍ သိကောင်းစရာများအကြောင်းအားလည်းကောင်း၊ ဒေါ်အေးအေးခိုင်မှ ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ သိကောင်းစရာများအကြောင်းအားလည်းကောင်း သင်ကြားပို့ချခဲ့ပြီး ပို့ချခဲ့သည့်အကြောင်းအရာများအပေါ် မေးခွန်းများ မေးမြန်း ဖြေကြားခြင်းများ ဆောင်ရွက်ခဲ့ကြ ကြောင်း၊ သင်တန်းသို့ Zoom ဖြင့် သင်တန်းသားဦးရေ(၁၈)ဦး၊ လူကိုယ်တိုင်တက်ရောက်သည့် သင်တန်းသားဦးရေ (၁၈)ဦး စုစုပေါင်း(၃၆)ဦးတက်ရောက်ခဲ့ကြကြောင်း သတင်းရရှိပါသည်။

DOCA(မကွေး)

   မကွေးတိုင်းဒေသကြီး၊ တိုင်းဒေသကြီးဦးစီးမှူးရုံးမှ တိုင်းဒေသကြီးဦးစီးမှူး၊ ဒုတိယတိုင်း ဒေသ ကြီးဦးစီးမှူးနှင့်ဝန်ထမ်းများ၊ မင်းဘူးခရိုင်တာဝန်ခံ၊ ပွင့်ဖြူ၊ စလင်းမြို့နယ်တာဝန်ခံနှင့် ဝန်ထမ်းများ၊ ပွင့်ဖြူမြို့နယ် အုပ်ချုပ်ရေးမှူးဦးဆောင်သော မြို့နယ်ဆန်စပါးလုပ်ငန်းကြီးကြပ်ရေး အဖွဲ့ဝင်များ၊ မြို့နယ်ဆန်စက်လုပ်ငန်းရှင်များအသင်း၊ ဆန်စပါးကုန်သည်များအသင်းမှ တာဝန်ရှိသူ များနှင့်အတူ (၂၀.၁၀.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် ပွင့်ဖြူမြို့နယ်၊ အထွေထွေ အုပ်ချူပ်ရေးမှူး အစည်းအဝေးခန်းမ၌ ဆန်စပါးလုပ်ငန်းလုပ်ကိုင်ဆောင်ရွက်ကြသည့် ဆန်စပါး ကုန်သည်များ၊ ဆန်စက်လုပ်ငန်းရှင်များ၊ ကြားပွဲစားများ၊ တောင်သူများနှင့်တွေ့ဆုံ၍  MYRO  တွင် မှတ်ပုံတင်ရေး၊ မှတ်ပုံတင်ထားသည့် ဆန်စက်နှင့် ဆန်ကုန်သည်များအနေဖြင့် လစဉ် ကုန်ရ ကုန်ထုတ် လက်ကျန်များ ရေးသွင်းရေး မကြာမီ မိုးစပါးပေါ်တော့မည်ဖြစ်ရာ ထုတ်ပေးထားသည့် စပါးဝယ်ယူခွင့် စိစစ်ရေး (ကြားပွဲစား) ကဒ်များအား သက်တမ်းတိုးဆောင်ရွက်ရေး အသိပညာပေးဆွေးနွေးခဲ့ကြောင်း သိရှိရ ပါသည်။

