သတင်းနှင့် လှုပ်ရှားမှုများ

   စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးဝင်းသိန်းဦး (ရုံးအုပ်)သည် ၁၆.၁၀.၂၀၂၅ ရက်နေ့ (၀၉:၀၀) အချိန်တွင် မိုးညှင်းမြို့ရှိ သောက်ရေသန့်လုပ်ငန်းရှင်များအသင်းအဖွဲ့အား မိုးညှင်း ခရိုင်ဦးစီးမှူးရုံး၌ တွေ့ဆုံ၍  အသိပညာပေးဟောပြောပွဲ ပြုလုပ်ဆောင်ရွက်ခဲ့ ပါသည်။

          ထိုသို့ ဟောပြောရာတွင် စားသုံးသူ၊ အွန်လိုင်းစနစ်ဖြင့် ရောင်းချခြင်း လုပ်ငန်း၏ အမည်နှင့် အဓိပ္ပာယ်ဖွင့်ဆိုချက်၊ စားသုံးသူအခွင့်အရေးနှင့် တာဝန်များ၊ စီးပွားရေး လုပ်ငန်းရှင်၏ တာဝန်များ၊ အွန်လိုင်းမှ ဈေးဝယ်ယူခြင်း၏ အားသာချက်၊ အားနည်းချက်၊အွန်လိုင်းမှလိမ်လည်မှုပုံစံ(၂) မျိုး၊ အွန်လိုင်း ရောင်းချမှု လုပ်ငန်းများနှင့် စပ်လျဉ်း၍ စိစစ်သင့်သည့်အချက်များ၊ ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ စားသုံးသူများ စိစစ်သင့်သည့် အချက်အလက်များ စီးပွားရေးနှင့်ကူးသန်း ရောင်းဝယ်ရေး ဝန်ကြီးဌာန၏ အမိန့်ကြော်ငြာစာအမှတ် ၅၀/၂၀၂၃ အရ အွန်လိုင်းစနစ်ဖြင့် ရောင်းချခြင်း လုပ်ငန်းကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်ထားရှိမှု အခြေအနေ၊ အွန်လိုင်း စနစ်ဖြင့် ရောင်းချခြင်း လုပ်ငန်းမှတ်ပုံတင်ခြင်းဆိုင်ရာ အမိန့်ကြော်ငြာစာအမှတ် ၅၁/၂၀၂၃ အား လိုက်နာ ဆောင်ရွက်ရန်၊ ကုန်သွယ်ရေးဦးစီးဌာန၏ eComReg System ၏ Report နှင့် ပတ်သက်သည့် အသုံးပြုရန်နည်းလမ်းများ၊ တရားမဝင်တင်သွင်းလာသည့် ကုန်ပစ္စည်းများအား အွန်လိုင်းစနစ်ဖြင့် ရောင်းချခြင်းလုပ်ငန်းများ ဆောင်ရွက်ခြင်းမပြုရန်၊ စားသုံးသူကာကွယ်ရေးဥပဒေပါ ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ ပြည့်စုံစွာ ဖော်ပြထားသော ကုန်စည်များကိုသာ ဝယ်ယူ ရောင်းချခြင်းပြုရန်၊ အရေးကြီးကုန်စည်နှင့် ဝန်ဆောင်မှုဥပဒေပါ ပြစ်မှုပြစ်ဒဏ်များအကြောင်းနှင့် တက်ရောက်လာသော သောက်ရေသန့်လုပ်ငန်းရှင်များ အသင်းအဖွဲ့အား 1535 Consumer Call Center လိုင်းခွဲ (1) သို့ လက်တွေ့ခေါ်ဆို၍ တိုင်ကြားရမည့် နည်းလမ်းအား အသိပညာပေး ဆွေးနွေးခဲ့ပါ သည်။   

DOCA(ကချင်)                        

         ၁၄.၁၀.၂၀၂၅ ရက်နေ့တွင် နံနက်(၁၀:၀၀) အချိန်တွင် အလုံမြို့နယ် City Mart ၊ လှိုင်မြို့နယ် Yangon Baby နှင့် မရမ်းကုန်းမြို့နယ် 9 မိုင် Ocean တို့တွင်ရောင်းချလျှက်ရှိသော ကလေးအဟာရ ဖြည့်စွက်စာအမျိုးမျိုးတို့တွင် ကုန်အညွှန်းအမှတ်အသားများ ပြည့်စုံစွာပါဝင်ခြင်းရှိ/မရှိအား ကွင်း ဆင်းစစ်ဆေးခြင်းများကို အနောက်ပိုင်းခရိုင်ဦးစီးမှူးရုံးမှ စစ်ဆေးရေးမှူး ဒေါ်မြတ်မွန်(ဒု-ကြီးကြပ် ရေးမှူး) မှ ဦးဆောင်၍ ဝန်ထမ်း(၂) ဦးနှင့်တို့မှ ပါဝင်စစ်ဆေးခဲ့ကြပါသည်။

