သတင်းနှင့် လှုပ်ရှားမှုများ

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆန်စက်များ၊ ဆန်စပါးများ ကြိတ်ခွဲထုတ်လုပ်နေမှုအခြေအနေနှင့် စပါးဝယ်ယူနေမှုအခြေအနေတို့ကို မေလ (၁၀)ရက်နေ့၊ နံနက် (၀၈:၀၀)နာရီအချိန်တွင် မြို့နယ် အဆင့်ဌာနဆိုင်ရာများ ပူးပေါင်း ၍ ကွင်းဆင်းစစ်ဆေးခဲ့ကြောင်း သိရသည်။

    ထိုသို့ ကွင်းဆင်းစစ်ဆေးခဲ့ရာတွင် မြို့နယ်စီမံအုပ်ချုပ်ရေးအဖွဲ့မှ အဖွဲ့ဝင်(၂) ဦးမြင့်ဦး၊ မြို့နယ်အထွေထွေ အုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးစည်သူ၊ မြို့နယ် စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးသက်နိုင်၊ မြို့နယ်ကျေးလက်ဖွံ့ဖြိုးရေးဦးစီးဌာနမှ ဦးစီးအရာရှိ ဦးကျော်ညီညီထွန်း၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်း၍ ကော့မှူး  မြို့နယ် ဝါးဘလောက်သောက်ကျေးရွာရှိ ဦးအောင်ဇေယျာဝင်းဆန်စက်အား သွားရောက်တွေ့ဆုံပြီး ဆန်စက်များ၊ ဆန်စပါးများကြိတ်ခွဲ ထုတ်လုပ်နေမှု အခြေအနေနှင့် စပါးဝယ်ယူနေမှု အခြေအနေတို့ အား စုံစမ်းမေးမြန်း စစ်ဆေးခဲ့ပြီး ဆန်စက်သိုလှောင်ရုံ ပိုင်ရှင်များအား ဈေးကစားရန် ရည်ရွယ်၍ သိုလှောင်ထားခြင်းများ မပြုလုပ်ကြရန်၊ ၎င်းဆန်စက်များတွင် စပါးဝယ်ယူကြိတ်ခွဲ ထုတ်လုပ်ဖြန့် ဖြူးရောင်းချလျက်ရှိသော စပါးဝယ်ကုန်သည်များ အနေဖြင့်လည်း ဆန်နှင့်ဆန်ထွက်ပစ္စည်းများ ဈေးကွက်အတွင်း ပြန်လည်ဖြန့်ဖြူးရောင်းချနေရသော ဈေးနှုန်းများပေါ်မူတည်ပြီး စပါးစိုက်တောင် သူများထံမှ ပုံမှန်ဝယ်ယူလျက်ရှိပြီး ဈေးကွက်အတွင်း သတ်မှတ်ထားသော ဆန်အမျိုးအစားအလိုက် ရည်ညွှန်းဈေးအား မကျော်လွန်ဘဲ စားသုံးသူပြည်သူများထံ ဖြန့်ဖြူးရောင်းချပေးလျက်ရှိကြောင်း သိရသည်။

DOCA(ရန်ကုန်)

     ပဲခူးတိုင်းဒေသကြီး နတ်တလင်းခရိုင် နတ်တလင်းမြို့နယ်တွင် သောက်ရေသန့် ရောင်းချနေသော လီတာသောက်ရေသန့်လုပ်ငန်းရှင်နှင့် တွေ့ဆုံပြီး မိမိတို့သောက်ရေသန့်လုပ်ငန်းမှ ထုတ်လုပ်သော လီတာသောက်ရေသန့် (၁-လီတာ)နှင့် (၂၀-လီတာ)ထုတ်လုပ်မှုအား နတ်တလင်းမြို့နယ် တာဝန်ခံရုံး စားသုံးသူရေးရာဦးစီးဌာနမှ ဝန်ထမ်းများသည်  ဧပြီလ စတုတ္တပတ်တွင် ဈေးကွက်စောင့်ကြည့် ကွင်းဆင်းစစ်ဆေးမှု ဆောင်ရွက်ခဲ့ပါသည်။

     အဆိုပါ သောက်ရေသန့်ကို “လီတာ”သောက်ရေသန့် အမှတ်တံဆိပ်ဖြင့်  ထုတ်လုပ်ဖြန့်ဖြူး ရောင်းချလျှက်ရှိပြီး  (၁-လီတာ)နှင့် (၂၀-လီတာ) သောက်ရေသန့်များအား  ၁-လလျှင် (၂၀-လီတာဗူး ၉၅၀ခန့်နှင့် ၁-လီတာဗူး- ၆လုံးကဒ် ၆၀၀ကဒ်) ထုတ်လုပ်နိုင်၍ (၂၀-လီတာ)တဗူးလျှင် (၅၀၀ကျပ်)၊ (၁-လီတာ)၆-လုံး ၁-ကဒ်လျှင် (၂၅၀၀-ကျပ်) ဖြန့်ဖြူးရောင်းချလျှက်ရှိပြီး မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါ ကုန်စည်များ၏ ကုန်အညွှန်းအမှတ်အသားများကို မြန်မာဘာသာဖြင့် ဖော်ပြရန် ညွှန်ကြားချက်အရ ကိုက်ညီမှုရှိပါကြောင်းနှင့် အခြားသက်ဆိုင်ရာ ဌာနများ၏ ဥပဒေ၊ နည်းဥပဒေ၊ လုပ်ထုံးလုပ် နည်းများကိုလည်း လိုက်နာဆောင်ရွက်သွားရန် ဈေးကွက်စောင့်ကြည့် ကွင်းဆင်းစစ်ဆေး ဆောင်ရွက်ခဲ့ကြောင်းသိရှိရသည်။ 