          ထိုသို့ အသိပညာပေးဆွေးနွေးခဲ့ရာတွင် တိုင်းဒေသကြီးဦးစီးမှူးက စပါး တင်း(၂၅၀၀) နှင့် အထက်၊ ဆန်အိတ်(၅၀၀)နှင့်အထက် သိုလှောင်ထားသည့် ဆန်ကုန်သည်များ၊ ဆန်စက်လုပ်ငန်းရှင် များအနေဖြင့် MYRO တွင် မဖြစ်မနေ မှတ်ပုံတင်ရမည် ဖြစ်ကြောင်း၊ မှတ်ပုံတင်ထားယုံနှင့် မရဘဲ လစဉ် ကုန်ရ ကုန်ထုတ် လက်ကျန်များကိုလည်း စာရင်းရေးသွင်းရမည်ဖြစ်ကြောင်း၊ ပွင့်ဖြူမြို့နယ်မှ တိုင်းဒေသကြီးအတွင်းနှင့် တိုင်းပြင်ပသို့ စပါးဆန်များ သယ်ယူခြင်းနှင့်စပ်လျဉ်း၍ တိုင်းဒေသကြီး ဆန်စပါးလုပ်ငန်းကြီးကြပ်ရေးအဖွဲ့ဝင်များဖြစ်သည့် တိုင်းဆန်စက်လုပ်ငန်းရှင်များအသင်း ဥက္ကဌနှင့် ဆန်ကုန်သည်များအသင်း ဥက္ကဌ တို့ထံတွင် ထုတ်ပေးထားသည့် မျှောစာဖြင့်သာ သယ်ယူရမည် ဖြစ်ကြောင်း၊ တိုင်းဒေသကြီးအစိုးရအဖွဲ့သို့ တိုင်းအတွင်းသို့ ဆန်ဝင်ရောက်မှုနှင့် မကွေးတိုင်း ဒေသ ကြီးမှ ထွက်ရှိသည့် ဧရာပဒေသာဆန် စီးထွက်မှုစာရင်းများကို လစဉ် တင်ပြရသည့်အတွက် စီးဝင်မှု စာရင်းများကို ရေကြောင်းနှင့် ဗွက်ကြီးတံတားတို့မှ ရရှိသည့်စာရင်းများနှင့် စိစစ်တင်ပြ ရသလို စီးထွက်မှုစာရင်းများကိုလည်း ထုတ်ပေးထားသည့် မျှောစာများမှ စာရင်းများဖြင့် စိစစ် တင်ပြရ သည့်အတွက် တိုင်းတွင်း/တိုင်းပြင်ပ သယ်ဆောင်မှုများနှင့်ပတ်သက်၍ မျှောစာဖြင့်သာ အသုံးပြုရမည် ဖြစ်ကြောင်း ဆန်စပါးဈေးနှုန်းတည်ငြိမ်ရေးအတွက် စပါးများဝယ်ယူရာတွင် စပါး ပွဲစား၊ ကြားပွဲစား များအတွက် ကြားပွဲစားစိစစ်ရေးကဒ်များကို ထုတ်ပေးထားပြီးဖြစ်ရာ သက်တမ်းကုန်ဆုံးသည့် ကြားပွဲ စားများအနေဖြင့် သက်တမ်းတိုးဆောင်ရွက်သွားရန် စပါးများဝယ်ယူရာတွင် လည်း စက်ကြိတ်နိုင် သည့်အဆင့် သိုလှောင်နိုင်သည့်အဆင့်ကို ၁၃ ပိဿာနှုန်းဖြင့် ဝယ်ယူသွားရန် သတ်မှတ်ခဲ့ကြောင်း၊ သတ်မှတ်အစိုဓာတ်ထက်ကျော်လွန်သည့် စပါးများ ဝယ်ယူရာတွင် ၁၃ ပိဿာမှ ၁၅ ပိဿာကြား တောင်သူ၊ ကြားပွဲစား၊ စက်ပိုင်တို့ ညှိနှိုင်းဝယ်ယူသွားရန် အစိုဓာတ်ကျော်လွန်သည့် စပါးများအတွက် အလေးချိန်သတ်မှတ်ပေးနိုင်ရန်အတွက် ဖွဲ့စည်းပြီးဖြစ်သည့် မြို့နယ်၊ ဆန်စပါး လုပ်ငန်းကြီးကြပ်ရေး အဖွဲ့ အစည်းအဝေးတွင် အမှာစာဖြင့် တင်ပြညှိနှိုင်း၍ ဆုံးဖြတ်ချက်ကို တိုင်း ဆန်စပါး လုပ်ငန်း ကြီးကြပ်ရေးအဖွဲ့သို့ တင်ပြဆောင်ရွက်သွားရန်ဖြစ်ကြောင်း ရှင်းလင်းဆွေးနွေးခဲ့ပါသည်။

          အဆိုပါ အသိပညာပေးဆွေးနွေးပွဲတွင် တက်ရောက်လာကြသည့် တောင်သူများ၊ ကြားပွဲစား များ၊ ဆန်စက်လုပ်ငန်းရှင်များ၏ မေးမြန်းမှုများအပေါ် တိုင်းဒေသကြီးဦးစီးမှူးနှင့် တာဝန်ရှိသူများမှ ပြန်လည်ရှင်းလင်းဆွေးနွေးခဲ့ပြီး အသိပညာပေးဆွေးနွေးပွဲကို (၁၃: ၃၀) နာရီတွင် ရုပ်သိမ်းခဲ့ကြောင်း သိရှိရပါသည်။

DOCA(မကွေး)