          ထိုသို့ကွင်းဆင်းစစ်ဆေးရာတွင် ကမာရွတ်မြို့နယ် လှည်းတန်း အလုံမြို့နယ် City Mart ၊ လှိုင်မြို့နယ် Yangon Baby နှင့် မရမ်းကုန်းမြို့နယ် 9 မိုင် Ocean တို့တွင် ကလေးအဟာရဖြည့်စွက်စာ များဖြစ်သော Gaullac(ဖော်စပ်စာ)၊ Dugro(ဖော်စပ်စာ)၊ DG-1 (ဆိတ်နို့ဖော်စပ်စာ)၊ Golden Cow (အဟာရမှုန့်၊ Gold Power(အရဟာမှုန့်)၊ Kendamil(ဖော်စပ်စာ)၊ မာဆုရ(ဂျပန်ကလေးအဟာရ ဖြည့်စွက်စာ)၊ PO PO (ဖြည့်စွက်စာ) တို့တွင်  ကုန်ညွှန်းအမှတ်အသားများပြည့်စုံစွာပါဝင်မှုရှိ/မရှိ ကွင်းဆင်းစစ်ဆေးခဲ့ရာ  ၎င်းကလေး အဟာရများတွင် ကုန်ညွှန်းအမှတ်အသားများပြည့်စုံစွာ ပါဝင်မှု ရှိကြောင်းသိရှိရပါသည်။ ကလေးငယ်များအတွက် အဟာရဖြည့်စွက်စာများတွင် ကလေးငယ်များ ဘေးဥပါဒ်မဖြစ်စေရန်  ထုတ်လုပ်သည့်ရက်စွဲ၊ သက်တမ်း ကုန်ဆုံးသည့်ရက်စွဲ၊   ထားသိုသိမ်းဆည်းမှု၊ ဓာတ်မတည့် ကြောင်းဖော်ပြချက်၊ ပါဝင်ပစ္စည်း၊ ကြိုတင်သတိပေးချက်စသည့် ကုန်ညွှန်းအမှတ်အသားများအား မြန်မာဘာသာဖြင့် ပြည့်စုံစွာထည့်သွင်းရန် လိုအပ်ကြောင်း အသိပညာပေး ဆောင်ရွက် ခဲ့ကြောင်းသိရှိရပါသည်။

DOCA (ရန်ကုန်)

  ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးတွင် (၁၃.၁၀.၂၀၂၅) ရက်နေ့၊ နံနက် (၁၀:၀၀)နာရီအချိန်တွင် ပြည်ခရိုင်ဦးစီးမှူးမှ ဆန်စက်လုပ်ငန်းရှင်၊ ဆန်စပါးကုန်သည်များနှင့် ပူးပေါင်း၍ Myro ကိစ္စရပ်များနှင့် ပတ်သက်ပြီး အစည်းအဝေးကျင်းပ ပြုလုပ်ခဲ့ရာ လုပ်ငန်းရှင် စုစုပေါင်း (၄၆)ဦးတက်ရောက်ခဲ့ကြောင်းသိရသည်။

          အဆိုပါ အစည်းအဝေးတွင် ပြည်ခရိုင်ဦးစီးမှူးက Myro တွင် မှတ်ပုံမတင်ရသေးသောသူများ မှတ်ပုံတင်နိုင်ရေး၊ မှတ်ပုံတင်ပြီးပါက သက်တမ်းတိုးနိုင်ရေး၊ လစဉ် လဆန်း (၁)ရက်နေ့မှ (၇)ရက်နေ့အတွင်း ကုန်ရ၊ ကုန်ထုတ်၊ ကုန်လက်ကျန်များ မပျက်မကွက် ထည့်သွင်းပေးရန်နှင့် လိုက်နာမှု မရှိပါက စီမံခန့်ခွဲရေးနည်းလမ်းအရ အရေးယူမှုများဆောင်ရွက်သွားရန် ဌာနမှ လမ်းညွှန် မှုများရှိသဖြင့် လိုက်နာဆောင်ရွက်ရန်လိုအပ်ပါကြောင်းနှင့် ဆောင်ရွက်ရာတွင် အခက်အခဲရှိပါက မိမိတို့ရုံးသို့ လာရောက်အကူအညီတောင်းနိုင်ပါကြောင်း ရှင်းလင်းဆွေးနွေးခဲ့ပါသည်။

DOCA(ပဲခူး)

      ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်တွင် Online Sale ရောင်းချခြင်းနှင့် စပ်လျဉ်း၍ Online Sale ရောင်းချသည့်လုပ်ငန်းရှင်များနှင့်တွေ့ဆုံ၍ စားသုံးသူရေးရာဦးစီးဌာနမှ စစ်ဆေးရေးအရာရှိ ဦးသန်းနိုင်နှင့်ဝန်ထမ်းများသည် အောက်တိုဘာလ(၁၅)ရက်နေ့၊ နံနက် (၁၀:၀၀)နာရီအချိန်တွင် အသိပညာပေးလုပ်ငန်းများ ကွင်းဆင်းစစ်ဆောင်ရွက်ခဲ့ကြောင်း သိရ သည်။

