သတင်းနှင့် လှုပ်ရှားမှုများ

   ရန်ကုန်တိုင်းဒေသကြီး၊ သန်လျင်ခရိုင်၊ ကျောက်တန်းမြို့နယ် စည်ပင်သာယာမြို့မဈေး အတွင်း/အပြင်ရှိ ဆန်ဆိုင်များအား ဈေးနှုန်းမြှင့်တင်ရောင်းချခြင်း မဖြစ်ပေါ်စေရေးနှင့် စားသုံးသူ ရေးရာဦးစီးဌာနမှ လစဉ်ထုတ်ပြန်သည့် သတ်မှတ်ရည်ညွှန်းဈေးအတိုင်း ရောင်းချခြင်းရှိ/မရှိ ကွင်းဆင်းစစ်ဆေးခြင်းအား (၂၀၂၅)ခုနှစ် မေလ(၉)ရက်နေ့၊ ညနေ (၁၆:၀၀)နာရီအချိန်တွင် ကျောက်တန်းမြို့နယ်၊ မြို့နယ်အုပ်ချုပ်ရေးမှူး ဦးဆောင်သောအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရှိရသည်။

     အဆိုပါ ကွင်းဆင်းစစ်ဆေးမှုတွင် ကျောက်တန်းမြို့နယ်အတွင်းရှိ မြို့နယ်အထွေထွေ အုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူးနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိနှင့် ဝန်ထမ်းများ၊ မြို့နယ်ရဲတပ်ဖွဲ့မှူးနှင့်အတူ စားသုံးသူရေးရာဦးစီးဌာန တောင်ပိုင်းခရိုင်ဦးစီးမှူးရုံး (သန်လျင်မြို့)မှ ဒေါ်ငြိမ်းငြိမ်းဝင်း (ဦးစီးမှူး)တို့ ပူးပေါင်းအဖွဲ့သည် ကျောက်တန်းမြို့နယ် စည်ပင်သာယာမြို့မဈေးအတွင်း/အပြင်ရှိ ဆန်ဆိုင်များသို့ သွားရောက်ကာ ဆန်များအား ဈေးနှုန်းမြှင့်တင် ရောင်းချခြင်းမရှိစေရေး၊ ဆန်ဈေးကွက်အတွင်း ဈေးနှုန်းတည်ငြိမ် မှန်ကန်စေရေးတို့အတွက် စားသုံးသူရေးရာဦးစီးဌာနမှ ဆန်ဈေးနှုန်းများအား သင့်တင့်မျှတသော ဈေးနှုန်းဖြင့် လစဉ်ထုတ်ပေးလျက်ရှိရာ အဆိုပါ သတ်မှတ်ရည်ညွှန်းဈေးများအတိုင်း ဈေးကွက်အတွင်း ရောင်းချခြင်းရှိ/မရှိ ကွင်းဆင်းစစ်ဆေးပြီး သတ်မှတ်ရည်ညွှန်းဈေးအတိုင်း ရောင်းချခြင်းမရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက် သွားမည်ဖြစ်ပါ ကြောင်း ဆန်ဆိုင်ပိုင်ရှင်များအား ပြောကြားခဲ့ပြီး ကွင်းဆင်းစစ်ဆေးခဲ့ကြောင်း သိရှိရသည်။

DOCA(ရန်ကုန်)

    ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်တွင် မေလ(၁၀)ရက်နေ့၊ နေ့လယ် (၁၃:၀၀) နာရီအချိန်တွင် ဆန်သိုလှောင်ရုံများအား မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူး ဦးအောင်ရဲ၊ မြို့နယ်ရဲတပ်ဖွဲ့မှူး ရဲမှူးကျော်စိုး၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်ကျော့ကေခိုင်၊ မြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးဇော်နိုင်ဦး တို့ပါဝင်သော ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရသည်။