DOCA(ပဲခူး)

    စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန ရုံးချုပ်၏ ညွှန်ကြားချက်နှင့်အတူ စစ်ကိုင်းတိုင်းဒေသကြီး စားသုံးသူရေးရာဦးစီးဌာန ဦးစီးအရာရှိ ဦးဆောင်၍ ဝန်ထမ်းများသည် တိုင်းဒေသကြီးအသေးစားစက်မှုလက်မှုလုပ်ငန်းဉီးစီးဌာနမှဖွင့်လှစ်သည့် “အချိုရည် နှင့် ယိုမျိုးစုံ၊ သစ်သီးဝိုင်မျိုးစုံ ထုတ်လုပ်မှုနည်းပညာသင်တန်းတွင် စားသုံးသူကာကွယ်ရေး အသိပညာပေးဟောပြောပွဲ ကျင်းပဆောင်ရွက်ခဲ့ရာ သင်တန်းသူစုစုပေါင်း (၂၀)ဦး တက်ရောက် ခဲ့ကြောင်း သိရှိရပါသည်။

   အဆိုပါ ဟောပြောပွဲတွင် စစ်ကိုင်းတိုင်းဒေသကြီးစားသုံးသူရေးရာဦးစီးဌာနမှ ဦးစီးအရာရှိ ဒေါ်အေးမြင့်ငြိမ်းက စီးပွားရေးနှင့်ကူသန်းရောင်းဝယ်ရေးဝန်ကြီးဌာန၏ ဖွဲ့စည်းဆောင်ရွက်မှုများ အကြောင်း၊ ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များနှင့်စပ်လျဉ်း၍ ကုန်စည်များတွင် မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရာတွင် စီးပွားရေးလုပ်ငန်းရှင်များ လိုက်နာရဆောင်ရွက်ရမည့်အချက်များ၊ ကုန်စည် အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ်အချက် အလက်များ၊  စားသုံးသူရေးရာဦးစီးဌာနတွင် တိုင်ကြားနိုင်သည့်နည်းလမ်းများ၊ ဌာနမှဖြေရှင်း ဆောင်ရွက်နေမှု အခြေအနေများ၊ Online Sale မှတ်ပုံတင်ခြင်းအကြောင်းနှင့်  Consumer Call Center 1535 သို့ ခေါ်ဆိုမေးမြန်း တိုင်ကြားနိုင်ကြောင်းအသိပညာပေးခဲ့ပြီး သင်တန်းသူ ၂ ဉီးအား လိုင်းခွဲ (၁) နှင့် (၂) များသို့ လက်တွေ့ ခေါ်ဆိုမေးမြန်းစေခဲ့ကြောင်း၊ ဆက်လက်၍ လုပ်ငန်းရှင်များအနေဖြင့် ကုန်စည်နှင့်ဝန်ဆောင်မှုများကို အွန်လိုင်းစနစ်အသုံးပြုပြီး ရောင်းချမည်ဆိုပါက မဖြစ်မနေ အွန်လိုင်း စနစ်ဖြင့် မှတ်ပုံတင်ပြီးမှသာရောင်းချရန်၊ မှတ်ပုံတင်ထားခြင်းမရှိဘဲ ရောင်းချမည်ဆိုပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူခံရမည်ဖြစ်ကြောင်း၊ တက်ရောက်လာသူများမှ သိလိုသည် များကို ရှင်းလင်းဖြေကြားပြီး အသိပညာပေး လက်ကမ်းစာဆောင်များ ဖြန့်ဝေပေးခဲ့ကြောင်း သတင်း ရရှိပါသည်။

DOCA(စစ်ကိုင်း)       

    ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်ရှိ ဆောက်လုပ်ရေးသုံးပစ္စည်း အရောင်းဆိုင်များအား ဘိလပ်မြေ ပြတ်လပ်မှုရှိ/မရှိနှင့် ဈေးနှုန်းမြှင့်တင် ရောင်းချခြင်းရှိ/မရှိ အခြေ အနေအား မေလ(၉)ရက်နေ့၊ နံနက်(၀၉:၀၀)နာရီအချိန်တွင် ကွင်းဆင်းစစ်ဆေးခဲ့ကြောင်း သိရ သည်။