   ထိုသို့ ကွင်းဆင်းစစ်ဆေးရာတွင် စစ်ဆေးရေးအရာရှိမှ လုပ်ငန်းရှင်များအား Online စနစ်ဖြင့် ရောင်းချခြင်းလုပ်ငန်းများနှင့် စပ်လျဉ်း၍ မြေပြင်ကွင်းဆင်းစစ်ဆေးရမည့် အချက်(၁၈) ချက်နှင့် ကိုက်ညီမှုရှိ/မရှိ၊ မှတ်ပုံတင်လျှောက်ထားစဉ်က တင်ပြထားသည့် လုပ်ငန်းတည်ရှိရာ လိပ်စာတွင် ရောင်းချခြင်းရှိ/မရှိ စစ်ဆေးခြင်း၊ မှတ်ပုံတင်လက်မှတ်ရရှိသူ၏ တာဝန်များနှင့် စပ်လျဉ်း၍ လိုက်နာဆောင်ရွက် ရမည့်အချက်များအကြောင်း၊ အွန်လိုင်းစနစ်ဖြင့် ရောင်းချသည့် လုပ်ငန်းဆိုင်ရာအမိန့်ကြော်ငြာ စာအမှတ်(၅၁/၂၀၂၃)အား ရှင်းလင်းဆွေးနွေးခြင်း၊ စားသုံးသူ ကာကွယ်ရေး ဥပဒေပါ စီးပွားရေးလုပ်ငန်းရှင်တာဝန်များ၊ ကုန်အညွှန်းအမှတ်အသား ဆိုင်ရာ ဖော်ပြရမည့်အချက်အလက်များအကြောင်း၊ ကုန်အညွှန်းအမှတ်အသားပြည့်စုံစွာ မပါရှိသည့် ပစ္စည်းများအား ရောင်းချခြင်းမပြုလုပ်ကြရန်၊ eComReg System တွင်2FAစနစ် အသုံးပြုထား မှုနှင့် စပ်လျဉ်း၍ အသိပညာပေးခြင်း၊ အွန်လိုင်းစနစ်ဖြင့်ရောင်းချခြင်း လုပ်ငန်းသည် အရေးကြီး ကုန်စည်နှင့်ဝန်ဆောင်မှုဥပဒေဖြစ် သတ်မှတ်ထားကြောင်းနှင့် အခြားသိကောင်းစရာများ အသိပညာပေး ရှင်းလင်းဆွေးနွေး အသိပညာပေး ပြောကြားခဲ့ကြောင်း သိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ် စည်ပင်သာယာမြို့မဈေးနှင့် ရပ်ကွက်အတွင်းရှိ ကလေးအာဟာရဖြည့်စွက်စာအမျိုးမျိုး ရောင်းချသောဆေးဆိုင်များသို့ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် ကလေး အာဟာရဖြည့်စွက်စာအမျိုးမျိုးတွင် ကုန်အညွှန်းအမှတ်အသားများ ပြည့်စုံစွာဖော်ပြထားခြင်းရှိ/ မရှိ ဈေးကွက်စောင့်ကြည့်စစ်ဆေးခြင်းအား အောက်တိုဘာလ(၁၄)ရက်နေ့၊ နံနက်(၀၉:၃၀)နာရီ အချိန်တွင် စားသုံးသူရေးရာဦးစီးဌာနနှင့် မြို့နယ်စည်ပင်သာယာရေးအဖွဲ့တို့ ပူးပေါင်း၍ ကွင်းဆင်းစစ်ဆေးခဲ့ကြောင်း သိရသည်။

ထိုသို့ ကွင်းဆင်းစစ်ဆေးရာတွင် တွံတေးမြို့နယ်စည်ပင်သာယာမြို့မဈေးနှင့် ရပ်ကွက် များရှိ ဆေးဆိုင်များတွင် ကလေးအာဟာရဖြည့်စွက်စာအမျိုးမျိုးဖြစ်သော Dumex Dupro ကလေးငယ်ဖော်စပ်စာ၊ Gold Power ကလေးဖြည့်စွက်အာဟာရမှုန့်၊ Lactogen ကလေးငယ် အတွက်ဖော်စပ်စာများ ရောင်းချလျက်ရှိသည့် ကလေးအာဟာရဖြည့်စွက်စာအမျိုးမျိုးတွင် စားသုံးသူကာကွယ်ရေးဥပဒေပြဌာန်းချက်များနှင့်အညီ ကုန်အညွှန်းအမှတ်အသားများအား မြန်မာဘာသာဖြင့်သော်လည်းကောင်း၊ မြန်မာဘာသာနှင့်အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ဖော်ပြထားခြင်းရှိ/မရှိ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

DOCA(ရန်ကုန်)