   ထိုသို့ ကွင်းဆင်းစစ်ဆေးခဲ့ရာတွင် ခရမ်းမြို့နယ်အတွင်းရှိ သိုလှောင်ရုံများသည် မြန်မာနိုင်ငံ ဆန်စပါးအသင်းချုပ်၏ MyRoတွင် သိုလှောင်ရုံ မှတ်ပုံတင် ဆောင်ရွက်ထားမှုရှိ/မရှိ၊ ဆန်သိုလှောင် ရုံများတွင် ရွှေဘိုပေါ်ဆန်း၊ ဧရာဝတီပေါ်ဆန်း ဆန်များသိုလှောင်ထားခြင်းရှိ/မရှိအား ကွင်းဆင်း စစ်ဆေးခဲ့ပြီး ဆန်စက်သိုလှောင်ရုံ ပိုင်ရှင်များအား ၎င်းဆန်များအား ဈေးကစားရန်ရည်ရွယ် သိုလှောင်ထားခြင်း မပြုလုပ်ကြရန်နှင့် မှတ်ပုံတင်ထားပြီး သိုလှောင်ရုံများသည်လည်း လဆန်း (၇)ရက်မတိုင်မီ သိုလှောင်မှုစာရင်း (လချုပ်စာရင်း)များအား မပျက်မကွက် တင်ပြရန်တို့အား ရှင်းလင်းပြောကြားခဲ့ပြီး သိုလှောင်ရုံများရှိ စပါးတင်းနှင့် ဆန်အိတ်လက်ကျန်များအား စာရင်းကောက်ယူခဲ့ကြကြောင်း သိရသည်။

DOCA(ရန်ကုန်)

   ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်တွင် မေလ(၉)ရက်နေ့၊ နေ့လယ်  (၁၃:၃၀)နာရီအချိန်တွင် စည်ပင်သာယာမြို့မဈေးအတွင်းရှိ ကုန်မျိုးစုံ ရောင်းချသော ဆိုင်များ တွင် ရောင်းချနေသော သွားတိုက်ဆေးအမျိုးမျိုးတို့တွင် ကုန်အညွှန်းအမှတ်အသား မြန်မာ ဘာသာဖြင့် ဖော်ပြထားမှုရှိ/မရှိအား ကွင်းဆင်းစစ်ဆေးခဲ့ကြောင်း သိရသည်။

    ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာန၊ ခရမ်းမြို့နယ် တာဝန်ခံ ဒေါ်ကျော့ကေခိုင်နှင့် ဝန်ထမ်းများသည် မြို့နယ်စည်ပင်သာယာရေးအဖွဲ့ ဈေးတာဝန်ခံတို့နှင့် ပူးပေါင်း၍ မြို့မဈေးအတွင်းရှိ သွားတိုက်ဆေး အမျိုးမျိုးရောင်းချသော ဈေးဆိုင်များတွင် ရောင်းချ နေသော သွားတိုက်ဆေးများအား စစ်ဆေးခဲ့ရာ မြန်မာဘာသာဖြင့် ဖော်ပြရမည့် ကုန်အညွှန်းအမှတ် အသားများဖြင့် ပြည့်စုံကြောင်း စစ်ဆေးတွေ့ရှိရပြီး ဈေးဆိုင်ရှင်များအား နောင်တွင်လည်း ကုန်အညွှန်းအမှတ်အသားများ မြန်မာဘာသာဖြင့် ပြည့်စုံစွာဖော်ပြထားသော ကုန်ပစ္စည်းများအား ရောင်းချခြင်းဖြင့် စားသုံးသူများ၏ အခွင့်အရေးများ ပြည့်စုံစွာရရှိစေရေးနှင့် စားသုံးသူများ ဘေးအန္တရာယ် ကင်းရှင်းနိုင်ရေးတို့အတွက် ပူးပေါင်းပါဝင်ပေးကြရန် အသိပညာပေးခဲ့ကြောင်း သိရ သည်။

DOCA(ရန်ကုန်)