    ထိုသို့ ဆောက်လုပ်ရေးသုံးပစ္စည်း အရောင်းဆိုင်များအား ကွင်းဆင်းစစ်ဆေးခဲ့ရာတွင် မြို့နယ်အထွေထွေ အုပ်ချုပ်ရေးဦးစီးဌာနမှ ဒုတိယမြို့နယ် အုပ်ချုပ်ရေးမှူး ဦးဝေဖြိုးလင်း၊ တွံတေးမြို့မ ရဲစခန်းမှူး အောင်မျိုးနိုင်၊ မြို့နယ်စည်ပင်သာယာရေးအဖွဲ့မှ ဈေးတာဝန်ခံ  ဦးဉာဏ် လင်းထက်နှင့် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးအာကာမင်းတို့ ပါဝင်သော ပူးပေါင်းအဖွဲ့ဖြင့် တွံတေးမြို့နယ် ကန်ဘဲ့ကျေးရွာရှိ သစ္စာအိမ်  အိမ်ဆောက်ပစ္စည်း အရောင်းဆိုင်သို့ ဘိလပ်မြေများ ပြတ်လပ်မှုရှိ/မရှိ၊ ဝယ်ယူရရှိမှု အခြေအနေနှင့်ဖြင့် ဖြန့်ဖြူးရောင်းချနေမှုအပြင် ဈေးနှုန်းမြှင့်တင် ရောင်းချနေခြင်းရှိ/မရှိအခြေအနေတို့အား လုပ်ငန်းရှင်များနှင့် တွေ့ဆုံ၍ မေးမြန်း စစ်ဆေးခဲ့ပြီး၊ ဘိလပ်မြေများအား ဈေးကစားရန် ရည်ရွယ်ချက်ဖြင့် သိုလှောင်ထားခြင်း၊ ဈေးနှုန်း အဆမတန် မြှင့်တင်ရောင်းချခြင်းများ မပြုလုပ်ကြရန် အသိပညာပေး ဆွေးနွေးခဲ့ပြီး ဈေးကွက် အတွင်း ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)

   ရန်ကုန်တိုင်းဒေသကြီး၊ သန်လျင်ခရိုင်၊ ကျောက်တန်းမြို့နယ် စည်ပင်သာယာမြို့မဈေး အတွင်း/အပြင်ရှိ ဆန်ဆိုင်များအား ဈေးနှုန်းမြှင့်တင်ရောင်းချခြင်း မဖြစ်ပေါ်စေရေးနှင့် စားသုံးသူ ရေးရာဦးစီးဌာနမှ လစဉ်ထုတ်ပြန်သည့် သတ်မှတ်ရည်ညွှန်းဈေးအတိုင်း ရောင်းချခြင်းရှိ/မရှိ ကွင်းဆင်းစစ်ဆေးခြင်းအား (၂၀၂၅)ခုနှစ် မေလ(၉)ရက်နေ့၊ ညနေ (၁၆:၀၀)နာရီအချိန်တွင် ကျောက်တန်းမြို့နယ်၊ မြို့နယ်အုပ်ချုပ်ရေးမှူး ဦးဆောင်သောအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရှိရသည်။

     အဆိုပါ ကွင်းဆင်းစစ်ဆေးမှုတွင် ကျောက်တန်းမြို့နယ်အတွင်းရှိ မြို့နယ်အထွေထွေ အုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူးနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိနှင့် ဝန်ထမ်းများ၊ မြို့နယ်ရဲတပ်ဖွဲ့မှူးနှင့်အတူ စားသုံးသူရေးရာဦးစီးဌာန တောင်ပိုင်းခရိုင်ဦးစီးမှူးရုံး (သန်လျင်မြို့)မှ ဒေါ်ငြိမ်းငြိမ်းဝင်း (ဦးစီးမှူး)တို့ ပူးပေါင်းအဖွဲ့သည် ကျောက်တန်းမြို့နယ် စည်ပင်သာယာမြို့မဈေးအတွင်း/အပြင်ရှိ ဆန်ဆိုင်များသို့ သွားရောက်ကာ ဆန်များအား ဈေးနှုန်းမြှင့်တင် ရောင်းချခြင်းမရှိစေရေး၊ ဆန်ဈေးကွက်အတွင်း ဈေးနှုန်းတည်ငြိမ် မှန်ကန်စေရေးတို့အတွက် စားသုံးသူရေးရာဦးစီးဌာနမှ ဆန်ဈေးနှုန်းများအား သင့်တင့်မျှတသော ဈေးနှုန်းဖြင့် လစဉ်ထုတ်ပေးလျက်ရှိရာ အဆိုပါ သတ်မှတ်ရည်ညွှန်းဈေးများအတိုင်း ဈေးကွက်အတွင်း ရောင်းချခြင်းရှိ/မရှိ ကွင်းဆင်းစစ်ဆေးပြီး သတ်မှတ်ရည်ညွှန်းဈေးအတိုင်း ရောင်းချခြင်းမရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက် သွားမည်ဖြစ်ပါ ကြောင်း ဆန်ဆိုင်ပိုင်ရှင်များအား ပြောကြားခဲ့ပြီး ကွင်းဆင်းစစ်ဆေးခဲ့ကြောင်း သိရှိရသည်။

DOCA(ရန်ကုန်)