   စားသုံးသူရေးရာဦးစီးဌာန စစ်ကိုင်းတိုင်းဒေသကြီး ကန့်ဘလူခရိုင် ကန့်ဘလူမြို့နယ်တာဝန် ခံဦးမျိုးဝင်းသန်းသည် ၂၀၂၅ ခုနှစ်၊ မေလ ၁၀ ရက် နံနက်(၀၈:၀၀)နာရီတွင် ကန့်ဘလူမြို့နယ် ဆီကိုယ်စားလှယ်မှ ကန့်ဘလူမြို့ပေါ်ရှိ စားသုံးသူပြည်သူများကို စားအုန်းဆီလက်လီရောင်းချပေး နေမှုအား ကွင်းဆင်းစစ်ဆေးခဲ့ကြောင်း သိရသည်။

   မြို့နယ်တာဝန်ခံမှ အချိန်အတွယ်မှန်ကန်မှုရှိ/မရှိ၊ ဈေးနှုန်းမှန်ကန်မှုရှိ/မရှိ စားအုန်းဆီ လက်လီအရောင်းဆိုင်များအား ကွင်းဆင်းစစ်ဆေးခဲ့ကြောင်း၊ ကန့်ဘလူမြို့နယ် ဆီကိုယ်စားလှယ် ကခွဲတမ်းရရှိလာသော စားအုန်းဆီများကို ရည်ညွှန်းဈေး၊ သယ်ယူပို့ဆောင်ခကုန်ကျစရိတ်နှင့် ၂% အမြတ်တို့ဖြင့် လက်လီ/လက္ကားဆိုင်များမှ စားသုံးသူပြည်သူများသို့ တစ်ဦးလျှင်(၅၀)ကျပ်သားနှုန်း ရောင်းချပေးလျှက်ရှိကြောင်း စားအုန်းဆီလက်လီရောင်းချသည့် လုပ်ငန်းရှင်ထံမှ သတင်းရရှိပါ သည်။

DOCA(စစ်ကိုင်း)

          ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့ရှိ စားသုံးသူရေးရာဦးစီးဌာန၊ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ် မေလ (၉)ရက်နေ့ နံနက်(၁၃:၀၀)နာရီအချိန်တွင် ပြန်/ဆက် ဦးစီးဌာနရုံး Commumity Centre ခန်းမ၌ စာဖတ်ပြည်သူများအား ထုတ်ကုန်လုံခြုံစိတ်ချရမှု ရှိစေရေး စားသုံးသူကာကွယ်ရေး အသိပညာပေးဟောပြောခဲ့ပါသည်။

          အဆိုပါ ဟောပြောပွဲတွင မြို့နယ်တာဝန်ခံမှ စားသောက်ကုန်/လူသုံးကုန်နှင့် ထုတ်လုပ်ရာတွင် စားသုံးသူများ ဘေးအန္တရာယ်ကင်းရှင်းစွာ သုံးစွဲနိုင်ရေးအတွက် စားသုံးသူကာကွယ်ရေး ဥပဒေ အခန်း (၁၈)ပါ ပုဒ်မ(၄၁)အရ ထားသို သိမ်းဆည်းမှု၊ သက်တမ်းကုန်ဆုံးရက်၊  ထုတ်လုပ်ရက်စွဲ၊ အလေးချိန်/ဂရမ် စသည့် ညွန်းကြားချက်များကို တိတိကျကျ ဖော်ပြရန် လိုအပ်ကြောင်းနှင့်  ပုဒ်မ (၄၃)အရ  မြန်မာဘာသာဖြင့် ဖြစ်စေ၊ အခြားဘာသာတစ်ခုထက်ပို၍ တွဲလျက်ဖြစ်စေ၊  ဖော်ပြထားရှိမှသာ စားသုံးသူများ ဘေးအန္တရာယ်ကင်းရှင်းစွာ ရွေးချယ်ဝယ်ယူသုံးစွဲနိုင်မည် ဖြစ်ကြောင်းနှင့် စားသုံးသူများအနေဖြင့် ကုန်စည်/ဝန်ဆောင်မှုကြောင့် နစ်နာမှု ဖြစ်လာပါက တိုင်းကြားနိုင်ကြောင်းနှင့် တိုင်ကြားမှု ပုံစံ များအား အသိပညာပေး ဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)